‘Agsaksakay iti Dasig ti Kinapudno’
“Ket iti tan-okmo agsakayka; iti dasig ti kinapudno ken kinaemma ken kinalinteg, ket ta makanawanmo isuronanto kenka dagiti nakaal-alingget a bambanag.”—SALMO 45:4.
1, 2. (a) Ania a mensahe ti nangparagsak ti salmista? (b) Apay a dayta met laeng a mensahe ti mamagtignay kadatayo?
TI DUMADANIW a kumakanta ti magagaran a mangirugi ti kantana. Ti pananginanama ti um-umay a nasayaat a gobierno kadagiti ima ti maysa a di agrupsa, nalinteg nga agturay ti nakapigpigsa unay. Isut’ di makapagulimek. Saannan a matngelan ti bagina, ti salmista ti nagpukkaw kadagitoy a sasao: “Ti pusok aglippias iti naimbag a banag. Saoek dagiti bambanag: ‘Ti ar-aramidko ti maipanggep iti ari.’ Sapay koma ta ti dilak isu ti pluma ti maysa a nalaing a mannurat.” (Salmo 45:1) Ti orihinal a dumadaniw a kumakanta ket nabayag a natayen. Ngem dagiti naimpadtuan a kantana ti kaskasdi a sibibiagda, ket ti puersa dayta ti nikaanoman di pay napigpigsa ngem itatta.—Idiligyo iti Colosas 3:16.
2 Dagiti “naimbag a bambanag” ti ania ngatat’ nangtignayanna iti puso ti salmista? Daytat’ nainaig iti naimbag a damag ti Pagarian ti Dios! Ti mensahe ti Pagarian ti “nakaim-imbag” unay a daytat’ maikari a “maikaskasaba iti amin a mapagnaedan a daga kas maysa a pammaneknek iti isuamin a nasnasion” sakbay nga umay “ti panungpalan” dagitoy a nasnasion. (Mateo 24:14) Itatta, ti kadi “naimbag” a tema ti Mesianiko a Pagarian ti Dios ti nangtignay ti pusoyo? Rebbengna. Apay? Agsipud ta ti berbo a Hebreo a naipatarus “aglippias” (ra·chashʹ) ipasimudaagna ti naragsak a panaggunay, kas ti agburburayok, lumlummuag a likido. Ti berbo ipampamatmatna ti kinaan-anay. Ken laglagipenyo, ti Pangulotayo, ni Jesu-Kristo, kinunana: “Iti nasayaat a gameng ti pusona iruar[na] ti naimbag.” (Lucas 6:45) Gapuna, kas ti salmista, addaankay aya ti puso nga agliplippias kadagiti “naimbag a banag”? No kasta, ngarud awan ti makapasardeng kadakayo iti inkayo panangikanta iti daytoy superlatibo a kinapudno: ni Jesu-Kristo ti agturturayen iti Pagarian ti Dios!
Panangisaknap ti Kanta ti Kinapudno
3. Ania dagiti dua a kangrunaan a metodo a nausar iti panangisaknap ti naimbag a damag ti Pagarian itatta?
3 Kasano ti pannakaisaknap daytoy nadaeg a kanta? Babaen ti nasantuan nga espiritu, ti dila ti salmista nagbalin a maysa a “pluma” kadagiti im-ima ni Jehova. (Idiligyo iti 2 Samuel 23:2.) Dagiti insuratna a liriko ti nakanta nga agpaay a denggen amin dagiti managdaydayaw ni Jehova. Datayo met itatta mabalintayo nga ikampeon ti kinapudno ti Pagarian ti Dios iti dua nga agasping a pamay-an. Umuna, babaen kadagiti sasaotayo a mangngegan iti publiko a panangaskasaba ken, maikadua, babaen kadagiti sasaotayo a mabasa kadagiti literaturatayo. Gapuna, no agiwarwarastayo kadagiti literatura a naibatay iti Biblia, ibagbagatayo no ania ti imbagan ti dila dagiti napaltiingan a nasantuan a tattao. (2 Timoteo 3:16; 2 Pedro 1:20, 21) Ket itatta ti naimaldit a mensahe ti Pagarian ti maiwarwarasen iti adu a bilang ken pagsasao ken iti kapartak a di pulos rinipirip ti salmista. Addaankay kadi ti regular a paset iti pannakaiwarasna, nangnangruna babaen ti panagiwaras kadagiti pagiwarnakan a Pagwanawanan ken Agriingkayo!?
