Anian a Makagunggona ti Panangbilang iti Naaramidan ni Jehova!
1 Ti napaltiingan a mannurat iti Salmo 48 kiniddawna kadagiti adda ti Israel nga ‘agmartsada iti aglawlaw ti Sion, a bilangenda dagiti baluartena, usisaenda dagiti mapagnaedan a torrena, tapno mabilangda a maipaay iti masanguanan a kaputotan.’ Matignay babaen iti ayat ken Jehova, napinget ti interesda iti kada detalye ti naindagaan a sentro iti teokratiko a turay. Anian a nagpateg dagitoy a detalye agsipud ta daytoy a siudad ti nangilugaran ni Jehova iti mismo a naganna! Saritaenda maipapan dayta, ken nangruna a siguruenda a mangngegan dayta ti kaputotanda maipapan iti amin a bambanag nga intalimengda ti mismo a pusoda.—Sal. 48:12, 13.
2 Agbibiagtayon iti tiempo a ti teokratiko a turay iti Mesias ni Jehova a naisentro saanen nga iti naindagaan a Sion ngem idiay nailangitan a Jerusalem. (Heb. 12:22) Ti Pagarian ni Jehova iti ima ni Jesu-Kristo ti nagturayen manipud idi 1914. (Apoc. 12:10) Ti aktibidadna isut’ kadakkelan a paginteresantayo. Interesadotayo unay iti wagas a panangidalan ni Jehova kadagiti adipenna ditoy daga tapno mairingpasda ti pagayatanna kas makita a pannakabagi dayta a Pagarian. Dagiti makaay-ayo a detalye maipapan daytoy ti naibinsabinsa iti baro a librotayo a Dagiti Saksi ni Jehova—Manangiwaragawag iti Pagarian ti Dios. Anian a rag-otayo idi inawattayo dayta iti kallabes a “Nadiosan a Sursuro” a Kombension Distrito!
3 Idi Setiembre 1, 1993, nairuaren daytoy a libro iti 20 a pagsasao, ket madama idi ti panangipatarus ken panangimaldit kadagiti sabali pay a 13 a pagsasao. Nakaalan aya ti pamiliayo iti maysa a kopia? Basbasaenyo kadin? Sarsaritaenyo aya dagiti naadalyo kenkuana?
4 Kalpasan a kinitada dagiti ladawan ken binasada dagiti komentario, kas naisingasing idiay kombension, adu a kakabsat a lallaki ken babbai ti sidadaras a napan iti kangrunaan a teksto ti material. Ania ti naikomentoda? Adda ditoy ti sumagmamano.
5 Maysa a kabsat a babai ti nagsurat: “Isu pay laeng daytoy a libro ti naawatko a diak makauray a mangiringpas tapno mabasakto manen. Addaak itan iti kapitulo 25. Bayat a basbasaek, lalo nga agarubos dagiti luak ket ti pusok napnuan iti panagayat ken Jehova. Pudno a daytoy a libro ket makaparegta ken makapapigsa iti pammati.”
6 Maysa a kabsat a lalaki a nagserbin ken Jehova iti nasurok nga 40 a tawen ti nagkuna: “Ita laeng a mabigbigko no kasano a makaguyugoy daytoy a libro. Pinagpuyatak aginggat’ kaadalman ti rabii ken parbangonek iti agriing ket kinompletok a binasa iti dua a lawas. Pudno unay nga isut’ maysa kadagiti kangrunaan a makagutugot a libro a nabasak. Maysa nga obra maestra ti panagsukimat ken obra maestra met iti pammaregta.”
7 Regular a Programa iti Panagbasa: Dadduma kadagiti sidadaras a nangbasa iti intero a libro ti determinado a mangbasa manen ngem iti daytoy a tiempo isut’ nabannayat a wagas.
8 No adda nasursurok ngem maysa a miembro ti sangakabbalayan iti kinapudno, mabalin a kayatyo nga usaren dagiti paset ti libro iti panagadal ti pamiliayo. Dadduma kadagiti pamilia ti nangirugin iti dayta sumagmamano nga aldaw kalpasan a naawatda ti kopiada idiay kombension. Saanna a kayat a sawen a dagiti dadduma a bambanag, kas ti panagsagana iti Panagadal ti Pagwanawanan, ket liwayan. Ngem masarakanyo a makagunggona unay no usaren ti 15 wenno 20 a minutos a panagbasa ken pananglawlawag iti material manipud Manangiwaragawag a libro.
9 Dadduma a pamilia ti mangbasa iti dua wenno tallo a pinanid—nalabit a maysa a subtema wenno dua—kada rabii sakbay nga agsisinada iti pangrabii. Nalabit a tunggal maysa ket gistay nabasadan ti intero a libro, ngem magunggonaanda iti natanang a panangkobre agraman gundaway a pagsaritaan ti material. Dadduma a mangar-aramid iti daytoy ti nagserbin ken Jehova iti adu a tawtawen. Bayat a basaenda, adu a nakaay-ayat a pasamak iti maipalagip. Mapabara ti puspusoda bayat a pagsaritaanda a sangsangkamaysa iti mismo a naaramidanda idi napasamak daydiay nabasada.
