“Ti Naimbag a Damag Maikaskasaba nga Umuna”
“Ket, masapul a ti naimbag a damag maikaskasaba nga umuna kadagiti amin a nasion.”—MARCOS 13:10.
1.Aniat’ maysa a banag a mangiduma kadagiti Saksi ni Jehova manipud amin a relihion iti Kakristianuan, ken apay?
KADAGITI isuamin nga agkunkuna a Kristianoda, dagiti laeng Saksi ni Jehova ti sisiserioso a mangibakbaklay ti panangikaskasaba ti naimbag a damag. Buklenda ti kakaisuna a grupo a tunggal miembro mariknada ti personal nga obligasion nga umasideg iti kaarubada iti personal a pamay-an tapno makisao kenkuana kadagiti pangpanggep ti Dios. Apay daytoy? Agsipud ta marikna ti tunggal Saksi a, kas maysa a Kristiano, isut’ masapul a sumurot kadagiti addang ni Kristo. (1 Pedro 2:21) Aniat’ ipamatmat daytoy?
2.Kasanot’ panangmatmat ti adu a tattao ken Jesu-Kristo, ngem aniat’ kangrunaan nga aramidna ditoy daga?
2 Iti is-isip dagiti adu, ni Jesu-Kristo ket maysa laeng a tao a nagaramid kadagiti naimbag a bambanag. Inagasanna dagiti masakit, pinakanna ti mabisin, ken nangipakita ti ayat ken asi kadagidiay agkasapulan. Ngem ad-adu pay ngem dayta ti inaramid ni Jesus. Kangrunaan ngem isuamin isut’ maysa a naregta a manangaskasaba ti naimbag a damag ti Pagarian ti Dios. Sumagmamano a bulan kalpasan ti bautismona idiay karayan Jordan, rinugian ni Jesus ti publiko a panangikaskasaba: “Agbabawikayo, ta ti pagarian ti langit asidegen.” (Mateo 4:17) Kuna met ti salaysay ni Marcos: “Ni Jesus simrek idiay Galilea, a nangikaskasaba ti naimbag a damag ti Dios ket kunkunana: ‘Ti naituding a tiempo naturposen, ket ti pagarian ti Dios asidegen. Agbabawikayo ket patienyo ti naimbag a damag.’”—Marcos 1:14, 15.
3, 4.(a) Nupay nangagas ni Jesus iti amin a kita ti sakit, ania ti impaganetgetna iti ministeriona? (b) Apay a ni Jesus ti naibaon? (c) Iti aniat’ nangiyarigan ni Jesus iti panangaskasabana, ket aniat’ imbagana kadagiti adalanna nga aramidenna?
3 Ni Jesus inayabanna da Pedro, Andres, Santiago, ken ni Juan a sumurot kenkuana, ket mabasatayo: “Ket linawlawna ti amin a Galilea a nangisursuro kadagiti sinagogada ken nangikaskasaba ti naimbag a damag ti pagarian ket nangpapaimbag kadagiti amin a kita ti sakit ken amin a kita ti an-anayen kadagiti umili.” Idi dagiti umariwekwek idiay Galilea pinadpadasda a pagtalinaeden pay kunana: “Kadagiti sabsabali a siudad masapul met nga ipakaammok ti naimbag a damag ti pagarian ti Dios, ta daytoy ti panggep a nakaibaonak.” Kalpasanna isut’ napan nangaskasaba kadagiti sinagoga idiay Judea.—Mateo 4:18-23; Lucas 4:43, 44.
4 Idi nagsubli manen idiay Galilea, ni Jesus “nagdaliasat kadagiti amin a siudad ken purpurok, a mangaskasaba ken ipakaammona ti naimbag a damag ti pagarian ti Dios.” (Lucas 8:1) Inyarigna ti panangaskasabana iti panagani ket kinunana: “Ti anien adu ngem bassitda dagiti agani. Dawatenyo ngarud, iti Apo ti anien tapno mangibaon koma kadagiti agani iti paganianna.” (Mateo 9:35-38) Uray pay no dagiti umariwekwek ket saanda a paginanaen, “inawatna ida a siaasi ken kinasaona ida maipapan iti pagarian ti Dios, ket inagasanna dagiti makasapul ti pannakaagas.”—Lucas 9:11.
