Ti Naindaklan a Naespirituan a Templo ni Jehova
“Addaantayo iti nangato a padi a kas itoy, . . . maysa a publiko nga adipen ti nasantuan a disso ken ti pudno a tolda, nga imbangon ni Jehova, ket saan a ti tao.”—HEBREO 8:1, 2.
1. Ania a naayat a probision ti inaramid ni Jehova agpaay iti managbasol a sangatauan?
GAPU iti naindaklan a panagayatna iti sangatauan, impaay ni Jehova a Dios ti maysa a daton a mangikkat kadagiti basol ti lubong. (Juan 1:29; 3:16) Kinalikagumanna ti pannakayakar ti biag ti inauna nga Anakna manipud langit iti aanakan ti maysa a birhen a Judio nga agnagan Maria. Sibabatad nga inlawlawag ti anghel ni Jehova ken ni Maria a ti ubing nga iyinawna “maawaganto iti nasantuan, Anak ti Dios.” (Lucas 1:34, 35) Naibaga ken Jose, a naitulag ken Maria, ti maipapan iti datdatlag a pannakayinaw ni Jesus ket naammuanna a daytoy ti ‘mangisalakanto iti ilina manipud kadagiti basolda.’—Mateo 1:20, 21.
2. Aniat’ inaramid ni Jesus idi agarup 30 ti tawenna, ken apay?
2 Bayat a dumakdakkel ni Jesus, di pagduaduaan a natarusanna ti dadduma kadagitoy a kinapudno maipapan iti datdatlag a pannakayanakna. Ammona nga adda makaispal-biag nga ipatrabaho kenkuana ditoy daga ti nailangitan nga Amana. Gapuna, idi nagtengannan ti umiso nga edad a 30, napan ni Jesus iti mammadto ti Dios a ni Juan, tapno agpabautisar idiay Karayan Jordan.—Marcos 1:9; Lucas 3:23.
3. (a) Aniat’ kayat a sawen ni Jesus iti sasao a, “Sakripisio ken daton saanmo a kinayat”? (b) Ania a naisangsangayan nga ulidan ti impasdek ni Jesus kadagiti amin nga agtarigagay nga agbalin nga adalanna?
3 Agkarkararag ni Jesus idi mabautisaran. (Lucas 3:21) Nabatad, inyaplikarna iti bagina ti Salmo 40:6-8, kas impakita ni apostol Pablo kamaudiananna: “Sakripisio ken daton saanmo a kinayat, ngem insaganam ti maysa a bagi a maipaay kaniak.” (Hebreo 10:5) Iti kasta impakita ni Jesus nga ammona a ‘saan a kinayat’ ti Dios nga agtultuloy ti pannakaidaton dagiti animal a daton idiay templo ti Jerusalem. Imbes ketdi, nautobna nga insagana ti Dios ti maysa a perpekto a natauan a bagi para kenkuana, ni Jesus, a maidatag kas maysa a daton. Daytoy ti mangikkat iti aniaman a pakasapulan pay kadagiti animal a daton. Tapno maipakita ti naimpusuan a tarigagayna nga agpasakup iti pagayatan ti Dios, intuloy nga inkararag ni Jesus: “Adtoy! Umayak (iti lukot ti libro naisurat ti maipapan kaniak) tapno aramidek ti pagayatam, O Dios.” (Hebreo 10:7) Anian a nakaskasdaaw nga ulidan ti kinatured ken awan panagimbubukodanna a debosion ti impakita ni Jesus iti dayta nga aldaw kadagiti amin nga agbalinto nga adalanna!—Marcos 8:34.
4. Kasanot’ panangipakita ti Dios iti anamongna iti panangidaton ni Jesus iti bagina?
4 Inanamongan kadi ti Dios ti kararag ni Jesus idi mabautisaran? Bay-antayo nga ipaayannatay ti sungbat ti maysa kadagiti napili nga apostol ni Jesus: “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket nakitana ti espiritu ti Dios a bumabbaba a kasla maysa a kalapati nga um-umay kenkuana. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdunguen, nga inanamongak.’”—Mateo 3:16, 17; Lucas 3:21, 22.
