“Puntiriakayto ti Pananggura Dagiti Amin a Nasnasion”
1 Iti kallabes a tawtawen nagrag-otayo amin gapu ti nakaskasdaaw a bendision a linak-am dagiti tattao ni Jehova iti aglawlaw ti lubong. Ti pannakalegal iti trabaho idiay Malawi kalpasan ti 26 a tawtawen a naranggas a panangirurumen isut’ namagarubos iti luluatayo gapu ti rag-o. Limmukay iti panagangestayo idi narpuog ti Komunismo iti Makindaya a Europa a nagresulta ti pannakawayawaya dagiti rinibo a kakabsattayo. Naseknantayo a nangimatang bayat a ti wayawayatayo nga agdayaw idiay Grecia ket nakarit; ket nagrag-otayo idi a nagbiktoriatayo iti kangatuan a korte ti Europa. Nagragsaktayo idi nangngegan maipapan iti ilalawa dagiti sanga ti Sosiedad a namagbalin a nawadwad iti maparnuay a literatura nga agpaay kadagiti managsapul iti kinapudno. Nagsiddaawtayo idi nadamag a nasurok a 7,400 ti nabautisaran idiay Kiev, Ukraine. Wen, dagitoy a dramatiko a panagabante iti trabaho ti Pagarian iti sigurado a nangpasinatnat ti rag-otayo!
2 Bayat nga adu ti pamuidan nga agragsak, masapul nga agannadtayo a maikontra iti nalabes a panagrag-o. Dagiti napaburan a report ti mamagpanunot kadatayo a bumasbassiten iti ibubusor ket dagiti tattao ni Jehova ti maanamonganen iti aglawlaw ti lubong. Dayta a kapanunotan ti makaallilaw. Bayat a nagballigitayo iti sumagmamano a biktoria ken naikkat dagiti lapped iti nagduduma a dagdaga, ditay liplipatan a ti relasiontayo iti lubong ket saan a nagbalbaliw. Saantayo a “paset ti lubong.” No kastatayo, masigurado a puntirianatayo “ti pananggura dagiti amin a nasnasion.” (Juan 15:19; Mat. 24:9) Bayat nga adda pay laeng daytoy a sistema dagiti bambanag, saan nga agbalbaliw ti pagalagadan nga “amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.”—2 Tim. 3:12.
3 Patalgedan ti historia iti kinapudno daytoy a pakdaar. Bayat nga impaay ni Jesus ti nakaskasdaaw a testimonia iti saklang dagiti agtuturay ken iturayanda, isut’ nagsagaba ti inaldaw nga abuso ken kanayon nga agpeggad iti ipapatay. Uray dagiti apostolna a nagaramid iti adu a disipulo, nakiraman iti pannakaisurat ti Griego a Kasuratan, ken nangiparangarang iti milagro a sagsagut iti espiritu, isudat’ nabusor ken naikuspil. Agpapan pay naimbag ti kondukta ken naayatda iti kaarruba, matmatanda dagiti Kristiano a kas makaparurod a “sekta” ken ‘mapagsasawan iti uray sadino.’ (Ara. 28:22) Bayat a ti Kristiano a kongregasion ita ket inusar ni Jehova iti nakaskasdaaw a wagas a mangitungpal iti pagayatanna, agtultuloy a busoren iti kada elemento daytoy dakes a sistema dagiti bambanag. Awan ti rason a manamnama a sumardeng iti ibubusor.
4 Idi umuna siglo, indadanes ni Satanas dagiti disipulo ni Jesus iti nagduduma a wagas. Nagsao dagiti bumusbusor iti kinaulbod a nangballikug kadakuada. (Ara. 4:17, 18) Dagiti makapungtot nga umariwekwek ti nangpadas a nangpaulimek kadakuada. (Ara. 19:29-34) Naibaludda nga awan gapuna. (Ara. 14:19) Iti dadduma a kaso napapatay dagiti awanan basol. (Ara. 7:54-60) Ni apostol Pablo ti kangrunaan a nagsagaba kadagitoy nga abuso. (2 Cor. 11:23-27) Inusar dagiti kabusor ti kada oportunidad a mangsinga iti panangasaba a trabaho ken sinaktanda ti panagsagaba dagitoy a matalek a managobra.
