Agtutubo—Parayrayenyo ti Tarigagayyo nga Agserbi ken Jehova
“Lagipem, itan, ti Naindaklan a Namarsuam kadagiti aldaw ti kinaagtutubom.”—ECL. 12:1.
1. Ania ti nayawis kadagiti agtutubo iti Israel?
AGARUP 3,500 a tawen ti napalabasen, ni Moises a mammadto ni Jehova imbilinna kadagiti papadi ken lallakay iti Israel: “Ummongem dagiti umili, ti lallaki ken ti babbai ken dagidiay ubbing . . . , tapno makapagimdengda ken tapno makasursuroda, yantangay masapul nga agbutengda ken Jehova a Diosyo ken annadanda nga itungpal ti amin a sasao daytoy a linteg.” (Deut. 31:12) Imutektekanyo no siasino dagiti nabilin a makipagdayaw: dagiti lallaki, babbai, ken ubbing. Wen, uray dagiti agtutubo nabilinda nga agimdeng, agsursuro, ken agtulnog kadagiti instruksion ni Jehova.
2. Kasano nga inyebkas ni Jehova ti pannakaseknanna kadagiti agtutubo iti nagkauna a kongregasion Kristiano?
2 Idi umuna a siglo, nagtultuloy nga inyebkas ni Jehova ti pannakaseknanna kadagiti agtutubo iti ilina. Kas pagarigan, pinaltiinganna ni apostol Pablo nga agsurat kadagiti kongregasion. Dadduma kadagita ti naglaon kadagiti instruksion nga espesipiko a naiturong kadagiti agtutubo. (Basaen ti Efeso 6:1; Colosas 3:20.) Dagiti agtutubo a Kristiano a nangyaplikar kadagita a balakad rimmayray ti panangipategda iti naayat a nailangitan nga Amada ken nagun-odda ti pamendisionna.
3. Kasano nga ipakpakita dagiti agtutubo ita ti tarigagayda nga agserbi iti Dios?
3 Maaw-awis kadi ita a makitaripnong dagiti agtutubo tapno agdayawda ken Jehova? Wen! Gapuna, maragsakan ti ili ti Dios a makakita iti nagadu nga agtutubo nga adipen ti Dios iti intero a lubong a mangipappapuso iti balakad ni Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Heb. 10:24, 25) Kanayonanna, adu nga agtutubo ti makiramraman a kadua dagiti nagannakda iti panangikasaba iti naimbag a damag ti Pagarian ti Dios. (Mat. 24:14) Ken kas ebkas ti naimpusuan a panagayatda ken Jehova, rinibu nga agtutubo ti agpabpabautisar iti kada tawen ken mangtagtagiragsak kadagiti bendision nga itden ti panagbalin nga adalan ni Kristo.—Mat. 16:24; Mar. 10:29, 30.
Awatenyo ti Awis Itan
4. Kaano a mabalin nga awaten dagiti agtutubo ti awis ti Dios nga agserbi kenkuana?
4 Kuna ti Eclesiastes 12:1: “Lagipem, itan, ti Naindaklan a Namarsuam kadagiti aldaw ti kinaagtutubom.” Adda kadi espesipiko nga edadyo dakayo nga agtutubo sakbay a mabalinyo nga awaten ti nadungngo nga awis nga agdayaw ken agserbi ken ni Jehova? Awan ti ibaga ti Kasuratan. Gapuna, dikay koma bumdeng, a panunotenyo nga ubingkayo pay unay tapno agimdeng ken agserbi ken ni Jehova. Aniaman ti edadyo, maparegtakayo nga agtignay koma itan.