5. Aniat’ inladawan ti altar iti literal a templo?
5 Ti pananganamong ti Dios iti pannakaidatag ti bagi ni Jesus a maidaton kaipapananna nga, iti naespirituan nga anag, addan maysa nga altar a dakdakkel ngem ti adda iti templo iti Jerusalem. Ti literal nga altar a nakaidatonan dagiti animal inladawanna ti naespirituan nga altar, nga iti kinapudnona “pagayatan” wenno urnos ti Dios iti panangawatna iti natauan a biag ni Jesus kas maysa a daton. (Hebreo 10:10) Daytat’ makagapu no apay a maisurat ni apostol Pablo kadagiti padana a Kristiano: “Addaantayo iti maysa nga altar nga iti dayta dagidiay mangaramid iti sagrado a panagserbi idiay tolda [wenno, templo] awan kinaturayda a mangan.” (Hebreo 13:10) Iti sabali a pannao, magunggonaan dagiti pudno a Kristiano manipud iti natantan-ok a makaabbong-basol a daton, nga inlaksid ti kaaduan a padi a Judio.
6. (a) Aniat’ naadda idi tiempo a nabautisaran ni Jesus? (b) Aniat’ kaipapanan ti titulo a Mesias, wenno Kristo?
6 Ti pannakapulot ni Jesus iti nasantuan nga espiritu kayatna a sawen nga impasdeken ti Dios ti naan-anay nga urnosna iti naespirituan a templo, a ni Jesus ti agserserbi kas Nangato a Padi. (Aramid 10:38; Hebreo 5:5) Napaltiingan ni adalan a Lucas a mangitudo iti tawen daytoy napateg a pasamak kas “maikasangapulo ket lima a tawen ti panagturay ni Tiberio Cesar.” (Lucas 3:1-3) Tumupag dayta iti tawen 29 K.P.—apag-isu nga 69 a lawas dagiti tawen, wenno 483 a tawen, manipud idi imbilin ni Ari Artaxerxes ti pannakaibangon manen dagiti bakud ti Jerusalem. (Nehemias 2:1, 5-8) Sigun iti padto, agparangto ti ‘Mesias a Pangulo’ iti dayta naipadto a tawen. (Daniel 9:25) Nabatad nga ammo daytoy ti adu a Judio. Ipadamag ni Lucas a “siinanama dagiti tattao” maipapan iti panagparang ti Mesias, wenno Kristo, titulo manipud iti Hebreo ken Griego a sasao nga addaan iti isu met laeng a kaipapanan, “daydiay napulotan.”—Lucas 3:15.
7. (a) Kaano a pinulotán ti Dios ti “Kasasantuan,” ket aniat’ kayat a sawen daytoy? (b) Ania pay ti napasamak ken Jesus idi nabautisaran?
7 Idi nabautisaran ni Jesus, napulotán ti nailangitan a balay ti Dios, wenno nailasin, kas “ti Kasasantuan” iti urnos ti naindaklan a naespirituan a templo. (Daniel 9:24) Adda idin “ti pudno a tolda [wenno, templo], nga imbangon ni Jehova, ket saan a ti tao.” (Hebreo 8:2) Kasta met, babaen ti pannakabautisarna iti danum ken nasantuan nga espiritu, nayanak manen ni tao a Jesu-Kristo kas naespirituan nga Anak ti Dios. (Idiligyo ti Juan 3:3.) Kaipapanan daytoy nga inton agangay ayabanto ti Dios ti Anakna iti nailangitan a biag, a sadiay agserbinto iti makannawan ni Amana kas Ari ken Nangato a Padi “iti agnanayon maitunos iti kasasaad ni Melquisedec.”—Hebreo 6:20; Salmo 110:1, 4.
Ti Nailangitan a Kasasantuan
8. Aniada a baro nga aspeto ti adda itan iti trono ti Dios idiay langit?
8 Iti daydi aldaw a pannakabautisar ni Jesus, naaddaan kadagiti baro nga aspeto ti nailangitan a trono ti Dios. Ti panangituding [ti Dios] iti maysa a perpekto a natauan a daton a mangabbong kadagiti basol ti lubong impaganetgetna ti kinasanto ti Dios no idilig iti kinamanagbasol ti tao. Naitampok met ti asi ti Dios iti banag nga impakitanan ti kinatulokna a mabalin nga ay-aywen, wenno pakikappiaan. Iti kasta ti trono ti Dios idiay langit nagbalin a kas iti makin-uneg a paset ti templo, a sumrekan idi ti nangato a padi iti maminsan iti makatawen nga addaan iti dara ti animal a mangabbong iti basol iti makailadawan a pamay-an.
