Agtalinaed a Siririing iti “Panawen ti Panungpalan”
“Agtalinaed a sikikita, agtalinaed a siririing, ta diyo ammo no kaano ti naituding nga aldaw.”—MARCOS 13:33.
1. Kasanot’ rebbeng a panagtignaytayo bayat a manglukat dagiti makapikapik a pasamak iti daytoy “panawen ti panungpalan”?
BAYAT nga agparang dagiti makapikapik a pasamak iti daytoy “panawen ti panungpalan,” kasanot’ rebbeng a panagtignay dagiti Kristiano? (Daniel 12:4) Saanda nga agmalmalanga. Imbaga ni Jesu-Kristo ti padto a naglaon iti nabukel a pagilasinan a manarimaan pannakatungpalnan iti daytoy maika-20 a siglo. Impakpakaunana dagiti adu a tampok a nangmarka iti daytoy a panawen nanipud 1914 kas naidumduma. Gapu ta pagaammona ti padto ni Daniel maipanggep “iti panawen ti panungpalan,” pinasarunuan ni Jesus ti bukodna a dakkel a padto babaen panangigunamgunamna kadagiti adalanna nga “agtalinaed a siririing.”—Lucas 21:36.
2. Apay nga adda dakkel a kasapulan iti panagtalinaed a siririing iti naespirituan?
2 Apay nga agtalinaed a siririing? Agsipud ta isu daytoy ti kapepeggadan a panawen ti natauan a historia. Ti irurukma dagiti Kristiano iti naespirituan a panagtuglep iti daytoy a tiempo ket makadidigra. No agbalintayo nga aleng-aleng wenno palubosantayo a mapadagsenan dagiti pusotayo kadagiti pakadanagan ti biag, agpeggadtayo. Idiay Lucas 21:34, 35, pinakdaarannatayo ni Jesu-Kristo: “Aluadanyo dagiti bagbagiyo di la ket ta dagiti pusoyo mapnoda iti kinarawet ken panagbartek ken kadagiti pakadanagan ti biag, ket iti kasta umayto a kellaat kadakayo dayta nga aldaw kas maysa a silo. Ta umayto iti amin nga agnaed iti rabaw ti isuamin a daga.”
3, 4. (a) Aniat’ kayat a sawen ni Jesus iti panagkunana a ti aldaw ti pungtot ti Dios ket umayto a kellat kadagiti tattao “kas maysa a silo”? (b) Yantangay saan a ti Dios ti mangipakat iti silo, apay a dayta nga aldaw di ninamnama a lapunosennanto ti kaaduan kadagiti tao?
3 Buyogen naimbag a rason a kuna ni Jesus a ti aldaw ni Jehova umayto a ‘kellaat kas maysa a silo.’ Ti maysa a silo masansan nga addaan sima, ket maaramat daytoy a pagtiliw kadagiti billit ken animal. Ti silo addaan kakalbitan, ket asinoman a makabaddek iti dayta masagidna ti kakalbitan. Kalpasanna agserran ti silo, ket matiliwen ti biktima. Amin daytoy mapasamak a giddato. Iti umasping a pamay-an, kuna ni Jesus, dagiti di aktibo iti naespirituan makellaatdanto ken malapunosdanto inton “aldaw ti pungtot” ti Dios.—Proverbio 11:4.
4 Ni kadi Jehova a Dios ti mangipakpakat iti silo kadagiti tattao? Saan, isut’ saan a manggunggundaway tapno masalamaanna a di agsipsiput dagiti tattao tapno dadaelenna ida. Ngem dayta nga aldaw lapunosennanto ti pangkaaduan kadagiti tattao gapu ta dida impangpangruna ti Pagarian ti Dios. Aramidenda ti kaykayatda iti pananggaw-at kadagiti gugun-oden iti biag, a dida ipangpangag ti kaipapanan dagiti paspasamak iti aglawlawda. Daytoy, nupay kasta, dina baliwan ti pagorasan ti Dios. Isut’ addaan bukod a naituding a tiempo ti panagsingirna. Ken, siaanus, saan a dina ipakaammo iti sangatauan ti um-umay a panangukomna.—Marcos 13:10.
