Dagiti Agtutubo a Mangparagsak iti Puso ni Jehova
“Paragsakem toy pusok, tapno masungbatak ti mangumsi kaniak.”—PROVERBIO 27:11.
1. Kasano nga apektado dagiti dadakkeltayo ken ti Namarsuatayo iti wagas ti panagbiagtayo?
PAGAAMMOYO man dayta wenno saan, adda pagimbaganna no kasano ti panagbiagyo. Kas pangarigan, adda pagimbagan dayta kadagiti dadakkelko. “Ti masirib nga anak paragsakenna ti amana,” ilawlawag ti Biblia, “ngem ti maag nga anak isu ti babantot ni inana.” (Proverbio 10:1; 23:24, 25) Ngem nangnangruna pay, no kasano ti panagbiagyo ti mamagbalin a naragsak wenno naladingit iti Namarsuatayo, ni Jehova a Dios. “Anakko, agsiribka,” ibalakad ni Jehova, “ket paragsakem toy pusok, tapno masungbatak ti mangumsi kaniak.”—Proverbio 27:11.
2. Ania a nagpateg nga isyu ti pinataud ni Satanas, ken kasano a nairamantayo?
2 Siempre, daydiay mangum-umsi ken ni Jehova, isu ni Satanas a Diablo. Idiay minuyongan ti Eden, pinataud ni Satanas ti napateg nga isyu nga aw-awaganna ti sungbat nga aggapu iti Dios. Idi nabaelan ti Diablo, a silalaka unay, a maala ni Eva, ken kalpasanna ni Adan, a nangsalungasing iti linteg ti Dios, adda ebidensia a kinaritna ni Jehova. Ket, kasla kinuna ni Satanas: ‘Basta ikkannak laeng iti gundaway ket mapagbaw-ingko ti uray siasino iti panagserbi kenka.’ (Job 1:6-12) Gapuna, inaramid ni Jehova ti makatignay-puso a panagapelo kas nailanad iti ngato, tapno ti anakna ti mangted kenkuana ti “sungbat” tapno masungbatanna ti karit ni Satanas.
3. Apay a ti panagapelo ni Jehova agaplikar nangnangruna ken Jesus, ken asino pay dagiti nangparagsak iti puso ti Dios?
3 Nupay kasta, iti siasino nangnangruna ti nangiturongan ni Jehova iti daytoy nga apelo, nga aw-awaganna “anakko”? Iti naisalsalumina a pamay-an ni Jesu-Kristo ket anak ti Dios, kas ti bugbugtong nga anakna. (Juan 1:14) Nupay kasta, malaksid ken Adan, a pinaayna ti Namarsuana, ni Jesus ti kakaisuna a perpekto a tao a nagna ditoy daga, ngarud ti kakaisuna a tao a nakapaneknek iti naan-anay a kaipapananna a ti kinamatalek iti Dios ket mabalin a mataginayon. (1 Corinto 15:45) Gapuna ti panagapelo ni Jehova ti agaplikar a nangnangruna ken Jesus. Ket ni Jesus saanna a pinaay ni Amana. Babaen iti matalek a kursona, ni Jesus inikkanna ti Dios ti sungbat iti napangas a karit ni Satanas a dagiti tattao saanda nga agserbi Kenkuana a simamatalek iti sidong ti pakasuotan. (Hebreo 2:14; 12:2) Mainayon pay, amin dagidiay makipagturay a kadua ni Kristo idiay langit paragsakendanto met ti puso ni Jehova gapu iti kinamatalekda iti Dios agingga ken patay.—Apocalipsis 2:10.
