Aniat’ Masapul nga Aramidentayo Tapno Maisalakan?

NAMINSAN nagsaludsod ken Jesus ti maysa a lalaki: “Apo, bassit kadi dagidiay maisalakan?” Ania’t insungbat ni Jesus? Kinunana kadi: ‘Basta awatennak kas Apom ken Manangisalakanmo, ket maisalakankan’? Saan! Kinuna ni Jesus: “Umagawakayo a sipipinget a sumrek iti akikid a ruangan, agsipud ta, ibagak kadakayo, adu ti agtarigagayto a sumrek ngem didanto kabalinan.”​—Lucas 13:23, 24.

Napaay kadi ni Jesus a nangsungbat iti saludsod ti lalaki? Saan, saan a sinaludsod ti lalaki no kasanot’ karigat ti maisalakan; sinaludsodna no bassit laeng ti bilang. Gapuna impasimudaag laeng ni Jesus a basbassit a tattao ngem iti ninamnama ti maysa ti umagawa a sipipinget tapno magun-odda daytoy nakaskasdaaw a bendision.

‘Saan a kasta ti naibaga kaniak,’ nalabit ireklamo ti dadduma a managbasa. Mabalin nga adawenda ti Juan 3:16, a kunana: “Ta kasta la unay ti panagayat ti Dios iti lubong, ta intedna ti bugbugtong nga Anakna, tapno ti asinoman a mamati kenkuana saan koma a madadael, no di ket maaddaan iti agnanayon a biag.” (King James Version) Nupay kasta, insungbatmi: ‘Ania, no kasta, ti masapul a patientayo? A pudpudno a nagbiag ni Jesus? Siempre. Nga isut’ Anak ti Dios? Awan duadua! Ket tangay awagan ti Biblia ni Jesus kas “Mannursuro” ken “Apo,” saan aya a masapul a patientayo met dagiti insurona, agtulnog kenkuana, ken sumurot kenkuana?’​—Juan 13:13; Mateo 16:16.

Panangsurot ken Jesus

A, ditoy a rumsua ti parikut! Adu a tao a nakaibagaan a “naisalakanda” ti kasla bassit ti tarigagayda a sumurot wenno agtulnog ken Jesus. Kinapudnona, insurat ti maysa a klero a Protestante: “Siempre, rumbeng nga agtultuloy ti pammatitayo ken Kristo. Ngem ti panangikuna a naan-anay a kasapulan, wenno nesesita, ti talaga nga awan suportana iti Biblia.”

Iti kasunganina, nailista iti Biblia dagiti imoral nga aramid a gagangay kadagiti tao a mangipapan a “naisalakan[dan].” Maipanggep iti daydiay nagtultuloy iti kasta a dana, imbilinna kadagiti Kristiano: “Ikkatenyo ti nadangkes a tao manipud iti tengngayo.” Awan duadua a saan a kayat ti Dios dagiti nadangkes a tao a mangtulaw iti Nakristianuan a kongregasionna!​—1 Corinto 5:11-13.

Ania, no kasta, ti kaipapanan ti panangsurot ken Jesus, ken kasanotay a maaramid dayta? Bueno, ania aya ti inaramid ni Jesus? Imoral kadi? maysa a mannakiabig? mammartek? managulbod? Nakusit aya iti negosio? Siempre saan! ‘Ngem,’ maisaludsodyo, ‘masapul kadi nga ikkatek amin dagita iti biagko?’ Maipaay iti sungbat, kitaenyo ti Efeso 4:17 aginggat’ 5:5. Saanna a kuna nga awatennatay ti Dios uray aniat’ aramidentayo. Imbes ketdi, kunana kadatayo nga agbalintay a naiduma manipud kadagiti nasion iti lubong a “napukawda ti amin a moral a kaririknada, . . . ngem dikay naadal ti Kristo a kasta . . . Ikkatenyo koma ti daan a personalidad a maiyannurot iti immun-una a panagbibiagyo . . . Ti agtatakaw saan koma nga agtakawen . . . Ti pannakiabig ken tunggal kita ti kinarugit wenno kinaagum saan koma a pulos madakamat iti nagtetengngaanyo, kas maitutop kadagiti nasantuan a tattao . . . Ta ammoyo daytoy, a bigbigbigenyo dayta iti bagbagiyo, nga awan ti mannakiabig wenno narugit a tao wenno naagum a tao​—a kaipapananna ti panagbalin a managrukbab iti didiosen​—nga addaan aniaman a tawid iti pagarian ti Kristo ken ti Dios.”