5 Ita us-usaren met laeng ni Satanas iti umasping a taktika. Dagiti pammadakes ti mangiladawan kadatayo a kas naiyaw-awan a sekta wenno kulto. Iti dadduma a pagilian, linapdan ti autoridad dagiti literaturatayo. Ti panagraem iti kinasagrado ti dara isut’ inuyawda iti publiko. Idi 1940’s, dagiti sipupungtot a manangraut a masemsem iti isyu maipapan ti panagsaludo iti bandera ti nangatakar kadagiti kakabsattayo ken dinadaelda dagiti sanikuada. Rinibo dagiti naibalud gapu iti isyu ti neutralidad. Kadagiti totalitariano a dagdaga, dagiti kakabsattayo ti siuulbod a naakusar a kas subersibo, a nagtinnag iti ginasut a natutuok ken napapatay kadagiti kampo a pagbaludan. Daytoy a pakarigatan ti sibabatad a mangipakita a datayo ti puntiria iti ibubusor nga awanan gapgapu.—Kitaenyo ti libro a Manangiwaragawag, kapitulo 29.
6 Ania ti Pasungaden iti Masakbayan? Bayat a dagiti tattao ni Jehova ket naragpatda ti sumagmamano a gin-awa iti sagpaminsan kadagiti dadduma a paset daytoy lubong, ti intero a kasasaad ket nagtalinaed a pareho. Agtultuloy ti Diablo a makapungtot iti pannakaigarangugongna idi 1914. Ammona nga ababan ti tiempona. Ti ungetna isut’ sigurado a rumaba bayat nga umasideg iti dakkel a rigat. Gubatenna daydiay naitrono nga Ari, ni Kristo Jesus, ket desidido a makirupak aginggat’ tungpalna. Isu ken dagiti demoniona ti sipupungtot laeng kadagiti tattao ni Jehova ditoy daga, isuda a simamatalek “a mangtungtungpal kadagiti bilin ti Dios ken addaan iti trabaho a panangsaksi ken Jesus.”—Apoc. 12:12, 17.
7 Gapuna bayat a kumitatayo iti masanguanan, masapul a napudnotayo. Awanantayo iti rason nga agpanunot a ti Diablo ket umatrasen wenno maupayen. Ti ibubusor kadatayo iti daytoy a lubong ti bumtak iti aniaman a tiempo ken lugar. Iti adu a pagilian ti wayawayatayo a mangasaba ket dimteng laeng kalpasan iti napaut a dangadang. Dayta a wayawaya ti nalabit a narasi laeng. Dagiti dramatiko a gulo ti dumteng iti agpatnag laeng, a mangyeg iti riribuk ken abuso iti natauan a kalintegan.
8 Ti agdama a kinanam-ay ken wayawaya a laklak-amentayo iti dadduma a pagilian ti mabalin a bigla nga agngudo, a mamataud iti abuso a sinagaba dagiti kakabsattayo ti napalabas. Ditay koma palubosan iti bagbagitayo a maduayya iti espiritu ti panangiyaleng-aleng, a panunoten a dagiti kabusortayo ket naparukmadan. Ti igugura daytoy a lubong ket saan a kanayon nga aglatak, ngem agtalinaed a nabara. Ipakita ti Sao ti Dios a ti ibubusor iti lubong ket bumarbara bayat nga umadani ti panungpalan. Gapuna nga agsiputtayo, a mangipakita iti bagbagitayo “a naannad a kas kadagiti serpiente ket kaskasdi a nasingpet a kas kadagiti kalapati.” (Mat. 10:16) Masapul a mailasin nga addaantayo ti ‘maysa a napinget a dangadang’ agingga iti panungpalan, ket ti panagibtur isut’ tulbek iti pannakaisalakan.—Jud. 3; Mat. 24:13.