4. (a) Kasano a ni Kristo Jesus nagbalin a “nasaysayaat ngem kadagiti annak dagiti tattao”? (b) Kasano a ti klase napulotan nga agwanawan tinuladna ‘ti imnas dagiti bibig ni Kristo’?
4 Ti panagparang ti Ari ni Jehova ti nangtignay ti salmista a nagsurat: “Nasaysayaatka ngem dagiti annak dagiti tattao. Ti grasia naibuyat kadagiti bibigmo. Anansata ti Dios binendisionannaka nga agnanayon.” (Salmo 45:2) Manipud aldaw ti pannakapulotna ti espiritu ti Dios, dagiti bibig ni Jesus ti nagtultuloy a nangikasaba ti Pagarian, agingga a dagiti natauan nga ahente ni Satanas ti nangpaulimek kadakuada. Gapu iti kinasungdo ni Jesus, isu ngarud ti binendisionan ni Jehova iti agnanayon babaen ti panangpagungarna kenkuana manipud ken patay ket intan-okna a nangatngato ngem amin dagiti dadduma a parparsua. (Filipos 2:8-11) Nanipud nailangitan a pannakaipadayag ni Jesus, idi nagbalin nga ‘eksakto a ladawan ti Dios,’ isut’ ad-adda a napimpintas ngem iti katatan-okan unay nga agturay, natauan man wenno angheliko. (Hebreo 1:3, 4) Itan, kas ti naitronon nga Ari, inikkan ni Jesus ti pannakabalin dagidi bibig ti napulotan a klase agwanawan ken dagiti katulonganda a mangikanta a situtured ti naimbag a damag ti Pagarian. Nupay kasta, daytoy ket maysa met a kanta ti gubat.
5, 6. (a) Ania ti ipasimudaag ti ‘panagsakay [ni Kristo] gapu iti kinapudno’? (b) Kasano ti panangus-usar ti klase agwanawan iti Pagwanawanan ken Agriingkayo!?
5 Sumaganad ti salmista ti pumukkaw iti agturturayen nga Ari: “Ibarikesmo ta kampilanmo ita lomom, O mannakabalin, ti dayag ken ti tan-okmo. Ket iti tan-okmo agsakayka a sirarang-ay; gapu iti pudno ken kinaemma ken kinalinteg, ket ta makanawanmo isuronanto kenka dagiti nakaal-alingget a bambanag.” (Salmo 45:3, 4) Nanipud pay 1914 ni Kristo ti nakasakayen iti maysa a kabayo iti gubat, a sisasaganan a makibakal. (Apocalipsis 6:1, 2) Isut’ nabariksan nga addaan kampilan—ti simbolo ti gubat ken kasta met ti autoridad ken pannakabalin a naggapu ti Dios tapno ikisapna dagiti nasnasion a bumusbusor. Ni Kristo ti nakidangadangen ken Satanas ken dagiti demoniona, nga intappuakna ida manipud langit ket ingarangugongna ida iti kaparanget iti daga.—Apocalipsis 12:1-13.
6 Nupay kasta, sakbay a maisubli ti talna, dagiti bambanag nga ad-adda pay a nakaal-alingget ngem iti daytoy ti aramiden ti kannawan ti Ari inton isu ti ‘agsakay a sirarang-ay gapu iti kinapudno’ inton Armagedon tapno dadaelenna amin a kabkabusor ti Dios ditoy daga. (Salmo 45:4; Apocalipsis 16:14, 16; 19:17, 18) Pinaingel met ni Kristo ti napulotan a klase agwanawan a mangikanta met iti daytoy a pakdaar. Aniat’ usaren ti “agwanawan” a mangpapigsa ti timekna? Kangrunaanna dagiti panid ti magasin a Pagwanawanan—ti pagiwarnak nga isu ti kangrunaan iti panangiwarwaragawag ti naipasdeken a Pagarian ni Jehova. Ti klase agwanawan, kas maysa a buyot dagiti mangsilud nga alakdan a dudon, ti naikkan iti isu met laeng nga espiritu a mangidurduron ken Kristo nga “agsakay a sirarang-ay gapu iti kinapudno.” (Apocalipsis 9:7-11) Siepektibo, us-usarenda dagiti magasin a naisagana iti sidong ti panangiwanwan ti “agwanawan”—Ti Pagwanawanan ken Agriingkayo!—“gapu iti kinapudno.”—Mateo 24:45; idiligyo iti Apocalipsis 9:16-19.