9. (a) Aniat’ inladawan ti kurtina iti nagbaetan ti Nasantuan ken ti Kasasantuan? (b) Kasano a nakastrek ni Jesus iti labes ti kurtina iti naespirituan a templo ti Dios?
9 Ti kurtina a namagsina iti Nasantuan manipud iti Kasasantuan inladawanna ti nainlasagan a bagi ni Jesus. (Hebreo 10:19, 20) Dayta ti nanglapped ken Jesus a sumrek iti sanguanan ni Amana bayat ti kaaddana ditoy daga kas tao. (1 Corinto 15:50) Iti daydi ipapatay ni Jesus, “ti kurtina ti santuario napisang a nagudua, manipud ngato agingga iti baba.” (Mateo 27:51) Daytoy ti nangipakita a sibabatad a naikkaten ti bangen a manglapped iti iseserrek ni Jesus idiay langit. Kalpasan ti tallo nga aldaw, nangaramid ni Jehova a Dios iti naisangsangayan a milagro. Pinagungarna ni Jesus, saan a kas maysa a di matay a natauan a lasag ken dara, no di ket kas maysa a nadayag nga espiritu a parsua nga ‘agtultuloy a sibibiag iti agnanayon.’ (Hebreo 7:24) Kalpasan ti uppat a pulo nga aldaw, immuli ni Jesus idiay langit ken simrek iti pudpudno a “Kasasantuan,” “tapno agparang iti sanguanan ti persona ti Dios maipaay kadatayo.”—Hebreo 9:24.
10. (a) Aniat’ napasamak kalpasan ti panangidatag ni Jesus iti pateg ti datonna iti nailangitan nga Amana? (b) Aniat’ kaipapanan ti pannakapulot iti nasantuan nga espiritu kadagiti adalan ni Kristo?
10 Inawat kadi ti Dios ti pateg ti naiparukpok a dara ni Jesus kas pangabbong kadagiti basol iti lubong? Wen inawatna. Naaramid ti pammaneknek iti daytoy apag-isu a 50 nga aldaw kalpasan ti panagungar ni Jesus, iti aldaw ti piesta ti Pentecostes. Naibukbok ti nasantuan nga espiritu ti Dios kadagiti 120 nga adalan ni Jesus a nagtataripnong idiay Jerusalem. (Aramid 2:1, 4, 33) Kas ti Nangato a Padida, ni Jesu-Kristo, napulotandan nga agserbi kas maysa a ‘nasantuan a kinapadi, tapno mangidaton kadagiti naespirituan a sakripisio’ iti sidong ti urnos ti naindaklan a naespirituan a templo ti Dios. (1 Pedro 2:5) Maysa pay, dagitoy napulotan ti mangbukel iti maysa a baro a nasion, ti “nasantuan a nasion” ti Dios ti naespirituan nga Israel. Sipud idin, amin a padto dagiti naimbag a banag maipapan iti Israel, kas ti kari a “baro a tulag” a nailanad iti Jeremias 31:31, agaplikar iti napulotan a kongregasion Kristiano, ti pudpudno nga “Israel ti Dios.”—1 Pedro 2:9; Galacia 6:16.
Dadduma Pay nga Aspeto ti Naespirituan a Templo
11, 12. (a) Iti kaso ni Jesus, aniat’ inladawan ti paraangan ti kinapadi, ket ania dayta iti kaso dagiti napulotan a pasurotna? (b) Aniat’ iladladawan ti naipalanggana a danum, ket kasano a naaramat dayta?
11 Nupay inladawan ti Kasasantuan ti “langit a mismo,” a nakaitronuan ti Dios, amin a dadduma nga aspeto ti naespirituan a templo ti Dios ti mainaig kadagiti banag ditoy daga. (Hebreo 9:24) Iti templo idiay Jerusalem, adda makin-uneg a paraangan agpaay kadagiti papadi nga addaan iti altar a pagidatonan ken maysa a dakkel a naipalanggana a danum, nga inaramat dagiti papadi a pangdalus iti bagida sakbay nga aramidenda ti sagrado a panagserbi. Aniat’ iladawan dagitoy a banag iti urnos ti naespirituan a templo ti Dios?
