‘Panangsarak ti Makaay-ayo a Sasao, Umiso a Sasao’

“TI MANANGUMMONG sinukimatna tapno sarakenna dagiti makaay-ayo a sasao ken ti panangisurat kadagiti umiso a sasao ti kinapudno.” (Eclesiastes 12:10) Anian a nagsudi ‘dagiti makaay-ayo, umiso a sasao’ a naibatay iti naipaltiing a Kasuratan! Naiyarigda kas “mansanas a balitok nga adda iti iniket a pirak,” a nakaar-arte ken nakadaydayaw iti aniaman nga okasion ken di magatadan kadagiti makapadukot a kasasaad.​—Proverbio 25:11.

Iti kaaldawantayo ti Naindaklan a Manangummong, a ni Jesu-Kristo, impaayna dagiti naespirituan a kinabaknang a nalablabes pay ngem dagidiay tinagiragsak ti ili ti Dios iti sidong dagiti ar-ari nga Israelita idi ugma. (Mateo 12:42) Iti daytoy siglotayo, dagiti makaay-ayo, umiso a sasao ti kinapudno a mangsaklaw ti tunggal paset ti panagbiag maidatdatagda kadagiti publikasion ti Watch Tower Society ken maiwarwarasdan iti adu a pagsasao. Adu a pamilia ken indibidual ti nakaurnongen iti mismo a pagtaenganda ti libreria dagiti mapagtalkan a reperensia a mangisensentro iti Biblia. Mainayon pay, kaaduan a kongregasion dagiti Saksi ni Jehova addaanda kadagiti nagsasayaat a libreria a maus-usar kadagiti Kingdom Hall da.

Kaskasdi, ti panangsarak kadagiti makaay-ayo, umiso a sasao a kasapulan iti partikular a situasion kalikagumanna ti panagsukimat. Iti panangbigbig iti daytoy, manipud karrugi ti historiana, mangipabpablaaken ti Watch Tower Society kadagiti indise kadagiti pagbasaanna.​—Kitaenyo ti kahon iti pinanid 28 ken 29.

Baro a Pagannurotan

Ti tawen 1985 inrugina ti baro a kapitulo iti historia ti Watch Tower Publications Indexes. Dagiti siam nga immun-una nga Indexes napagkaykaysa ken napagtutunosda iti maymaysa a tomo a saklawennat’ manipud 1930 ingganat’ 1985, maysa a proyekto a kinasapulanna ti panagregget a 14 a tawen ti tao. Dagiti gunggona iti kasta a maymaysa-tomo nga Index a mangsaklaw ti adu a tawtawen ti nangiturong idi 1986 iti maysa a baro a pagannurotan, ti panangipablaak ti napagkaykaysan nga Indexes manipud idin. Kada tawen, masansan a bayat ti uppat nga agsasaruno a tawen, maysa a napagkaykaysan a broshur nga Index ti mangsaklaw ti maysa, dua, tallo, ket kalpasanna uppat a tawtawen. Tunggal lima a tawen maysa a natangken abbungna nga Index ti mamagkaykaysa amin nga Indexes manipud 1986 nga agtultuloy, kas ti 1986-90, 1986-95, ken agtultuloyen. Gapu itoy, saanen a nesesita ti panagkonsulta iti nasursurok ngem tallo nga Indexes: ti 1930-1985 Index, ti agdama a natangken abbungna nga Index, ken ti agdama a brochure.

Index Naisagana a Sipapanunot Kadakayo

Ti umuna a seksion ti tunggal Index isu ti indise ti tema. Iti panangisagana ti indise ti tema, dua a salsaludsod ti naimutektekan: (1) Ania nga impormasion ti rebbeng maiyindise? (2) Sadino ti mabalin a papanan ti maysa a pangbirukan iti dayta nga impormasion?

Kas maysa a managbasa, mammano nga interesadokayo a mangkita ti nakabasbassit a komento iti maysa a tema. Yantangay kaaduanna nga agsapsapulkay ti impormasion a pudno a napateg wenno talaga a nausar, daytoy ti napili a maipaay iti panangiyindise. Ngem ti kasta a material saan a kasapulan a nakalawlawa. Ti entrada ti Index mabalin a tukoyenna ti uray maysa laeng a sentensia, kas ti panangiyebkas ti pagannurotan ti Sosiedad iti maysa a banag. Wenno mabalin a saklawennat’ intero nga artikulo, uray pay intero a publikasion. Ngem, masansan, ti entrada mangiturong kadagiti sumagmamano a parapo a pannalaysay.