‘Agsakay Gapu iti Kinapudno’
7. Iti ania nga agresibo a pamay-an ti panangitantandudo ti magasin a Pagwanawanan ken Agriingkayo! iti kinapudno ti Biblia?
7 Iti nasurok ngem sangagasut a tawtawenen, Ti Pagwanawanan ti nangikampeonen ‘ti Kinapudno ti Pagarian.’ Sisisigo nga us-usaren dayta ti Sao ti Dios kas kampilan iti panangukisna kadagiti agrurutap a kinaulbod a naibalkot iti aglawlaw ti ulbod a narelihiusuan a pannursuro. (Idiligyo iti Efeso 6:17; Hebreo 4:12.) Ti magasin nga Agriingkayo! itantandudona met ti kinapudno. No maipapan kadagiti agdama a paspasamak, ti Agriingkayo! ti mangiwa iti abbungot a kasla mangabbong kadagiti mangdadael ti Biblia a sientipiko a teoria ken dagiti napeggad a sosial ken moral a pagannayasan. Aniat’ maaramidantayo a mangipaima kadagitoy a magasin iti im-ima dagitoy a tattao tapno mangngeganda ti makaispal iti biag a mensahe ti Pagarian?
8, 9. Kasano a ti panangiyaplikar iti prinsipio idiay Efeso 5:16 iti panagbasa Ti Pagwanawanan ken Agriingkayo! tulongannakayo nga “aglippias” a makiraman iti panangaskasaba babaen ti magasin? Mangted kadagiti pangarigan.
8 Amin nga agayat iti kinapudno ti rebbeng nga “aglippias” kadagiti mensahe a linaon dagiti pagiwarnakan a Pagwanawanan ken Agriingkayo! (Salmo 45:1) Kasano? Apay a dikay basaen ita a dagdagus apaman a maawatyo ida? ‘Diak basaen ti nailubongan a magasin wenno libro agingga nga umuna a nabasak a naan-anay dagiti magasintayo,’ kuna ni Lillian iti bagina sangapulo a tawen ti napalabasen. Isut’ kaskasdi a matalek iti dayta a pangngeddengna. (Mateo 6:33) Aniat’ maaramidanyo kalpasan a mabasayo ida? Isarsaritayo dagiti linaonda kadagiti dadduma—kadagiti kameng ti pamilia ken kadagiti pada a kameng ti kongregasion. Daytoy met ti rebbeng a mangrubrob kadakayo iti regta iti panangasaba a kadua dagiti magasin tapno maibagayo kadagiti kaarrubayo ti maipapan ti naimbag a bambanag a nabasbasayo. Awan duadua tarigagayanyo ti makiraman iti panangaskasaba ken panagiwaras ti magasin kada lawas, nga ipanyo ida kadagiti pagtaengan dagiti kakaarrubayo. Maiyasping daytoy iti pamay-an a “panangpaneknek a naan-anay” nga inaramid ni apostol Pablo.—Aramid 20:20, 21.
9 Ni Peter ken ti asawana a ni Petra agserserbida kas misionero iti maysa a pagilian ti Africa iti napalabasen nga uppat a tawen. Dagiti magasin a Pagwanawanan ken Agriingkayo! ti maysa kadagiti kangrunaan a gubuayan ti naespirituan a pigsada. “Ti Pagwanawanan tumulong kadakami a mangsalimetmet iti naespirituan a kinaalertomi iti teritoriami,” kuna ni Petra. “Magunggun-odanmi ti pammaregta ken pammigsa manipud tunggal ruar ti Ti Pagwanawanan ken Agriingkayo!,” innayon met ni Peter, “ket tunggal sumangpet dagiti magasin, kayariganna a kasla umaw-awatkami iti surat manipud ilimi.” (Idiligyo ti Salmo 46:1.) Addaankayo met laeng aya ti isu met laeng a nauneg a panangipateg kadagiti pagiwarnakantayo ken magagarankayo aya a mangbasa kadakuada a kas kada Peter ken Petra? Dayta a kita ti espiritu ti mangtignay met kadakayo a mangitukon a regular kadagiti magasin kadagiti dadduma.
