Tulbek iti Naballigi a Biag ti Pamilia
“AGRAKRAKAYAN dagiti pamilia iti pagiliantayo,” kuna ti maysa a kandidato para presidente iti E.U. itay napan a tawen. Pudno unay, makapakigtot ti kakaro ti panagrakaya ti pamilia. “Pagmuttalengennatayo dagiti panagbalbaliw a kas kadakkel iti tay-ak ti ekonomia wenno industria iti las-ud ti isu met la a panawen,” impadamag ti magasin a Fortune.
Masansan a maapektaran iti kasta unay uray dagiti pamilia a mangikagkagumaan a mangalagad kadagiti prinsipio ti Biblia. Sumagmamano a tawenen ti napalabas, kinuna ti maysa a napasnek a Kristiano iti maysa nga ama nga addaan innem nga annak: “Namnamaem nga uppat kadagiti annakmo ti tumallikudto iti kinapudno.” Ngem, patien daytoy nga ama a saan a mapasamak dayta iti uray maysa kadagiti annakna. Inlawlawagna no apay.
“Saan a dakami ti agpayso nga akinkukua kadagiti annakmi,” kinunana. “Intalek ida ni Jehova a Dios kadakami nga agassawa, kas ‘tawid,’ wenno sagut, a naggapu kenkuana. Ket kinunana a no sanayenmi ida iti umiso a wagas, ‘saandanto a pagpanawan.’ Isu nga ar-aramidenmi ti amin a kabaelanmi a mangaywan kadakuada a kas man la ni Jehova ti akinkukua kadakuada.”—Salmo 127:3; Proverbio 22:6.
Impakita ti ama ditoy ti tulbek iti naballigi a biag ti pamilia—rumbeng nga aywanan dagiti nagannak dagiti annakda a kas man la ti Dios ti akinkukua kadakuada. Nupay saan a kayat a sawen daytoy a kanayon nga ipangag dagiti annak ti nasayaat a panangidalanyo, pagrebbenganyo nga aywanan dagiti annak nga intalek ti Dios kadakayo.
Nadagsen a Pagrebbengan
Rumbeng nga aywananyo ida a buyogen ti panagraem ken nauneg a pannakaseknan. Saankay koma nga agbalin a naliway wenno aleng-aleng. Pagreggetanyo nga aramiden daytoy agsipud ta bigbigenyo a sungsungbatanyo iti Dios ti tawid, wenno sagut, nga inawatyo kenkuana. Di kasapulan a padasenyo dagiti nadumaduma a wagas ti panangpadakkel iti anak. Dagiti laeng pammagbaga ti Dios a nailanad iti Saona, ti Biblia, ti kasapulan dagiti nagannak, ket rumbeng a surotenda a naimbag dagitoy.
Kastoy ti bilin ni Jehova a Dios: “Yunay-unaymo [dagiti saok] kadagiti [annakmo] ket dagitoy ti sawem kadakuada no situtugawka iti balaymo ken no magmagnaka iti dalan ken no agiddaka ken no bumangonka. Ket ibedbedmo ida ita imam kas maysa a tanda, ket isundanto ti pannakabedbed iti baet dagita matam; ket isuratmo ida kadagiti baotek ti ruangan ti balaymo ken kadagiti rikepmo.” Idagadag pay ti Biblia: “Dakayo nga amma, . . . idalanyo [dagiti annakyo] iti disiplina ken pammagbaga ni Jehova.”—Deuteronomio 6:7-9; Efeso 6:4.
Isu a ti panangaywan kadagiti annak sapulenna ti inaldaw a panangasikaso; wen, kaipapananna ti sibubuslon a panangipaay iti panawenyo, nangruna ti ayat ken nauneg a pannakaseknanyo kadakuada. Dagiti nagannak a mangipapaay kadagitoy a kangrunaan a kasapulan kadagiti annakda ar-aramidenda ti ibagbaga ti Dios a nasken iti panangtagiragsak iti naballigi a biag ti pamilia.
Iti panagkunayo, nalabes kadi ti kiddawen daytoy? Adu a nagannak ti mangipamatmat babaen ti tigtignayda a kasta ti panagriknada. Nupay kasta, dagitoy a sagut a naggapu iti Dios—dagiti annakyo—maikarida unay iti naipangruna nga atension.
No Kasano ti Panangaywan Kadakuada
Nasayaat no usigenyo ti ulidan dagidiay nagballigi a nangpadakkel kadagiti annak. Iti maysa a magasin, iti kangrunaan nga artikulo daytoy a napauluan “Amazing Families,” nadakamat dagiti uppat a banag a nasken iti naballigi a panangaywan kadagiti annak: “[1] Panagsasarita kabayatan ti pannangan a mangparayray iti panunot, [2] panangbasa kadagiti naindaklan a libro, [3] inspirasion dagiti nasariwawek panagpampanunotna ken mapagulidanan a tattao, [4] pannakaammo nga adda dagiti pagannurotan ti pamilia a masapul a suroten.”—U.S.News & World Report, Disiembre 12, 1988.