5, 6. (a) Gapu iti um-umay a panangukom, ania a naayat a probision ti inaramiden ti Namarsua maipaay kadagiti natauan a parsua, ngem buyogen ania a pangkaaduan a resulta? (b) Aniantot’ mausig tapno matulongantayo nga agtalinaed a siririing?
5 Daytoy a pakdaar ket maysa a naayat a probision iti biang ti naindaklan a Namarsua, nga interesado iti pagimbagan dagiti natauan a parsua ditoy simboliko a pagbatayan dagiti sakana. (Isaias 66:1) Ipatpategna dagiti agnanaed iti lugar a masasao a paginanaan dagiti sakana. Gapuna a babaen kadagiti naindagaan nga embahadorna ken embiadona, pakdaaranna ida kadagiti pasamak iti masanguananda. (2 Corinto 5:20) Kaskasdi, agpapan pay amin a naited a pakdaar, dagidiay a pasamak sumangbaydanto iti natauan a pamilia a di napakpakadaan kas ket tay naikursongda iti maysa a silo. Apay? Agsipud ta kaaduan a tao ket matmaturogda iti naespirituan. (1 Tesalonica 5:6) Bassit laeng a bilang ti mangipangpangag iti pakdaar ket lumasatdanto agturong iti baro a lubong ti Dios.—Mateo 7:13, 14.
6 Kasano, ngarud, a makapagtalinaedtayo a siririing iti daytoy panawen ti panungpalan tapno maibilang kadagidiay maisalakan? Ipaay ni Jehova ti kasapulan a tulong. Paliiwentayo dagiti pito a bambanag a maaramidantayo.
Sarangten ti Pannakasinga
7. Ania a pakdaar maipanggep iti pannakasinga ti inted ni Jesus?
7 Umuna, masapul a sarangtentayo ti pannakasinga. Idiay Mateo 24:42, 44, kuna ni Jesus: “Agsalukagkayo, ngarud, ta dikay ammo no ania nga aldawto ti iyaay ti Apoyo. Gapuna addakayo met koma a sisasagana, ta inton oras a dikay ipagpagarup, toy Anak ti tao umayto.” Ti pagsasao nga inusar ni Jesus ditoy ipabigbigna nga iti daytoy napeggad a tiempo, adunto dagiti pakasingaan, ket ti pannakasinga mabalin a mangituggod iti pannakadadael. Idi panawen ni Noe adu a bambanag ti namagbalin nga okupado kadagiti tattao. Kas nagbanaganna, dagiti nasinga a tattao “dida nadlaw” ti mapaspasamak, ket ti Layus inyayusna amin ida. Maitutop unay, impakdaar ni Jesus: “Kastanto met ti iyaay ti Anak ti tao.”—Mateo 24:37-39.
8, 9. (a) Kasano a dagiti gagangay a gagaw-aten ti biag sipepeggad a singaendatayo? (b) Aniada a pakdaar ti inted kadatayo da Jesus ken Pablo?
8 Laglagipenyo, met, nga iti pakdaarna idiay Lucas 21:34, 35, salsalaysayen ni Jesus dagiti gagangay a paset ti biag, kas iti pannangan, panaginum, ken dagiti pakadanagan iti pagsapulan. Bambanag dagita a gagangay iti amin a tao, agraman dagiti adalan ni Apo Jesus. (Idiligyo ti Marcos 6:31.) Dagitoy a bambanag mabalin a dida mangdangran a mismo, ngem no mapalubosan, mabalin a singaendatayo, pagbalinendatayo nga okupado, ket ngarud ipastrekda kadatayo ti napeggad a naespirituan a panagtuglep.
9 No kasta, ditay koma liwliwayan ti banag a kapapatgan—ti panangragpat iti nadiosan nga anamong. Imbes a maigamertayo kadagiti gagangay a bambanag ti biag, usarentayo koma ida iti nakedngan laeng a rukod a kasapulan a pangsustento iti biagtayo. (Filipos 3:8) Rebbeng a dida koma lengdan ti intereses ti Pagarian. Kas kunaen ti Roma 14:17, “ti pagarian ti Dios ket saan a maipapan iti pannangan wenno iyiinum, no di ket kaipapananna ti kinalinteg ken talna ken rag-o iti nasantuan nga espiritu.” Laglagipenyo dagiti sasao ni Jesus idi a kunana: “Itultuloyyo ngarud a biruken nga umuna ti pagarian ken ti kinalintegna, ket amin dagitoy a bambanag mainayondanto kadakayo.” (Mateo 6:33) Ad-adda pay, idiay Lucas 9:62, impakaammo ni Jesus: “Awan ti tao nga idinto nga immiggem iti arado ken tumaliaw pay iti likudan ti maikari iti pagarian ti Dios.”