10. Ania a tipo ti kababalin ti kasapulan a maipaay iti epektibo a panangaskasaba iti magasin, ket ania dagiti gunggona a mabalinna a patauden?
10 Dagiti agibumbunannag ti Pagarian rebbeng a maaddaanda ti positibo a kababalin iti panangaskasaba babaen ti magasin. Dagiti tattao a napasnek iti relihion ti kaskasdi a mangaw-awat pay met laeng kadagiti naibatay iti Biblia nga impormasion a linaon dagiti pagiwarnakantayo. (Idiligyo iti Aramid 10:15, 30-33.) Apay? Agsipud ta daytat’ dida magun-odan manipud kadagiti dadduma a gubuayan. Iti nasuroken a 45 a tawen ti napalabasen idiay Sweden, nakagun-od ni Lars ti sangatambak a magasin a Pagwanawanan manipud ti maysa nga empleado. “Nasayaat daytoy,” kunana ken ni baketna kalpasan ti panangbasana kadakuada. “No ania ti kunaen ti Biblia, isu met ti kunaen Ti Pagwanawanan.” Ti nabasa ni Lars isut’ nangtignay kenkuana a nabautisaran—idi Marso 1940. Usigenyo pay ti sabali a pangarigan. Dua a payunir a ministro manipud umabagatan nga Estados Unidos ti nagkuna:
“Maysa a babai ti nasabet iti trabaho a panagiwaras ti magasin. Ti babai ti tesurera ti maysa a dakkel a simbaan dagiti Baptist ken maysa a serioso met nga estudiante ti Biblia. Idi nabasana ti serie ti tema nga Armagedon kadagiti ruar ti Pagwanawanan nga Enero 1 inganat’ Pebrero 15, 1985, isut’ maragsakan. Idi napalabas nagadu nga oras ti binusbosna a nagsuksukimat iti dayta a tema ket awan pulos nagun-odanna malaksid laeng ti kasuratan a masarakan idiay Apocalipsis 16:16. Sinaludsodanna ti ministrona: ‘Ania ti Armagedon? Mailawlawagmo aya dayta?’ Ti ministro ti kimmita kenkuana ket kinunana, ‘Nauneg dayta a tema,’ ket kalpasanna pimmanawen. Ti babai ti nagkuna a Ti Pagwanawanan, iti kasumbangirna, ti nangsungbat kenkuana iti tunggal saludsod ket isu laeng daytoy ti maymaysa a gubuayan a nasarakanna nga addaan kadagiti kasapulan a kasuratan maipapan iti tema nga Armagedon.”
11. (a) Apay nga iyiskediolyo ti panangaskasaba babaen ti magasin, ken kasano kasansan? (b) Ti kadi serbisio ti magasin makatulong ti trabaho a panangiyadal ti Biblia? Ilawlawagyo. (c) Kasano a makaipaimakayo Ti Pagwanawanan ken Agriingkayo! kadagiti tattao? Kitaenyo ti kahon.
11 Mabalinyo aya nga iyiskediol ti uray maysa laeng nga aldaw a maipaay iti panangaskasaba babaen ti magasin kada lawas, a pagbalinen daytoy a paset ti naespirituan nga ar-aramidyo? (Idiligyo iti Filipos 3:16.) “Dagiti agibumbunannag, ken kasta met dagiti payunir, saanda a mangbusbusbos ti nawadwad a tiempo iti panagiwaras ti magasin,” kuna ti sanga nga opisina ti Watch Tower Society idiay Nigeria. Ngem rebbeng kadi a ti panangaskasaba babaen ti magasin ti manglab-aw itan iti trabaho a panagaramid-adalan? Maisupadi iti dayta, ti report manipud sangsanga ti sosiedad idiay Australia ken Brazil ipakitana a ti panagipaima kadagiti magasin ket mabalin nga isu ti umuna nga addang iti panangrugi iti panangiyadal ti Biblia. “Manipud ti umuna a panagipaima ti magasin, tallo a panagadal ti narugian,” kuna ti maysa a kabsat a babai a taga Australia. Kasano ti mabalinyo a panagipaima kadagiti magasin a mangiturong ti panangiyadal ti Biblia? Kitaenyo ti kahon a napauluan “Panagipaima kadagiti Magasin” a maipaay kadagiti suhestion.