4. No ikedkeddengyo no aniat’ aramidenyo iti biagyo, ania a nagpateg a banag ti rebbeng nga usigenyo?
4 Ngem komostatay met itatta, agraman kadakayo nga agtutubo? Nairamankayo aya iti daytoy nga isyu no agmatalek met laeng wenno saan dagiti tattao iti Dios? Pudno a nairamankayo! (Salmo 147:11; 148:12, 13) Mabalin a dikay pagaammo dayta, ngem no ania ti inkay aramiden iti biagyo ket mabalin a supsuportaranna ti dasig ti Dios iti dayta nga isyu wenno ti dasig ni Satanas. Mabalin a daytat’ mangparagsak ken ni Jehova wenno mangparagsak ken ni Satanas. Pudno unay, ti awis wenno panagapelo ni Jehova ti mamatmatan a kas naiturong met a personal kadakayo: “Anakko, agsiribka, ket paragsakem toy pusok, tapno masungbatak ti mangumsi kaniak.” (Proverbio 27:11) Saan kadi a ti panangparagsak ti puso ti Namarsuayo ket maysa a makapnek a kalat a maadda kadakayo?
Apay a Daytat’ Nainsiriban
5. Apay a nainsiriban a paragsakentay ti puso ni Jehova?
5 Kitaenyo ta mamaregta ni Jehova, “Agsiribka.” Apay a masiribtayo no paragsakentayo ti puso ni Jehova? Ngamin ta ni Jehova ket maysa a naayat nga Ama a ti laeng kasayaatan ti kayatna para kadatayo, ket aniaman a dawatenna nga aramidentayo ket agpaay a pagimbagantayo. Kas kunaen ti Isaias 48:17, 18: “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko! Iti kasta ti talnam kas koma ti maysa a karayan, ket ti kinalintegmo kasla koma daldalluyon ti baybay.”
6. (a) Aniat’ mangipakpakita a kayat ni Jehova a tagiragsakenyo ti biagyo? (b) Ania dagiti bungbunga a dikay maliklikan?
6 Kas maysa a naayat a naganak, kayat ni Jehova a tagiragsakenyo a naan-anay ti nasudi a sagutna a biag. Gapuna kunana: “Agrag-oka, o agtutubo a lalaki, iti kinaagtutubom, ket paragsakennaka koma ta pusom kadagiti aldaw ti kinaagtutubom, ket magnaka kadagiti daldalan ta pusom ken iti imatang dagita matam.” Siempre, daytoy, ket saan a maysa a panangawis a mangaramid iti aniaman a makaay-ayo a banag a tarigagayanyo. Ipakita daytoy ti sumaganad a pammagbaga: “Ngem ammuem a gapu amin kadagitoy a bambanag iyegnakanto ti Dios iti pannakaukom.” (Eclesiastes 11:9) Wen, dikay maliklikan dagiti ibunga dagiti tigtignayyo; ti Dios pagsungbatennakayto iti aniaman nga aramidenyo. Ti pagalagadan ti sigurado: “Ta ti aniaman nga imulanto ti maysa a tao, apitennanto met.”—Galacia 6:7.
7, 8. (a) Kasanoyo nga ikkaten ti liday ken iwaksi ti didigra? (b) Kaano a kinaubbaw ti kinaagtutubo ken ti panagbannawag ti biag?
7 Gapu itoy a rason, innayon ni Jehova: “Gapuna ikkatem ti liday [wenno ti mamataud ti panagdanag] ita pusom, ket ikkatem ti kinadakes ita lasagmo; ta ti kinaagtutubo ken panagbannawag ti biag ubbawda.” (Eclesiastes 11:10) Pudno unay, nainsiriban ti panangliklik kadagiti ar-aramid a mamataud kadagiti parparikut iti kamaudiananna. Ay ket, addanto dagidiay agkuna nga adu ti saysayangenyo—ta saankay a ‘nagbiag a pudpudno’ malaksid no dikay nagbartek, naaddaan iti naiparit a sekso, wenno nagaramid iti dadduma a “napeggad” a banag. Ngem anian ti kinamaagda! “Pudno a saan unay a maikari dayta,” silaladingit a kinuna ti maysa nga aglulua nga agtutubo nga estudiante kalpasan ti pannakiabigna. “Maaburidoak unay nanipud idin.”
