“Agridamkayo”

“Ti panungpalan ti amin a bambanag immasidegen. . . . Agridamkayo no maipapan kadagiti kararag.”​—1 Ped. 4:7.

1. Ania ti kangrunaan nga insuro ni Jesus?

IDI adda ditoy daga ni Jesu-Kristo, ti Pagarian ti Dios ti kangrunaan nga insurona. Babaen iti dayta a Pagarian, alangonen ni Jehova ti sapasap a kinasoberanona ken santipikarenna ti naganna. Gapuna, insuro ni Jesus kadagiti adalanna nga ikararagda iti Dios: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mat. 4:17; 6:9, 10) Dayta a Pagarian ket nakaas-asidegen a pagpatinggaenna ti lubong ni Satanas ken kalpasanna, imatonanna ti pannakatungpal ti pagayatan ti Dios iti intero a daga. Kas impadto ni Daniel, ti Pagarian ti Dios “rumekennanto ken pagpatinggaenna amin dagitoy [nga agdama] a pagarian, ket dayta agtalinaedto agingga kadagiti tiempo a di nakedngan.”​—Dan. 2:44.

2. (a) Kasano nga ammo dagiti pasurotna nga agturturayen ni Jesus iti Pagarian? (b) Ania pay ti ipasimudaag ti pagilasinan?

² Gapu ta nagpateg kadagiti pasurot ni Jesus ti iyaay ti Pagarian ti Dios, inyimtuodda kenkuana: “Anianto ti pagilasinan ti kaaddam ken ti panungpalan ti sistema ti bambanag?” (Mat. 24:3) Nupay saan a makita dagiti tattao ti kaadda wenno panagturay ni Kristo iti dayta a Pagarian, adda maited a pagilasinan. Dayta a pagilasinan ket buklen ti nagduduma nga aspeto a naipadto iti Kasuratan. Gapuna, dagiti pasurot ni Jesus a sibibiag iti dayta a tiempo mailasinda a nangrugin nga agturay ni Jesus idiay langit. Pagilasinan pay dayta a nangrugin ti tiempo a natukoy iti Biblia kas ‘maudi nga al-aldaw’ ti dakes a sistema dagiti bambanag a mangdomdominar iti daga.​—2 Tim. 3:1-5, 13; Mat. 24:7-14.

Agridamkayo Kadagiti Maudi nga Aldaw

3. Apay a nasken nga agridam dagiti Kristiano?

³ Insurat ni apostol Pedro: “Ti panungpalan ti amin a bambanag immasidegen. Nasimbeng koma ti panagpampanunotyo, ngarud, ket agridamkayo no maipapan kadagiti kararag.” (1 Ped. 4:7) Masapul nga agridam dagiti pasurot ni Jesus, a siputanda dagiti pasamak iti lubong a mangipamatmat nga agturturayen ni Jesus iti Pagarian. Ken ad-adda a naganat ti panagbalinda a naridam bayat nga umad-adani ti panungpalan ti agdama a dakes a sistema dagiti bambanag. Kinuna ni Jesus kadagiti adalanna: “Agtultuloykayo nga agbantay, ta saanyo nga ammo no kaano nga umay ti apo ti balay [a mangukom iti lubong ni Satanas].”​—Mar. 13:35, 36.

4. Pagdiligenyo ti panangmatmat dagiti tattao a paset ti lubong ni Satanas ken dagiti adipen ni Jehova. (Iraman ti kahon.)

⁴ Iturturayan ni Satanas ti kaaduan a tattao, ken dida maawatan ti kaipapanan dagiti pasamak ditoy lubong. Saanda a mailasin nga agturturayen ni Kristo iti Pagarian. Ngem naridam dagiti pudno a pasurot ni Kristo ken ammoda ti talaga a kaipapanan dagiti pasamak iti naglabas a siglo. Sipud idi 1925, nabigbig dagiti Saksi ni Jehova a ti Gubat Sangalubongan I ken dagiti simmaganad a pasamak ket nabatad a pammatalged a nangrugin nga agturay ni Kristo iti nailangitan a Pagarian idi 1914. Gapuna, nangrugin ti maudi nga al-aldaw daytoy dakes a sistema ti bambanag nga iturturayan ni Satanas. Nupay dida ammo ti kaipapananna, adu a managpaliiw a tattao ti makadlaw iti dakkel a nagdumaan ti panawen sakbay ken kalpasan ti Gubat Sangalubongan I.​—Kitaenyo ti kahon a “Nangrugi ti Panawen ti Riribuk.”

