IBLENG, LUGIT

Ti ibleng ti tattao, tumatayab, ken an-animal ket inrepresentar ti nagduduma a sao kadagiti lenguahe iti Biblia. Iti Kasuratan, masansan a naaramat ti ibleng iti piguratibo a pamay-an.

Adda idi “pribado a lugar” wenno “pagiblengan” a sidadaan nga aramaten dagiti soldado ti Israel iti ruar dagiti pakarso ti buyotda, ket gaburanda ti iblengda. (De 23:12-14) Daytoy ti nangtaginayon iti kinadalus ti buyot iti sanguanan ni Jehova ken nakatulong met a manglapped iti panagsaknap dagiti makaimpektar a sakit nga iyakar dagiti ngilaw.

Ti maysa kadagiti ruangan ti Jerusalem isu ti “Ruangan dagiti Gabsuon a Dapo,” a naawagan iti “Ruangan ti Ibleng” iti adu a Biblia. (Ne 2:13; 3:13, 14; 12:31) Sangaribu a kasiko (445 m; 1,458 pie) ti kaadayona manipud iti daya ti Ruangan ti Ginget, ket adda ngarud dayta iti abagatan ti Bantay Sion. Nalabit kasta ti naipanagan iti daytoy a ruangan gapu iti basura a namuntuon iti Ginget ti Hinnom nga adda iti baba ken sadiay met nga agturong daytoy a ruangan; mabalin a nairuar ti basura ti siudad babaen iti daytoy a ruangan.

Ti sumagmamano kadagiti agakar-akar a tattao mabalin nga inaramatda ti ibleng kas sungrod. Idi iyakto ni Ezequiel ti maysa a naimpadtuan a buya maipapan iti pannakalakub ti Jerusalem, nagkedkedanna ti bilin ti Dios a pagsungrodna ti ibleng ti tao iti panaglutona iti tinapay. Siaayat a pinalubosan ti Dios nga agaramat ketdi iti ibleng ti bakbaka. (Eze 4:12-17) Agparang nga ipakita daytoy a saan a normal nga aramid dayta iti Israel.

Naaramat ti ibleng kas ganagan a pangpadam-eg iti daga. Agparang a napaglaok ti garami ken ibleng iti “lugar ti ibleng,” a mabalin a ti garami ket imbaddebaddek sadiay dagiti animal. (Isa 25:10) Ti maysa a pamay-an a panangabuno iti kayo a higos ket ‘kalian ti aglawlawna ken mangikabil iti ganagan.’​—Lu 13:8.

Ibilang ti kaaduan a ti ibleng ket makaparurod a basura, banag nga ibelleng. Ti mangipakita a makaparurod dayta ken kasta met a mangipaganetget iti panangikkat ket isu ti sasao ni Jehova maipapan iti nasubeg a balay ni Ari Jeroboam ti Israel: “Pudno a mangaramidakto iti naan-anay a panangsagad iti likudan ti balay ni Jeroboam, kas iti panangikkat ti maysa iti ibleng agingga a maibelleng dayta.”​—1Ar 14:10.

Ti panamagbalin iti balay ti maysa a tao kas publiko a pagiblengan ket kadakkelan nga insulto ken maysa a dusa. (Esd 6:11; Da 2:5; 3:29) Bayat ti pannubok iti kinadios iti tapaw ti Bantay Carmelo, ni Elias rinurodna dagiti mammadto ti di mangipangpangag a ni Baal babaen ti panagkunana: “Mabalin nga adda banag a pakaseknanna, ken addaan ibleng ket masapul a mapan iti pagiblengan.” (1Ar 18:27) Idi agangay imparugpo ni Jehu ti balay ni Baal, ket “pinagtalinaedda dayta a nailasin maipaay a kas dagiti pagiblengan.”​—2Ar 10:27.

Naaramat met ti ibleng wenno ganagan kas pangiladawan iti nakababain a panagpatingga ti maysa a tao wenno maysa a nasion. (2Ar 9:36, 37; Sal 83:10; Jer 8:1, 2; 9:22; 16:4) Impadto ni Jehova a bayat ti pannakisubangna iti nasnasion, saanto a madung-awan, maurnong, wenno maitabon dagidiay papatayenna, no di ket agbalinda a “kas ganagan iti rabaw ti daga.”​—Jer 25:31-33; idiligyo ti Sof 1:14-18.

Sigun iti Linteg, awan ti kanen ti padi a “daton gapu iti basol,” a ti dara dayta ket naipan iti santuario maipaay iti panangabbong. Ti bangkay ken ibleng ti animal ket mapuoran iti maysa a nadalus a lugar iti ruar ti pakarso. (Le 4:11, 12; 6:30; 16:27) Daytoy ket gapu ta awan aniaman a paset ti animal ti maaramat iti sabali pay a pakausaran wenno mabaybay-an nga agrupsa. “Nadalus” idi dayta, kayatna a sawen, nasantipikar ken Jehova ket ngarud kasapulan a mapuoran iti maysa a nadalus a lugar.​—Idiligyo ti Heb 13:11-13.

Rinaraem unay ni Pablo ti naespirituan a bambanag ken tinagipategna unay ti namnamana ken Kristo, ket indeklarana: “Maigapu kenkuana inawatko ti pannakaipukaw ti amin a bambanag ket ibilangko ida kas adu a basura, tapno magun-odak ni Kristo ken masarakanak a naikaykaysa kenkuana.” (Fil 3:8, 9) Ti Griego a sao a naipatarus ditoy a “basura” (skyʹba·lon) ipasimudaagna ti ibleng wenno bambanag a natedda iti padaya ken naibelleng manipud iti lamisaan. Uray no ti naud-udi a kaipapanan ti adda iti panunot ti apostol, ti panangibilangna iti “amin a bambanag” kas “basura” ipaganetgetna ti kasta unay a panangtagipategna iti pananggun-od ken Kristo ken iti pannakaikaykaysa kenkuana.​—Kitaenyo ti LUGIT TI KALAPATI.

Maipapan iti sasao a “makadurmen nga idolo,” kitaenyo ti IDOLO, IDOLATRIA (Panangmatmat Maipaay iti Idolatria).