10. Ania a peggad ti adda no ditay pagtalinaeden dagiti matatayo a sikikita iti kalat?
10 Iti kanito a rinugiantayo ti agarado, iti piguratibo a panagsao, masapul a lintegentayo ti desdestayo. Ti agarado a tumaliaw iti likudan saanto a nalinteg ti takapna. Isut’ masinga ken nalaka a maisiasi wenno maisallin kadagiti pakaisagudan. Saantayo koma nga agbalin a kas iti asawa ni Lot, a timmaliaw ket di pulos nakadanon iti kinatalged. Kasapulantayo a taginayonen a sikikita dagiti matatayo iti kalat. Tapno maaramidan dayta masapul a sarangtentayo ti pannakasinga.—Genesis 19:17, 26; Lucas 17:32.
Agkararag iti Amin a Kinaregget
11. Aniat’ impaganetget ni Jesus kalpasan panangpakdaarna kadatayo maipapan iti peggad ti pannakasinga?
11 Nupay kasta, adda ad-adu pay a maaramidantayo tapno agtalinaed a siririing. Ti maikadua a napateg a banag ket: Agkararag iti amin a kinaregget. Kalpasan panangpakdaarna kadatayo maibusor iti pannakasinga kadagiti gagangay a gagaw-aten ti biag, inted ni Jesus daytoy a balakad: “Agtalinaedkayo ngarud, a siririing, nga agkarkararagkayo a kankanayon tapno agballigikayo iti pananglisi kadagitoy amin a bambanag a naikeddeng a mapasamak, ken makapagtakderkayo iti sanguanan ti Anak ti tao.”—Lucas 21:36.
12. Ania a kita ti kararag ti kasapulan, ken buyogen ania a resulta?
12 Ngarud, masapul a kankanayon nga agkararagtayo maipanggep iti peggad ti kasasaadtayo ken ti kasapulantayo nga agbalin a nasiglat. Gapuna nga umadanitayo a sikakararag iti Dios buyogen naregget a panagpakpakaasi. Kunaen ni Pablo idiay Roma 12:12: “Agtalinaed iti panagkararag.” Ken idiay Efeso 6:18, mabasatayo: “Buyogen amin a kita ti kararag ken dawdawat . . . , itultuloyyo ti panagkararag iti amin a gundaway iti espiritu. Ket maipaay itoy agtalinaed a siririing a kankanayon.” Daytoy ket saan a basta panangidatag laeng iti kararag kas ket tay gagangay laeng a banag nga awan dakkel nga ibungana. Ti mismo a kaaddatayo ket agpegpeggad. Kasapulantayo ngarud ti agdawat a sireregget maipaay iti nadiosan a tulong. (Idiligyo ti Hebreo 5:7.) Iti dayta a pamay-an mataginayontayo dagiti bagbagitayo iti dasig ni Jehova. Awan ad-adda a makagunggonan iti panangtulong kadatayo a mangitungpal iti daytoy ngem ti ‘panangaramidtayo a kankanayon iti panagdawdawat.’ Taginayonennatayonto ngarud ni Jehova iti kasasaad ti napinget a kinasiput. Anian a nagpateg, ngarud, ti agtultuloy iti panagkararag!
Kumpet a Siiirut iti Organisasion ti Dios ken iti Trabahona
13. Kasapulan ti ania a kita ti pannakilangen tapno agtalinaed a siririing?
13 Kayattayo a malisian amin dagitoy a bambanag nga umapay iti lubong. Kayattayo ti agtakder iti saklang ti Anak ti tao, nga addaan iti anamongna. Iti daytoy a banag adda maikatlo a banag a maaramidantayo: Kumpet a siiirut iti teokratiko nga organisasion ni Jehova. Kasapulantayo ti makitimpuyog nga awan pagpambarna iti dayta nga organisasion ken makiraman kadagiti aramidna. Iti daytoy a pamay-an awan panagduadua a maibilangtayo dagiti bagbagitayo kas Kristiano nga agsipsiput.