12 Iti kaso ni Jesu-Kristo, ti makin-uneg a paraangan dagiti papadi inladawanna ti awanan basol a kasasaadna kas perpekto a tao nga Anak ti Dios. Iti panamati iti daton ni Jesus, maibilang a nalinteg dagiti napulotan a pasurot ni Kristo. Iti kasta, siuumiso a makilangen kadakuada ti Dios a kasla awan basolda. (Roma 5:1; 8:1, 33) Gapuna, daytoy a paraangan iladawanna met ti naikuna a nalinteg a natauan a kasasaad a tagtagiragsaken dagiti indibidual a kameng ti nasantuan a kinapadi iti sanguanan ti Dios. Maigiddato iti dayta, imperpekto ken agbasol pay laeng dagiti napulotan a Kristiano. Ti naipalanggana a danum iti paraangan iladawanna ti Sao ti Dios, nga in-inut nga aramaten ti Nangato a Padi a mangdalus kadagiti nasantuan a papadi. Babaen ti panagpadalusda iti kastoy a pamay-an, naragpatda ti natan-ok a langa a mangidayaw iti Dios ken mangguyugoy kadagiti adda iti ruar nga agturong iti nadalus a pagdayaw kenkuana.—Efeso 5:25, 26; idiligyo ti Malakias 3:1-3.
Ti Nasantuan
13, 14. (a) Aniat’ iladladawan ti Nasantuan iti templo iti kaso ni Jesus ken dagiti napulotan a pasurotna? (b) Aniat’ iladladawan ti nabalitokan a kandelero?
13 Ti umuna a paset ti templo iladawanna ti maysa a kasasaad a natantan-ok ngem iti paraangan. Iti kaso ti perpekto a tao a ni Jesu-Kristo, iladawanna ti pannakayanakna manen kas maysa a naespirituan nga Anak ti Dios a naitudingen nga agsubli iti nailangitan a biag. Kalpasan ti pannakaideklarada a nalinteg maibatay iti pammatida iti naiparukpok a dara ni Kristo, mapasaran met dagitoy a napulotan a pasurot ti naisangsangayan a panagandar ti espiritu ti Dios. (Roma 8:14-17) Babaen ti “danum [dayta ti, pannakabautisarda] ken espiritu,” ‘nayanak[da] manen’ kas naespirituan nga annak ti Dios. Iti kasta, addaanda iti namnama a pannakapagungar iti nailangitan a biag kas espiritu nga annak ti Dios, no la ketdi agtalinaedda a matalek agingga ken patay.—Juan 3:5, 7; Apocalipsis 2:10.
14 Dagiti papadi a nagserbi iti uneg ti Nasantuan iti naindagaan a templo ti saan a nakita dagiti managdaydayaw nga adda iti ruar. Kasta met, mapaspasaran dagiti napulotan a Kristiano ti naespirituan a kasasaad a saan a napasaran wenno naan-anay a natarusan ti kaaduan a managdaydayaw iti Dios, dagidiay addaan namnama nga agbiag nga agnanayon iti paraiso a daga. Ti nabalitokan a kandelero iti tabernakulo iladawanna ti nalawagan a kasasaad dagiti napulotan a Kristiano. Ti panagandar ti nasantuan nga espiritu ti Dios, kas ti lana kadagiti kandelero, mangted lawag iti Biblia. Saan a bukbukodan dagiti Kristiano ti pannakaawat a magunggun-odda iti dayta. Imbes ketdi, agtulnogda ken Jesus, a nangikuna: “Dakayo ti silaw ti lubong. . . . Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.”—Mateo 5:14, 16.
15. Aniat’ inladawan ti tinapay iti lamisaan ti tinapay ti pamarang?
15 Tapno makapagtalinaed iti daytoy a nalawagan a kasasaad, kasapulan a regular nga agtaraon dagiti napulotan a Kristiano iti inladawan ti tinapay iti lamisaan ti tinapay ti pamarang. Ti Sao ti Dios ti kangrunaan a gubuayan ti naespirituan a taraonda, nga ikagumaanda a basaen ken utoben iti inaldaw. Inkari met ni Jesus nga ipaayanna ida iti ‘taraon iti umiso a tiempo’ babaen ti “matalek ken masirib nga adipen[na].” (Mateo 24:45) Daytoy nga “adipen” isut’ intero a bagi dagiti napulotan a Kristiano ditoy daga iti aniaman a partikular a tiempo. Us-usaren ni Kristo daytoy napulotan a bagi a mangipablaak iti impormasion iti kaitungpalan dagiti padto ti Biblia ken mangipaay iti naintiempuan a panangiwanwan iti pannakayaplikar dagiti prinsipio ti Biblia iti agdama nga inaldaw a panagbiag. No kasta, agtaraon dagiti napulotan a Kristiano kadagiti amin a kakasta a naespirituan a probision a buyogen ti panangapresiar. Ngem ti pannakataginayon ti naespirituan a biagda agpannuray iti ad-adda pay ngem ti basta pananggun-od iti pannakaammo ti Dios kadagiti panunot ken pusoda. Kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Umasping iti dayta, mapaspasaran dagiti napulotan a Kristiano ti pannakapnek babaen ti inaldaw a panangyaplikarda a mismo ti panangaramid iti naipalgak a pagayatan ti Dios.