10 Gapu ti kasasaad iti pagtaenganyo, masarakanyo a maaramid ti panangbasa a dakdakayo. Maysa a kabsat a babai ti nagsurat iti Sosiedad: “Basbasaek daytoy a libro a saggabassit iti kada rabii sakbay a maturogak. Daytoy a libro ti namabileg kaniak iti nauneg a panangipateg ken ayat a maipaay ti kinapudno, ken mariknak a naasidegak ken Jehova ket iti kasta agyamanak ta maysaak a paset ti organisasionna. Pudno unay a mananamko ti kada panid a mabasak.”
11 Nupay ti libro ket dakkel, iti tunggal benneg ket saan. Ti panglukat a paset isut’ nadaras ngem makaay-ayo a panangkobre iti pasamak manipud aldaw ni Abel agingga ti 1992—iti 108 laeng a pinanid. Dagiti dadduma a benneg ti agatiddog laeng iti 13 aginggat’ 150 a pinanid. Kada benneg dagitoy ti nabingay iti sumagmamano a kapitulo, wenno maysa a subtema; a pagnumaran ken pakagunggonaanyo dayta.
12 Itiempoyo a Panunoten ti Nabasayo: Ania ti panggepyo bayat nga agbasakayo? Saan koma a basta mawanas ti pinanid—mangkompleto iti libro—ti panggepyo. Ti Manangiwaragawag a libro isut’ naglaon iti rekord ti espiritual a tawidyo. Rumbeng a maammuanyo a naimbag. Itiempoyo a panunoten maipapan iti kababagas no ania ti nabasayo. Bayat a marepasoyo ti aktibidad dagiti kaunaan a saksi ni Jehova, utobenyo no kasanoyo a matulad ti pammatida. (Heb. 12:1, 2) No mabasayo maipapan iti itatanor ti dakkel nga apostasia, imutektekanyo dagiti palab-og a nakatnagan dagidiay a nagtallikud, a buyogen ti panangsaluad iti bukodyo nga espiritualidad. Ken bayat a repasuenyo iti moderno nga aldaw a historiatayo, matmatanyo dagiti espiritual a kalidad dagidiay nga inusar ti Dios, no kasanoda nga indemostra a ti panagaramidda iti pagayatan ti Dios isut’ kapatgan a banag iti biagda, ken no kasano a nagtignayda kadagiti kasasaad—dadduma iti narikut unay—nga impalubos ti Dios.—Heb. 13:7.
13 Masarakanyo a makapabileg ti pammati no siraraken iti detalye a mangipakita no kasano nga indalan ni Jehova dagiti tattaona babaen ti nalawag a pannakaawat iti kinapudno ti Biblia a sagsagrapentayo itan. Ti panangipategyo iti makita nga urnos nga us-usaren ni Jehova ti dumakkel bayat a mas makabisadoyo iti itatanor ti organisasion. Maragsakankayo bayat a mabasayo, no kasano a natungpal dagiti padto, a ti naimbag a damag ket nakadanon agingga iti ungto ti daga. Ti pusoyo isut’ mabang-aran babaen iti kapadasan dagiti matalek kadagiti amin a paset ti lubong a nagtrabaho a sipipinget a nangiwaragawag iti Pagarian. Masarkedankayo a sumaranget kadagiti personal a pakasuotan bayat a basaenyo no ania ti naibturan dagiti matalek a kakabsat a lallaki ken babbai gapu iti ayatda ken Jehova.
14 Kalpasan a mabasayo ti benneg iti material, itiempoyo a pagsasaritaan ti pategna ken repasuenyo a detaliado. No addaankayo ti annak, iramanyo ida iti panangilawlawag kadagiti retrato ken ibagada kadakayo no ania ti ammoda maipapan kadagiti nakaladawan a tattao. Uray dakdakayo ti agbasa, ikagumaanyo nga ipadamag iti sabsabali dagiti naadalyo. Kas maitutop, usarenyo dagiti material iti panagsarungkar ken panagadal ti Biblia iti pagtaengan. Ti panangulityo kadagitoy isut’ mangimula iti panunot ken pusoyo, ken magunggonaan met dagiti dadduma.
15 Paginteresanyo a Detaliado: Ti kapaut a maipaayyo a mangbasa iti Manangiwaragawag a libro ket agpadpada a makabang-ar ken makagunggona.