5.Idi imbaon ni Jesus dagiti apostolna ken dadduma nga adalanna iti ministerio, ania a bilbilin ti intedna kadakuada?
5 Pudno, inagasan ni Jesus ti masakit ken naminsan pinakanna dagiti mabisin. Ngem nangnangruna ngem ti dadduma pay, isut’ okupado a mangibagbaga kadagiti tattao maipapan iti Pagarian iti Dios. Ket kayatna a dagiti paspasurotna aramidenda met ti kasta. Kalpasan ti panangsanayna kadagiti apostolna, imbaonna ida a sagdudua a mangaskasaba, a kunkunana: “Ket no mapankayo, mangaskasabakayo, a kunkunayo, ‘Ti pagarian ti langit dimtengen.’” (Mateo 10:7) Kuna ni Lucas: “Ket imbaonna ida a mangikaskasaba ti pagarian ti Dios ken mangagas kadagiti masakit.” (Lucas 9:2) Kadagiti 70 nga adalan, nangted met ni Jesus ti bilin nga ‘agasanyo dagiti masaksakit nga adda idiay ket ibagayo kadakuada nga immasideg kadakayo ti pagarian ti Dios.’—Lucas 10:9.
6.Sakbay ti iyuulina sadi langit, ania a bilbilin maipapan iti ministerioda ti inted ni Jesus kadagiti pasurotna?
6 Sakbay ti iyuulina sadi langit, binilin ni Jesus dagiti pasurotna nga itultuloy ti trabaho a panangasaba ken pasaknapen pay dayta. Imbilinna kadakuada: “Inkayo ngarud ket pagbalinenyo nga ad-adalan dagiti amin a nasion . . . nga isursuroyo kadakuada nga aywananda dagiti isuamin a banag nga imbilinko kadakayo.” (Mateo 28:19, 20) Mainayon pay, kunana: “Ngem umawatkayto ti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” (Aramid 1:8) Gapuna, agpadpada a ni Jesus ken dagiti apostolna impangpangrunada ti panangikaskasaba ti naimbag a damag ti Pagarian ti Dios.
Ti Pagarian Maikaskasaba iti Tiempotayo
7.Aniat’ kinuna ni Jesus maipapan iti trabaho a panangasaba a maaramidan “iti panungpalan iti sistema dagiti bambanag”?
7 Iti padtona maipapan kadagiti paspasamak a mapagteng “iti panungpalan ti sistema dagiti bambanag,” kinuna ni Jesus: “Ket daytoy naimbag a damag ti pagarian maikaskasabanto iti amin a mapagnaedan a daga kas pammaneknek kadagiti isuamin a nasion; ket iti kasta umayton ti panungpalan.” (Mateo 24:3, 14) Wenno, kas kunaen ti Marcos 13:10: “Ket masapul a ti naimbag a damag maikaskasaba nga umuna kadagiti amin a nasion.”—Kitaenyo met ti Apocalipsis 14:6, 7.
8.(a) Aniat’ ramanen ti naimbag a damag idi panawen dagiti apostol? (b) Aniat’ ramanen ti mensahe ti naimbag a damag itatta?
8 Kadagiti “maudi nga al-aldaw,” ti naimbag a damag ti Pagarian ad-adu pay ti ramanenna ngem idi adda ni Jesus ditoy daga. Inkaskasaba ni Jesus a ti Pagarian asidegen, nga inyeg iti atensionda ti kinapudno nga isut’ adda iti nagtetengngaan dagiti tattao kas ti Mesias ken Ari. (2 Timoteo 3:1; Mateo 4:17; Lucas 17:21) Ti naimbag a damag nga inkaskasaba dagiti immuna a Kristiano ramanenna ti maipapan ti panagungar ken iyuuli ni Jesus idiay langit, ket pinaregtana dagiti naemma a mamatida iti um-umay a Pagarian. (Aramid 2:22-24, 32; 3:19-21; 17:2, 3; 26:23; 28:23, 31) Itan ta nadanontayon “ti panungpalan ti sistema dagiti bambanag,” ti panangikaskasaba ti naimbag a damag ti Pagarian ramanenna ti nakaskasdaaw a mensahe a ti Pagarian naipasdeken kadagiti langlangit.—Apocalipsis 11:15-18; 12:10.