Napadpadasyon Aya Dagitoy a Suhestion?
12. Ania dagiti suhestion a napaneknekan a makatulong iti maysa nga agibumbunannag?
12 Ti Ministeriotayo iti Pagarian ti Mayo 1984 ti addaan ti uppat a panid a suplemento maipapan ti panagiwaras ti magasin. Napadpadasyon aya dagiti intukonna a suhestion? Nasaysayaat no basaen manen dagiti agibumbunannag ti Pagarian dayta a suplemento ket iyaplikarda dagiti pammagbagana iti tay-ak ti serbisio. Maysa a kabsat a babai a taga Estados Unidos ti nangaramid iti dayta; dagiti resulta ti maparagsak a nangkellaat kenkuana. Insuratna:
“Iyap-aplikarko dagiti punto a naibalabala iti Mayo 1984 a suplemento Ti Ministerio ti Pagarian maipapan ti panagipaima ti magasin, ket agkurkurri dayta! Idi agtapos ti 1983 nakaipaimaak laeng ti 36 a magasin iti intero a tawen! Maladingitanak, saan unay a gapu iti bilang nga adda iti report, ngem napaayak a nangipan kadagiti makaited-biag nga impormasion iti im-ima dagiti tattao nga agkasapulan iti dayta. Nagkararagak ken ni Jehova maipapan iti dayta a banag ket naikeddengko a mangaramidak ti dakdakkel a panagregget a mangipaima Ti Pagwanawanan ken Agriingkayo! Inusarko dagiti suhestion maipapan iti panangikabil iti personal a kalat kadagiti maipaima, a mangusar ti ababa a presentasion a mangitampok laeng ti maysa a magasin, a rummuar a regular iti tay-ak ti serbisio iti aldaw ti magasin, ken maaddaan ti positibo a kababalin. Ita no saan nga awaten ti bumalay ti regular a tukon, kunaek: ‘Bueno, no kasta mangibatiak laeng kadakayo kadagiti kabaruan a ruar Ti Pagwanawanan ken Agriingkayo! iti 40 cents.’ Pudno a dagitoy a punto ti agkurri. Kadagiti napalabas nga uppat a bulan, nakapromedioakon ti 14 a magasin kada bulan!”
13. Ania a pammagbaga a naipablaak idi 1888 ti kaskasdi a praktikal agingga itatta?
13 Iti Disiembre 1888 a ruar ti Zion’s Watch Tower, iti sidong ti paulo a “Maysa a Suhestion kadagiti Managani,” naited daytoy pammagbaga: “Ti kadadakkelan a parikut iti biang dagiti adu ti kasla, ti puspusoda ti nakapunpunno unay kadagiti naimbag a damdamag, a gapu itoy magargarida nga agsao iti adu unay maipapan iti Plano ti Dios.” Agaplikar pay met laeng aya dayta a pammagbaga? Idi napagsaludsodan no aniat’ maaramidan dagiti agibumbunannag a mangparang-ay kadagiti magasin a maipaimada, maysa a manangaywan ti sirkito a taga Francia ti simmungbat: “Agsao laeng ti ababa. Direkta iti punto.”
14, 15. Kasano a dagiti retrato idiay Ti Pagwanawanan ken Agriingkayo! mausarda iti panangaskasaba? Mangted kadagiti pangarigan.