16 Kayatyo kadi a ti pamiliayo ket masarungkaranda ti headquarters dagiti Saksi ni Jehova? Iti pinanid 208-9 ipakitana dagiti pasilidad nga inusar ti Sosiedad iti maysa a siglo a napalabas idiay lugar ti Pittsburgh. Iti pinanid 216-17 iyammona kadakayo dagiti patakder a nausar kalpasanna idiay Brooklyn. Dagiti retrato iti pinanid 352-6 ti tumulong kadakayo a mangiladawan iti sangalubongan a headquarters ita. Napno ti detalye dagiti kapitulo 26 ken 27 maipapan iti trabaho idiay Bethel, ket ti pinanid 295-8 mangted iti mainayon a salaysay maipapan ti biag iti Bethel.
17 Kaaduan kadatayo ti saan a makabisita kadagiti adu a sanga iti Sosiedad. Idiay pinanid 357-401 iti Manangiwaragawag a libro ti mangipasiar kadakayo iti sangalubongan. Saan a kasapulan ti panagganat iti dayta. Usarenyo ti kalalainganna a tiempo iti kada pagilian ken pagragsakanyo dayta. Usarenyo iti mapa ti lubong iti pinanid 415-17 a mangsarak ti kada lugar. Basaenyo dagiti komento a kakuyog iti kada retrato ti sanga. Babaen ti indese masarakanyo met dagiti makaay-ayo a salaysay maipapan iti kada pagilian. Dakamatenyo daytoy a gundaway a mangammo kadagiti miembro ti espiritual a pamiliayo iti dadduma a pagilian.
18 No agtataripnong dagiti tattao, no dadduma adda panagay-ayam a ramanenna ti panangammo kadagiti sekular a paspasamak. Saan kadi a mas makagunggona no ammuen dagiti napateg a petsa ken pasamak iti moderno a historia dagiti tattao ni Jehova? Adu ti masarakanyo kadagitoy a nailista iti pinanid 718-23 ti Manangiwaragawag a libro. Ipaay dayta a listaan ti punganay a pannakasangal; mainayonyo dayta idiay detalye a masarakan iti intero a libro. Usarenyo ida a kas basaran iti repaso. Dagiti agtutubo iti pamilia ti nalabit a makaimemoria kadakuada a sidadaras. Dadduma kadatayo nga addaanen iti edad ti nabambannayat. Ngem detaliado dagitoy iti teokratiko a historia a makagunggona kadatayo no maammuan. Kalpasan a maadalyo dagiti petsa ken pamunganayan a kinapudno, ipasdekyo dayta a pamuon. Kitaenyo no mano a detalye ti malagipyo maipapan iti kada pasamak. Kalpasanna ilawlawagyo maipapan ti paset iti kada pasamak a nakaitungpalan ti pagayatan ti Dios. Sumaruno, mapagsaritaan no kasano nga apektaranna ti bukodyo a biag ken no kasano a maiparbeng dayta iti aramiden ni Jehova.
19 Kitaenyo ti Gundaway a Nakalukat Kadakayo: Bayat a basaen ken pagsaritaanyo daytoy Dagiti Saksi ni Jehova—Manangiwaragawag iti Pagarian ti Dios, maibistrad iti imatangyo ti naindaklan a kaitungpalan ti Isaias 60:22. Kunaen ti libro iti panid 519: “Ti kaitungpalan ti kari a ‘ti bassit agbalinto a sangaribu’ talaga a napasamaken, ket aglaplapusanan pay! Iti tunggal maysa kadagiti nasurok a 50 a daga nga idi ket awan pay uray ‘bassit’ laeng—nga awan Saksi ni Jehova dita idi 1919, nga awan a pulos naaramid a panangaskasaba—adda ita nasursurok a sangaribo a mangidaydayaw ken Jehova. Iti dadduma kadagitoy a daga, adda itan pinullo a ribo, wen, ket nasurok a sangagasut a ribo pay, a Saksi ni Jehova a sireregta a mangiwarwaragawag ti Pagarian ti Dios. Iti intero a lubong, dagiti Saksi ni Jehova nagbalinda a “maingel a nasion”—nga ad-adut’ bilangda kas nagkaykaysa a sangalubongan a kongregasion ngem ti indibidual a populasion ti uray ania kadagiti di kumurang a 80 nga independiente a nasion toy lubong.”
20 Dayta a trabaho iti panagrang-ay ti Pagarian ket saan pay a nagngudo. Maisupadi, lalo a pinadaras ni Jehova iti di maartapan a rukod. Kasano kawadwad ti pannakiramanyo iti dayta? Sipupuotkayo kadi iti amin a gundaway a nakalukat kadakayo? Bayat a maadalyo no ania iti ar-aramiden dagiti dadduma, sapay koma ta matignay ti pusoyo a makipaset a naan-anay iti naindaklan a trabaho nga idaldalan ti naayat a Diostayo babaen ken Kristo Jesus kadagitoy aldawtayo.