5. Kasano a dagiti nagannak matulonganda dagiti annakda a rumang-ay iti naespirituan?
5 Adu kadakayo ti tinulongan ti maysa wenno agpada a nagannakyo a rumang-ay iti naespirituan. No kasta, umasping ti kasasaadyo ken Timoteo idi panawen ti Biblia. Idi maladaga pay, naisuro kenkuana dagiti nasantuan a sursurat babaen ken nanangna a Eunice ken lolana a Loida. (2 Tim. 3:14, 15) Nalabit nga isursurodakay met dagiti nagannakyo iti kasta a pamay-an babaen ti panangyadalda kadakayo iti Biblia, pannakipagkararagda kadakayo, ken panangikuyogda kadakayo kadagiti gimong, asamblea, ken pangasabaan. Wen, ti panangisuroda kadakayo iti daldalan ti Dios ket nagpateg a responsabilidad nga intalek a mismo ni Jehova kadagiti nagannakyo. Apresiarenyo kadi ti ayat ken pannakaseknanda kadakayo?—Prov. 23:22.
6. (a) Sigun iti Salmo 110:3, ania a kita ti panagdayaw ti makaay-ayo ken Jehova? (b) Ania ti usigentayo ita?
6 Kaskasdi, bayat nga agmatmataengankayo dakayo nga agtutubo, kayat ni Jehova a “mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios,” kas iti inaramid idi ni Timoteo. (Roma 12:2) No aramidenyo dayta, makiramankayo kadagiti aktibidad ti kongregasion gapu ta kayatyo nga aramiden ti pagayatan ni Jehova, saan ket a gapu ta kayat dayta dagiti nagannakyo. Maay-ayo ni Jehova no situtulokkayo nga agserbi kenkuana. (Sal. 110:3) Kasanoyo ngarud a maipakita a kayatyo a parayrayen ti tarigagayyo nga agimdeng ken ni Jehova ken agtulnog iti instruksionna? Usigentayo ti tallo a napateg a pamay-an tapno maaramidyo dayta: ti panagadal, panagkararag, ken kondukta. Saggaysaentayo nga usigen dagita.
Am-ammuenyo ni Jehova kas Maysa a Persona
7. Kasano a mapagwadan ni Jesus no iti panagbalin a napasnek nga estudiante ti Kasuratan, ken ania ti nakatulong kenkuana?
7 Ti umuna a pamay-an a maipakitayo a kayatyo a parayrayen ti tarigagayyo nga agserbi ken Jehova ket babaen ti inaldaw a panagbasa iti Biblia. Mapennekyo ti naespirituan a kasapulanyo ken magun-odyo dagiti nagpateg a pannakaammo iti Biblia babaen ti regular a panagbasa iti Sao ti Dios. (Mat. 5:3) Nangipasdek ni Jesus iti pagwadan. Naminsan, idi agtawen iti 12, isu ket nasarakan dagiti nagannakna iti templo a “situtugaw iti tengnga dagiti mannursuro ken agim-imdeng kadakuada ken agsalsaludsod kadakuada.” (Luc. 2:44-46) Uray ubing pay idi, tartarigagayannan nga adalen ti Kasuratan ken addaanen iti pannakaawat iti dayta. Ania ti nakatulong kenkuana? Awan duadua a dakkel ti naitulong ni nanangna a Maria ken ti pannakaamana a ni Jose. Agpadada nga agserserbi iti Dios ken insuroda ken ni Jesus ti maipapan Kenkuana sipud kinamaladagana.—Mat. 1:18-20; Luc. 2:41, 51.
8. (a) Kaano a rumbeng a rugian dagiti nagannak nga iyukuok kadagiti annakda ti panagayat iti Sao ti Dios? (b) Mangted iti maysa a kapadasan a mangpaneknek iti kinapateg ti panangsanay kadagiti annak sipud kinamaladagada.
8 Umasping iti dayta, bigbigen dagiti managbuteng iti Dios a nagannak ita ti kinapateg ti panangyukuok iti puso dagiti annakda ti tarigagay a mangadal iti kinapudno iti Biblia sipud kinamaladagada. (Deut. 6:6-9) Kasta ti inaramid ti maysa a Kristiano a ni Rubi di nagbayag kalpasan nga impasngayna ti inauna nga anakna a lalaki a ni Joseph. Inaldaw nga ibasaanna iti Ti Librok Dagiti Estoria ti Biblia. Bayat a dumakdakkel, tinulonganna nga agikabesa iti nagduduma a teksto. Nagunggonaan kadi ni Joseph iti kasta a panangsanay? Di nagbayag, idi ammonan ti agsao, kabaelannan nga isalaysay ti adu nga estoria iti Biblia. Ket idi agtawen iti lima, imparangna ti umuna a pasetna iti Teokratiko nga Eskuelaan ti Panagministro.