14, 15. (a) Ti pannakaigamer iti ania a trabaho ti tumulong kadatayo nga agtalinaed a siririing? (b) Asinot’ mangikeddeng no ti panangasaba a trabaho ket nalpasen, ken kasanot’ rebbeng a panagriknatayo maipapan iti dayta? (c) Kalpasan ti dakkel a rigat, aniantot’ mailasintayo inton tumaliawtayo iti naaramidan a panangikasaba iti Pagarian?
14 Nainaig unay isu ti maikapat a banag a makatulong kadatayo nga agtalinaed a siririing. Masapul nga agbalintayo a maysa kadagidiay mangpakpakdaar kadagiti tattao iti um-umay a panungpalan daytoy a sistema ti bambanag. Ti naan-anay a panungpalan daytoy daan a sistema ti bambanag dinto mapasamak agingga a “daytoy naimbag a damag ti pagarian” ket naikasaban iti rukod a pinanggep ti Dios a Mannakabalin-amin. (Mateo 24:14) Dagiti Saksi ni Jehova saan nga isuda ti mangikeddeng no nairingpasen ti trabaho a panangasaba. Ni Jehova laeng ti addaan kalintegan iti dayta. (Marcos 13:32, 33) Datayo, nupay kasta, ket determinado nga agtrabaho a sigagaget aginggat’ mabalin ken aginggat’ kasapulan iti panangikasaba maipapan iti kasayaatan a gobierno a magun-odan ti sangatauan, ti Pagarian ti Dios. Ti ibebettak ti “dakkel a rigat” umayto bayat a makipaspasettayo pay laeng iti daytoy a trabaho. (Mateo 24:21) Kabayatan ti intero a masanguanan, dagiti nakalasat makataliawdanto ket siraragsak a mapasingkedanda a ni Jesu-Kristo ket saan a maysa nga ulbod a mammadto. (Apocalipsis 19:11) Ti panangasaba a trabaho ket maaramidton iti rukod a dakdakkel nga amang ngem iti ninamnama dagidiay makipaspaset iti dayta.
15 Maitutop unay, iti napateg a tiempo inton daytoy a trabaho ket maaramiden iti kapkapnekan ti Dios, ad-adunto ngata ti makipaset iti dayta ngem iti aniaman a panawen iti kallabes. Anian a ragsaktayonto iti kaadda ti pasettayo iti daytoy dakkel a trabaho! Ipasigurado kadatayo ni apostol Pedro a ni Jehova “dina kayat a madadael ti asinoman no di ket tarigagayanna nga amin ket agturong koma iti panagbabawi.” (2 Pedro 3:9) Maigiddato, ti aktibo a puersa ti Dios a Mannakabalin-amin ket agan-andar itan a nakarkaro ngem idi, ket tarigagayan dagiti Saksi ni Jehova ti agtultuloy iti daytoy tinignay-espiritu a trabaho. Gapuna a kumpet a siiirut iti organisasion ni Jehova, ken agbalin nga okupado iti publiko a ministeriona. Maysanto daytoy a tumulong iti panagtalinaedyo a siririing.
Mangaramid iti Panangsukimat iti Bagi
16. Apay a rebbeng a mangaramidtayo iti panangsukimat iti bagi maipapan iti agdama a naespirituan a kasasaadtayo?
16 Adda maikalima a banag a maaramidantayo tapno makapagtalinaed a siririing. Sinaggaysa, masapul a mangaramidtayo iti panangsukimat iti bagi kadagiti bukodtayo a sasaaden. Maitutop daytoy ita a nangnangruna ngem idi. Kasapulan a paneknekantayo no makin-dasig ti sipapakinakem a pagtaktakderantayo. Idiay Galacia 6:4, kuna ni Pablo: “Tunggal maysa paneknekanna koma ti bukodna nga aramid.” Mangaramid ti panangsukimat iti bagi maitunos kadagiti sasao ni Pablo idiay 1 Tesalonica 5:6-8: “Ditay koma maturog a kas kadagiti dadduma, no di ket agtalinaedtayo a siririing ken agsiputtayo. Ta dagidiay maturog nairuamda a maturog iti rabii, ken dagidiay mabartek masansan a mabartekda iti rabii. Ngem no kadatayo a taga lawag, agsiputtayo ken ikapettayo a kabal iti barukong ti pammati ken ayat ken kas kabal iti ulo ti inanama ti pannakaisalakan.”