5. Apay a napateg nga itultuloytayo ti agridam?

⁵ Kalpasan ti dandani maysa a siglo itan, dagiti nakaam-ames a pasamak iti intero a lubong paneknekanda nga agbibiagtayon iti maudi nga al-aldaw. Nagbassit laengen ti tiempo a nabati sakbay a ni Jehova bilinenna ni Kristo nga idauluanna ti nabileg a buyot dagiti anghel maibusor iti lubong ni Satanas. (Apoc. 19:11-21) Nabilin dagiti pudno a Kristiano nga agtultuloyda nga agbantay. Gapuna, nasken nga agtalinaedtayo a naridam bayat a segseggaantayo ti panungpalan daytoy a sistema. (Mat. 24:42) Malaksid iti dayta, nasken nga itungpaltayo ti maysa nga espesipiko a trabaho iti intero a daga babaen iti panangiwanwan ni Kristo.

Sangalubongan a Trabaho

6, 7. Ania ti rimmang-ayan ti trabaho a panangasaba bayat ti maudi nga al-aldaw?

⁶ Ti trabaho nga itungpal dagiti adipen ni Jehova ket paset ti naipadto a ragup a pagilasinan a mangipakita nga addatayon iti maudi nga al-aldaw ti agdama a dakes a sistema ti bambanag. Inladawan ni Jesus daytoy a sangalubongan a trabaho idi imbensabensana ti nagduduma a mapasamak bayat ti tiempo ti panungpalan. Karaman iti padtona daytoy a napnuan kaipapanan a sasao: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mat. 24:14.

⁷ Utobenyo ti dadduma a kinapudno a mainaig iti dayta a detalye ti padto ni Jesus. Manmano laeng ti mangiwarwaragawag iti naimbag a damag idi nangrugi ti maudi nga al-aldaw idi 1914. Ita, nagadudan. Nasurok a 7,000,000 a Saksi ni Jehova ti mangaskasaba iti intero a daga, nga adda kadagiti nasurok a 100,000 a kongregasion. Adda 10,000,000 a tattao a nakipagrambak kadagiti Saksi ni Jehova idi 2008 iti Pananglaglagip iti ipapatay ni Kristo. Dakkel ti ngimmatuanna no idilig iti naglabas a tawen.

8. Apay a dagiti bumusbusor dida nalapdan ti panagballigi ti panangasabatayo?

⁸ Anian a nagbileg a panangsaksi iti Pagarian ti Dios a maikalkallangogan iti amin a nasion sakbay nga agpatingga daytoy a sistema! Maar-aramid dayta iti laksid ti kinapudno a ni Satanas “ti dios daytoy a sistema ti bambanag.” (2 Cor. 4:4) Isu ti mangim-impluensia kadagiti amin a politika, relihion, ken komersio daytoy a lubong agraman dagiti propagandada. Apay ngarud a nakabalballigi ti trabaho a panangasaba? Gapu iti tulong ni Jehova. Ngarud, agtultuloy ti panagrang-ay ti trabaho a panangasaba iti laksid ti panangikagumaan ni Satanas a mangpasardeng iti dayta.

9. Apay a maibilang a milagro ti naespirituan nga irarang-aytayo?

⁹ Ti panagballigi ti trabaho a panangasaba, naespirituan nga irarang-ay, ken iyaadu ti ili ni Jehova ket maibilang a milagro. No awan ti panangiwanwan ken pannalaknib ti Dios iti ilina, imposible nga agballigi ti trabaho a panangasaba. (Basaen ti Mateo 19:26.) Babaen ti panangtignay ti nasantuan nga espiritu ti Dios iti puso dagiti naridam a tattao a situtulok nga agserbi, masiguradotayo a sibaballigi a mairingpas daytoy trabaho a panangasaba, “ket iti kasta umayton ti panungpalan.” Napartak ti iyaadani dayta a tiempo.