8 Gapuna dakayo nga agtutubo, sisisirib nga ipangagyo ti balakad ti Dios nga ikkatenyo iti pusoyo ti aniaman a pagtaudan ti panagdanag wenno panagbabawi, kas iti napaspasaranen dagiti agtutubo a nangsursurot iti narisgo wenno inaagum a wagas ti panagbiag. Maysa a mannurat iti maika-17 a siglo ti nagkuna: “Ti kadadakkelan a paset ti sangatauan ti mangus-usar kadagiti umuna a tawtawenda a pagbalinen dagiti maud-udi a miserable.” Pudno, ngem anian a nakalkaldaang! No ti maysa nga agtutubo dadaelenna ti pisikal a pigsa ken dagiti kapabilidadna a mamagbalin a narigrigatto dagiti maud-udi a tawtawen ti kinanataenganna, pudno a ti kinaagtutubo ken panagbannawag ti biag ubbawda! (Proverbio 22:3) Gapuna agmasiribkayo! Surotenyo ti kanayonan pay a pammagbaga: “Lagipenyo, itan, ti Naindaklan a Namarsuayo iti aldaw ti kinaagtutuboyo.”—Eclesiastes 12:1.
9. Ania dagiti gunggona a tagiragsakenyo babaen ti pananglaglagipyo ken Jehova iti kinaagtutuboyo?
9 Babaen ti pananglaglagipyo ken ni Jehova iti kinaagtutuboyo, pudno a ti bagiyo ti gunggonaanyo. Saanyo laeng a maliklikan ti liday ken dagiti makadidigra a rigrigat no di ket maaddaankayton ti maysa a naragsak, makagunggona a panagbiag iti panagserbiyo iti Naindaklan a Namarsuayo. Mainayon pay, sisisirib nga agur-urnongkayto kadagiti gupityo idiay langit a makagunggonanto kadakayo iti agnanayon. (Mateo 6:19-21) No laglagipenyo ni Jehova itan babaen ti panagaramid iti pagayatanna, lagipennakayto met ken gunggonaannakayo “iti tarigagay ti pusoyo,” wen, ti maysa a naragsak, naan-anay a panagbiag idiay Paraiso iti agnanayon!—Salmo 37:4; 133:3; Lucas 23:43; Apocalipsis 21:3, 4.
Kasanot’ Panagriknayo Maipapan ken Jehova?
10. (a) Apay a ti pangngeddengyo nga agserbi ken ni Jehova ket saan a mabalin a basta nalamiis a panangpattapatta laeng no ania ti nainsiriban? (b) Ania a kanayonan a panagkalikagum ti inaramid pay ni Jehova?
10 Kaskasdi ti pangngeddengyo nga agserbi ken ni Jehova saan a mabalin a maysa laeng a nalammiis a panangkalkula no ania ti nainsiriban. Ni Satanas ti maysa a nagsikap a kabusor a no pampanunotenyo laeng ti personal a gunggonayo, inton agangay mabalinnanto ti agapelar kadagiti inaagum a pagannayasan tapno maiyadayonakayo manipud iti panagserbiyo ken ni Jehova. Gapuna saannakay laeng nga aw-awisen ni Jehova nga agbalin a masirib. Saan, no di ket isut’ agapelar met a maipaay iti personal a dedikasion kenkuana. Kuna ni Jesus: “Ayatem ni Jehova a Diosmo iti amin a pusom.” (Mateo 22:37) Ammoyo kadi no aniat’ kaipapanan ti panagayat ken ni Jehova iti amin a puso?
11. (a) Aniat’ kaipapanan ti inkay panangted iti pusoyo ken ni Jehova? (b) Kasano nga iyilustrar ti kapadasan ni Jose no kasano a ti umisot’ pannakatignayna a puso iduronnatayo nga agaramid iti pagayatan ti Dios?