16. Aniat’ inladawan ti panagserbi iti altar ti insienso?
16 Iti bigat ken iti rabii, agidaton ti maysa a padi iti insienso iti Dios iti altar ti insienso iti Nasantuan. Maigiddato iti dayta, makapagkararag iti Dios dagiti managdaydayaw a saan a padi bayat a sitatakderda kadagiti makinruar a paraangan ti templona. (Lucas 1:8-10) “Ti insienso,” ilawlawag ti Biblia, “kaipapananna ti karkararag dagiti sasanto.” (Apocalipsis 5:8) “Ti kararagko agtarus kadi a kas insienso dita sanguanam,” insurat ni salmista a David. (Salmo 141:2) Tagipatgen met dagiti napulotan a Kristiano ti pribilehioda a makapagkararag ken Jehova baeten ken Jesu-Kristo. Dagiti nasged a kararag nga aggubuay iti puso umasping iti nasayamusom nga insienso. Dagiti napulotan a Kristiano idayawda met ti Dios iti dadduma pay a pamay-an, nga usarenda dagiti bibigda a mangisuro kadagiti sabsabali. Ti kinaandurda iti sidong dagiti pakarigatan ken ti kinatarnawda iti sidong ti pakasuotan ti nangnangruna a makaay-ayo iti Dios.—1 Pedro 2:20, 21.
17. Aniat’ nairaman iti kaitungpalan ti naimpadtuan a ladawan nga impaay ti immuna nga iseserrek ti nangato a padi iti Kasasantuan iti Aldaw ti Panangabbong?
17 Iti Aldaw ti Panangabbong, kasapulan a sumrek ti nangato a padi ti Israel iti Kasasantuan ken mangpuor iti insienso iti nabalitokan a paginsiensuan a naglaon kadagiti umap-apuy a beggang. Kasapulan a maaramid daytoy sakbay nga iserrekna ti dara dagiti daton gapu iti basol. Kas kaitungpalan daytoy naimpadtuan a ladawan, tinaginayon ti tao a ni Jesus ti naan-anay a kinatarnaw ken Jehova a Dios sakbay nga indatonna ti biagna kas ti manayon a daton maipaay kadagiti basoltayo. Iti kasta impakitana a masalimetmetan ti maysa a perpekto a tao ti kinatarnawna iti Dios aniaman a pammarigat ti iyeg ni Satanas kenkuana. (Proverbio 27:11) Idi nasuot, nagkararag ni Jesus “buyogen dagiti napigsa nga ikkis ken lulua, ket isu naimdengan buyogen ti pannakaanamong gapu iti nadiosan a butengna.” (Hebreo 5:7) Iti daytoy a pamay-an impadayagna ni Jehova kas ti nalinteg ken umiso a Soberano ti uniberso. Ginunggonaan ti Dios ni Jesus babaen ti panangpagungarna kenkuana iti imortal a nailangitan a biag. Iti daytoy natan-ok a saadna, ipaayan ni Jesus iti atension ti maikadua a makagapu iti immayanna ditoy daga, nga isu ti, panangikappiana kadagiti managbabawi a managbasol a tattao iti Dios.—Hebreo 4:14-16.
