TURED, BILEG
Ti kualidad a kinabileg, kinatured, kinanakarit, kinamaingel. Ti tured ket kasungani ti buteng, alikaka, ken kinatakrot.—Mr 6:49, 50; 2Ti 1:7.
Ti Hebreo a berbo a cha·zaqʹ ti masansan unay a tumukoy iti ideya ti kinabileg wenno kinatured. Kangrunaanna nga ipasimudaagna ti ‘bumileg.’ (2Sm 13:28; 2Cr 19:11; Eze 3:14) Masansan a maar-aramat ti cha·zaqʹ a kadua ti ʼa·matsʹ, a kaipapananna met ti ‘bumileg.’ Dagitoy dua a berbo ket agparang kadagiti sasao a “Bumilegkayo ken pumigsakayo” (Jos 10:25) ken “Bumilegkayo, ket pumigsa koma ti pusoyo.”—Sal 31:24.
Ti ideya ti ikakapuy wenno ikakapsut ket mayebkas babaen iti Hebreo a termino a ra·phahʹ, a no dadduma mabalin a kaipapananna ti ‘mapukawan iti tured’ (Jer 49:24) wenno ‘ipakita a naupay.’ (Pr 24:10) No maipatarus nga “agsalupaypay,” kas iti sasao a “Saan koma nga agsalupaypay dagiti imam,” addaan dayta iti kaipapanan a “mapukawan iti tured, kumapuy unay nga agtignay.”—Sof 3:16; Isa 13:7; Eze 7:17.
Iti Griego, ti kinatured wenno kinabileg ket mayebkas babaen kadagiti berbo a thar·reʹo (2Co 5:8) ken thar·seʹo. (Mt 9:2) Ti berbo a tol·maʹo ket nagduduma ti pannakaipatarusna kas “naitured” (Jud 9), “makaitured” (Mr 12:34), “agtured” (Ro 15:18), “agtignay a situtured” (2Co 11:21), a ti maipagpaganetget ket pannakaiparangarang ti bileg wenno kinatured iti maysa nga isayangkat nga aramiden.
Dagiti adipen ti Dios kanayon a kasapulanda ti bileg wenno kinatured tapno makapagtalinaedda a matalek iti Kangatuan. Gapuna, idi nakasaganan dagiti Israelita a bumallasiw nga agturong iti Naikari a Daga, imbaga ni Moises kadakuada: “Bumilegkayo ken pumigsakayo,” ket dayta met laeng a pammagbaga inulitna ken Josue, ti nadutokan a sunona. (De 31:6, 7) Kas panangpasingked kadagidiay a sasao ni Moises, ni Jehova a mismo imbagana ken Josue idi agangay, “Bumilegka ken pumigsaka . . . Isuna laeng ta bumilegka ken pumigsaka unay.” (Jos 1:6, 7, 9) Tapno maipaayan iti kasapulan a bileg, nasken idi nga umimdeng, agsursuro, ken agtulnog ti nasion iti linteg ni Jehova. (De 31:9-12) Umasping iti dayta, tapno bumileg ken pumigsa, naibaga ken Josue a kanayon a basaenna ti linteg ti Dios ken ikagumaanna nga iyaplikar dayta.—Jos 1:8.
Ti Kasuratan ket naglaon iti adu a nabatad a bilin a bumileg, ken ipakitana met no kasano a ti maysa magun-odanna dayta. (Sal 31:24) Dakkel ti maitulong ti timpuyog dagiti pada a managdaydayaw. (Ara 28:15) Iti Salmo 27:14 kinuna ni David, a maysa met a nabileg a lalaki: “Bumilegka ket pumigsa koma ta pusom.” Kadagiti immun-una a bersikulo ti Salmo 27, ipalgak ni David no ania ti nakatulong kenkuana a bumileg: Panagpannuray ken Jehova kas “ti salindeg” ti biagna (ber 1), dagiti napalabas a kapadasanna no kasano a tinaming ni Jehova dagiti kabusorna (ber 2, 3), panangtagipateg iti templo a pagdaydayawan ken Jehova (ber 4), panagtalek iti pannalaknib ni Jehova ken iti tulong ken panangispalna (ber 5-10), agtultuloy a paisuro kadagiti prinsipio ti nalinteg a dalan ti Dios (ber 11), ken dagiti kualidad a pammati ken namnama (ber 13, 14).
Kasapulan ti maysa a Kristiano ti bileg wenno tured tapno makapagtalinaed a di mamulitan kadagiti kababalin ken tigtignay ti lubong a makibimbinnusor ken Jehova a Dios ken tapno makapagtalinaed a matalek Kenkuana uray pay no kasapulan a sanguenna ti pananggura ti lubong. Kinuna ni Jesu-Kristo kadagiti adalanna: “Iti lubong addaankayo iti rigat, ngem bumilegkayo! Pinarmekko ti lubong.” (Jn 16:33) Ti Anak ti Dios saan a pulos timmulok iti impluensia ti lubong, no di ket nagballigi maibusor iti lubong babaen iti saanna a panagbalin a kas iti dayta iti aniaman a pamay-an. Ti nagpaiduma nga ulidan ni Jesu-Kristo kas manangparmek ken ti imbunga ti awan pakapilawanna a danana mabalinna la ketdi a punnuen ti maysa a tao iti kasapulan a bileg wenno tured tapno tuladenna ni Jesus iti panagtalinaed a naisina ken di natulawan iti lubong.—Jn 17:16.