Sipapasnek Kadi a Sapsapulem ni Jehova?

SIPAPASNEK a tinarigagayan ti maysa a Kristiano a lalaki nga iranud ti naimbag a damag manipud iti Biblia kadagiti kaluganna iti tren. (Marcos 13:10) Ngem nagkedked gapu iti buteng. Simmuko kadi? Saan. Impasnekna ti nagkararag ken inkagumaanna a sursuruen no kasano ti mangirugi iti saritaan. Pinatgan ni Jehova a Dios ti kiddawna ket impaayanna iti tured a mangasaba.

Napateg ti kasta a kinapasnek no sapulentayo ni Jehova ken ti pamendisionna. Kinuna ni apostol Pablo: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Saan nga umdas ti basta panangsapul ken Jehova. Ti Griego a sao a naipatarus kas “sipapasnek a mangsapsapul” ket adda iti porma a mangipasimudaag iti kinapinget ken naipamaysa a panagregget. Ramanen daytoy ti amin a puso, isip, kararua, ken pigsa ti maysa a tao. No sipapasnek a sapsapulentayo ni Jehova, ditay agbalin nga aleng-aleng, napaidam, wenno nasadut. Imbes ketdi, ipakitatayo ti napaypayso a regta iti panangsapultayo kenkuana.​—Aramid 15:17.

Dagidiay Sipapasnek a Nangsapul ken Jehova

Naglaon ti Biblia iti adu nga ehemplo maipapan kadagiti tattao a nagregget a nangsapul ken Jehova. Maysa kadakuada ni Jacob, a sipipinget a nakigabbo iti naglasag nga anghel ti Dios agingga iti parbangon. Kas resultana, napanaganan ni Jacob iti Israel (Mannakiranget iti Dios) gapu ta nakiranget, wenno nagporsegi, nagpinget, ken nagtalinaed iti Dios. Ti anghel binendisionanna ni Jacob gapu iti napasnek a panangikagumaanna.​—Genesis 32:24-30.

Adda met di nainaganan a babai a taga Galilea nga agpaspasar iti “adu a rigat” ta 12 a tawen idin nga agsagsagaba iti panagbulos ti dara. Gapu iti dayta, dina mabalin a sagiden dagiti tattao. Nupay kasta, inturturedna ti rimmuar a napan nangkita ken Jesus. Kinunkunana: “No masagidko uray laeng dagiti makinruar a kawesna umimbagakto.” Panunotem ti pannakilinnetletna iti ‘bunggoy a sumursurot idi [ken Jesus] ken mangdupdupudop kenkuana.’ Naagasan ti nakaro a sakitna ta apaman a nasagidna ti makinruar a pagan-anay ni Jesus, nariknana a “ti ubbog ti darana naabbatan”! Nagbuteng idi dinamag ni Jesus, ‘Asino ti nangsagid iti makinruar a kawesko?’ Ngem siaasi a kinuna ni Jesus kenkuana: “Anak, ti pammatim pinaimbagnaka. Mapanka a sitatalna, ket sumalun-atka koma iti nadagsen a sakitmo.” Nagunggonaan ti panagreggetna.​—Marcos 5:24-34; Levitico 15:25-27.

Iti sabali pay a gundaway, maysa a babai a taga Fenicia ti sipapasnek a nagpakaasi ken Jesus tapno paimbagenna ti anakna a babai. Kinuna ni Jesus a saan a rumbeng nga ited kadagiti uken ti taraon dagiti ubbing. Kayatna a sawen a dina mabalin a baybay-an dagiti maikari a Judio gapu kadagiti di Israelita. Naawatanna ti kayat a sawen ni Jesus, ngem nagpakaasi latta ti babai: “Wen, Apo; ngem pudno a dagiti uken manganda kadagiti murkat nga agtintinnag manipud iti lamisaan dagiti appoda.” Ti napigsa a pammati ken kinapasnekna ti nangtignay ken Jesus a mangikuna: “O babai, dakkel ti pammatim; mapasamak koma kenka ti kayatmo.”​—Mateo 15:22-28.