Ti saludsod no sadinot’ pagparangan dagiti reperensia idiay Index ket importante met, ta nagdudumat’ panagpampanunot dagiti managbasa ken kumitada iti sidong dagiti nadumaduma a paulo. Kas pangarigan, ti impormasion maipapan iti Torre ti Babel agparang iti sidong ti TOWER OF BABEL. Ngem dadduma a managbasa mabalin a kumitada iti sidong ti BABYLON, ARCHAEOLOGY, wenno iti LANGUAGE(S), depende iti aspeto ti tema a makapainteres kadakuada. Gapuna, nagreggetan ti panangulit kadagiti reperensia iti sidong dagiti nadumaduma a maiyanatup a paulo, a pampanunoten a dagiti managbasa ket nadumaduma ti edad ken nalikudanda, ket addaandat’ nagduduma a panggep.

No Kasano a Matulongannakayo ti Index

Kas maysa a mapa ti Index maserbiannakayo laeng no usarenyo dayta. Aniat’ namnamaenyo a makita idiay indise ti tema wenno iti seksion ti indise ti Kasuratan a sumarsaruno iti dayta?

Dagiti reperensia idiay seksion ti indise ti Kasuratan isuda dagiti material a mangilawlawag ti sinaggaysa a bersikulo. Mabalin a makakitakayo ti pannakailawlawag ti setting a sadiay naiyebkas dagiti sasao ti maysa a teksto, no apay a daytat’ naisurat, no asino ti pagaplikaranna, wenno ti kaipapanan dagiti indibidual a sasao wenno grupo ti sasao. Ti naidawat iti modelo a kararag ni Jesus mabalin a maysa a pangarigan: “Ket dinakam iyeg iti pannakasulisog.” (Mateo 6:13) Apay a kastat’ pannakaisaona? Ti indise ti Kasuratan matulongannakayo a mangammo.

Ti indise ti tema, kas isingasing ti naganna, ket indise nangnangruna kadagiti tema imbes a kadagiti sasao wenno grupo ti sasao. No padpadasenda a sapulen ti maysa nga artikulo babaen iti paulona, sumagmamano kadagiti managbasa marigatanda a mangbiruk iti dayta. Mabalin a rumsua daytoy a parikut no awan sao iti paulo a talaga a mangilasin iti tema. Ti pangarigan ket mabalin a ti artikulo a “Kasano Kaadu ti Nalabes?,” a mangisalsalaysay kadagiti epekto ti alkohol. Iti pannakalagip kadagiti linaon ti artikulo, mabalinyo ti agturong iti ALCOHOLIC BEVERAGES wenno DRINKING idiay Index, ket makitayo a daytat’ natukoy sadiay.

Ti Index mabalin a naisangsangayan ti pategna iti panagsapul ti impormasion kadagiti sangsanguenyo a parikut. Kas pangarigan, no ti maysa ket naganak, marikriknayo kadi no maminsan a mapapaaykayo iti panagreggetyo a mangdisiplina ken mangiturong kadagiti annakyo? Iti sidong ti CHILDREN makakitakayo kadagiti adu a reperensia a mangipaay ti pannakaawat iti panagpampanunot, rikrikna, ken dagiti kasapulanda. Kaskasdi, iti sidong ti paulo a CHILD TRAINING, masarakanyo dagiti reperensia maipapan iti panangisuro ken panangdisiplina iti amin nga aspetoda.

No maminsan ti Watch Tower Society makaaw-awat kadagiti insurat a panagkalikagum ti tulong a mangresolbar kadagiti parikut ti pagassawaan wenno salsaludsod maipapan iti kinaumiso dagiti dadduma a kinasinged ti agassawa. Nupay mabalin a makasungbat ti Sosiedad, ti isu met laeng a sensitibo, praktikal a balakad ket masarakan babaen iti panagturong iti paulo a MARRIAGE, babaen kadagiti subtitulo a “problems” ken “sex” wenno “sexual relations,” ken panangkita kadagiti nailista a reperensia.

Maaw-awat met dagiti surat manipud kadagidiay agsagsagaba iti panagleddaang wenno pannakariribuk ti panunot. Ti makaisublit’ talek ken tulong a maipaay babaen ti koreo ket mabalin a nadardaras a masarakan iti kabukbukodanyo a libreria wenno daydiay adda iti lokal a Kingdom Hall babaen ti panangsukimat kadagiti paulo a DEPRESSION ken MENTAL ILLNESS idiay Index. Dagiti artikulo a mangilawlawag no kasano a parmeken dagiti sakit ti isip, dagiti adda a panangagas, ken dagiti makatukay-rikna a kapkapadasan dagidiay nagledleddaangen ket nadakdakamatda met.

Maysakay aya nga agtutubo? Mabalin a maseknankayo maipapan iti panagasawa, panagbiag ti pamilia, eskuelaan, ti relasionyo kadagiti dadakkelyo, ken dadduma pay. Ti kangrunaan a paulo a YOUTHS addaan kadagiti reperensia iti sidong amin dagitoy a subtitulo ken ad-adu pay. Mainayon pay, dagiti paulo kas ti RELATIONSHIPS, SCHOOLS, CAREER, ken COURTSHIP adut’ maipaayda. Para kadagiti report idiay eskuelaan, ti Index maiturongnakayo met kadagiti nasasayaat a materiales maipapan iti nakaparsuaan, kadagiti siensia, droga, ekonomia, ken adu pay a dadduma a tema.