11 Ti pusoyo tuktukoyenna ti makin-uneg a kinataoyo, dagiti kababalinyo, ken dagiti nauneg a rikriknayo, agraman ti panagpampanunotyo. Gapuna ti panagayat ken ni Jehova iti amin a puso kaipapananna nga isut’ ay-ayatenyo unay ken nangnangruna ngem ti aniaman iti biag pinanunotyo a piniliyo a paragsaken ti pusona babaen ti panangted kenkuana ti maysa a sungbat iti panangum-umsi ni Satanas. Ti kasta a makin-uneg a pannakaawat ken nauneg a rikna ti ayat ken pannakaseknan iti pagayatan ti Dios ti mangipaay iti kapipigsaan a pakatignayanyo a mangaramid iti pagayatanna, uray pay no ad-adda koma a makaay-ayo ti panangaramid iti sabali pay a banag. Ni agtutubo a Jose ti addaan iti kasta a panagayat ken ni Jehova, gapuna idi maysa a nalatak a babai ti nangawis kenkuana: “Kaiddaennak,” simmungbat ni Jose: “Kasano ngarud ti panangaramidko itoy naindaklan a kinadakes ken makabasolak iti Dios?”—Genesis 39:7-9.
12. (a) Kasanot’ panangipakitayo nga intedyo ti pusoyo ken ni Jehova? (b) No dikay pay impaay ti pusoyo ken ni Jehova, ania a salsaludsod ti rebbeng nga usigenyo?
12 Ipakpakitayo nga inayatyo ni Jehova iti amin a pusoyo no mapankay kenkuana iti kararag ket ibagayo kenkuana a kayatyo ti patagikua kenkuana, a kayatyo ti agserbi kenkuana iti agnanayon. Iti daytoy a pamay-an idedikaryo ti bagiyo ken Jehova. Naaramidanyon aya daytoy? No saan pay, apay a saan? Ania ti manglaplapped kadakayo? Nataengankayo metten aya a makaawat ken mangapresiar iti naindaklan nga isyu iti nagbaetan ni Jehova ken ni Satanas? Ken kayatyo aya a paragsaken ti puso ni Jehova? Sigurado a ni Satanas dina kayat nga ayatenyo ni Jehova iti amin a pusoyo. Siaagum a kayatna nga “aramidenyo ti kayatyo,” tapno paragsakenyo ti bagiyo met laeng. Asino ti parparagsakenyo, ni Jehova wenno ni Satanas? Usigenyo a naimbag daytoy.
13. No dedikado ken bautisadokayon, ania a salsaludsod ti rebbeng nga iyimtuodyo iti bagiyo?
13 No indedikaryon ti bagiyo iti Dios ken insimbolo daytoy babaen iti bautismo iti danum, ti aya kurso ti panagbiagyo ipakpakitana a ti pusoyo ket pudno a kukua ti Dios? Sadino ti nakaisentruan dagiti interesesyo, dagiti panagayatyo? iti kadi pannakaala ti baro a kotse? panagsapul ti kuarta tapno makagatang kadagiti kawkawes ken dadduma pay a personal a bambanag? Makin-interes ti umun-una—ti interesesyo wenno ti intereses ni Jehova? Pudno kadi a simmungbatkayon iti panagapelar ni Jehova nga itedyo ti pusoyo kenkuana?
14. (a) Ania a nagpateg a gameng ti adda kadagiti agtutubo? (b) Apay a naladingit no ti agtutubo dina laglagipen ti Namarsuana?