Asino ti Mangikaskasabanto ti Naimbag a Damag?
9.(a) Kasanot’ panangirason dagiti dadduma a ti panangaskasaba ti naimbag a damag ket saan nga inkapilitan para kadagiti amin a Kristiano itatta? (b) Asino ti inusar ni Jehova idi un-unana a mangikasaba iti saona, ket aniat’ kaipapanan daytoy kadatayo itatta?
9 Asino, itatta, ti rebbeng a makiraman ti panangaskasaba? Nalawag, patien ti Kakristianuan a saan nga obligasion dayta nga agpaay iti tunggal maysa, ket pudno met nga idi kinuna ni Jesus a ti naimbag a damag ket maikaskasaba, saanna a pinagbalin nga espesipiko no asino ti mangaramid iti trabaho. Ngem, asino pay ngay, ti usaren ni Jehova iti kasta a trabaho no di dagidiay addaan iti pammati iti Saona ken rinugianda nga inyaplikar dayta iti panagbiagda? Idi inkeddeng ni Jehova idi kaaldawan ni Noe a pakdaaran ti nadangkes a lubong ti sangatauan iti umay a pannakadadael, inaramatna ti maysa a tao a “nakipagna iti pudno a Dios.” (Genesis 6:9, 13, 14; 2 Pedro 2:5) Idi kinayatna a maipan ti naimpadtuan a mensahe iti Israel, imbaonna ‘dagiti ad-adipenna, dagiti mammadto.’ (Jeremias 7:25; Amos 3:7, 8) Ti dedikado a nasion ti Israel ket maysa a nasion dagiti saksina. (Exodo 19:5, 6; Isaias 43:10-12) Wen, us-usaren ni Jehova dagiti dedikado nga ad-adipenna kas dagiti saksina.
10.Kasano a makita manipud sasao ti Mateo 28:19, 20 a ti bilin a panangaramid kadagiti ad-adalan agaplikar kadagiti isuamin a Kristiano?
10 Kuna dagiti dadduma a ti bilin a mangaramid kadagiti adalan, idiay Mateo 28:19, 20, ket naited laeng kadagiti apostol ket ngarud saan nga agaplikar kadagiti Kristiano a kaaduan. Ngem kitaenyo ti kuna ni Jesus: “Inkayo ngarud ket mangaramidkayo ti ad-adalan kadagiti amin a nasion . . . nga isursuroyo kadakuada nga aywananda dagiti isuamin a banag nga imbilinko kadakayo.” Dagiti paspasurot ni Jesus ti mangisuro kadagiti amin nga adalan nga aywananda dagiti isuamin a bambanag nga insuro ni Jesus. Ket maysa kadagiti bambanag nga imbilinna isu ti ‘inkayo ket mangaramid ti ad-adalan.’ Pudno unay, amin a baro nga ad-adalan ti masapul a masursuruan a mangaywan met iti daytoy masinunuo a bilin.
11.(a) Ania nga obligasion ti naipatay iti tunggal kongregasion Kristiano idi umuna a siglo? (b) Aniat’ nasken para iti maysa tapno maisalakan, ket aniat’ ramanen daytoy?
11 Ti kongregasion Kristiano idi umuna a siglo ket naawagan ‘ili a kukua ti Dios a mangipaduyakyak kadagiti kinatan-ok daydiay nangayab kadakuada manipud iti kinasipnget aginggana iti nakaskasdaaw a lawag.’ (1 Pedro 2:9) Dagiti miembrona ti sireregta a nangted iti pammaneknek maipapan iti Pagarian ti Dios. (Aramid 8:4, 12) Amin dagiti “sasanto,” dagiti napulotan a Kristiano, idiay Roma ti nakaibagaanna a “babaen iti ngiwat ti panagaramid ti panangipaduyakyak iti publiko a maipaay iti pannakaisalakan” ket “siasinoman nga umawagto iti nagan ni Jehova maisalakanto.” (Roma 1:7; 10:9, 10, 13) Daytoy a panangipaduyakyak iti publiko a maipaay iti pannakaisalakan, a naaramid iti pannakabautisar ti maysa, ramanenna met ti publiko a panangikaskasaba iti naimbag a damag iti Pagarian ni Jehova.