Dagiti Gunggona Para kadagiti Amin nga Edad

Maysa a 81-años a baket ti nagsurat: “Dagiti libro ken magasin arigda lat’ pagminasan ti balitok kadagiti impormasion ken naespirituan a pammigsa​—ket ti Index iruarna dagitoy a balitok.” Maysa nga ina a dagiti annakna agtawendat’ walo ken siam ti nagkuna: “Itan pampanunotek no kasano komat’ panagtignayko no awan dayta. Daytat’ nangiturong kaniak kadagiti sungbat kadagiti adu a salsaludsod a pinampanunotko iti nakabaybayag ken pinagbalinna a nalaklaka ti panagsukimatko bayat ti panagsagsaganak kadagiti panaggigimong ti kongregasion. . . . Kayatko met nga ibaga kadakayo no kasano a daytoy a publikasion nakatulong iti panagadal ti Biblia ti pamiliami. . . . No ikkan ni lakayko dagiti babbai ti panagpili no aniat’ kayatda nga aramiden, masansan a kaykayatda ti panagsirarak babaen iti panagusar iti daytoy Index. Tagiragsakenda ti agpili kadagiti tema a paginteresanda, kas kadagiti paboritoda nga an-animal wenno nagduduma a pagilian, ket mabalinanda ti agsapul kadagiti impormasion a bassit laeng ti tulong. Daytoy met ti nakaisuro kadakuada a ti panagadal ti Biblia ket makaparagsak.”

Ti panangsarak kadagiti makaay-ayo a sasao ken umiso a sasao ti kinapudno addaan kadagiti di magatadan a gunggona. Ti panagregget ti Manangummong nangipaay kadagiti gunggona nga aglablabes ngem ti orihinal a panggepna, ta dagita a sasao nagserbida a mangparegta ken nangiwanwan kadagiti ad-adipen ni Jehova agingga itoy nga aldaw. Dagiti met umasping a panagreggettayo mangyegda kadagiti bendision ni Jehova, nga addaan kadagiti resulta nga awan inggana.​—Proverbio 3:13-18, 21-26.

[Kahon/Ladawan iti panid 28, 29]

Dagiti Immuna nga Indise

Idi 1902 ti espesial nga edision ti Holman Parallel Edition Bible naaramid nga agpaay iti Watch Tower Society, ket daytat’ naglaon ti nakaad-adu a tulong nga insagana ti Sosiedad. Ti apendisena naglaon agpadpada kadagiti indise ti tema ken Kasuratan kadagiti serie ti Millennial Dawn a liblibro (a ti kamaudianan naawagan kas Studies in the Scriptures), dagiti dua a kangrunaan a polieto, ken ti Zion’s Watch Tower para ti 1879-1901.

Ti Berean Bibles ti 1907 ken kalpasan dayta nangipaay ti umas-asping nga indise. Dagitoy ti nasukatan idi 1922 babaen kadagiti nalawlawa nga indise kadagiti amin a publikasion ti Sosiedad. Dagitoy nga indise nagparangda kadagiti maudi a pito a tomo ti naiyimprenta manen a Watch Tower (1879-1919). Agingga iti daytoy nga aldaw ti naud-udi isuda pay met laeng ti kangrunaan a pamay-an a pagsapul kadagiti materiales a naiparang kadagiti immuna a publikasion ti Watch Tower Society.

Kadagiti sumaganad nga 40 a tawtawen, nupay kasta, ti panagsirarak kadagiti publikasion a nairuar kalpasan ti 1919 ket maaramidan babaen ti panagusar kadagiti nasinasina nga indise iti likudan dagiti libro ken iti maudi a ruar ti magasin kada tawen. Ngem idi 1959 imbaklay ti Sosiedad ti dakkel a trabaho a mangipaay ti indise ti tema ken Kasuratan iti maymaysa a tomo para kadagiti publikasionna iti Ingles. Maysa a bunggoy ti naurnong nga inramanna dagiti kamkameng ti headquarters staff, dagiti misionero a nagturpos iti Watchtower Bible School of Gilead, ken uray pay dagiti agdaldaliasat a manangaywan manipud New York City. Kalpasan ti makatawen ket kagudua a naipamaysa a panagregget babaen kadagiti 18 a dedikado a trabahador, ti umuna a Watch Tower Publications Index, agraman kadagiti seksionna maipaay kadagiti tema a naisalaysay ken dagiti kasuratan a nailawlawag, a saklawenna ti 31 a tawtawen manipud 1930 ingganat’ 1960, ket nairuar. Daytat’ damo a nairuar kadagiti maragsakan a managdengngeg iti 1961 United Worshipers Assemblies.

Nanipud idin, kada tawen nga agparangen ti Watch Tower Publications Index iti Ingles, nga adda natangken-abbungna a napagkaykaysa nga Index kada lima a tawen.