14 Nupay dagiti natataengan ad-adu ti kapadasanda ken kaaduanna ad-adu ti kinasiribda, dagiti agtutubo ti addaan met ti nagpateg a kinabaknang a mausarda a pangparagsak iti Dios. “Ti dayaw ti agtutubo a lalaki isu ti kinapigsada,” kuna ti Biblia. (Proverbio 20:29) Gapuna usarenyo ti pigsayo itan. Laglagipenyo ti Namarsuayo “sakbay ti idadateng dagiti dakes nga aldaw” ti kinalakay inton ti bagi kumapsuten ken dagiti organona kumapuydan ket saandan nga agandar a nasayaat. Anian a nakalkaldaang para iti maysa a tao a dina linaglagip ti Namarsuana iti kinaagtutubona ket inton lakayen awanen ti aniaman a pangirekomendarna iti bagina iti Dios! Isu dayta ti “kinaubbaw dagiti kinaubbaw!” (Eclesiastes 12:1-8) Ngarud, sisisirib, laglagipenyo ti Namarsuayo bayat nga addaankay ti pigsa ken bileg. Mangibangonkayo ti maysa a rekord ti matalek a serbisio ti Dios, a manglaglagipto kadakayo iti paborable a panangukom, wen, ti biag nga agnanayon.—Hebreo 6:10-12; Eclesiastes 12:13, 14.
Pinaragsakda ti Puso ti Dios
15. Ania nga ulidan idiay Biblia ti adda maipapan kadagiti agtutubo a nangusar iti pigsada iti serbisio ti Dios?
15 Ti Biblia napno iti ulidan dagiti agtutubo a nangusar iti “dayaw”—ti pigsada—iti serbisio iti Dios. Dagiti “agtutubo a lallaki” nga addaan kinaalibtak ken kinaparagsit ti nangespia iti Naikari a Daga. (Josue 6:22, 23; 2:15, 16, 23) Ni David, idi isu a mismo ti agtawen 20, ti nangibaon iti “sangapulo a lallaki nga agtutubo” tapno dumawat ti pabor ken Nabal. (1 Samuel 25:4, 5) Idi dagiti Judio iti sidong ni gobernador Nehemias imbangonda manen ti bakud ti Jerusalem nga agpegpeggad iti pannakarautda, asino ti nangaramid iti napeggad, narigat a trabaho? “Ti kagudua dagiti agtutubo a lallaki,” inlawlawag ni Nehemias, “nagaramidda iti aramid ket ti kagudua kadakuada iniggamanda dagiti pika, dagiti kalasag, ken dagiti bai, ken dagiti kabal.” (Nehemias 4:16) Ket idi a pinasag ti Dios ni Ananias ken ni baketna a Sapira gapu ta nagulbodda, “dagiti agtutubo a lallaki” ti nangiruar ken nangitanem kadakuada.—Aramid 5:5, 6, 10.
16. Ania a naespirituan nga aramid ti nakipasetan dagiti agtutubo idi napalabas?
16 Pudno, makaparagsak iti puso ni Jehova no dagiti agtutubo ipaayda dagiti bagbagida iti aniaman a serbisio a kasapulan iti dayta a kanito. Kaskasdi nairaman dagiti agtutubo kadagiti naespirituan nga ar-aramid a makasapul iti ad-adda pay ngem ti nainlasagan a pannakabalin ken pigsa. “Siak ubingak,” binigbig ni Eliu. Nupay kasta, isut’ inusar ni Jehova a mangtubngar ken ni Job. (Job 32:4-6) Ni Samuel ket maysa met nga “ubing” idi nangrugi nga agserbi idiay tabernakulo ni Jehova sadi Silo. (1 Samuel 2:18) Maysa idi “a balasitang,” numan pay maysa nga adipen iti sangakabbalayan ni Naaman, ti awan butengna a nangipakaammo no aniat’ maaramidan ti pammadto ni Jehova. (2 Ar-ari 5:2-4) Idi tinudingan ni Jehova ni Jeremias kas mammadto, kuna ni Jeremias: “Siak ubingak.” (Jeremias 1:5, 6) “Ket no maipapan kadagitoy nga ubbing, uppat kadakuada”—ni Daniel ken dagiti tallo a Hebreo a kakaduana—anian a naisangsangayan nga ad-adipen ni Jehova ida a nakayawan idiay Babilonia! (Daniel, kapitulo 1 ken 3) Ti kaanakan ni Pablo, daydi “bumaro,” ti situtured a nagtignay a maipaay ken ulitegna. (Aramid 23:16-22) Sa adda met daydiay agtutubo a ni Timoteo, a manipud kinamaladagana naammuanna dagiti nasantuan a sursurat ket inusarna ti kinaagtutubona iti serbisio ni Jehova.—2 Timoteo 3:15; Filipos 2:19-23; 1 Corinto 4:17.