Ti “Dakkel a Rigat”

10. Kasano ti panangiladawan ni Jesus iti umad-adani a dakkel a rigat?

¹⁰ Agpatingga daytoy dakes a sistema inton “dakkel a rigat.” (Apoc. 7:14) Saan nga ibaga ti Biblia no kasano kapaut dayta, ngem kinuna ni Jesus: “Iti kasta addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.” (Mat. 24:21) No idiligtayo ti rigat a napasaranen daytoy a lubong, kas iti Gubat Sangalubongan II a nakatayan ti agarup 50 agingga iti 60 a milion a tattao, nakarkaro pay ti umad-adani a dakkel a rigat. Dumanonto ti kangitingitanna iti gubat ti Armagedon. Iti dayta a tiempo nga usaren ni Jehova ti buyotna a mangdadael iti amin a nabatbati a paset ti naindagaan a sistema ni Satanas.​—Apoc. 16:14, 16.

11, 12. Ania a pasamak ti mangtanda iti panangrugi ti dakkel a rigat?

¹¹ Nupay awan ti ibaga ti Biblia a petsa no kaano a mangrugi ti umuna a paset ti dakkel a rigat, ibagana no ania ti karkarna a pasamak a mangtanda iti rugina. Isu dayta ti pannakadadael ti amin a palso a relihion babaen kadagiti napolitikaan a pannakabalin. Kadagiti padto ti Biblia iti Apocalipsis kapitulo 17 ken 18, ti palso a relihion ket nayarig iti balangkantis a nakikamalala kadagiti napolitikaan nga agtuturay ditoy daga. Ipakita ti Apocalipsis 17:16 nga iti din agbayag, dagitoy a napolitikaan nga elemento “guraendanto ti balangkantis ket pagbalinendanto a walangwalang ken lamolamo, ket lamutendanto dagiti nalasag a pasetna ket isu puorandanto a naan-anay iti apuy.”

¹² Tapno mapasamak dayta, ti Dios ‘ikabilna iti puso dagiti napolitikaan nga agtuturay ti panangitungpalda iti panunotna’ tapno dadaelenda ti amin a palso a relihion. (Apoc. 17:17) Gapuna, maikuna a ti Dios ti nangdadael kadakuada. Dayta ti panangukomna iti managinsisingpet a relihion a nabayagen a mangisursuro kadagiti doktrina a maikaniwas iti pagayatan ti Dios ken nangidadanes kadagiti adipenna. Saan a namnamaen ti kaaduan a tattao a dumteng daytoy a pannakadadael ti palso a relihion. Ngem segseggaan dayta dagiti matalek nga adipen ni Jehova. Kinapudnona, kadagitoy maudi nga al-aldaw ipakpakaammoda dayta kadagiti tattao.

13. Ania ti mangipakita nga apagbiit laeng ti pannakadadael ti palso a relihion?

¹³ Maklaatto dagiti tattao a makakita iti pannakadadael ti palso a relihion. Sigun iti padto ti Biblia, addanto pay “ar-ari ti daga” a mangikuna maipapan iti dayta a pannakadadael: “Asika pay, asika pay, . . . agsipud ta iti maysa nga oras dimtengen ti pannakaukommo!” (Apoc. 18:9, 10, 16, 19) Ti panangusar ti Biblia kadagiti sasao a “maysa nga oras” ipakitana nga apagbiit laeng daytoy a pasamak.