12, 13.(a) Ti “publiko a panangipaduyakyak iti namnamatayo” a nadakamat idiay Hebreo 10:23 ramanenna ti ania? (b) Kasano nga ipakita ti Salmo 96 ti pannakasapul ti publiko a panangipaduyakyak iti ruar ti kongregasion, ken kasano a ti Apocalipsis 7:9, 10 suportaranna daytoy?
12 Nagsurat ni apostol Pablo kadagiti Hebreo a Kristiano: “Salimetmetantayo koma a sititibker ti publiko a panangipaduyakyak ti inanamatayo tapno di agisin, ta mapagtalkan daydiay nagkari.” (Hebreo 10:23) Daytoy publiko a panangipaduyakyak ket saan a nakedngan kadagiti panaggigimong iti kongregasion. (Salmo 40:9, 10) Idiay Salmo 96:2, 3, 10 nalawag a makitatayo ti naimpadtuan a bilin a mangaskasaba iti ruar ti kongregasion, kadagiti nasnasion, kadagitoy a sasao: “Iti inaldaw-aldaw ibagayo ti naimbag a damag iti pannakaisalakanna. Ipalawagyo ti dayagna kadagiti nasnasion, dagiti nakaskasdaaw nga ar-aramidna kadagiti amin a tattao. Kunaenyo kadagiti nasnasion: ‘Ni Jehova ti nagarin.’” Pudno unay, idiay Mateo 28:19, 20 ken Aramid 1:8, binilin ni Jesus dagiti Kristiano a mangaskasaba kadagiti nasnasion.
13 Daytoy a publiko a panangaskasaba ti nadakamat pay kadagiti kanayonan a sasao ni Pablo kadagiti napulotan a Hebreo a Kristiano: “Iti kasta gapu kenkuana idatontayo a kankanayon iti Dios ti daton ti panagdaydayaw, kayatna a sawen, ti agaon kadagiti bibig a mangaramid ti publiko a panangipaduyakyak iti naganna.” (Hebreo 13:15) Idiay libro ti Apocalipsis, ti “dakkel a bunggoy,” a naur-urnong manipud amin a nasnasion, ti nakita met a mangipukpukkaw babaen iti dakkel a timek: “Ti pannakaisalakan nagtaud iti Diostayo, nga agtugtugaw iti trono, ken iti Kordero.” (Apocalipsis 7:9, 10) Gapuna, iti daytoy panawen ti panungpalan ti sistema dagiti bambanag, ti panangikaskasaba ti naimbag a damag ti ar-aramiden dagiti dedikado a Saksi ni Jehova, ti natda kadagiti naespirituan a kakabsat ni Kristo ken dagiti kimmarnero a kakaduada a mangbukel ti “dakkel a bunggoy.” Ngem kasanot’ aktual a panagaramidda iti daytoy a trabaho?
“Iti Publiko ken iti Binalaybalay”
14.Sadino ti nangaramidan ni Jesus ti panangasabana, ket ania a prinsipio ti maadaltayo manipud iti daytoy?
14 Ni Jesus ti direkta a nangaskasaba kadagiti tattao. Mabasatayo, kas pangarigan, nga isut’ mangaskasaba kadagiti sinagoga. Apay? Agsipud ta nagtataripnong dagiti tattao sadiay iti Panaginana ket agdengdengngegda ti pannakaibasa ken pannakaisalaysay dagiti Kasuratan. (Mateo 4:23; Lucas 4:15-21) Ni Jesus nangaskasaba met kadagiti tattao kadagiti igid ti daldalan, iti igid ti baybay, iti arisadsad ti bantay, agraman iti ruar iti siudad, ken kadagiti pagtaengan. Sadinoman nga ayan dagiti tattao, nangaskasaba ni Jesus kadakuada—Mateo 5:1, 2; Marcos 1:29-34; 2:1-4, 13; 3:19; 4:1, 2; Lucas 5:1-3; 9:57-60; Juan 4:4-26.
