Wen, Masarakanyo ti Kinaragsak

NARIGAT a masarakan no dadduma ti pudno, manayon a kinaragsak. Ti maysa a kangrunaan a makagapu ket saan nga umiso ti pangbirbirokan ti adu a tattao iti dayta. No addaanda la koma iti mapagtalkan ken kualipikado a gayyem a mangisuro kadakuada iti umiso a direksion!

Ti Biblia isu ti gubuayan dayta a napateg a direksion. Usigenyo ti maysa laeng kadagiti librona​—ti Salmo. Daytoy a libro ket buklen ti 150 a sagrado a kanta a naidedikar ken ni Jehova a Dios, nga agarup kagudua kadagita ti pinutar ni David nga ari ti nagkauna nga Israel. Nupay kasta, ti adayo a napatpateg ngem ti panangammo iti kinasiasino ti mannurat ket ti panangammo a naisurat daytoy a libro babaen ti panangipaltiing ni Jehova, ti katan-okan a Gayyem ti tao. Masiguradotayo ngarud a naglaon dayta iti panangiwanwan ti Dios nga agpaay iti pagimbagantayo ken isurona no kasano a masarakantayo ti kinaragsak.

Dagiti mannurat ti Salmo masiguradoda a ti kinaragsak ti maysa a tao ket maigapu iti nasayaat a relasionna iti Dios. “Naragsak ti tao nga agbuteng ken Jehova,” insurat ti salmista. (Salmo 112:1) Awan ti aniaman a relasion iti pada a tao, material nga ik-ikutan, ken personal a gapuanan a makaipaay iti kinaragsak nga itden ti panagbalin a paset “ti ili a ti Diosna isu ni Jehova.” (Salmo 144:15) Patalgedan dayta ti biag ti adu nga agdama nga adipen ti Dios.

Ti maysa a pagarigan ket ni Susanne, nga agtawen iti nasurok la bassit nga 40.a Kinunana: “Ita, adu a tattao ti makipaset kadagiti grupo a kapadada ti kalat wenno pakaseknan. Ngem manmano laeng ti ibilangda a gayyem iti dayta a grupo. Saan a kasta dagiti adipen ni Jehova. Agpipinnategtayo gapu iti panagayattayo ken ni Jehova. Iti ili ni Jehova, mariknatayo ti panagkakabsat sadinoman ti ayantayo. Ad-adda a naragsak ti biagtayo gapu iti kasta a panagkaykaysa. Siasino pay koma ti makaibaga nga isu ket addaan iti gagayyem manipud iti naiduma unay a kagimongan ken nalikudan ken nagadu a nasion? Naimpusuan a maibagak a ti kinaragsak ket aggubuay iti panagbalin a kameng ti ili ni Jehova.”

Ni Maree, a nayanak idiay Scotland, nasursurona met a napateg ti maaddaan iti nasayaat a relasion ken ni Jehova tapno maaddaan iti kinaragsak. “Sakbay a naammuak ti kinapudno iti Biblia,” insalaysayna, “magusgustuak dagiti makaaliaw a pelikula. Ngem iti rabii, saanak a makaturog no awan ti iggemko a krus nga ipagarupko a mangpatalaw kadagiti al-alia ken bampira, a kanayonko a mabuybuya kadagiti pelikula. Ngem idi naammuak ti kinapudno ken insardengko ti panagbuya kadagiti kasta a pelikula, ti relasionko ken ni Jehova ti nangted kaniak iti nasimbeng a turog, ket naragsakak ta agserserbiak iti maysa a Dios a nabilbileg ngem kadagiti demonio wenno bampira a parnuay ti imahinasion.”

Ti Panagtalek ken ni Jehova Mangyeg iti Kinaragsak

Awan ti makagapu tapno pagduaduaantayo a mannakabalin-amin ken awan pagpatinggaan ti sirib ti Namarsua. Gapu ta ammona a mabalinna ti naan-anay nga agtalek ken agkamang ken ni Jehova, insurat ni David: “Naragsak ti nabaneg a lalaki a nangisaad ken Jehova kas talekna.”​—Salmo 40:4.

Kinuna ni Maria: “Maibatay kadagiti kapadasak idiay Espania ken iti dadduma pay a lugar, mangyeg iti kasayaatan a resulta ti panangaramid kadagiti bambanag sigun iti pamay-an ni Jehova, uray pay no maisupadi iti dayta ti kayattayo. Mangyeg dayta iti kinaragsak agsipud ta kanayon a kasayaatan ti pamay-an ni Jehova.”