Sursurotentay kadi ni Jesus no ditay man la padpadasen ti agbiag a maitunos iti ulidanna? Saan aya a masapul a pagreggetantayo a pagbalinen ti biagtayo nga ad-adda pay a tumutulad ken Kristo? Dayta a nagpateg a saludsod ti manmano nga usigen dagiti tao, no adda man, nga agkuna, kas ti panangdakamat ti maysa a narelihiosuan a tract: “Umaykayo ita ken Kristo​—a kasta kayon.”

Namakdaar ti maysa kadagiti adalan ni Jesus a “pagbalbalinen [dagiti di nadiosan a tattao] ti di kaikarian a kinamanangaasi ti Diostayo kas pambar maipaay ti nalulok a kababalin ket libakenda ti kakaisuna a Makinkukua kadatayo ken Apotayo, a ni Jesu-Kristo.” (Judas 4) Iti kinapudnona, kasanotay a pagbalinen ti asi ti Dios a “pambar maipaay ti nalulok a kababalin”? Maaramidtay dayta iti panangipapan nga abbongan ti daton ni Kristo dagiti ginagara a basol a pinanggeptayo nga itultuloy nga aramiden imbes a dagiti basol a bunga ti natauan a kinaimperpekto nga ikagkagumaantay a tallikudan. Awan duadua a ditay umanamong iti maysa kadagiti kalatakan nga ebanghelista ti America, a nagkuna a diyon kasapulan ti “agdalus, agsardeng, wenno agbalbaliw.”​—Idiligyo ti Aramid 17:30; Roma 3:25; Santiago 5:19, 20.

Ti Pammati Mamagtignay

Naibagan kadagiti adu a tao a ti “panamati ken Jesus” maysa a mamimpinsan nga aramid ket ti pammatitayo saan a masapul a nakapigpigsa a manggutugot iti panagtulnog. Ngem saan nga umanamong ti Biblia. Saan a kinuna ni Jesus a dagiti tao a mangirugi iti Nakristianuan a dana ti maisalakan. Imbes ketdi, kinunana: “Ti nakapagibtur agingga iti panungpalan isunto ti maisalakan.” (Mateo 10:22) Iyasping ti Biblia ti Nakristianuan a danatayo iti maysa a lumba, a ti pannakaisalakan ti gunggona iti ungtona. Ken idagadagna: “Agtaraykayo iti kasta a wagas tapno magun-odanyo dayta.”​—1 Corinto 9:24.

No kasta, ti “panangawat ken Kristo” ramanenna ti ad-adda pay ngem iti panangawat kadagiti bendision nga ituktukon ti naisangsangayan a daton ni Jesus. Makalikaguman ti panagtulnog. Kuna ni apostol Pedro a ti panangukom mangrugi iti “balay ti Dios,” ken kunana pay: “Ita no mangrugi nga umuna dayta kadatayo, anianto ti pagtungpalan dagidiay di natulnog iti naimbag a damag ti Dios?” (1 Pedro 4:17) Gapuna ad-adu pay ti masapul nga aramidentayo ngem ti basta dumngeg ken mamati. Kuna ti Biblia a masapul nga ‘agbalintayo a managtungpal iti sao, ket saan a managdengngeg laeng, nga al-allilawentayo [ti bagbagitayo] iti ulbod a panagrasrason.’​—Santiago 1:22.