9 Ditoy pagiliantayo, ti panangasaba a trabaho ket rumangrang-ay nga awanan lapped dagiti bumusbusor. Daytoy ti nalabit a mamagpanunot kadatayo a saantayo unay a serioso a maseknan. Nupay kasta, kasapulan ti panagridam. Bigla nga agbalbaliw dagiti kasasaad. Awanan pakdaar, dagiti kabusor ti mamataud iti isyu ken usarenda dayta a maikontra kadatayo. Dagiti apostata ti kanayon nga agbirbirok iti maireklamoda. Dagiti marurod a klero ti mabalin a sipupubliko a kumontra kadatayo. Ti planotayo a mangibangon iti Kingdom Hall ti mabalin a mangpasged iti panangsuppiat ti sangakaarrubaan. Dagiti negatibo a sasao a maibusor kadatayo iti mabalin a maiwarnak. Dagiti nalatak a tattao ti sigagagara a mangpardaya kadatayo, a mangaramid kadagiti kaarruba a nakasir no mapantayo kadakuada. Uray dagiti mismo a kabbalay ti mangidadanes kadatayo. Gapuna a kasapulan a naridamtayo, a mabigbig a ti ibubusor daytoy lubong ket sibibiag, ket lumtuad dayta iti aniaman a kanito.
10 Kasano a Daytoy Apektarannatayo? Amin dagitoy ti mangapektar iti langa ti masanguanantayo. Iti ania a wagas? Daytoy kadi ti mangpabuteng kadatayo no ania iti sagabaen? Agkapuytayo aya iti panangasaba a trabaho gapu ta dadduma dita komunidadyo ket madisturbo iti daytoy? Adda kadi rason a marikna iti panagrurod no mapadakestayo? Ti aya nasabrak a panangtrato ket rabsutenna iti rag-otayo nga agserbi ken Jehova? Adda kadi aniaman a panagduadua iti pagbanagan? Awan, nikaanoman! Apay nga awan?
11 Ditay koma liplipatan a ti mensahe nga iwarwaragawagtayo ket nagtaud, saan a kadatayo, ngem ken Jehova. (Jer. 1:9) Addatayo iti sidong ti obligasion a mangipangag iti pammaregta: “Awaganyo ti naganna. Ipakaammoyo kadagiti tattao dagiti pannakilangenna . . . iti intero a daga.” (Isa. 12:4, 5) Impalubosna ti pannakaidadanes dagiti tattaona maigapu iti masinunuo a panggep, ‘ti pannakaiwaragawag ti naganna iti amin a daga.’ (Exo. 9:16) Ar-aramidentayo ti trabaho nga intuyang ni Jehova, ket isu a mismo ti mangted kadatayo iti pammatured nga agsao a di buteng. (Ara. 4:29-31) Isu daytoy ti kangrunaan a trabaho a masapul a maaramid kadagitoy maudi nga al-aldaw daytoy daan a sistema.
12 Daytoy a pannakaammo ti mangted kadatayo iti tured a mangala ti takder a maikontra ken Satanas ken iti daytoy a lubong. (1 Ped. 5:8, 9) Iti pannakaammo nga adda kadatayo ni Jehova isut’ mangaramid kadatayo a “maingel ken nabileg,” a paksiaten iti buteng. (Deut. 31:6; Heb. 13:6) Bayat a kanayontayo a padasen iti agtaktika ken agrason no agpangta dagiti bumusbusor, ibutaktaktayo a silalawag a determinado nga “agtulnog[tayo] iti Dios kas agturay imbes a kadagiti tattao” no makarit iti panagdayawtayo. (Ara. 5:29) No adda gundaway nga agsao a maipaay iti depensatayo, aramidentayo dayta. (1 Ped. 3:15) Nupay kasta, saantayo a sayangen ti tiempotayo a makisubang kadagiti timmangken a kabusor nga interesado laeng a mangimameg kadatayo. Imbes nga ikagumaan a balsen ida iti pammadakesda, basta ‘bay-antayo ida.’—Mat. 15:14.