Panangparagsak ti Puso ti Dios Itatta
17. Apay a manamnamatayo ti pannakakita kadagiti agtutubo itatta a mangparparagsak ken Jehova, ken kastatayo aya?
17 Ngem saan laeng a dagiti agtutubo ti napalabas ti nangparagsak iti puso ti Dios gaput’ matalek a serbisioda. “‘Ket maaramidto kadagiti maud-udi nga aldaw,’ kuna ti Dios, ‘Ibuyatkonto ti espirituk iti amin a lasag, ket dagiti annakyo a lallaki ken babbai agipadtodanto ket dagiti babbaroyo makakitadanto kadagiti parparmata.’” (Aramid 2:17; Joel 2:28) Ngarud nainkalintegan laeng a namnamaentayo ti pannakakita a kadagiti maud-udi nga aldaw adu nga agtutubo a Kristiano ti mangparparagsak ken ni Jehova. Ket agpayso a kasta! Nupay dagiti agtutubo a Saksi ket addaanda met kadagiti biddut, ta awan met uray maysa nga awanan biddut kadatayo, adu dagiti nasayaat ti ar-aramidda kas Kristiano. Maseknanda iti panangparagsakda iti puso ni Jehova.—Proverbio 27:11; 3:1, 2.
18, 19. Ania a trabaho ti kasapulan a maaramid ita, ken apay a maibagay dagiti agtutubo iti dayta?
18 Kadagitoy maud-udi nga al-aldaw, pagayatan ni Jehova a maysa a naindaklan a sangalubongan a pammaneknek ti maipaay maipapan iti Pagarianna, a ramanen dayta ti dakkel a panagregget. (Mateo 24:14) Dagiti Kingdom Hall a pagdaydayawan kasapulan a maibangonda, agraman dagiti dadakkel a pasdek a maipaay kadagiti asamblea sirkito. Kadagiti adu a pagilian, ad-adu pay nga espasio ti paktoria a maipaay iti panagiyimprenta ti literatura ti Biblia ti kasapulan, agraman dagiti kanayonan a pagianan kadagiti pagtaengan a Bethel. Ti panangipaay kadagitoy baro a pasdek kasapulanna ti adu a trabaho a panagibangon, ket kas iti panangibangon iti bakud idi kaaldawan ni Nehemias, dagiti agtutubo nga addaan pigsa ti mangar-aramid iti kaaduan a trabaho.
19 Dagita nga agtutubo ti mangar-aramid met ti kadakkelan a paset ti nadagsen a pisikal a panagtrabaho a kasapulan iti panagimprenta, panagaramid ti libro, ken panagipatulod iti rinibo a tonelada a literatura ti Biblia iti tinawen. Kinapudnona, idiay hedkuarter dagiti Saksi ni Jehova idiay Nueva York, agraman idiay Watchtower Farms, addada nasurok a 1,400 nga agtutubo a 25 años ken ub-ubing pay. Ket ti serbisioda saan a limitado kadagiti pisikal a trabaho bayat iti lawas; iti ngudo ti lawas makiramramanda met iti trabaho a panangaskasaba iti binalaybalay ken kadagiti Nakristianuan a panaggigimong a kadua dagiti lokal a kongregasionda. Anian ti panangparparagsakda iti puso ni Jehova!