Dagiti Mismo a Mensahe ni Jesus

Naglaon ti libro ti Biblia nga Apocalipsis kadagiti mensahe manipud ken Jesus, a nayallatiw baeten ken Juan kadagiti pito a nagkauna a kongregasion Kristiano. (Apocalipsis 1:1, 4) Kinuna aya ni Jesus a tangay dagiti tao kadagitoy a kongregasion “inawat[dan ni Jesus],” umdasen dayta? Saan. Indayawna dagiti aramidda, dagiti panagbannogda ken ti panagibturda ken dinakamatna ti ayat, pammati, ken ministerioda. Ngem kinunana a suoten ida ti Diablo ket magunggonaanda ‘iti tumunggal maysa sigun kadagiti aramidda.’​—Apocalipsis 2:2, 10, 19, 23.

Iti kasta inladawan ni Jesus ti adayo a dakdakkel a rebbengen ngem iti naawatan ti kaaduan a tattao idi naibaga kadakuada a ti pannakaisalakanda ket maysa a “nalpasen nga aramid” iti kanito nga isut’ “awaten[da]” iti narelihiosuan a panagtataripnong. Kinuna ni Jesus: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan ket agtultuloy a surotennak. Ta siasinoman nga agtarigagay a mangisalakan iti kararuana mapukawnanto dayta; ngem siasinoman a makapukaw iti kararuana maigapu kaniak masarakannanto dayta.”​—Mateo 16:24, 25.

Paglikudantay ti bagbagitayo? Agtultuloy a sumurot ken Jesus? Kalikaguman dayta ti panagregget. Balbaliwanna ti panagbiagtayo. Ngem, talaga kadi a kinuna ni Jesus a ti dadduma kadatayo nalabit a ‘mapukawna ti kararuana’​—a matay maigapu kenkuana? Wen, dumteng laeng ti kasta a kita ti pammati buyogen ti pannakaammo kadagiti nakaskasdaaw a banag a masursuroyo manipud iti panagadal iti Sao ti Dios. Nalawag dayta idi aldaw a pannakaubor ni Esteban babaen kadagiti relihioso a panatiko a “dida kabaelan a taginayonen ti takderda maibusor iti sirib ken iti espiritu a babaen iti dayta isu agsasao.” (Aramid 6:8-12; 7:57-60) Ket naiparangarang ti kasta a pammati iti panawentayo babaen kadagiti ginasut a Saksi ni Jehova a natay kadagiti kampo konsentrasion dagiti Nazi imbes a salungasingenda ti konsiensiada a nasanay iti Biblia.a

Nakristianuan a Regta

Masapul a kumpettayo a siiirut iti Nakristianuan a pammatitayo agsipud ta, saan a kas iti mabalin a mangngegyo iti sumagmamano a simbaan wenno kadagiti narelihiosuan a programa iti telebision, kuna ti Biblia a mabalin a maisiasitayo. Dakamatenna ti maipapan kadagiti Kristiano a timmalikud iti “nalinteg a dana.” (2 Pedro 2:1, 15) Masapul ngarud nga ‘itultuloytayo nga itrabaho ti bukodtayo a pannakaisalakan buyogen ti buteng ken panagpigerger.’​—Filipos 2:12; 2 Pedro 2:20.

Kastoy kadi ti pannakaawat dagiti immuna-siglo a Kristiano, dagiti tao nga aktual a nakangngeg iti panangisuro ni Jesus ken dagiti apostolna, maipanggep iti daytoy a banag? Wen. Ammoda nga adda masapul nga aramidenda. Kinuna ni Jesus: “Inkayo ngarud ket mangaramidkayo kadagiti adalan a tattao iti isuamin a nasnasion, . . . nga isursuroyo kadakuada a tungpalenda dagiti isuamin a bambanag nga imbilinko kadakayo.”​—Mateo 28:19, 20.