13 Ti panagibturtayo kadagiti pakasuotan isut’ makaay-ayo ken Jehova. (1 Ped. 2:19) Ania a gatad ti masapul nga ibayadtayo iti dayta nga anamong? Agserbitayo aya nga awanan ragsak agsipud ta mabusor ken makontratayo? Pulos a saan! Inkari ni Jehova iti gunggona ti kinatulnogtayo a buyogen iti “rag-o ken talna.” (Roma 15:13) Iti sidong ti nabara a panagsagaba, nagtalinaed ni Jesus a naragsak “gapu iti rag-o a naikabil iti sanguananna.” (Heb. 12:2) Pudno met dayta kadatayo. Gapu iti dakkel a gunggona ti panagibtur, matignaykayo koma nga “agrag-o ken aglagtokayo gapu iti rag-o” nupay nakaro dagiti pakasuotanyo. (Mat. 5:11, 12) Uray pay iti tiempo ti didigra, daytoy a rag-o, a mismo, isut’ gapu a maited latta iti dayaw ken Jehova.
14 Adda kadi panagduadua maipapan iti maudi a tungpal, nga isut’ mamagsarimadeng kadatayo? Awan, ti pagbanagan ti salisal iti organisasion ni Jehova ken iti lubong ni Satanas ket nalpasen a nasentensiaan iti nabayagen a tiempo. (1 Juan 2:15-17) Uray kasano ti kabara iti ibubusor, ipaay ni Jehova iti balligi. (Isa. 54:17; Roma 8:31, 37) Agpapan pay masuottayo a naan-anay, awan ti makalapped kadatayo nga umawat iti gunggona. Awanantayo ti rason a “maringgoran iti aniaman,” agsipud ta impaay ni Jehova kadatayo iti talna a kas sungbat dagiti ararawtayo.—Fil. 4:6, 7.
15 Gapuna nga agyamantayo ken Jehova iti tunggal tiempo a mangngegan dagiti kakabsattayo a naalaw manipud ti pannakaidadanes wenno naipaayan iti wayawaya a mangasaba kadagiti dati a nalapdan a luglugar. Agrag-otayo no maluktan dagiti baro nga oportunidad kadagiti rinibo a sinsero a tattao a dumngeg iti mensahe ti Pagarian. Agyamantayo no ited ni Jehova iti balligi no maipasangotayo kadagiti bumusbusor. Ammotayo a bendisionanna ti trabahotayo iti aniaman a wagas a kasapulan tapno maitandudo ti pudno a panagdayawna ken maiyeg iti uneg dagidiay a “matarigagayan” a tattao manipud ti amin a nasnasion.—Hag. 2:7; Isa. 2:2-4.
16 Kabayatan dayta a tiempo, siriridamtayo a ti kabusortayo, ni Satanas, ket mannakabalin unay, ket busorennatayo a sibibileg aginggat’ punget. Mabalin a dagiti atakarna ket napanayag ken dumardarang, wenno nalabit a nasikap ken makaallilaw. Nalabit a ti pannakaidadanes ket rumsua a bigla kadagiti dati a natalna a luglugar. Dagiti bumusbusor ti nalabit ngumerngerda a mangirurumen kadatayo. Iti umiso a tiempo agminardanto a sibabatad kadagiti amin nga isuda dagiti “mannakilaban a maibusor iti Dios,” ket gudasennanto ida. (Ara. 5:38, 39; 2 Tes. 1:6-9) Kabayatanna, aniaman a pagibturantayo, determinadotayo koma nga agtalinaed a natibker nga agserbi ken Jehova ken mangikasaba iti damag ti Pagarian. Datayo dagiti karagsakan a tattao iti rabaw ti daga, ta ammotayo nga ‘ti panagbalintayo a naanamongan awatentayo iti balangat ti biag.’—Sant. 1:12.