14 Iti adu a pagsasao a pagparparanganen dagiti magasin, dagiti makaay-ayo nga ilustrasion kadagiti uppat a kolor ti nangnayon iti panangallukoy ti mensahe ti Pagarian bayat a madanonna dagiti nagduduma a kita dagiti tattao. Manipud ti Enero 8, 1987 a ruar, ti Agriingkayo! nakikaduan Ti Pagwanawanan a maiyim-imprenta iti uppat a kolor iti kaaduan kadagiti kangrunaan a pagsasao. Us-usarenyo aya dagiti ilustrasion ken retrato kadagiti magasin kas punto a pagsaritaan? Adu ti mangar-aramid iti dayta, nga addaan kadagiti naimbag a resulta. Ni Theresa, maysa a misionera idiay Adayo a Daya nanipud 1976, ti mangar-aramid iti dayta. Isut’ makaiwarwaras ti 260 a magasin iti makabulan. “Us-usarek dagiti retrato a mangipaganetget iti kangrunaan a punto iti presentasionko,” kunana. “Iti adu a daras iparparangko laeng ti akkubna iti bumalay ken dakamatek ti topiko, ket ngangngani kanayon a ti magasin ti mangipapaima ti bagbagina.”
15 Ni Kay, maysa a misionera idiay pagilian ti Suriname, ti naaddaan umas-asping a kapadasan. Isu ken ni lakayna ti adda idiayen iti sangapulo a tawen, ket nasarakanda dagiti retrato nga epektibo a mangaskasabada, nangnangruna kadagidiay adda iti pammati a Hindu. Apay? Ilawlawag ni Kay:
“Ti relihion a Hindu ket maysa a relihion ti retretrato. Iti maysa a ruangan, sinaludsodak ti maysa a babai: ‘Pangngaasim ta ibagam kaniak ti nagan dagiti didiosyo kadagiti retretratoyo.’
“‘Daytoy isu ni Shiva,’ insungbatna.
“‘Ita, asino ti kangatuan a dios?’ sumaganad nga insaludsodko. Awan sungbat. ‘Basaentay man ngarud ti Jeremias 10:10-12? Asino a Dios ti makapagkuna nga isu ti Namarsua? Ni laeng Jehova. Ammomi a kaay-ayoyo dagiti retrato. Saan kadi a dagitoy a retrato nga adda iti Ti Pagwanawanan ken Agriingkayo! napipintas ken makapainteresda? Dika aya kayat ti maaddaan ti rag-o a mangammo no ania ti kaipapananda?’”
Apay a dikay padpadasen nga ilagalaga dagiti retrato iti pannakipatpatangyo inton sumaganad a mapankayo agipaima ti magasin?
16. Ania a suhestion manipud maysa nga agibumbunannag idiay Hong Kong ti masarakanyo a makatulong?
16 Bayat nga agserserbi idiay Hong Kong, nakapromedio ni Gene ti nasurok a 300 a magasin a maipapaima kada bulan. Kasanot’ panangar-aramidna iti dayta? Ilawlawagna:
“Umuna, agkararagka a maipaay iti pammendision ni Jehova iti panangiwarasmo kadagiti magasin. Maikadua, agbalinka a positibo, naisem, ken nainggayyeman. Maikatlo, agbalinka a mannakibagay ken umanamong, ken kumita iti banag a pakipadaam iti bumalay. Maikapat, agpedido ti umdas a magasin para iti intero a makabulan. Addaanak ti dakkel a pedido, a daytoy ti mangted kaniak ti kanayonan a pakatignayan. Maikalima, mangilasinka ti maysa a rabii kada lawas a maipaay iti serbisio ti magasin, yantangay ad-adu kadagiti tattao ti adda kadagiti pagtaenganda iti dayta ken ad-adda a nainanaanda. Maikanem, mangrugika iti maysa a rota ti magasin, uray no daytat’ bassit laeng.”
Panangirugi ti Rota ti Magasin
17. (a) Iti ania a paset ti panangaskasabatayo iti magasin a maiyaplikar ti prinsipio iti Aramid 15:36? (b) Kadagiti pagilian a nakapuy ti serbisio ti koreoda, aniat’ maysa a pamay-an a mabalin a pakaipaimaan dagiti agibumbunannag ti magasin?
17 “Ti panangidulin kadagiti umiso a rekord no sadino ti makaipaimaan kadagiti magasin ken ti panagsubli a regular ti maysa a pamay-an a panangparang-ay iti panagiwaras ti magasin,” kuna ni Ollie, a nakapagserbin idiay pagilian ti Africa a Burkina Faso. “Addaanak ti 15 a katao iti rotak ti magasin. Gapu ta ti Burkina Faso ket saan a maysa a sanga a pagim-imprentaan ken saan a sigurado ti panagipatulod ti koreo, masansan a dagiti Saksi aw-awatenda dagiti magasinda a maipaay iti panagiwaras nga aggigiddan, mabalin nga uppat wenno lima a ruar nga aggigiddan.” Pudno met aya dayta iti pagilianyo? No kasta, aniat’ maaramidan tapno maparmek daytoy a karit iti panagipaima ti magasin? “Mabalinyo nga iggaman dagiti kopia iti kada ruar iti imayo ket iyukradyo a kasla abaniko dagiti magasin, ket awisenyo ti interesado a tao nga agpili no ania ti kayatna a basaen,” insingasing ni Ollie. “Masansan, alaenna ida amin.”