Dua a bulan kalpasan a kinuna ni Jesus dayta, 3,000 a tattao ti nabautisaran iti maysa laeng nga aldaw. Dagus nga immadu ti bilang dagiti manamati iti 5,000. Nangisuro iti sabsabali dagidiay namati. Idi naiwarawarada gapu iti panangidadanes, pinagsaknapna laeng ti mensaheda. Kuna ti Biblia a saan laeng a sumagmamano a pangulo no di ket “dagidiay naiwarawara napanda iti amin a daga nga idekdeklarada ti naimbag a damag ti sao.” Kalpasan ti agarup 30 a tawen, maisurat ngarud ni apostol Pablo a ti naimbag a damag “naikaskasaba[n] kadagiti isuamin a parsua nga adda iti baba ti langit.”​—Aramid 2:41; 4:4; 8:4; Colosas 1:23.

Saan a nangkomberte ni Pablo, kas ti ar-aramiden ti dadduma nga ebanghelista iti TV, babaen ti panangikuna: ‘Awatem ni Jesus itan a mismo, ket maisalakankan nga agnanayon.’ Ket saan met a naaddaan iti kompiansa nga umasping iti maysa nga Amerikano a klero a nagsurat: “Kas maysa a bumarito, . . . naisalakanakon.” Nasurok a 20 a tawen kalpasan a personal a pinili ni Jesus ni Pablo a mangidanon iti Nakristianuan a mensahe kadagiti tao iti nasnasion, kastoy ti insurat daytoy nagaget nga apostol: “Disdisnogek ti bagik ket iturturongko kas maysa nga adipen, tapno, kalpasan a nakaskasabaak ti sabsabali, uray kasano siak a mismo saanak nga agbalin a di naanamongan.”​—1 Corinto 9:27; Aramid 9:5, 6, 15.

Ti pannakaisalakan maysa nga awan-bayadna a sagut manipud iti Dios. Saan a teggeden dayta. Nupay kasta kalikagumanna ti panagreggettayo. No adda nangitukon kadakayo iti nakapatpateg a regalo ket dikay nangipakita iti maiparbeng a panangipateg a mangala ken mangyawid iti dayta, ti kinaawan panagyamanyo mabalin a tignayenna ti mannangted a mangisagut ketdi iti dayta iti sabali. Bueno, kasano kapateg ti mangipaay-biag a dara ni Jesu-Kristo? Maysa dayta nga awan-bayadna a sagut, ngem masapul nga ipakitatayo ti nasged a panangipateg iti dayta.

Adda dagiti pudno a Kristiano iti maysa a naisalakan a kasasaad la ketdi no addada iti naanamongan a takder iti sanguanan ti Dios. Kas maysa a grupo, sigurado ti pannakaisalakanda. Kas indibidual, kasapulan a maragpatda dagiti pagalagadan ti Dios. Nupay kasta, mabalin a mapaaytayo, ta kinuna ni Jesus: “No ti asinoman di agtalinaed a naikaykaysa kaniak, isu maibelleng a kas maysa a sanga ket magango.”​—Juan 15:6.

“Ti Sao ti Dios Nabiag”

Ti panagsasarita a nadakamat iti rugi ti immuna nga artikulo napasamak agarup 60 a tawen ti napalabasen. Mamati pay laeng ni Johnny a dumteng laeng ti pannakaisalakan babaen ken Jesu-Kristo, ngem nautobna a masapul a ragpatentay dayta. Isut’ agtalinaed a kombinsido nga isursuro ti Biblia ti kakaisuna a pudpudno a gubuayan ti namnama para iti sangatauan ken masapul nga adalentayo dayta nakaskasdaaw a libro, matignay iti dayta, ken palubosantay nga isut’ mangtignay kadatayo kadagiti aramid ti ayat, pammati, kinamanangngaasi, panagtulnog, ken panagibtur. Sinanayna dagiti annakna a mamati iti kasta met laeng a banag, ket ita maragsakan a makakita a sansanayenda met dagiti annakda iti isu met laeng a pamay-an. Tarigagayanna a maaddaan ti amin iti kasta a kita ti pammati, ken ar-aramidenna ti aniaman a kabaelanna a mangitukit iti dayta iti puso ken isip ti dadduma.