9. Apay a napateg ti panagbasa iti Biblia ken ti panangutob iti nabasayo?
9 Tapno ad-adda a rumang-aykayo iti naespirituan, masapul nga iyugaliyo ti inaldaw a panagbasa iti Biblia bayat ti kinaagtutuboyo agingga iti kinaadultoyo. (Sal. 71:17) Apay a makatulong ti panagbasa iti Biblia iti panagrang-ayyo? Imutektekanyo ti inkararag ni Jesus iti Amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios.” (Juan 17:3) Kinapudnona, bayat a gumunggun-odkayo iti ad-adu a pannakaammo maipapan ken Jehova, ad-adda a makitayo nga isu ket pudno a Persona ken rumayray ti panagayatyo kenkuana. (Heb. 11:27) Gapuna, tunggal basaenyo ti maysa a paset ti Biblia, gundawayanyo dayta tapno makasursurokayo iti ad-adu pay maipapan ken Jehova. Isaludsodyo iti bagiyo: ‘Ania ti isurona kaniak daytoy a salaysay maipapan ken Jehova kas maysa a Persona? Kasano a paneknekan daytoy a teksto ti panagayat ken pannakaseknan kaniak ti Dios?’ No iwayaanyo nga utoben dagita a saludsod, maammuanyo ti panagpampanunot ken rikrikna ni Jehova ken ti kalikagumanna kadakayo. (Basaen ti Proverbio 2:1-5.) Kas iti agtutubo a ni Timoteo, ‘maguyugoykayo a mamati’ kadagiti maad-adalyo iti Kasuratan, ken matignaykayo nga agdayaw ken Jehova buyogen ti situtulok a puso.—2 Tim. 3:14.
No Kasano a ti Kararag Parayrayenna ti Ayatyo ken Jehova
10, 11. Kasano a ti kararag parayrayenna ti tarigagayyo nga agserbi iti Dios?
10 Ti maikadua a pamay-an a maparayrayyo ti tarigagayyo nga agserbi ken Jehova iti amin a puso ket babaen kadagiti kararagyo. Mabasatayo iti Salmo 65:2: “O Managdengngeg iti kararag, kenka a mismo umayto dagiti tattao iti isuamin a lasag.” Uray idi panawen a ti Israel ti nasion a naitulag iti Dios, dagiti ganggannaet a mapan iti templo ni Jehova mabalinda ti umadani kenkuana babaen ti kararag. (1 Ar. 8:41, 42) Saan a mangidumduma ti Dios. Dagidiay mangannurot iti bilbilinna masiguradoda nga ipangagna ida. (Prov. 15:8) Sigurado a karamankayo dakayo nga agtutubo iti nadakamat a “dagiti tattao iti isuamin a lasag.”
11 Ammoyo a ti nakaibatayan ti pudno a panaggayyem ket ti nasayaat a komunikasion. Nalabit a maragragsakankayo a mangiranud kadagiti kapanunotan, pakaseknan, ken rikriknayo iti nasinged a gayyemyo. Umasping iti dayta, mabalinyo ti makikomunikar iti Naindaklan a Namarsua babaen kadagiti naimpusuan a kararag. (Fil. 4:6, 7) Makisaritakayo ken Jehova a kas man la iyeb-ebkasyo ti linaon ti pusoyo iti maysa a naayat a nagannak wenno nasinged a gayyem. Kinapudnona, adda dakkel a pagnaigan ti wagas ti panagkararagyo ken ti panagriknayo ken Jehova. Madlawyo a bayat a sumingsinged ti pannakigayyemyo ken Jehova, agbalin a nabagbagas ti kararagyo.