‘Agtultuloy nga Aglippiaskayo iti Naimbag a Banag’
18. Ania a paspaset ti nabiit pay a report ti tay-ak ti serbisio ti nangnangruna a makomendaran, ket iti ania ti mabalintay nga ikkan ti dakdakkel nga atension?
18 Dakayo nga agibumbunannag ti Pagarian ti nakatulong iti irarang-ay ti bilang dagiti suskripsion a nagun-odan para kadagiti dua a magasin. Masapul a makomendarankayo gapu iti regtayo iti panangisaknap ti naimbag a damag iti daytoy a pamay-an. Kasta met a makomendaran ti panagpangato ti bilang ti dagup dagiti magasin a maipapaimayo. Nalabit, nupay kasta, mabalintayo pay nga ikkan ti ad-adda nga atension dagiti indibidual a maipapaimatayo kadagiti magasin. Babaen iti naing-inget pay a panangsaknap iti teritoria, dagiti maipapaima a magasin ti kada agibumbunnag ti bimmaba. Idinto nga agbibiagtayon a nakaun-unegen iti panawen ti panungpalan, mabalinantay pay kadi ti ad-adda nga ‘aglippias iti naimbag a banag’ iti Pagarian babaen ti panangaskasaba babaen kadagiti magasin?—Salmo 45:1; 1 Pedro 4:7.
19. Iti ania a dua a pamay-an a mabalintayo nga ikampeon ti kinapudno ti Pagarian?
19 Ni Kristo iti kinadayag ti Pagarian ti agsaksakayen nga agturong iti panagballigi iti panangsantipikar iti nasantuan a nagan ni Amana ken iti panangalangon iti sapasap a kinasoberanona. (Apocalipsis 6:2) Usarentay dagiti dilatayo ken ti naimaldit a panid a mangiyanunsio iti idadatengna. Sapay koma ta sisusungdo nga itag-aytay dagiti timtimektayo a kadua ti klase napulotan nga agwanawan bayat iti pannakikadkaduana ken Kristo iti panangikampeon iti kinapudno iti naipasdeken a Mesianiko a Pagarian ti Dios. Wen, iwarastay koma a sisasaknap Ti Pagwanawanan ken Agriingkayo!—dagiti magasin a nangpunno iti nagpateg a paset bayat a ti Aritayo ‘agsakay a sirarang-ay gapu iti kinapudno.’—Salmo 45:4.
Malagipyo Pay Aya?
◻ Ania ti “naimbag a banag” a rebbeng a mamaglippias ti pusoyo?
◻ Ti ‘panagsakay [ni Kristo] a maipaay iti kinapudno’ ti nangyeg ti ania a resulta?
◻ Iti ania a kaipapanan a Ti Pagwanawanan ken Agriingkayo! pagserserbianda “ti kinapudno”?
◻ Kasano a makaipaaytayo ti ad-adu nga atension iti panangaskasaba babaen ti magasin?
[Kahon/Ladawan iti panid 18]
TI PANAGIPAIMA KADAGITI MAGASIN
Napadasyon Aya?—
◆ Iti panangaskasaba iti binalaybalay
◆ Panangaskasaba iti lansangan
◆ Panangaskasaba iti lugar dagiti negosio
◆ Panangaskasaba iti rota dagiti magasin
◆ Panangaskasaba iti rabii
◆ No dida inawat ti libro a naitukon
◆ No agsarsarungkar
◆ No bumisbisita kadagiti dati nga estudiante ti Biblia
◆ No agdaldaliasat wenno ag-shopping
◆ No makisarsarita kadagiti kakabagyan, katrabahuan, kakaarruba, kakaeskuelaan, wenno mannursuro