TAEP

Ti naingpis a balkut wenno ukis ti bukel a kas iti sebada ken trigo. Nupay namin-adu a tinukoy ti Biblia ti taep iti piguratibo a pamay-an, ipamatmat dagitoy ti trabaho a panagirik a kadawyan idi un-unana. Kalpasan ti panagani, awanen ti serserbi ti ukis ti nagpateg a binukel, isu a mayanatup laeng a simbolo daytoy ti maysa a banag a nalag-an, awan patpategna, ken di matarigagayan, maysa a banag nga isina manipud nasayaat sa maibelleng.

Umuna, maisina ti taep manipud iti bagas babaen ti panagirik. Kalpasanna, babaen ti panangitaep, ipalais ti angin ti nalag-an a taep a kas iti tapok. (Kitaenyo ti PANAGTAEP.) Daytoy ti mangiladawan no kasano nga ikkaten ni Jehova a Dios dagiti apostata iti tengnga ti ilina ken no kasano a dadaelenna dagiti nadangkes a tattao ken dagiti bumusbusor a nasion. (Job 21:18; Sal 1:4; 35:5; Isa 17:13; 29:5; 41:15; Os 13:3) Ti Pagarian ti Dios rumekennanto dagiti kabusorna a kas iti taep a nalaka nga ipalais ti angin.​—Da 2:35.

Masansan a ti awan serserbina a taep ket maurnong ken mapuoran tapno saanen nga itayab ti angin ket mailaok manen kadagiti bunton ti bukbukel. Umasping iti dayta, impadto ni Juan a Manangbautisar ti um-umay ken sumsumged a pannakadadael dagiti nadangkes ken ulbod a panguluen ti relihion​—a ti trigo ket urnongento ti Managirik a ni Jesu-Kristo, “ngem ti taep puorannanto iti apuy a saan maiddep.”​—Mt 3:7-12; Lu 3:17; kitaenyo ti PANAGIRIK.