Panangmatmat iti Biblia

Sino dagiti “Nayanak a Nabaliwan”?

NI Nicodemo ket miembro iti nangato a korte a Judio, maysa nga eskolar iti relihiuso a linteg, ket nakakitan iti umdas a pammaneknek kadagiti milagro ni Jesus tapno makumbinsir nga isu ti Mesias. Kaskasdi, dina maawatan no ania ti kayat a sawen ni Jesus iti sasao a, “No ti maysa a tao saan a mayanak a mabaliwan, saanna a mabalin a kitaen ti pagarian ti Dios.”​—Juan 3:1-3, 10.

“Kasano ti pannakabalin ti tao a mayanak idinto a lakayen?” inimtuod ni Nicodemo: “Mabalin aya ti sumrek manen iti aanakan ni inana ken mayanak?”​—Juan 3:4.

Minilion a tattao itatta ti agkunkuna a “nayanak a nabaliwan” ket kunaenda a nalawag a naawatanda ti kaipapanan daytoy. Dadduma, kas ken ni Nicodemo, ti mariribukan nga interamente iti kapanunotan a mayanak a mabaliwan. Agsipud ta inaramid ni Jesus daytoy a punto nga umuna a kasapulan iti iseserrek iti Pagarian ti Dios, nasken a maawatantayo no ania ti kayatna a sawen ti “mayanak a mabaliwan.”

Kas sungbat iti saludsod ni Nicodemo, kinuna pay ni Jesus: “Pudno, pudno kunak kenka, No ti maysa saan a mayanak iti danum ken iti espiritu, saanna a mabalin ti sumrek iti pagarian ti Dios. Ti mayanak iti lasag, isu lasag, ket ti mayanak iti espiritu, isu espiritu. Dika pagsiddaawan ti kinunak kenka, Masapul kadakayo ti mayanak a mabaliwan.”​—Juan 3:5-7.

Narigat a maawatan? Ammo ni Jesus a ti pannakaawat kadagiti naespirituan a kinapudno ket saan a nalaka. Gapuna tapno pagbalinen a nalawlawag dagiti bambanag, isut’ nangusar iti pangarigan maipapan iti angin. “Ti angin agpuyupoy iti pagayatanna, ket mangngegmi ti awerna, ngem dika ammo no adino ti paggapuanna ken adino ti papananna. Kasta ti amin a mayanak iti espiritu.” (Juan 3:8) Makangngeg ni Nicodemo, makarikna, ken makitana dagiti epekto ti angin, ngem dina maawatan dagiti gubuayanna wenno ti kamaudianan a pagtungpalanna. Kaskasdi, ti kinapudno ti angin ket di pagduaduaan. Kasta met, dagidiay nga agkurang iti naespirituan a pannakaawat marigatanda a mangawat no kasano a ni Jehova, babaen iti espirituna, mapagbalinna a ti maysa a tao ket mayanak a mabaliwan ken no ania ti kamaudianan a pagtungpalan iti kasta. Nupay kasta, babaen iti tulong iti napaltiingan a mannurat iti Biblia, maawatantayo dagita a bambanag.​—Juan 16:13.

Pananglawlawag iti Pakariribukan

Ania ti adda iti panunot ni Jesus idi sinaona ti maipapan iti “pannakayanak iti danum ken iti espiritu”? Ti pannakayanak kaipapananna ti pangrugian. Ti baro a pannakayanak kaipapananna ti baro a pangrugian. Iti kaso dagiti ad-adalan ni Jesus, ti umuna nga addang iti mayanak a mabaliwan mangrugi apaman a nagbabawida kadagiti basbasolda, pinanawanda ti dakes a dalanda, ken nabautisaranda iti danum. Mangrugi idi Pentecostes 33 K.P., kas panangsungbat iti kasta a tignay, inikkan ida ni Jehova ti tinukoy ni Pedro a kas “binaliwannatay nga inyanak a maipaay iti maysa nga inanama a sibibiag . . . naidulin sadi langit a maipaay kadakayo.” (1 Pedro 1:3, 4; 3:21) Ti nasantuan nga espiritu ni Jehova ti nangimula kadakuada ti maysa a pammati a kamaudiananna agbiagdanto a kadua ni Jesu-Kristo idiay langit. Daytoy ti nangted kadakuada iti interamente a baro a panangmatmat iti biag​—maysa a baro a pangrugian.

