Kinatarnaw iti Panagserbi iti Dios ti Kinapudno
“Isurom kaniak ti dalanmo, O Jehova. Kayatko ti magna iti kinapudno.”—SALMO 86:11.
1, 2. (a) Kasano a maiyilustrar ti sagana ti Dios a maipaay iti sangatauan? (b) Kasanot’ panangiladawan ti Kasuratan kadagiti ar-aramid ti Dios ken ti kinakillo dagiti tattao?
MENNAMENNAENYO a kasla magmagnakayo iti maysa a langalang a let-ang nga awan pulos biagna. Kalpasanna nakagtengkayo iti maysa a nagpintas a balay. Dayta ti addaan air-condition ken pagpapudotna no kalam-ekna, addaan pagayusan dagiti dandanumna, ken elektrisidadna. Dagiti reprihirador ken estantena ti napunno iti taraon. Ti sirokna naglaon kadagiti pagsungrod ken ti aglaplapusanan a dadduma nga abasto. Kunaenyo kadi nga amin dagita nakagtengda sadiay a por disgrasia? Agyaman kay kadi no ti makinkukua ket dawatenna ti panagyanyo iti daytoy a balay ket tagiragsakenyo dayta?
2 Bueno, daytoy nakaay-ayat a daga a pagtataengantayo ket maiyarig iti dayta a balay. Nabayagen sakbay ti pannakaparsua ti tao, insaganan ti naayat a Diostayo daytoy a daga nga agbalin a pagtaengantayo ket impaayna ti isuamin a kasapulantayo a mangparagsak kadatayo. (Isaias 45:12, 18) Ditay kadi rebbeng ti agyaman iti daytoy managparabur a Manangipaay? Isu Daydiay nangipaltiing ti pannakaisurat dagiti sasao ti Biblia idiay Hebreo 3:4: “Ta amin a balay adda nangbangon, ngem ti nangbangon kadagiti isuamin a bambanag isu ti Dios.” Ti nakababain a banag a ta ti tao a naagum taktakawanda ken daddadaelenda ti ar-aramid ti Dios ditoy daga.—Deuteronomio 32:3-5.
3. Aniat’ kuna ti Biblia maipapan iti kinamanagparabur ni Jehova ita ken iti masanguanan?
3 Uray kadagiti bumusbusor iti kinapudno, maikuna ni apostol Pablo maipapan iti Dios: “Ngem saanna a binaybay-an nga awan makasaksi kenkuana a nagaramid ti naimbag, ken inikkannakayo kadagiti tudtudo ti langit ken nabunga a tiempo, a pinunnona a naan-anay dagiti puspusoyo iti taraon ken ragsak.” (Aramid 14:17) Anian nga ad-adda pay a bendisionan ni Jehova dagidiay agserbi kenkuana iti kinatarnaw! Nupay dagiti rigrigat ken babantot kadagitoy “maudi nga al-aldaw” ti mangpadagsen kadatayo, adda dayta nadayag a namnama nga iti di mabayagen a masanguanan ni Soberano nga Apo Jehova sigurado a mangipaay iti aglaplapusanan a bangkete dagiti naimbag a bambanag para kadagidiay agayat kenkuana, a punasennanto ti lulua kadagiti amin a ruprupada.—2 Timoteo 3:1; Isaias 25:6-8.
Ti Pakaskasdaawan a Natauan a Kinasaririt
4. (a) Ania a parikut ti naipasango iti sumagmamano a sientista ti kompiuter? (b) Aniat’ kunaen ti Jeremias 33:2, 3 maipapan iti Nangaramid iti utek ti tao?
4 Iti sumagmamano a tawenen, padpadasen dagiti sientista ti makapagaramid kadagiti kompiuter a makapagpanunot. Ngem aminenda itan a nalapdanda manipud pay umuna nga addangda. Apay? Aminendan a ti pannakasangal ti natauan a mata ti nakaabakandan. No saanda a matulad ti mata, kasanonto ngarud a marugianda ti utek, ken kasanonto pay a mapataudda ti pakultad ti isip? Anian a nakaskasdaaw ti utek ti tao! Iti kada segundo, sangagasut a milion a saggabassit nga impormasion ti maibuybuyat iti daytoy nga organo tapno masagat, makapagpili, ken maiyaplikar iti intelihente a panagbiag. Uray ti kasasayaatanen a kompiuter di pay makaasideg a maiyarig iti dayta. Anian a nagsayaat a pammaneknek iti aglaplapusanan a kinasirib ti naayat a Dios a nangaramid kadatayo! Maragsakantayo ta ti Nangaramid ken Nangbukel kadatayo, a ni Jehova a Dios, ti nangipaay kadatayo iti kinasaririt ket mabalintay nga usaren dagiti utektayo iti panangadal kadagiti “dadakkel ken narikut a bambanag” nga ipanayagna kadatayo ti mismo a tiempo ken pamay-anna.—Jeremias 33:2, 3.