15.(a) Ania a bilbilin ti inted ni Jesus kadagiti adalanna idi imbaonna a mangasaba? (b) Kasano ti panangilawlawag dagiti dadduma a komentarista ti Biblia iti daytoy?
15 Idi imbaon ni Jesus dagiti adalanna a mangasaba, imbaonna met ida a direkta kadagiti tattao. Makita daytoy kadagiti bilbilinna a nailanad idiay Mateo 10:1-15, 40-42. Iti Mt 10 bersikulo 11 kunana: “Ket uray sadino a siudad ken purok a serkanyo, birukenyo a nalaing idiay no asino ti maikari, ket agdaguskayo idiay agingga iti pumanawkayo.” Ipaulog ti The Jerusalem Bible daytoy a bersikulo: “Agsaludsodkayo maipapan iti daydiay maikari,” a kasla kettay dagiti adalan ti agsaludsod ti maipapan iti prominente wenno napakaammuan a tao iti dayta a purok tapno masarakan ken maammuan no asino ti addaan ti nasayaat a pakasarsaritaan ket iti kasta maikari iti mensahe. (Kitaenyo met ti Weymouth ken ti King James Version.) Ket isu daytoy ti panangilawlawag dagiti dadduma a komentarista ti Biblia maipapan iti Mt 10 bersikulo 11.
16.Aniat’ ad-adda nga addaan panggep a panangusig ti sasao ni Jesus idiay Mateo 10:11 ti mangipamatmat no kasano ti panangsapul dagiti apostol kadagidiay maikari?
16 Rebbeng a laglagipen, nupay kasta, nga iti kaaduan a pasetna, dagiti teologo iti Kakristianuan saanda nga agbalaybalay, ket adu kadagiti komentarista iti Biblia adda pagannayasanda nga ipatarus dagiti Kasuratan iti konteksto dagiti kabukbukodanda a kapadasan. Iti ad-adda nga addaan panggep a panangusig iti bilin ni Jesus ipamatmatna nga isut’ agsasao maipapan iti panagsapul dagiti adalanna kadagiti tattao a sinaggaysa, manipud iti balaybalay wenno iti publiko, ket iparang kadakuada ti mensahe iti Pagarian. (Mateo 10:7) Ti panangabrasada ipamatmatna no maikarida wenno saan.—Mateo 10:12-15.
17.Aniat’ mangpaneknek a dagiti adalan ni Jesus saanda laeng a sumarsarungkar kadagiti maikari a tattao a maibatay iti rekomendasion wenno pannakitulag?
17 Makita daytoy kadagiti sasao ni Jesus idiay Mateo 10:14: “Ket uray siasino a saan nga umawatto kadakayo ken saan a dumngeg kadagiti saoyo, no pumampanawkayon iti daydiay a balay wenno siudad pampagenyo ti tapuk dagiti saksakayo.” Ni Jesus ket agsasao maipapan iti panangaramid dagiti adalanna iti di naaw-awis a panagsarungkar kadagiti tattao tapno mangasaba kadakuada. Pudno, umawatda met iti panagdagus iti maysa kadagiti sangakabbalayan a mangabrasa iti mensahe. (Mateo 10:11) Ngem ti kangrunaan a banag isu ti trabaho a panangaskasaba. Idiay Lucas 9:6 kunana: “Ket napanda iti teritoria iti inilin-ili nga inkaskasaba ti naimbag a damag ket nangag-agasda kadagiti isuamin a purpurok.” (Kitaenyo met ti Lucas 10:8, 9.) Dagidiay maikari nga immawat kadagiti adalan kadagiti pagtaenganda kas mammadto, a nalabit nangted kadakuada iti “sangabaso a nalamiis a danum” wenno uray pay dagiti pagdagusan, didanto mapukaw ti gunggonada. Denggendanto ti mensahe ti Pagarian.—Mateo 10:40-42.
18, 19.(a) Sigun iti Aramid 5:42, kasanot’ panangaramid dagiti immuna a Kristiano ti panangaskasabada? (b) Kasano nga ipakita dagiti sasao ni Pablo idiay Aramid 20:20, 21 nga isut’ agsasao maipapan iti ministerio kadagiti di manamati, saan nga iti makin-uneg a trabaho a panangipastor?