17. No mangaramid iti panangsukimat iti bagi, ania a salsaludsod ti rebbeng nga iyimtuodtayo kadagiti bagbagitayo?
17 Kumustatayo? No sukimatentayo dagiti bagbagitayo iti lawag dagiti Kasuratan, makitatayo kadi nga agtaltalinaedtayo a siririing, nga addaan kas kabal iti ulo ti inanama ti pannakaisalakan? Tattaotayo kadi a sipopositibo a nangilasin kadagiti bagitayo manipud daan a sistema ti bambanag ken ditayo aw-awatenen dagiti kapanunotanna? Pudpudno kadi nga addaantayo iti espiritu ti baro a lubong ti Dios? Sisisiputtayo kadi a naan-anay no sadino ti pagturongan daytoy a sistema? No wen, dinatayto lapunosen ti aldaw ni Jehova a kas ket tay mannanakawtayo.—1 Tesalonica 5:4.
18. Aniada pay a salsaludsod ti nalabit kasapulan nga iyimtuodtayo kadagiti bagbagitayo, ken buyogen ania a resulta?
18 Ania, nupay kasta, no ipanayag ti panagsukimattayo iti bagitayo nga ikarkarigatantayo ti mangipasdek iti naimas, nawaya, kumportable, palaypalay a wagas ti panagbiag? Ania ngay no matakkuatantayo a dagiti naespirituan a matatayo ket agkepkeppetdan buyogen panagtuglep ken pannakaturturogen? Addatayo kadi iti kasasaad ti panagdarepdep, nga agkamkamat iti adu a nailubongan nga arapaap? No wen, agriingtayo ngaruden!—1 Corinto 15:34.
Mennamennaen dagiti Natungpalen a Padto
19. Aniada dagiti dadduma a padto ti nakitatayo a natungpalen?
19 Mapantayon iti maikanem a banag a tumulong kadatayo nga agtalinaed a siririing: Mennamennaen dagiti adu a padto a natungpalen iti daytoy panawen ti panungpalan. Nalabsantayon ti maika-77 a tawen manipud panagngudo ti naituding a panawen dagiti nasnasion idi 1914. Bayat a tumaliawtayo iti tallo a kakapat ti maysa a siglo, makitatayo no kasano a nagsasaganad ti pannakatungpal dagiti padto—ti pannakaisubli ti pudno a panagdayaw; ti pannakaispal dagiti napulotan a natda, kasta met kadagiti kakaduada, agturong iti naespirituan a paraiso; ti pannakaikasaba ti naimbag a damag ti Pagarian iti sangalubongan a rukod; ti panagparang ti dakkel nga umariwekwek. (Isaias 2:2, 3; kapitulo 35; Zacarias 8:23; Mateo 24:14; Apocalipsis 7:9) Addan pannakaitan-ok ti naindaklan a nagan ken unibersal a kinasoberano ni Jehova, kasta met ti iyaadu ti bassit tapno agbalin a sangaribo ken ti bassit tapno agbalin a nabileg a nasion, a ni Jehova ti mangpappapartak iti dayta iti tiempona. (Isaias 60:22; Ezequiel 38:23) Ken dagiti sirmata ni apostol Juan idiay salaysay ti Apocalipsis ket umas-asideg ti kangitingitandan.