Ti Dakdakkel a Dayag ti Naespirituan a Templo ti Dios
18. Kasano a naisangsangayan a pinadayag ni Jehova ti naespirituan a templona?
18 “Ti maud-udi a dayag daytoy a balay dakdakkelto ngem iti immun-una,” impadto ni Jehova. (Haggeo 2:9) Babaen ti panangpagungarna ken Jesus kas imortal nga Ari ken Nangato a Padi, nangipaay ni Jehova iti naisangsangayan a dayag iti naespirituan a templona. Maiyeg itan ni Jesus ti “agnanayon a pannakaisalakan amin dagidiay agtultulnog kenkuana.” (Hebreo 5:9) Ti immuna a nangipakita iti kasta a kinatulnog isu dagiti 120 nga adalan nga immawat iti nasantuan nga espiritu idi Pentecostes iti 33 K.P. Impadto ti libro nga Apocalipsis nga agdagupto iti 144,000 dagitoy a naespirituan nga annak ti Israel. (Apocalipsis 7:4) Kalpasan ti ipapatayda, adu kadakuada ti kasapulan a maturog iti kadawyan a tanem ti sangatauan, nga ur-urayenda ti tiempo a kaadda ni Jesus iti naarian a pannakabalin. Ti naimpadtuan a kronolohia a linaon ti Daniel 4:10-17, 20-27 itudtudona ti 1914 kas tiempo a panangrugi ni Jesus nga agturay iti tengnga dagiti kabusorna. (Salmo 110:2) Adu a dekada sakbayna, sigagagar nga inur-uray dagiti napulotan a Kristiano dayta a tawen. Ti umuna a gubat sangalubongan ken dagiti kakuykuyogna a rigat iti sangatauan pinaneknekanna a pudno a naitronon ni Jesus kas Ari idi 1914. (Mateo 24:3, 7, 8) Di nagbayag kalpasanna, idi dimteng ti tiempo a ti “panangukom mangrugi iti balay ti Dios,” ipatungpal ni Jesus ti kari kadagiti napulotan nga adalanna a naturogen ken patay: “Umayakto manen ket awatenkayto kaniak a mismo iti pagtaengan.”—1 Pedro 4:17; Juan 14:3.
19. Kasano a makastrek iti nailangitan a Kasasantuan ti natda ti 144,000?
19 Saan pay a naan-anay a naselioan amin ken naurnong iti nailangitan a taengda ti 144,000 a kameng ti nasantuan a kinapadi. Addada pay laeng nga agbibiag ditoy daga ti natda iti naespirituan a kasasaad nga inladawan ti Nasantuan, a naisina iti nasantuan a presensia ti Dios babaen ti “kurtina,” wenno bangen, ti nainlasagan a bagida. No matay dagitoy a simamatalek, dagus a mapagungarda kas imortal nga espiritu a parsua tapno maitiponda kadagidiay 144,000 nga addan idiay langit.—1 Corinto 15:51-53.
20. Ania a napateg a trabaho ti ar-aramiden ita dagiti natda ti nasantuan a kinapadi, ken buyogen kadagiti ania a resulta?
20 Gapu iti nakaad-adu a papadi nga agserserbi a kadua ti naindaklan a Nangato a Padi idiay langit, ad-adda pay a naipadayag ti naespirituan a templo ti Dios. Kabayatanna, dagiti natda ti nasantuan a kinapadi ar-aramidenda ti nakapatpateg a trabaho ditoy daga. Babaen ti panangaskasabada, ‘pagkinkintayegen [ti Dios] dagiti amin a nasnasion’ babaen kadagiti panangukomna, kas naipadto iti Haggeo 2:7. Maigiddato iti dayta, riniwriw a managdaydayaw a nailadawan kas “dagiti napateg a gameng dagiti amin a nasnasion” ti um-umay iti uneg dagiti naindagaan a paraangan ti templo ni Jehova. Kasano a maikari dagitoy iti urnos ti Dios agpaay iti panagdayaw, ket ania a kinadayag iti masanguanan ti mainanamatayo agpaay iti naindaklan a naespirituan a templona? Mausig dagitoy a saludsod iti sumaganad nga artikulo.
Dagiti Repaso a Saludsod
◻ Ania a naisangsangayan nga ulidan ti impakita ni Jesus idi 29 K.P.?
◻ Ania nga urnos ti nangrugi a nagandar idi 29 K.P.?
◻ Aniat’ inladawan ti Nasantuan ken ti Kasasantuan?
◻ Kasano a naipadayag ti naindaklan a naespirituan a templo?
[Ladawan iti panid 17]
Idi napulotan ni Jesus iti nasantuan nga espiritu idi 29 K.P., nangrugi a nagandar ti naindaklan a naespirituan a templo ti Dios