5. (a) Ania a milagro ti panagdakkel ti maar-aramid laeng kadagiti tattao? (b) Kasano a maiyanatop dagiti sasao ni Eliu?
5 Ti milagro ti natauan nga utek ti mangrugi idiay pay laeng aanakan, a dagiti selula ti utek ti mangrugi pay laeng a maporporma tallo a lawas kalpasan ti pannakainginaw. Dagitoy ti agadu a pugso-pugso, a no maminsan aginggat’ kakapat a milion a selula iti kada minuto. Kalpasan ti pannakaipasngayna, ti utek ti maladaga magtengna ti mamitlo ti kadakkelna ngem iti dati iti umuna a tawenna, a mangipakita a nakaad-adayo ti nakaidumaanna manipud iti utek ti aniaman nga animal, agraman pay ti sunggo. Di agbayag ti maladaga makapagsaonton, makapagpanunot kadagiti bambanag, maapresiarnanton dagiti moral nga isyu ken naespirituan nga ipatpateg. Kasano ti itataud dagitoy a kinasirib manipud awan ti nakemna nga an-animal? Maiyanatop unay, kinuna ni Eliu maipapan iti Diostayo ken ti Naindaklan a Manangaramidtayo: “Isu Daydiay mangisuro kadatayo a nangnangruna ngem kadagiti an-animal iti daga, ken nangaramid kadatayo a nasirsirib ngem kadagiti tumatayab kadagiti langlangit.”—Job 35:10, 11.
6. (a) Kasano a ti Kasuratan salaysayenna ti nakaskasdaaw a pannakasangal ti tao? (b) Kasano ti siaayat a panangusartayo iti inted-Dios a pannakabalintayo?
6 Daytoy a pagsidsiddaawan, ti kinasaririt ti tao, ti maitunos iti Genesis 1:27, a kunana: “Ket ti Dios pinarsuana ti tao a kaladladawanna met laeng, iti ladawan ti Dios pinarsuana; pinarsuana ida a lalaki ken babai.” Ditay kadi pagyamanan ti wagas a panangaramid ti Dios kadatayo? Nagyaman ni David. Indaydayawna ni Jehova, a kunkunana: “Agyamanakto kenka ta nakaam-amak ken nakaskasdaaw ti pannakaaramidko. Nakaskasdaaw dagiti ar-aramidmo.” (Salmo 139:14) Di aya rebbeng met nga idaydayawtayo ti Dios gapu iti dayta met laeng a rason? Mainayon pay, mabalintay nga usaren ti inted-Dios nga utek ken bagitayo iti intay panangsaranget iti karit nga inkabil ni Satanas iti sanguanan ti Diostayo. Mabalintay ti agserbi ken ni Jehova kas dagiti manangsalimetmet ti kinatarnawna.—Proverbio 27:11.
Salimetmetan a Sititibker ti Kinapudno
7, 8. (a) Ania dagiti makita a panaggiddiat iti kinapudno ken iti teoria? (b) Maipapan iti ebolusion, ania itan ti ibagbaga dagiti mannakaawat a tattao? (c) Apay a ti ebolusion mabalin a maikawing iti panamati imbes nga iti pammati?
7 Ti kinapudno masapul nga agballigi! Datayo a managayat ken ni Jehova masapul a salimetmetantayo a sititibker ti kinapudno bayat nga us-usarentayo dagiti pannakabalin ti panagpampanunottayo a mangpili iti dalan ti kinatarnaw. Ti kinapudno maipapan iti panamarsua naipasdeken. Daytat’ natibkeren. Naitakderan daytan ti suot iti adu a milenio. Iti nasursurok la bassit ngem maysa a siglon, dayta a naindaklan a kinaulbod, ti teoria ti ebolusion, ti sisasaganan a maiwaksi. Saantay laeng a kapanunotan dayta. Dayta ti nagnunummuanen ti adu a mannakaawat a sientista, dagiti abogado, imbestigador, ken dagiti dadduma pay a mannakaammo a tattao. Iti panangdakamatna iti karit “kadagiti prinsipio ti ebolusion, kas impaulog da Darwin ken dagiti dadduma pay,” ti The New York Times ti nanggupgop iti kasasaad babaen ti panagkunana: “Ti tay-ak ti nakagulgulo.” Ti adut’ pannakaammona a sientista nagsurat: “Aminenmi nga addada nagdadakkel nga abut iti ebidensia para iti ebolusion. . . . Wen, ti ebolusion ket maysa laeng a teoria. Ti panamati iti ebolusion, ngarud, ket maysa a panangipamatmat iti pammati.”
