Ania ti Makunkuna a Langit?

IPAGARUP ti dadduma a tattao nga imposible a maammuan ti maipapan iti langit gapu ta awan pay met ti immulog manipud langit a mangestoria iti dayta. Nalabit nalipatanda ti imbaga ni Jesus: “Bimmabaak manipud langit.” (Juan 6:38) Kinunana pay kadagiti pangulo ti relihion: “Naggapukayo kadagiti lugar iti baba; naggapuak kadagiti lugar sadi ngato.” (Juan 8:23) Ania ti imbaga ni Jesus maipapan iti langit?

Pinatalgedan ni Jesus a ti langit ti taeng ni Jehova. Inawaganna ti Dios nga “Amak nga adda sadi langit.” (Mateo 12:50) Ngem saan a maymaysa nga anag ti nangusaran ni Jesus iti sao a “langit.” Kas pagarigan, idi kinunana, “Paliiwenyo a sipapasnek dagiti tumatayab iti “langit,” ti atmospera ti tuktukoyenna. (Mateo 6:26) Nupay kasta, iti labes pay ti atmospera ti pagnanaedan ni Jehova. Kuna ti Biblia: “Adda Daydiay nga agnanaed iti ngatuen ti sirkulo ti daga.”​—Isaias 40:22.

Iti kadi ayan dagiti bituen ti pagnanaedan ti ‘Ama nga adda sadi langit’? Iti Nasantuan a Kasuratan, matuktukoy met ti pisikal nga uniberso kas “langit.” Kas pagarigan, maysa a salmista ti nangisurat: “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao tapno sipapanunotka kenkuana?”​—Salmo 8:3, 4.

Saan nga agnanaed ni Jehova iti pisikal nga uniberso a pinarsuana, no kasano a ti maysa a karpintero ket saan a mabalin nga agnaed iti uneg ti aparador nga inaramidna. Isu nga idi a ni Ari Solomon indedikarna ken Jehova ti templo idiay Jerusalem, kinunana: “Pudpudno kadi nga agnaedto ti Dios iti rabaw ti daga? Adtoy! Ti langlangit, wen, ti langit ti langlangit, saandaka a malaon; anian nga ad-adda pay, ngarud, daytoy balay nga imbangonko!” (1 Ar-ari 8:27) No saan nga agnanaed ni Jehova iti pisikal a langit, ania ngarud ti langit a pagtataenganna?

Nupay inadal dagiti tattao ti pisikal a langit babaen iti nabibileg a teleskopio ken dadduma ti nakapagdaliasaten iti law-ang, kaskasdi a pudno ti kuna ti Biblia: “Awan ti tao a nakakita iti Dios uray kaano.” (Juan 1:18) Inlawlawag ni Jesus no apay idi kinunana: “Ti Dios maysa nga Espiritu.”​—Juan 4:24.

Ti espiritu ket maysa a kita ti biag a nangatngato ngem iti tattao. Awanan dayta iti pisikal nga elemento a kas iti lasag ken dara, a makita ken maarikap ti tao. Idi ngarud dinakamat ni Jesus ti panagnaedna idiay “langit” a kadua ni Amana, kayatna a sawen nga addaan idi iti biag a natantan-ok ngem iti aniaman a kita ti pisikal a biag. (Juan 17:5; Filipos 3:20, 21) Dayta a taeng dagiti espiritu a pinagnaedan idi ni Jesus a kadua ni Amana, ti aw-awagan ti Biblia a “langit.” Ania ti kasasaad ken aktibidad sadiay?

Lugar ti Naragsak nga Aktibidad

Ti Biblia deskribirenna ti langit kas lugar nga aduan iti aktibidad. Dakamatenna ti ginasgasut a milion a matalek nga espiritu a parsua nga agnanaed sadiay. (Daniel 7:9, 10) Adda bukod a personalidad ti tunggal maysa kadakuada. Kasanotayo nga ammo dayta? Iti amin a makita ken mapagadalan a parsua, awan ti dua a sibibiag a parsua nga eksakto nga agpada. Masiguradotayo ngarud nga adda met panagduduma dagiti parsua idiay langit. Makapainteres ta sangsangkatunos nga agtartrabaho amin dagita a nailangitan a parsua. Dakkel ngarud ti nakaidumaanda kadagiti tattao ditoy daga a manmano a makapagtutunos.

Imutektekam no kasano a deskribiren ti Biblia ti aktibidad idiay langit. “Bendituenyo ni Jehova, O dakayo nga anghelna, a nabileg iti pannakabalin, a mangitungtungpal iti saona, babaen iti panagimdeng iti timek ti saona. Bendituenyo ni Jehova, dakayo amin a buybuyotna, dakayo a ministrona, nga agar-aramid iti pagayatanna.” (Salmo 103:20, 21) Nagadu ngarud a trabaho ti maar-aramid idiay langit. Masiguradotayo a makapnek a trabaho dayta.

Nabayagen nga agserserbi a siraragsak dagiti anghel sakbay pay a naparsua ti daga. Sigun iti Kasuratan, idi impasdek ni Jehova ti daga, dagiti annak ti Dios “sirarag-o a nagikkisda a sangsangkamaysa” ken “nangrugida a nagdir-i buyogen ti panangpadayaw.” (Job 38:4, 7) Maysa kadagiti nailangitan nga annak ti Dios ti naaddaan pay iti pribilehio a makipagtrabaho iti Dios idi pinarsuana ti amin a dadduma pay a bambanag. (Colosas 1:15-17) Mabalin a maparnuay dagiti saludsod mainaig iti langit ken ti sangatauan gapu iti makaay-ayo a pannakailadawan ti naragsak nga aktibidad idiay langit.

Nairanta Kadi a Mapan Dagiti Tattao Idiay Langit?

Yantangay dagiti anghel agserserbidan iti Dios idiay langit sakbay a naparsua ti daga, nabatad ngarud a saan a naparsua ti immuna a lalaki ken babai nga agnaed idiay langit. Imbes ketdi, imbaga ti Dios iti immuna nga agassawa: “Agbungakayo ken agadukayo ket punnuenyo ti daga.” (Genesis 1:28; Aramid 17:26) Ni Adan ti immuna kadagiti baro a kita ti naindagaan a biag, a makabael a mangammo maipapan iti Dios ken sisusungdo a makapagserbi kenkuana. Ni Adan ti agbalin koma nga ama ti amin a puli ti tattao nga agtaeng ditoy daga. “No maipapan iti langlangit, kukua ni Jehova ti langlangit, ngem ti daga intedna iti annak ti tattao.”​—Salmo 115:16.

Gagangay nga awan ti mayat a matay; ti ipapatay ket saan a nainkasigudan kadagiti tattao. Dinakamat laeng ti Dios ti ipapatay kas pannusa iti isusukir ni Adan. No koma nagtulnog ni Adan, pulos a saan koma a natay.​—Genesis 2:17; Roma 5:12.

Di ngarud pakasdaawan nga awan ti imbaga ti Dios ken Adan maipapan iti ipapanna idiay langit. Isu a ti daga ket saan a lugar a pangsubokan kadagiti tattao no maikarida nga agbiag idiay langit. Naparsua ti tao nga agbiag ditoy daga, ket matungpalto pay laeng dayta a panggep ti Dios. Ikari ti Biblia a “dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Nalawag a sipud idi damo saan a nairanta a mapan dagiti tattao idiay langit. Apay ngarud nga inkari ni Jesus ti nailangitan a biag kadagiti apostolna? Kayat kadi a sawen ni Jesus a makapan amin a naimbag a tattao idiay langit?