Ania ngata ti napasamak kadagitoy nga indibidual no dida nagporsegi? Nabendisionanda ngata no simmukoda a dagus gapu iti lapped wenno pannakailaksid? Saan! Maitutop nga ipakita dagitoy nga ehemplo ti punto nga insuro ni Jesus, a ti ‘natured a kinapinget’ ket rumbeng, napateg pay ketdi iti panangsapul ken ni Jehova.​—Lucas 11:5-13.

Maitunos iti Pagayatanna

Kinapasnek laeng kadi ti kasapulan tapno maagasan dagiti nadakamat a napaimbag babaen ti milagro? Saan ta masapul a maitunos iti pagayatan ti Dios dagiti kiddawda. Naikkan ni Jesus iti nakaskasdaaw a pannakabalin tapno makaipaay iti nalawag a pammaneknek nga isu ti Anak ti Dios, ti naikari a Mesias. (Juan 6:14; 9:33; Aramid 2:22) Kanayonanna, dagiti milagro nga inaramid ni Jesus ket nangipaay iti panirpatan maipapan kadagiti bendision nga iburay ni Jehova ditoy daga bayat ti Panagturay ni Kristo iti Sangaribu a Tawen.​—Apocalipsis 21:4; 22:2.

Saanen a pagayatan ti Dios nga agaramid kadagiti milagro dagiti adda iti pudno a relihion, kas ti pannakabalin a mangagas ken agsao iti nadumaduma a pagsasao. (1 Corinto 13:8, 13) Ti pagayatanna iti kaaldawantayo iramanna ti panangipakaammo iti naimbag a damag ti Pagarian iti intero a daga tapno ‘amin a kita ti tattao dumtengda iti umiso a pannakaammo iti kinapudno.’ (1 Timoteo 2:4; Mateo 24:14; 28:19, 20) Mainanama dagiti adipen ti Dios a denggen ni Jehova dagiti nasged a kararagda no sipapasnek nga aramidenda ti maitunos iti pagayatanna.

Mabalin a kuna ti dadduma, ‘Apay a masapul nga umagawatayo no matungpalto met laeng ti pagayatan ti Dios?’ Nupay pudno a matungpalto ti panggep ni Jehova aniaman a panagregget ti aramiden dagiti tao, maragsakan ti Dios a mangusar kadagiti tattao tapno maibanag ti pagayatanna. Mayarig ni Jehova iti maysa a karpintero. Ammo ti karpintero no ania ti disenio ti balay, ngem pilienna dagiti materiales a pagibangon a nalaka a mabirokan iti lugarda. Umasping iti dayta, adda proyekto ni Jehova nga iringpasna iti kaaldawantayo ket kaay-ayona nga usaren dagiti adipenna a situtulok nga agpausar kenkuana.​—Salmo 110:3; 1 Corinto 9:16, 17.

Utobem ti kapadasan ni agtutubo a Toshio. Apaman a nakadap-aw iti haiskul, kayatna ti mangasaba iti nagpaiduma a teritoriana no adda gundaway. Kanayon nga itugtugotna ti Bibliana ken sipapasnek nga inkagumaanna ti agbalin a mapagulidanan a Kristiano. Idi ngannganin agserra ti klaseda, naikkan ni Toshio iti gundaway nga agsao iti imatang dagiti kaklasena. Inkararagna ti tulong ni Jehova ket naragsakan idi makitana dagiti kaklasena a dumdumngeg a naimbag iti palawagna a napauluan iti “Ti Kalatko nga Agbalin a Payunir.” Inlawlawagna a kayatna ti agbalin nga amin-tiempo a ministro dagiti Saksi ni Jehova. Maysa kadagiti kaklasena ti mayat nga agpayadal iti Biblia kenkuana ket rimmang-ay agingga a nagpabautisar. Sibabaknang a nagunggonaan ni Toshio gapu iti napasnek a panagreggetna nga agtignay a maitunos kadagiti kararagna.

Kasano ti Kapasnekmo?