8 Ngem ti kadi panangawat iti ebolusion pudno a pammati? Kunaentay ketdi, a daytat’ maysa a nalaka a pannakaallukoy a mamati. Ti pammati ket addaan natibker a pundasion. Ibaga ti Hebreo 11:1 kadatayo a dayta “ti nabatad a panangipakita iti kinaagpayso.” Ti ebidensia a ti rekord ti Biblia ket naibatay kadagiti kinaagpayso ken isut’ kinapudno, ti aglaplapusanan. (2 Timoteo 3:16, 17; Roma 15:4) Iti kasumbangirna, bayat nga ad-adda nga imbestigaren dagiti ebolusionista dagiti bambanag, ad-adda met nga ad-adu ti makalida a panagsusuppiat a dagitoy ti padpadasenda nga ikalintegan kadagiti nalaka a maallukoy.
Adda Kadi Idi ti Sunggo-a-Tao?
9. Kasano kawadwad dagiti tedtedda ti sunggo-a-tao, ket sadino ti rebbeng a pakaikabilanda?
9 Iti 130 a tawtawenen a panagsapsapulda kadagiti tedtedda (fossils) iti mapukpukaw a kawing nga adda iti nagbaetan ti sunggo ken ti tao, ti la adda kadagiti ebolusionista isu pay laeng ti nakaay-ay-ay a sumagmamano kadagiti tultulang. Sigun iti magasin a Science Digest, “amin dagiti pisikal nga ebidensiami iti natauan nga ebolusion ti mabalin pay laeng a maikabil, nga adu pay nabati a pagkargaan, iti uneg ti maysa laeng a lungon!” Awan duadua, dayta ti rebbeng a pakaikabilan dagiti ibagbagada nga ebidensia—a mapunitanen a siirut ti kalub dayta a lungon tapno din malaglagip!
10. Kasano ti kinapudno ti panangsangal manen dagiti artist iti sunggo-a-tao?
10 Dagidiay a retretrato kadagiti magasin maipapan iti sunggo-a-tao a maus-usar a pangsupsuportarda iti teoria ti ebolusion ti arigda laeng kadagiti ar-arapaap, a pinataudda laeng a maibatay kadagiti sumagmamano a tipping ti bangabanga wenno panga. Kas pangarigan, idiay panid 1 ti The New New York Times ti Agosto 16, 1985, adda nagparang sadiay a “panangiladawan manen ti maysa nga artist iti Amphipithecus, ti kaunaan kadagiti pagaammo a nangatngato a sunggo . . . nga isu ti nagtaudan dagiti tattao,” a mangipakpakita iti nabarbon nga ulona ken im-imana. Manipud ania ti nakabuklan daytoy? Kuna ti pakuyogna nga artikulo: “Ti makinlikud a paset ti makimbaba a panga . . . agraman ti tipping ti makinsango a panga a nasarakan kagudua a siglo sakbayna.” Ngem ti kadi interamente nga ulo, buok ken amin, ti pudpudno a nabukel manen a maibatay laeng kadagiti dua a kakasta a tipping? Ti artikulo ti nangadaw iti maysa nga antropologo idiay Harvard University a nangawag kadagitoy a tedtedda kas maysa a “naur-urnong a lawag iti naglawaan a kinasipnget.” Ngem pudno kadi a mabalinda a maipadis iti lawag?
11. Kasano a maiyaplikar ti Isaias 59:15 maipapan iti makunkuna a “sunggo-a-tao”?
11 Ti mabalin nga awagan dagiti dadduma a sabali pay a kasta a “naur-urnong a lawag” ket isu ti bangabanga ti Piltdown man. Daytat’ nangala iti pannakasentro ti ebolusionario a tukad iti agarup 40 a tawtawen ngem daytat’ naibutaktak idi 1953 kas naur-urnong a tiptipping dagiti tultulang, a dadduma a pasetda ti animal ken dadduma tao, a siuulbod a pinagkakapetda kas maysa a panangallilaw! Kadagiti sasao ni mammadto nga Isaias, maikuna met kadagitoy teoritikal a sunggo-a-tao: “Ti kinapudno awan.”—Isaias 59:15.