Maipapan iti “panagsasarita kabayatan ti pannangan,” lagipenyo a binilin ti Dios dagiti nagannak nga isuroda dagiti annakda no situtugawda iti balayda. Kanayon kadi nga agsasangokayo a mangan a sangapamiliaan, iti kasta makapaglalangen ken makapagsasaritakayo iti inaldaw? Napateg ken nakallalagip kadagiti annak dagiti kasta a gundaway agsipud ta patalgedenna ti riknada. Kinuna ti maysa nga ubing nga agtawen iti innem a pagay-ayatna ti oras ti pannangan “agsipud ta awan ti rumbeng a pagdanagam iti tunggal maysa,” yantangay adda amin a kameng ti pamilia sadiay.
Ti ngay kalidad ti panagsasaritayo kabayatan ti pannangan? Masansan kadi a naisentro iti linaon dagiti “naindaklan a libro,” a pakairamanan ti Biblia ken dagiti naibatay-Biblia a literatura a mangsalaysay iti panagserbitayo iti Dios wenno maipapan kadagiti parsua ti Dios? Malaksid pay iti kastoy a panagsasarita kabayatan ti pannangan, babaen ti regular a panagadal, masapul a patanoren dagiti nagannak kadagiti annakda ti panagayat ken Jehova ken kadagiti nalinteg a lintegna.
“Saan a problema kadakami ti panagsasango a mangan iti inaldaw,” kuna ti nadakamat itayen nga ama nga addaan innem nga annak. “Nairuamkamin, ket dayta ti mamagkaykaysa kadakami. Ngem marigatankami a mangmantener iti regular a panagadal iti Biblia.” Gapu iti pannakabannogna iti agmalmalem a trabahona, makatuglep no kua kabayatan ti panagadal. Ngem pulos a dina liniwayan nga indauluan dagiti annakna iti panagadal iti Biblia, ken kanayon a kasaritana ti tunggal maysa kadakuada ken iwayaanna ti dumngeg kadakuada uray no mabayag bassit.
Malaksid pay iti panangidaulo iti nabagas a panagsasarita kabayatan ti pannangan ken panangbasa kadagiti naindaklan a libro, sigsiguraduenyo kadi nga umaw-awat dagiti annakyo iti “inspirasion dagiti nasariwawek panagpampanunotna ken mapagulidanan a tattao”? Kinapudnona, tapno naimbagto ti pagbanagan dagiti annakyo inton agmataenganda, nagpateg ti panangitimpuyog kadakuada a kanayon kadagidiay tumultulad iti katan-okan pay laeng a tao a nagbiag, ni Jesu-Kristo.
Kamaudiananna, ti ngay “pannakaammo nga adda dagiti pagannurotan ti pamilia a masapul a suroten”? Masapul a maawatan dagiti annakyo nga adda dagiti pagalagadan ti pamiliayo a mainanama a tungpalenda—nga adda dagiti kababalin, panagsasao, panagkawkawes, ugali, ken dadduma pay, a di maawat ken maisalungasing kadagiti pagannurotan ti pamilia. Masapul a mabigbigda a ti pananglabsing kadagiti pagannurotan ti pamilia ket maysa a serioso a banag—a masaktankayo iti kasta unay, kas ken ni patriarka a Jacob idi ugma, a dagiti annakna pinagbalinda isuna a “makarurod kadagiti agnaed ti daga” gapu iti nakababain nga aramidda.—Genesis 34:30.
Dagiti “pagannurotan ti pamilia” ti kangrunaan nga inyunay-unay ti nadakamat nga ama a nangibilang kadagiti innem nga annakna a kas kukua ti Dios. Kanayon a makirinnason kadagiti annakna no kasano a mayannurot iti espiritu ken panangidalan ti Namarsua, ni Jehova a Dios, ti pagalagadan ti pamilia iti panagkawkawes, panaglanglanga, ken pannakaisina kadagiti wagas ti lubong. Kas bunga ti nabuslon a panawen ken ayat nga impaayna ken ti nauneg a pannakaseknanna kadakuada—gapu iti pannakairuamda iti dalan a rebbengda a papanan—nangipangag amin dagiti innem nga annakna babaen ti ‘saanda a panangpanaw iti dalan a maiparbeng kadakuada.’—Proverbio 22:6.
Iti intero a lubong, rinibribo dagiti kasta a natibker a pamilia. Anian a pakaidaydayawan dagitoy ti Namarsua kadakuada, ken anian a gunggona kadagiti di-agimbubukodan, naayat a nagannak! Bayat ti panaglabas dagiti tawen, dagiti kasta a nagannak ad-adda nga ipateg dagiti annakda a nagunggonaan iti panagreggetda. Pangngaasiyo ta usigenyo ti sumaganad a pakasaritaan ti maysa a babai a pinadakkel dagiti managbuteng-Dios a nagannak, ket imutektekanyo dagiti agkakapateg nga adal a masursuro iti dayta.