20. Ania a panamati ti pagpapadaan dagiti Saksi ni Jehova, ken aniat’ kinaagpaysuanna a pinaneknekandan?
20 Ngarud, ad-adda ngem idi, sititibker a naallukoyen dagiti Saksi ni Jehova iti kinaumiso ti pannakatarusda iti kaipapanan dagiti pasamak ti lubong sipud 1914. Ti kaadda ti kasta a pannamati, nagbalinda nga alikamen kadagiti ima ti Kangatuan-amin a Dios. Isuda dagiti nadutokan a mangipagteng iti nadiosan a mensahe iti daytoy napateg a tiempo. (Roma 10:15, 18) Wen, pimmudnon dagiti sasao ni Jehova maipaay iti panawen ti panungpalan. (Isaias 55:11) Daytoy, manen, ti rebbeng a mangpabara kadatayo nga agtultuloy agingga a makitatayo ti maudi a pannakatungpal amin dagiti kari ti Dios babaen ken Jesu-Kristo.
Ti Pannakaisalakan As-asideg Ngem Idi Damotayo ti Nagbalin a Manamati
21. Ania a maikapito a tulong iti panagtalinaed a siririing ti adda kadatayo?
21 Kamaudiananna, ti maikapito a tulong iti panagtalinaedtayo a siririing: Kanayon a laglagipen a ti pannakaisalakantayo ket as-asidegen ngem idi damotayo ti nagbalin a manamati. Napatpateg pay, ti pannakaalangon ti unibersal a kinasoberano ni Jehova ken ti pannakasantipikar ti naganna ket nakaas-asidegen. Gapuna a ti kasapulan a panagtalinaed a siririing ket nagangganat itan ngem iti napalabas. Insurat ni apostol Pablo: “Ammoyo a tattao ti panawen, nga orasen ti panagriingyo manipud pannakaturog, ta ita ti pannakaisalakantayo ket as-asidegen ngem idi damo a namatitayo. Ti rabii lumabasen; umasidegen ti bigat.”—Roma 13:11, 12.
22. Kasanot’ rebbeng a panangapektar kadatayo ti kinaasideg ti pannakaisalakantayo?
22 Gapu ta as-asidegen nga amang ti pannakaisalakantayo, masapul nga agtalinaedtayo a siririing! Masapul a ditay ipalubos ti aniaman a personal wenno nailubongan nga interes a mangbattuag iti panangapresiartayo iti ar-aramiden ni Jehova maipaay iti ilina kabayatan daytoy panawen ti panungpalan. (Daniel 12:3) Kasapulantayo nga ipakita ti ad-adda a panagtultuloy ngem iti napalabas tapno saantayo a maisiasi manipud iti dalan a silalatak nga isingsingasing kadatayo ti Sao ti Dios. (Mateo 13:22) Silalawag nga ipakita dagiti pammaneknek a daytoy a lubong ket addan kadagiti maudi nga al-aldawna. Din agbayag mapunasen nga agnanayon tapno iwayaanna ti maysa a baro a lubong ti kinalinteg.—2 Pedro 3:13.
23. Iti ania a pamay-an a tulongannatayo ni Jehova, ken buyogen ania a nabendisionan a resulta?
23 Iti amin a pamay-an, ngarud, agtalinaedtayo a siririing. Ad-adda ngem idi, agbalin a nasiglat no sadino ti ayantayon iti ayus ti panawen. Laglagipen, saanto a pulos a maturog ti Dios maipapan iti daytoy a banag. Imbes ketdi, kankanayon a tulongannatayo nga agtalinaed a siririing iti daytoy panawen ti panungpalan. Ti rabii lumabasen. Umas-asidegen ti bigat. Gapuna agtalinaed a siririing! Din agbayag mapasarantayon ti kalilibnosan kadagiti al-aldaw, bayat a ti Mesianiko a Pagarian tungpalenna ti panggep ni Jehova iti daga!—Apocalipsis 21:4, 5.
Ania Dagiti Sungbatyo?
◻ Aniat’ kayat a sawen ni Jesus idi a kunana a ti aldaw ti pungtot ti Dios ket umayto “kas maysa a silo”?
◻ Apay a masapul a sarangtentayo ti pannakasinga, ken kasanotayo a maaramid ti kasta?
◻ Ania a kita ti kararag ti kasapulan tapno agtalinaed a siririing?
◻ Ania a kita ti pannakitimpuyog ti napateg?
◻ Apay a mangaramid iti panangsukimat iti bagi maipapan iti naespirituan a kasasaadtayo?
◻ Aniat’ akem ti padto iti panagtalinaedtayo a siririing?