14. Anianto ti aramiden ni Jehova inton dagiti kabusorna rautenda dagiti adipenna?

¹⁴ Ammotayo a sumagmamano a tiempo kalpasan ti pannakadadael ti palso a relihion, adda mapasamak a panangraut kadagiti adipen ni Jehova, a mangiwarwaragawag kadagiti mensahe ti panangukomna. (Ezeq. 38:14-16) Inton mangrugi ti panangraut, ni Jehova ti sanguen dagitoy a rumaut yantangay inkarina a salaknibanna ti matalek nga ilina. Kinuna ni Jehova: “Iti kinanasgedko, iti apuy ti rungsotko, kasapulan nga agsaoakto. . . . Ket kasapulanto a maammuanda a siak ni Jehova.” (Basaen ti Ezequiel 38:18-23.) Kinuna ti Dios iti Saona: “Ti mangsagid kadakayo [dagiti matalek nga adipenna] sagidenna ti bukel ti matak.” (Zac. 2:8) Isu a no mangrugi dagiti kabusorna a rumaut kadagiti adipenna iti intero a lubong, agtignayen ni Jehova. Agbanagto dayta iti maudi a paset ti dakkel a rigat​—ti Armagedon. Iti panangidaulo ni Kristo, ti nabileg a buyot dagiti anghel ibanagdanto ti panangdadael ni Jehova iti lubong ni Satanas.

No Ania ti Rumbeng nga Aramidentayo

15. Ania ti rumbeng nga aramidentayo yantangay ammotayo nga asidegen ti panungpalan daytoy a sistema?

¹⁵ Ania ti rumbeng nga aramidentayo yantangay ammotayo a napartak ti iyaadani ti panungpalan daytoy dakes a sistema? Insurat ni apostol Pedro: “Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion!” (2 Ped. 3:11) Ipaganetget dagita a sasao a masapul nga agtalinaedtayo a naridam tapno masiguradotayo a ti kababalintayo ket maitunos kadagiti pagalagadan ti Dios ken aduantayo kadagiti aramid ti nadiosan a debosion, a mangipakita nga ay-ayatentayo ni Jehova. Karaman kadagita ti panangaramid iti amin a kabaelantayo a mangikasaba iti naimbag a damag ti Pagarian sakbay a dumteng ti panungpalan. Insurat pay ni Pedro: “Ti panungpalan ti amin a bambanag immasidegen. . . . Agridamkayo no maipapan kadagiti kararag.” (1 Ped. 4:7) Sumingedtayo kenni Jehova ken maipakitatayo ti panagayattayo kenkuana babaen ti naynay a panagkararag kenkuana, a kiddawen ti panangiwanwanna babaen ti nasantuan nga espiritu ken ti sangalubongan a kongregasionna.

16. Apay a masapul a naan-anay nga ipangagtayo ti balakad ti Dios?

¹⁶ Bayat dagitoy napeggad a tiempo, masapul a naan-anay nga ipangagtayo ti balakad ti Sao ti Dios: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efe. 5:15, 16) Ad-adda ita a lumanlanlan ti kinadakes. Adu a gakat ti us-usaren ni Satanas tapno saan a maaramid dagiti tattao ti pagayatan ni Jehova wenno tapno masingana ida. Kas ad-adipen ti Dios, ammotayo dayta ket ditay kayat nga adda aniaman a mangpakapuy iti kinasungdotayo iti Dios. Ammotayo met no ania ti mabiiten a mapasamak isu nga agtalektayo kenni Jehova ken kadagiti panggepna.​—Basaen ti 1 Juan 2:15-17.

17. Iladawanyo ti reaksion dagiti makalasat iti Armagedon inton mapasamak ti panagungar.

¹⁷ Matungpalto ti naragsak a kari ti Dios nga isublina ti biag dagiti natay yantangay “addanto panagungar agpadpada dagiti nalinteg ken dagiti nakillo.” (Ara. 24:15) Imutektekanyo ti kinasigurado dayta a kari: “Addanto panagungar”! Saan a mapagduaduaan dayta ta ni Jehova ti nagsao! Ikari ti Isaias 26:19: “Dagidiay minataymo agbiagdanto. . . . Agriingkayo ken agdir-ikayo a sirarag-o, dakayo nga agtataeng iti tapok! . . . Ti met laeng daga bay-annanto a dumteng iti pannakayanak uray dagidiay inutil ken patay.” Adda immuna a kaitungpalan dagita a sasao mainaig iti panagsubli ti nagkauna nga ili ti Dios iti nakayanakanda a daga, a mangted kadatayo iti panagtalek iti umad-adanin a literal a kaitungpalanna iti baro a lubong. Anian a nagdakkel a rag-o inton dagiti mapagungar makalangenda manen dagiti ay-ayatenda! Wen, dandanin agngudo ti lubong ni Satanas, ken nakaas-asidegen ti baro a lubong ti Dios. Anian a nagpateg nga agtalinaedtayo a naridam!