18 Kalpasan ti pannakaibangon ti kongregasion Kristiano, mabasatayo ti maipapan kadagiti apostol: “Ket inaldaw-aldaw iti templo ken kadagiti balbalay dida namingga a nanursuro ken nangiwaragawag iti naimbag a damag maipapan ken Kristo, nga isu ni Jesus.” (Aramid 5:42; kitaenyo met ti Reference Bible, footnote.) Ti sasao iti Griego a naipatarus “kadagiti balbalay” ket kat’ oiʹkon. Ditoy ti ka·taʹ ket adda iti makaiwaras a kababagasna. Gapuna, mabalin a maikuna a ti panangaskasaba dagiti adalan ket naiwaras manipud balaybalay. Saanda nga agaramid iti basta immuna nga inyurnos a sosial a panagsarungkar. Ti umas-asping a panangusar iti ka·taʹ isut’ masarakan idiay Lucas 8:1 kadagiti sasao a “kadagiti amin a siudad ken purpurok.”
19 Isu met laeng a sasao iti plural, a kat’ oiʹkous, ti inusar ni apostol Pablo idiay Aramid 20:20. Sadiay kunana: “Ta awan ti aniaman a makapalaing a binaybay-ak . . . ket insurok kadakayo iti publiko ken kadagiti balbalay.” Ti sasao a “kadagiti balbalay” ti naipaulog iti “kadagiti pagtaenganyo” iti sumagmamano a patarus. Gapuna dadduma kadagiti komentarista iti Biblia iti Kakristianuan kunada a ti tuktukoyen ni Pablo ditoy isu ti panagsarungkar a panangipastor iti pagtaengan dagiti manamati. Ngem dagiti sumaganad a sasao ni Pablo ipakitana nga isut’ agsasao maipapan iti ministerio kadagiti di manamati, ta kunana: “A pinaneknekak kadagiti Judio ken kadagiti met Griego ti panagbabawi iti Dios ken iti pammati ken Apotayo a Jesu-Kristo.”—Aramid 20:21.
20.(a) Kasano kasaknapen iti nangikaskasabaanen dagiti Saksi ni Jehova iti naimbag a damag ti Pagarian iti tiempotayo? (b) Kasanot’ mabalin a panangmatmat dagiti dadduma iti panagtultuloy iti panangaskasaba?
20 Daytoy a pamay-an ti panangdanon kadagiti tattao ti rebbeng ngarud a mausar iti tiempotayo no ti “naimbag a damag iti pagarian” masapul a “maikaskasaba iti isuamin a mapagnaedan a daga kas pammaneknek iti isuamin a nasion.” (Mateo 24:14) Iti nasuroken a 65 a tawtawen, sireregta nga ikaskasaba dagiti Saksi ni Jehova ti naimbag a damag ti naipasdeken a Pagarian ti Dios iti publiko ken manipud binalaybalay—itan iti 210 a dagdaga. Anian a naindaklan a pammaneknek ti maar-aramid! Ket daytoy agpapan pay iti kinapudno a kaaduan kadagiti tattao itatta denggenda ti mensahe “ket ikidemda dagiti matada,” dadduma masuronda pay. (Mateo 13:15) Apay nga agtultuloy dagiti Saksi ni Jehova iti panangaskasaba kadagiti luglugar a sadiay dagiti tattao madida a dumngeg wenno busorenda pay ida? Daytoy a saludsod ti masalaysay iti sumaganad nga artikulo.
Kasanoyo a Sungbatan?
◻ Aniat’ ipakpakita dagiti Kasuratan a mangiladawan iti ministerio ni Jesus?
◻ Ania dagiti bilbilin a naited kadagiti apostol iti ministerioda?
◻ Ania a trabaho ti maaramidan iti tiempotayo, ken apay?
◻ Asino dagiti usaren ni Jehova a mangikaskasaba ti naimbag a damag iti kaaldawantayo?
◻ Sadino ken kasano ti pannakairingpas ti trabaho a panangasaba?