Maysa a Naimpadtuan a Katupagna
12. Ania a nakarimrimon a bambanag ti nakita ni Ezequiel?
12 Ti nadangkes a Kakristianuan itatta ti inladawan ti di matalek a Jerusalem idi ugma. Idi tawen 612 K.K.P. a ni Soberano nga Apo Jehova intedna ken ni Ezequiel ti maysa a sirmata nga inyakarna ti mammadtona manipud Babilonia a mapan idiay Jerusalem. Sadiay, iti paraangan ti templo, nakita ni Ezequiel ti makarimon a simbolo ti panagdaydayaw ti didiosen. Iti sumaganad isu ti pinagaramid ni Jehova ti maysa nga abut ket pinadakkelna dayta nga abut idiay bakud. Kalpasanna kinunana ken Ezequiel: “Sumrekka ket kitaem dagiti dakes a kinarimon nga aramidendanto.” Aniat’ nakitana? Apay, idiay kaungan a kukuarto iti balay a pagdaydayawan ken Jehova, “adtoy ti amin a kita ti agkarayam ken nakarimrimon nga animal, ken amin a didiosen iti balay ti Israel, a naiburikda iti bakud nga aglikmut.”—Ezequiel 8:1, 7-10.
13. (a) Ania nga umas-asping a kasasaad ti adda iti Kakristianuan itatta? (b) Kasanot’ panangmatmat ni Jesus iti salaysay ti Biblia maipapan iti panamarsua?
13 Kas maiyasping iti daytoy a sirmata, makitatayo ti makapakellaat a kasasaad kadagiti klero ti Kakristianuan ita. Iti kaaduan a pasetna, daytoy a “tao ti kinadakes” naglikudanna ti salaysay ti Biblia maipapan iti panamarsua. (2 Tesalonica 2:3) Wenno, kas kadagidiay apostata idi kaaldawan ni Ezequiel, nagreggetan dagiti klero nga ingamer ti ebolusion iti Biblia, a kunkunada a dagiti umuna a kapitulo iti Genesis ti buklen laeng dagiti sarsarita wenno pangngarig. Iti panangilaksid iti sientipiko a kinapudno a ti kalalakaan a panangilawlawag masansan nga isut’ pudno, kunada a ti salaysay ti Biblia ket nakasimsimple unay para kadakuada. Dagiti natatangsit a mamasiribda ti mangikalkalikagum iti maysa pay a banag nga ad-adda a nalalaing ken narikrikut. Intan-okda dagiti bagbagida a nangatngato ngem ni Jesu-Kristo, a tinukoyda ti literal a salaysay ti Genesis kas “kinapudno.”—Juan 17:17; Mateo 19:4-6.
14. Kasano a dagiti “lallakay” itatta napaayda a mangidadaulo iti arbanda, ket anianto ti resultana?
14 Iti sirmatana, nakakita ni Ezequiel ti “pitopulo a lallaki kadagiti lallakay iti balay ti Israel” nga agdaydayaw iti sanguanan dagitoy a naiburik nga “agkarkarayam ken nakarimrimon nga animal.” (Ezequiel 8:10, 11) Maiyasping daytoy kadagidiay moderno aldaw a klero a sipapanayag a kunkunada a ti tao ti naggapu manipud kakasta nga an-animal! Dagitoy a “lallakay” rebbeng nga isuda koma ti mangidadaulo iti arbanda iti dalan ti kinapudno. Ngem saan kadi a ti panangiladawan ni Jesus idiay Mateo 15:14 ti agaplikar kadakuada? Kuna ni Jesus: “Ta bulsekda a manangidalan kadagiti bulsek. Ket, no ti bulsek idalanna ti bulsek, agpadpadadanto a matnag iti abut.” Masarakandanto ti kasta nga abut iti “nakalawlawa a kinasipnget” a sadiay ti pagar-arikapan dagiti ebolusionista.