Malagipyo Kadi?

• Ania ti kangrunaan nga insuro ni Jesus?

• Kasano kasaknap itan ti trabaho a panangikasaba iti Pagarian?

• Apay a nagpateg nga agbalintayo a naridam?

• Ania ti nakitayo a makaparegta maipapan iti kari iti Aramid 24:15?

[Kahon/​Ladawan iti panid 16, 17]

NANGRUGI TI PANAWEN TI RIRIBUK

The Age of Turbulence: Adventures in a New World ti paulo ti 2007 a libro ni Alan Greenspan. Iti dandani 20 a tawen, isu ti tserman ti United States Federal Reserve Board, a mangimatmaton iti panagandar dagiti banko iti pagilian. Intampok ni Greenspan ti nakadkadlaw a nagdumaan ti kasasaad ti lubong sakbay ken kalpasan ti 1914:

“Sigun kadagiti pagiwarnak idi, ti lubong sakbay ti 1914 ket agparang nga agturong iti di magawidan a panagrang-ay iti kultura ken teknolohia; ken kasla magun-oden ti sangatauan ti kinaperpekto. Ti maika-19 a siglo ti namagpatingga iti nakas-ang a panaglako iti tagabo. Kasla bumasbassiten ti nakaro a kinaranggas kadagiti tattao. . . . Nasaknap ti iyaadelantar ti teknolohia bayat ti maika-19 a siglo, kas iti pannakapartuat dagiti telepono, de koriente a silaw, pagsinean, de makina a lugan, kabaruan a riles ti tren, ken adu nga alikamen ti balay. Immatiddog ti manamnama a kapaut ti biag gapu iti siensia ti medisina, napasayaat a nutrision, ken gapu ta ad-adu ti makagun-od iti nadalus a danum . . . Impagarup ti amin nga agtultuloy ti kasta a panagrang-ay.”

Ngem . . . “Nupay ad-adu ti natay iti Gubat Sangalubongan II, ad-adda a makadadael ti Gubat Sangalubongan I yantangay dinadaelna ti kultura ken teknolohia ken inikkatna ti dakkel a namnama dagiti tattao. Diak malipatan ti naraniag a namnama dagiti tattao bayat dagiti tawen sakbay ti Gubat Sangalubongan I, idi agparang a napartak ken di magawidan ti panagrang-ay. Nakadkadlaw ti panagduma ti panangmatmat ti naglabas a siglo ken ti mas realistiko a panangmatmattayo ita. Ti kadi terorismo, panagbara ti globo, wenno ti lumanlanlan a panagtarigagay ti tao iti wayawaya dadaelenna ti agdama a rumangrang-ay a sangalubongan a panagbiag no kasano a ti Gubat Sangalubongan I dinadaelna idi ti namnama dagiti tattao? Awan ti makaibaga.”

Malagip pay ni Greenspan ti kinuna idi ti propesorna iti Ekonomia a ni Benjamin M. Anderson (1886-1949): “Dagidiay adulton sakbay ti Gubat Sangalubongan I maragsakanda a manglagip iti naraniag a masakbayan a namnamaenda idi ken ti pannakariknada iti kinatalged. Ngem kalpasan ti gubat, napukaw amin dagita.”​—Economics and the Public Welfare.

Kasta met la ti konklusion a nagteng ti tomo nga A World Undone, ni G. J. Meyer, a naipablaak idi 2006. Mabasatayo: “Masansan a maikuna a dagiti dadakkel a pasamak ‘balbaliwanda ti amin a bambanag.’ Pudno dayta uray iti Dakkel a Gubat [1914-1918]. Talaga a binalbaliwan dayta a gubat ti amin a bambanag: saan laeng a dagiti pagbeddengan, wenno dagiti gobierno ken ti masanguanan dagiti nasion, no di ket uray pay ti panangmatmat ti tao iti bagina ken iti lubong sipud idin. Nangpataud daytoy iti moderno a lubong a naan-anay a naiduma iti sinarunona a natalged a lubong.”

[Ladawan iti panid 18]

Inton Armagedon, usaren ni Jehova ti nabileg a buyot dagiti anghel