Ni Andreas, maysa a Kristiano a panglakayen a nagserbi iti sumagmamano a pagilian iti Europa, ammona sigun iti personal a kapadasanna a mapagtalkantayo ni Jehova. Kinunana: “Ni manongko a saan a kapammatian sibibileg nga inimpluensiaannak bayat ti kinaagtutubok, a pinaregtanak a mangragpat iti propesion a mangpabaknang kaniak. Nagkaro ti pannakaupayna idi simrekak iti amin-tiempo a ministerio ken diak nagpannuray iti ibagbagada a kinatalged nga itden dagiti sekular a pension plan. Bayat ti amin-tiempo a serbisiok, saanak a nabaybay-an, ken natagiragsakko dagiti bendision nga ar-arapaapen laeng ti dadduma.”

Idi 1993, naawis ni Felix a tumulong iti panangpalawa iti pasilidad ti sanga nga opisina dagiti Saksi ni Jehova idiay Selters, Alemania. Apaman a naileppas ti trabaho, naawis ni Felix nga agbalin a permanente a kameng ti pamilia ti Bethel sadiay. Ania ti reaksionna? “Inawatko ti imbitasion buyogen ti panagduadua. Ngem nasurok a sangapulo a tawenen nga addaak ditoy, ket kombinsidoak a sinungbatan ni Jehova dagiti kararagko. Ammona no ania ti kasayaatan para kaniak. Babaen ti naan-anay a panagtalek ken panagpaiwanwan kenkuana, inikkak ni Jehova iti gundaway tapno ipakitana no ania ti kayatna nga aramidek.”

Ni Susanne, a nadakamat itay, tarigagayanna ti agserbi kas amin-tiempo a ministro, maysa a payunir, ngem marigatan nga agsapul iti paset-tiempo a trabaho. Kalpasan ti makatawen a panagurayna iti kasta a trabaho, nagtignay buyogen ti panagtalek ken ni Jehova. Insalaysayna: “Nagaplikarak nga agbalin a regular pioneer. Nakaurnongak iti umdas a gastosek iti agarup makabulan. Ket anian ta nakaragragsak dayta a bulan! Ti ministeriok ket gubuayan ti nagpaiduma a rag-o, nupay saanak a naawat iti trabaho kalpasan ti adu nga interbiu. Nupay kasta, dinak binaybay-an ni Jehova kas inkarina. Iti maudi nga aldaw ti bulan, naaddaanak iti trabaho. Ammok itan a talaga a mapagtalkak ni Jehova! Daytoy a damo a kapadasan iti amin-tiempo a panagserbik ket nakatulong tapno maaddaanak iti makagunggona ken naragsak a biag.”

Ti Panangipangag iti Nadiosan a Balakad Mangnayon iti Kinaragsak

Nakaaramid ni Ari David kadagiti serioso a basol. Adda dagiti gundaway a kasapulanna ti nainsiriban a balakad. Sidadaantayo kadi nga agpabalakad ken agpaisuro kas ken ni David?

Ti taga-Francia a ni Aida naamirisna ti serioso a kamali a naaramidanna. Kinunana: “Ti kangrunaan a pakaseknak isu ti panangisublik iti relasionko ken ni Jehova. Awanen ti sabali.” Nagpatulong kadagiti Kristiano a panglakayen. Nasuroken a 14 a tawen nga agserserbi kas amin-tiempo a ministro, ket ita kunana: “Anian a makapabang-ar a maammuan a pinakawannak ni Jehova!”

Maliklikantayo ti agbasol no manangipangagtayo iti nadiosan a balakad. Inlawlawag ni Judith: “Idi agtawenak iti 20, nagustuak ti maysa nga Aleman a kaduak iti negosio ken napinget nga agar-arem kaniak. Isu ket mararaem, naballigi iti propesionna, ngem kasadon! Nabigbigko a kasapulan nga agdesisionak: naan-anay a tallikudak ni Jehova wenno agtulnogak kadagiti lintegna. Inyumanko dayta kadagiti dadakkelko. Prangka a pinalagipannak ni tatangko maipapan iti namnamaen ni Jehova kaniak. Kinasaritanak iti nalapat, ket isu dayta ti kasapulak unay! Kaskasdi, pinadasko ti agsapul iti pambar. No mano a rabii iti adu a lawlawas a kinapatpatangnak ni Nanang maipapan iti kinapateg dagiti linteg ti Dios ken no kasano a mangispal iti biag dagita. Agyamyamanak unay ta in-inut a nayadani ti pusok ken ni Jehova. Gapu iti panangdisiplina ken panangisurona, nagun-odko ti nagpaiduma a kinaragsak​—ti adu a makagunggona a tawen iti amin-tiempo a ministerio ken ti maysa a nasayaat a Kristiano nga asawa a mangay-ayat kaniak ken mangay-ayat ken ni Jehova iti amin a puso.”