12. (a) Apay a saan laeng nga iti sasao a makita ti nabagas a kararag? (b) Ania ti tumulong kadakayo a mangpaneknek nga asideg kadakayo ni Jehova?
12 Ngem laglagipenyo a saan laeng nga iti sasao a makita ti nabagas a kararag. Ramanenna ti kaunggan a rikriknayo. Iti kararagyo, iyebkasyo ti nadungngo nga ayat, nauneg a panagraem, ken naan-anay a panagpannurayyo ken Jehova. Bayat a makitayo ti sungbat ni Jehova kadagiti kararagyo, personal a mapaneknekanyo a “ni Jehova asideg kadagidiay amin nga umaw-awag kenkuana.” (Sal. 145:18) Wen, suminged kadakayo ni Jehova, ket pabilgennakayo a mangbusor iti Diablo ken mangaramid iti umiso a pangngeddeng iti biag.—Basaen ti Santiago 4:7, 8.
13. (a) Kasano a nakatulong iti maysa a kabsat ti pannakigayyemna iti Dios? (b) Kasano a ti pannakigayyem iti Dios tulongannakayo a mangsaranget iti panangpilit dagiti sabsabali?
13 Usigenyo no kasano a nakagun-od iti bileg ni Cherie gapu iti nasinged a relasionna ken Jehova. Idi haiskul, nakaawat kadagiti pammadayaw gapu ta nalaing idiay eskuelaan ken iti isport. Idi nakagraduar, naitukon kenkuana ti libre a panagadal iti kolehio. “Makagargari dayta a tukon,” kuna ni Cherie, “ken kasta unay ti panangkombinsir kaniak dagiti coach ken padak nga estudiante.” Ngem nabigbigna a ti panagkolehio ket agkalikagum iti kaaduan a tiempona nga agadal ken agsanay para kadagiti kompetision iti isport. Iti kasta, bassiten ti tiempona nga agserbi ken Jehova. Ania ti inaramid ni Cherie? Kunana: “Kalpasan a nagkararagak ken Jehova, diak inawat ti libre a panagkolehio. Imbes ketdi nagserbiak kas regular pioneer.” Lima a tawen itan a payunir ni Cherie. “Awan a pulos ti pagbabawyak,” kinunana. “Naragsakak gapu ta ammok a naay-ayo ni Jehova iti pangngeddengko. Kinapudnona, no iyun-unam ti Pagarian ti Dios, amin a sabali a bambanag mainayondanto kenka.”—Mat. 6:33.
Ti Nasayaat a Kondukta Ipalgakna a ‘Nadalus ti Pusoyo’
14. Apay a napateg ken Jehova ti nasayaat a konduktayo?
14 Ti maikatlo a pamay-an a maipakitayo nga agserserbikayo ken Jehova buyogen ti situtulok a puso ket babaen ti konduktayo. Bendisionan ni Jehova dagiti agtutubo nga agtalinaed a nadalus iti moral. (Basaen ti Salmo 24:3-5.) Ti agtutubo idi a ni Samuel dina tinulad ti imoral a kondukta dagiti annak ti Nangato a Padi a ni Eli. Adu ti naay-ayo iti nasayaat a kondukta ni Samuel. Kuna ti Biblia: “Kabayatanna dumakdakkel idi ni ubing a Samuel ken ad-adda a pagay-ayat agpadpada iti panangmatmat ni Jehova ken panangmatmat dagiti tattao.”—1 Sam. 2:26.