Daytoy kadi ket maysa laeng nga emosional a relihiuso a kapadasan? Saan. Ti nasantuan nga espiritu ti Dios ti nangaramid kadakuada a maysa a banag nga interamente a baro, “maysa a baro a parsua.” (2 Corinto 5:17) Idi damo a nayanakda a kas tattao, nagbalinda a managbasol nga annak ni Adan, a nakatawid kadagiti amin a kinaimperpekto nga inyallatiw dagiti dadakkelda. Itan, apaman a “mayanak a mabaliwan,” dagitoy nga ad-adalan nagun-odanda ti nadalus a takder iti imatang ti Dios. Kasano? Ti merito ti daton ni Jesus naiyaplikar kadakuada. Gapuna, minatmatan ida ti Dios kas nalinteg uray pay bayat nga imperpektoda pay a tattao. (Roma 3:25, 26; 5:12-21; 1 Corinto 6:11) Saan laeng a dayta, bigbigenen ida ni Jehova kas dagiti annakna. Ipakita ni apostol Pablo no kasano: “Ta dagup amin nga idalan ti espiritu ti Dios isuda dagiti annak ti Dios . . . datayo annaknatayo iti Dios.” (Roma 8:14, 16) Itan maawatdan kas paset iti nailangitan a pamilia ti Dios.

Ket saan laeng a dayta. Inlawlawag manen ni Pablo: “Ket no annak, agtawid met: agtawid iti Dios, ken makipagtawid ken Kristo.” (Roma 8:17) Dagitoy a naespirituan nga annak ti Dios addaandan iti namnama nga agtawid iti tawiden ni Kristo Jesus​—ti naarian a pannakabalin idiay langit. Impalgak ni Jesus ken ni apostol Juan ti bilang dagiti tattao a makipagturayto kenkuana a mangituray iti daga​—144,000. (Apocalipsis 7:4; 14:1-3) Kalpasanna impakitana ken ni Juan a dagitoy a naparaburan nga ad-adalan “agbalindanto a papadi ti Dios ken ni Kristo, ket makipagaridanto kenkuana bayat ti sangaribo a tawen.”​—Apocalipsis 20:6.

Gunggona kadagiti Dadduma

Daytoy kadi kayatna ngarud a sawen a tapno magun-odan ti pananganamong ti Dios, tunggal maysa masapul a “mayanak a mabaliwan”? Saan. Ti daton ni Jesus saklawenna saan laeng a dagiti 144,000 a tattao a naisangsangayan a napili a kaduana iti langlangit. Idi nagsurat ni apostol Juan kadagiti “nayanak a nabaliwan” a Kristiano idi pagnguduan iti umuna a siglo, kinunana maipapan iti daton ni Jesus: “Isu ti daton ti kappia gapu kadagiti basbasoltayo, ket saan laeng a gapu kadagiti basbasoltayo no di pay ket gapu iti isuamin a lubong.” (1 Juan 2:2) Kasano a kastoy?

Kastoy. Dagidiay a “mayanak a mabaliwan” makipagagaridanto ken Kristo iti nailangitan a Pagarian ni Jehova tapno gunggonaanda ti dadduma iti sangatauan nga agbiagto iti daga. Daytoy ti naipakpakauna iti nakaskasdaaw a kari a naaramid iti inapo ni Jesus a ni Abraham ngangngani 4,000 a tawtawenen ti napalabas. “Ket iti putotmo mabendisionanto isuamin dagiti nasnasion ti daga,” imbaga ni Jehova ken Abraham. (Genesis 22:18) Wen, adu a bendision ti magun-odan dagiti nasnasion babaen iti “kaputotan” ni Abraham!

Siasino dayta a “kaputotan”? Ni Jesu-Kristo, a kaduana dagiti pudno a “nayanak a nabaliwan” a paspasurotna. Inlawlawag ni apostol Pablo: “Ket no taonakayo ni Kristo, dakay ngarud ti kaputotan ni Abraham.” (Galacia 3:16, 29) Kat ania dagiti bendisiona nga agpaay kadagiti amin a tattao iti nasnasion babaen ken Jesu-Kristo ken dagitoy a “nayanak a nabaliwan” nga ad-adalan? Ti gundaway a maisubli iti anamong ti Dios ken ti panangtagiragsak kadagiti amin a probisionna iti maysa a paraiso a daga.​—Genesis 1:27, 28; Salmo 37:29; Proverbio 2:21, 22; Isaias 45:18.

Gapuna, ti 144,000 a “nayanak a nabaliwan” nga ad-adalan “sumrekdanto iti [nailangitan] a Pagarian ti Dios” a mangipaay iti nakaskasdaaw a bendision nga iyeg dayta a Pagarian ti Dios kadagiti minilmilion ditoy daga a mismo. (Mateo 6:10; Roma 8:19-21; Apocalipsis 21:1-5) No naawatan ni Nicodemo dagiti sasao ni Jesus ket “nayanak a nabaliwan” tapno agbalin a paset daytoy a mangituray a bagi, ditay ammo. Ti ammotayo ket ti gundaway nga umawat kadagiti gunggona iti nailangitan a panangiturayda ket adda sadiay a maipaay iti siasinoman nga agtarigagay a manggun-od iti dayta. Gun-odenyonto aya?

[Blurb iti panid 27]

Masapul kadi a tunggal maysa “mayanak a mabaliwan” tapno makagun-od iti anamong ti Dios?