Nalawag, dagiti kasta a kapadasan patalgedanda ti kinapudno dagiti sasao ni David: “Naragsak daydiay a ti iyaalsana mapakawan, a ti basolna maabbongan. Naragsak ti tao nga iti kuentaanna saan a mangikabil ni Jehova iti biddut.”​—Salmo 32:1, 2.

Ti Kinaragsak nga Iyeg ti Panagbalin a Nakonsiderar

“Naragsak ti asinoman nga agtigtignay a buyogen ti konsiderasion iti daydiay nanumo,” insurat ni David. Intuloyna: “Iti aldaw ti didigra isu ilisinto ni Jehova. Isu saluadanto ni Jehova a mismo ket taginayonennanto a sibibiag. Isu maikunanto a naragsak.” (Salmo 41:1, 2) Ti naayat a konsiderasion nga impakita ni David ken ni Mefiboset, ti pilay nga anak ni Jonatan a dungdungnguen a gayyem ni David, ket maysa a pagarigan ti umiso a kababalin iti maysa a nanumo.​—2 Samuel 9:1-13.

Ni Marlies, maysa a misionera iti 47 a tawen, nakasabaanna dagiti tattao a kasapulan a pumanaw manipud kadagiti napeggad a lugar iti Africa, Asia, ken Makindaya a Europa. Kinunana: “Nagduduma ti parikutda ken kaaduanna a mariknada a saan ida a maakseptar ti komunidad, a kinapudnona, idumduma ida dagiti sabsabali. Kanayon a mangyeg iti kinaragsak ti panangtulong kadagiti kasta a tattao.”

Ni Marina, nga agtawen iti nasurok bassit nga 40, insuratna: “Kas awanan iti asawa, makaliwliwa kaniak ti pannakaammo nga adda gagayyemko a sidadaan a tumulong kaniak. Daytoy ti nangtignay kaniak a mangparegta met kadagiti tattao babaen ti telepono wenno surat. Adu ti nagyaman. Pakaragsakak ti tumulong kadagiti sabsabali.”

Kinuna ti agtawen iti 25 a ni Dimitar: “Agmaymaysa ni Nanang a nangpadakkel kaniak. Idi ubingak, maragsakanak ta ti manangaywan iti Panagadal iti Libro ti Kongregasion linawas nga ikuyognak tapno sanayennak a mangasaba. Agingga ita, agyamyamanak gapu iti kinapingetna. Ammok a siak ti kita ti tao a saan a nalaka a matignay.” Kas panagyamanna iti naitulong kenkuana, tumultulong ita ni Dimitar kadagiti sabsabali: “Maminsan kada bulan, ikagumaak ti mangikuyog iti maysa nga agtutubo wenno lakay iti panangasabak.”

Ti libro dagiti Salmo nangdakamat met kadagiti dadduma pay a banag a mangyeg iti kinaragsak. Ti maysa ket ti kinapateg ti panagpannuray saan nga iti bukod a pigsa no di ket iti pigsa ni Jehova: “Naragsak dagiti tattao a ti pigsada adda [ken ni Jehova].”​—Salmo 84:5.

Napaneknekan dayta ni Corinna. Immakar iti pagilian a dakdakkel ti panagkasapulan iti ministerio. “Nagbiagak iti baro a lenguahe, baro a kultura, ken baro a wagas ti panagpampanunot. Nariknak a kasla addaak iti sabali a planeta. Madandanaganak no panunotek ti mangasaba iti sabali a lugar. Nagpatulongak ken ni Jehova, ket nabaelak ti nangasaba iti agmalmalem iti naiputputong a teritoria gapu iti pigsa nga impaayna. Idi agangay, natural laengen kaniak ti panangaramid iti dayta. Nakairugiak iti adu a panagadal iti Biblia, ket agingga ita matultulongannak pay laeng dayta a kapadasan. Naadalko a babaen ti pigsa nga ipaay ni Jehova, madaerantayo uray dagiti kasla di mapagballigian a lapped.”

Wen, nagduduma dagiti mangyeg iti kinaragsak, kas iti pannakigayyem iti Dios ken iti ilina, naan-anay a panagtalek ken ni Jehova, panangipangag iti balakad ti Dios, ken panagbalin a nakonsiderar kadagiti sabsabali. Babaen ti pannagna kadagiti daldalan ni Jehova ken panagtulnog kadagiti lintegna, matagiragsaktayo ti anamongna.​—Salmo 89:15; 106:3; 112:1; 128:1, 2.

[Footnote]

[Ladawan iti panid 12]

Ni Maria

[Ladawan iti panid 13]

Ni Maree

[Ladawan iti panid 13]

Da Susanne ken Andreas

[Ladawan iti panid 15]

Ni Corinna

[Ladawan iti panid 15]

Ni Dimitar