15. Ania ti dadduma a rason a taginayonenyo ti nasayaat a kondukta?
15 Agbibiagtayo iti lubong a napno kadagiti tattao a managayat iti bagbagida, natangsit, nasukir kadagiti nagannak, saan a managyaman, saan a nasungdo, narungsot, natangsit gapu iti panagpannakkel, managayat iti ragragsak imbes a managayat iti Dios—ti sumagmamano a kababalin a dinakamat ni Pablo. (2 Tim. 3:1-5) Gapuna, dakkel a karit ti panangtaginayon iti nasayaat a kondukta iti tengnga ti dakes a lubong. Ngem tunggal aramidenyo ti umiso ken agkedkedkayo a makiraman iti dakes nga aramid, pampaneknekanyo nga addakayo iti dasig ni Jehova iti isyu mainaig iti sapasap a kinasoberano. (Job 2:3, 4) Maragsakankayo met gapu ta ammoyo nga ipangpangagyo ti nadungngo a kiddaw ni Jehova: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Prov. 27:11) Kanayonanna, rumayray ti tarigagayyo nga agserbi ken Jehova gapu ta ammoyo a maay-ayo kadakayo.
16. Kasano a ti maysa a kabsat pinaragsakna ti puso ni Jehova?
16 Idi tin-edyer pay ti Kristiano a ni Carol, sinalimetmetanna dagiti prinsipio ti Biblia bayat nga ages-eskuela, ken adu ti nakadlaw iti nasayaat a konduktana. Ania ti napasamak? Inumsi dagiti kaeskuelaanna gapu ta maibatay iti konsiensiana a sinanay ti Biblia, dina kayat ti makipaset kadagiti piesta ken patriotiko a seremonia. Kadagita a gundaway, pasaray mailawlawagna dagiti patpatienna. Kalpasan ti adu a tawen, nakaawat iti kard manipud iti dati a kaklasena. Kastoy ti linaonna: “Idi pay la a kayatka a makasarita tapno agyamanak kenka. Nadlawko ti nasayaat a kondukta ken ulidanmo kas maysa a Kristiano nga agtutubo, agraman ti natibker a takdermo mainaig kadagiti piesta. Sika ti immuna a naam-ammok a Saksi ni Jehova.” Nakaaramid ni Carol iti nasayaat a nagan iti kaklasena isu a nagpayadal daytoy iti Biblia idi agangay. Dinakamatna iti kard nga isu ket nasurok nga 40 a tawenen a bautisado a Saksi! Kas ken Carol, dakayo nga agtutubo a situtured a mangsalsalimetmet iti prinsipio ti Biblia mabalin a matignayyo dagiti nasingpet a tattao a mangam-ammo ken Jehova.
Dagiti Agtutubo a Mangidaydayaw ken Jehova
17, 18. (a) Ania ti mariknayo maipapan kadagiti agtutubo iti kongregasionyo? (b) Ania ti agur-uray kadagiti managbuteng iti Dios nga agtutubo?
17 Amintayo iti organisasion ni Jehova iti intero a lubong ket maragsakan a makakita iti rinibu nga agtutubo a sireregta a makiramraman iti pudno a panagdayaw! Parparayrayen dagitoy nga agtutubo ti tarigagayda nga agdayaw ken Jehova babaen ti inaldaw a panagbasa iti Biblia, panagkararag, ken panangitunosda iti konduktada iti pagayatan ti Dios. Dagita a mapagwadan nga agtutubo ket makaay-ayo kadagiti nagannakda ken iti amin nga adipen ni Jehova.—Prov. 23:24, 25.
18 Iti masanguanan, karamanto dagiti agtutubo kadagiti makalasat nga agturong iti inkari ti Dios a baro a lubong. (Apoc. 7:9, 14) Sadiay a masagrapda ti adu a bendision bayat a rumayrayray ti panangipategda ken Jehova, ket maidaydayawdanto ti Dios iti agnanayon.—Sal. 148:12, 13.
Mailawlawagyo Kadi?
• Kasano a mabalin a makiraman dagiti agtutubo iti pudno a panagdayaw ita?
• Tapno makagunggona ti panagbasayo iti Biblia, apay a napateg ti panangutobyo kadagiti nabasayo?
• Kasano a makatulong ti kararag tapno sumingedkayo ken Jehova?
• Ania ti maaramidan ti nasayaat a kondukta ti maysa a Kristiano?
[Ladawan iti panid 5]
Nayugaliyo kadi a basaen ti Biblia iti inaldaw?