15. Kasano a dagiti klero a manamati iti ebolusion mangtedda ti kanayonan a pammaneknek kas paset “ti tao ti kinadakes”?
15 Sumaganad ni Jehova sinaludsodanna ni Ezequiel: “Anak ti tao, nakitam ti ar-aramiden dagiti lallakay iti Israel iti sipnget, tunggal maysa a tao iti siledna addaan didiosenna? Ta kunada, ‘Dinatayo makita ni Jehova. Ni Jehova binaybay-anna ti daga.’” (Ezequiel 8:12) Dagiti klero a mamatpati kadagiti natauan a pilosopia mangtedda iti umas-asping a pammaneknek a pasetda “ti tao ti kinadakes.” Tinallikudanda ti linteg ti Dios, a mangiraman iti libro ti Genesis. (Aramid 7:53) Inwanwanda dagiti arbanda a nagturong iti kinasipnget dagiti nailubongan a panagpampanunot, kas naipakita iti di mapaneknekan ken pulos di mapaneknekan a teoria ti ebolusion. “Inayatda ti sipnget a nangnangruna ngem ti lawag” ti kinapudno.—Juan 3:19.
16. Ania a panagasping ti makita iti nagbaetan “dagiti lallakay” idi kaaldawan ni Ezequiel ken iti adu a klero itatta?
16 No kasano a dagidiay a lallakay a Judio inyegda ti ulbod a panagdaydayawda idiay templo ti Jerusalem, kasta met dagiti ulbod a narelihiusuan a papangulo itatta padpadasenda ti kumpet iti pakailasinan wenno awag a “Kristiano.” Ngem ti panamati iti ebolusion ket saan a Nakristianuan. Ti panangawat iti daytoy a teoria ti nangtignayen kadagiti adu nga immadayo iti Dios. Saan la a nagbassitan ti naitulong dayta iti panagwaywayas, kinaranggas, ken terorismo iti maika-20 a siglotayo, a dagiti nasnasion ken indibidual inabrasada ti ebolusionario a replan a “dagiti laeng napigsa ti matda.” Insursuro ti ebolusion a ti tao ket awan responsabilidadda iti maysa a Namarsua. (Roma 9:28) Gapu itoy marikna dagiti tattao a siwayawayada a ‘mangaramid iti kabukbukodanda a banag,’ nga awan pulos panagpampanunotda iti Dios.
17. Kadagiti ania a bambanag a natnag dagiti klero a manamati iti ebolusion iti dakkel a biddut?
17 Dagiti narelihiusuan a papangulo a nangawat iti ebolusion kayariganna, kunkunada: “Dinatayo makita ni Jehova. Ni Jehova binaybay-anna ti daga.” Gaput’ panangabrasada iti daytoy a pilosopia, patienda nga awan sungsungbatanda kenkuana. Talaga, ti pannakaawatda iti Dios ti pinasipnget ti panamatida iti maysa a misterioso, di mailawlawag a Trinidad dagiti didios. Maitunos iti daytoy a panangmatmat, kayatda a maikkat dayta mismo a nagan ti maymaysa a pudno a Dios a ni Jehova, a dida pay balbaliksen a pulos dayta a nagan ken siinget nga ik-ikkatenda dayta manipud kadagiti patpatarusda iti Bibliada. Mabutengda a kumontra iti nalatak a nailubongan a pannursuro iti ebolusion.
18. Ania a panangidatag ti agur-uray iti teoria ti ebolusion ken dagiti manangsuportarna?
18 Apagpag-isu, kinuna ni Jehova babaen iti sabali pay a mammadto: “Agsipud ta daytoy nga umili umasidegda kaniak ket iti ngiwatda ken kadagiti bibigda dayawendak, ngem dagiti pusoda inyadayoda kaniak, ket ti panagbutengda kaniak isu ti maysa a bilin dagiti tattao a naisuro kadakuada, gapuna adtoy, baliwakto nga aramiden ti maysa a nakaskasdaaw nga aramid iti tengnga daytoy nga ili, maysa a nakaskasdaaw nga aramid ken datdatlag; ket ti kinasirib dagiti tattaoda a mamasirib mapukawto, ken ti pannakaawat dagiti tattaoda a manakem mailemmengto.” (Isaias 29:13, 14) Iti kamaudianan, ti makaibabain iti Dios a teoria ti ebolusion ken dagidiay agkunkuna a Kristianoda a nangabrasa iti dayta maipasangodanto iti dayta a pannakikuentaan inton aldaw ti nabara a pungtot ni Jehova.—Sofonias 3:8.