20. (a) Ania a paset ti adda kadagiti agtutubo iti ministerio a panagpayunir? (b) Ania a salsaludsod ti rebbeng nga iyimtuod dagiti agtutubo nga awan pay iti amin-tiempo a ministerio kadagiti bagbagida?
20 Idiay Estados Unidos, ti makipagtartrabaho a kaasibay dagitoy nga agtutubo isu dagiti nasurok a 12,700 a dadduma pay a kaedadda nga agserserbi kas regular a payunir a ministro. Iti dadduma a paset ti lubong, pinulpullo pay a ribo dagiti agtutubo nga agpaypayunir. No maysakay nga agtutubo nga awan pay iti amin-tiempo a ministerio, mabalin kadi a pagbalinenyo a kalat ti inkayo panangipangpangruna ken ni Jehova iti panagbiagyo, imbes a nalabit pampanunotenyo laeng ti pannakagun-od iti trabaho a nasayaat ti pagsuelduanna, kalpasanna mangasawa ken maaddaan iti pamilia? Matartarusanyo aya ti naindaklan a sapasap a salisal wenno isyu? Pudno aya nga il-iliwenyo a makita a ti nagan ti Naindaklan a Namarsuatayo ket madalusanto iti isuamin a pakaumsianna? No kasta, saan aya a maiyanatop laeng nga aramidenyo ti amin a kabaelanyo iti serbisio ni Jehova? Ket saan kadi a ramanen dayta, uray ti kaaduan pay kadakayo, nga agboluntario nga agserbi idiay pagtaengan a Bethel wenno makiraman iti trabaho a panagpayunir?
21. (a) Iti ania nga awis manipud ken Jehova ti rebbeng a sungbatanyo, ken kasano? (b) Apay a sitatalektayo nga adu pay kadagiti agtutubo ti sumungbat iti awis ni Jehova a kas ni Isaias?
21 Denggenyo! Mangaw-awis ni Jehova, wen, agap-apelar kadakayo, a mangipaaykayo iti sungbat kadagiti nagdakes a panangum-umsi ni Satanas. Mangngegyo aya, kas ken Isaias, nga agim-imtuod ni Jehova: “Asino ti ibaonkonto, ken asino ti mapan a gapu kadatayo?” Apay a dikay agmasirib ket sumungbatkayo a kas ken Isaias: “Adtoyak! Ibaonnak.” (Isaias 6:8) Siinanamakami nga adu pay kadakayo nga agtutubo ti sumungbat agsipud ta ikarkari ti Sao ti Dios: “Ti ilim itulnogna ti bagina a siaayat iti aldaw iti puersa militarmo. . . . Addaanka iti buyot dagiti agtutubo a lallaki [ken babbai] a kas linnaaw.” (Salmo 110:3; 148:12, 13) Ket inton sumungbatkayo, maaddaankayto iti rag-o a mangammo a ni Jehova ti mangpalpaliiw ken manganamong—a dakayo ket parparagsakenyo ti pusona!
KAHON TI REPASO
◻ Apay a ti wagas a panagbiagtayo napateg ken Jehova?
◻ Apay a nainsiriban ti panangparagsak ti puso ni Jehova?
◻ Kasanotay a maipakita nga impaaytay ti pusotayo ken Jehova?
◻ Asino idi napalabas ti nangparagsak ti puso ni Jehova, ken kasano?
◻ Asino dagiti mangparparagsak ti puso ni Jehova itatta, ken kasano?
[Blurb iti panid 17]
No agsalungasing dagiti agtutubo iti linlinteg ti Dios, apitenda dagiti napait a pagbanaganna kamaudiananna
[Ladawan iti panid 18]
Pinaragsak dagiti agtutubo ti puso ti Dios babaen ti itutulongda a nangibangon manen kadagiti bakud ti Jerusalem