Maipakitam iti adu a wagas a sipapasnek a sapsapulem ni Jehova ken ti pamendisionna. Umuna, adda dagiti napateg a banag a mabalinmo nga aramiden, kas ti panagsagana a naimbag kadagiti Nakristianuan a gimong. Babaen kadagiti nasayaat iti pannakaisaganana a komento, makagutugot a palawag, ken epektibo a demostrasion, maipakitam a sipapasnek a sapsapulem ni Jehova. Maipakitam met ti kinapasnekmo babaen ti panangpasayaat iti kalidad ti ministeriom. Apay a dimo padasen a pagbalinen nga ad-adda a nainggayyeman ti pannakisaritam iti bumalay ken agusarka kadagiti epektibo nga introduksion a maitutop iti teritoriayo? (Colosas 3:23) Ti maysa a Kristiano a lalaki mabalinna ti umawat kadagiti annongen iti kongregasion a kas iti panagbalin a ministerial nga adipen wenno panglakayen no naimpusuan nga igaedna dayta. (1 Timoteo 3:1, 2, 12, 13) No madadaanka nga agserbi, masagrapmo ti rag-o nga itden ti panangted. Nalabit a mabalinmo ti agaplikar a tumulong iti panagibangon a proyekto ti sanga nga opisina wenno agserbi iti sanga nga opisina dagiti Saksi ni Jehova. No maysaka a baro ken kualipikadoka, mabalin a kayatmo ti ageskuela iti Ministerial Training School, a mangsanay kadagiti naespirituan a lallaki nga agbalin a naimbag a papastor. No naasawaankan, mabalin a ti panagserbi kas misionero ti maysa a pamay-an tapno maipakitam a tarigagayam ti ad-adda nga agserbi ken Jehova. Baka posible kenka ti umakar iti lugar a dakdakkel ti panagkasapulan kadagiti manangaskasaba iti Pagarian.​—1 Corinto 16:9.

Ti talaga a napateg ket ti kababalinmo a mangitungpal iti annongem. Aniaman ti naiparebbeng kenka, aramidem dayta a sipapasnek, sipipinget, ken buyogen ti “kinapasnek ti puso.” (Aramid 2:46; Roma 12:8) Rumbeng a matmatam ti amin nga annongen kas gundaway a mangipakita iti kinagagarmo a mangidayaw ken Jehova. Kanayon nga ikararagmo ti tulong ni Jehova, ken aramidem ti amin a kabaelam. Iti kasta, agapitkanto iti nabaknang a gunggona.

Magunggonaan ti Napasnek a Panangikagumaan

Malagipmo pay daydiay Kristiano a lalaki a nagkararag tapno makasabaanna a situtured dagiti kaluganna iti tren? Binendisionan ni Jehova ti napasnek a tarigagayna. Dayta a kabsat inkagumaanna ti agbalin a nainggayyeman ken nangisagana kadagiti topiko a pangirugi kadagiti saritaan. Nabaelanna nga inusar ti Biblia a sieepektibo idi kinasabaanna ti maysa a lalaki a masikoran iti di nasayaat a relasion dagiti tattao. Nagtungpal iti panangyadal iti Biblia iti pagtaengan ti panangitultuloyna a nangkasaba iti dayta a lalaki tunggal agkaluganda. Pudno a binendisionan ni Jehova ti napasnek a panagreggetna!

Mabalin a magunggonaanka met no sipapasnek nga itultuloymo a sapulen ni Jehova. No sipapakumbaba nga agporsegika ken naimpusuan nga aramidem ti aniaman a teokratiko nga aktibidadmo, usarennaka ni Jehova maitunos kadagiti panggepna ken sibabaknang a gunggonaannaka.

[Ladawan iti panid 26]

Ania ngata ti napasamak iti daytoy a babai no saan a nagporsegi?

[Ladawan iti panid 27]

Sipapasnek kadi nga idawdawatmo ti pamendision ni Jehova?

[Dagiti Ladawan iti panid 28]

Kasano a maipakitam a sipapasnek a sapsapulem ni Jehova?