Panagserbi a Maipaay iti Kinapudno
19. (a) Apay a nagadu ti nangabrasa iti ebolusion? (b) Iti ania a panagrag-o ti pakiramanan itan dagiti naemma?
19 Pudno a nadangkes daytoy a lubong! Ti ulbod a relihion ken ti di umisot’ pannakaiturongna a sientipiko a kinatangsit ti namagbalin iti dayta a kasta. Dagiti kinaulbod dagiti pannursuro “ti tao ti kinadakes,” dagiti klero ti Kakristianuan, ti nangibaw-ing iti adu manipud relihion. Dadduma kadagitoy ti nangawat iti ebolusion, kas ti panangdeggem ti tao a malmalmes iti maysa a garami. Dadduma ti nangabrasa iti kredo ti ebolusion gapu ta ti kinaawan diosna ti kasla agparang a mangwayawaya kadakuada manipud responsabilidad iti maysa a Dios a Manamarsua. (Idiligyo iti Roma 1:21-23.) Ngem dagiti napakumbaba, naemma a tattao iti sangatauan agragrag-oda ita a makaammo maipapan ken Soberano nga Apo Jehova, ti agturturayen nga Arina a ni Jesu-Kristo, ken dagiti pangpanggep ti Pagarian ti Dios a dandanin agbalin a maysa a nadayag a kinapudno.—Roma 16:20; 1 Corinto 15:25, 26.
20. (a) Ania nga engrande a kari ti adda a matungtungpal itan? (b) Kasano a napaneknekan daytoy bayat ti 1985? (c) Kasanot’ panangipakitayo iti kinatarnawyo iti panagserbi iti Dios ti kinapudno?
20 Anian a ragsaktayo a, kas dagiti Saksi ni Jehova, nagkaykaysatayo iti intero a daga iti sireregta a panangiwaragawag iti kinapudno! Ti espiritu ti Dios sibibileg nga agtigtignayen iti organisasionna, a gapu itoy makitkitatayon ti kaitungpalan ti karina: “Ti daga mapnonto iti pannakaammo ken ni Jehova a kas dagiti dandanum saknapanda ti baybay.” (Isaias 11:9) Ti sangalubongan a pammaneknek nga impaay ti ili ni Jehova bayat ti 1985 ti nangibunga iti pannakaiwaras idiay tay-ak ti 339,351,170 a Biblia ken dagiti pagbasaan a mangilawlawag iti Biblia, iti nasursurok ngem 200 a pagsasao. Pribilehio ti nasurok ngem tallo a milion kadatayo ti nakiraman iti daytoy engrande a sangalubongan a trabaho ti panangasaba, “iti publiko ken iti balaybalay.” (Aramid 20:20) Sapay koma ta agtultuloytayo a sibabaknang a mabendisionan ken Jehova bayat a pagregreggetantayo a salimetmetan ti kinatarnawtayo nga agserserbi iti Dios ti kinapudno.
Ania Ti Komentoyo?
◻ Ania dagiti pagsidsiddaawan iti natauan nga utek a mangitudtudo iti maysa a masirib a Manangaramid?
◻ Apay a di umiso ti panangikuna a ti panamati iti ebolusion ket maysa a kita iti pammati?
◻ Kasano kaadu nga ebidensia ti adda a mangpaneknek a talaga nga adda idi ti sunggo-a-tao?
◻ Kasano a ti Ezequiel 8:7-12 mabalin a maiyaplikar iti sumagmamano a narelihiusuan a papangulo ita?
◻ Ti kinatarnaw iti panagserbi iti Dios ti kinapudno ti nangyegen kadagiti ania a resulta?
[Kahon iti panid 21]
Life—How Did It Get Here? By Evolution or by Creation?
Ti libro nga addaan iti paulo nga adda iti ngato ti nairuar idi 1985 ken 1986 iti adu kadagiti Dagiti “Manangsalimetmet Kinatarnawna” a Kumbension dagiti Saksi ni Jehova iti intero a daga. Dayta ti naipablaaken kadagiti sumaganad a pagsasao: Aleman, Danes, Español, Finnish, Hapones, Ingles, Insik, Italiano, Pranses, Portuguese, ken Ulandes.
[Ladawan iti panid 19]
Napudno kadi dagiti ‘artist’ no bangonenda ti sunggo a tao manipud iti mammano laeng a tipping?
[Ladawan iti panid 20]
Dagiti Saksi ni Jehova ‘pinunnoda ti daga’ iti pannakaammo ken ni Jehova