Napaltiingan ni apostol Pablo a mangisurat a “ti sao ti Dios nabiag ken adda bilegna.” (Hebreo 4:12) Kabaelanna a baliwan dagiti biag. Kabaelannakay a tignayen kadagiti naimpusuan nga aramid ti ayat, pammati, ken panagtulnog. Ngem masapul nga ad-adda pay ti aramidenyo ngem ti basta “mangawat” iti isip iti ibagbaga ti Biblia. Adalenyo dayta ken bay-anyo ti pusoyo a matignay iti dayta. Bay-anyo nga iturongnakay ti kinasiribna. Ag-5,000,000 a natallugod a Saksi ni Jehova iti nasurok a 230 a daga ti mangituktukon iti libre a panagadal iti Biblia iti pagtaengan. Tapno makita no ania ti masursuroyo manipud iti kasta a panagadal, agsuratkayo kadagiti manangipablaak iti daytoy a magasin. Paragsakennakayto ti pammati ken naespirituan a pigsa a magun-odyo!

[Footnote]

[Kahon iti panid 7]

Apay a “Makidangadangkay a Sipipinget Maipaay Iti Pammati”?

Naiturong ti libro ti Biblia a Judas “kadagiti naayaban . . . , a nataginayon a maipaay ken Jesu-Kristo.” Ibagbaga kadi daytoy a siguradon ti pannakaisalakanda agsipud ta ‘inawatdan ni Jesus’? Saan, kinuna ni Judas kadagiti kasta a Kristiano a ‘makidangadangda a sipipinget maipaay iti pammati.’ Impaayanna ida iti tallo a rason iti panangaramid iti kasta. Umuna, “nangisalakan [ti Dios] ti maysa nga ili manipud iti daga ti Egipto,” ngem adu kadakuada ti naisina iti kamaudiananna. Maikadua, uray dagiti anghel immalsada ket nagbalinda a demonio. Maikatlo, dinadael ti Dios ti Sodoma ken Gomorra gapu iti aglablabes unay a seksual nga imoralidad kadagita a siudad. Indatag ni Judas dagitoy a salaysay iti Biblia “kas maysa a pammakdaar a pagwadan.” Wen, uray dagiti manamati a “nataginayon a maipaay ken Jesu-Kristo” masapul nga agannad a saan a maisina manipud iti pudno a pammati.​—Judas 1-7.

[Kahon iti panid 8]

Ania Kadagitoy ti Umiso?

Kuna ti Biblia: “Ti maysa a tao maideklara a nalinteg babaen ti pammati a naisina iti ar-aramid ti linteg.” Kunana pay: “Ti maysa a tao maideklara a nalinteg babaen kadagiti aramid, ket saan a babaen iti pammati laeng.” Ania kadagitoy ti umiso? Maideklaratayo kadi a nalinteg babaen ti pammati wenno babaen kadagiti aramid?​—Roma 3:28; Santiago 2:24.

Ti agtunos a sungbat manipud iti Biblia ket agpadada nga umiso.

Iti sinigsiglon kinalikaguman ti Linteg nga inted ti Dios babaen ken Moises kadagiti managdaydayaw a Judio a mangipaay kadagiti espesipiko a sakripisio ken daton, mangrambak kadagiti aldaw ti piesta, ken agtungpal kadagiti pagalagadan mainaig iti taraon ken dadduma pay a kasapulan. Dagiti kasta nga “ar-aramid ti linteg,” wenno basta “ar-aramid,” saanen a kasapulan kalpasan nga impaay ni Jesus ti perpekto a daton.​—Roma 10:4.

Ngem ti banag a sinuktan ti naisangsangayan a daton ni Jesus dagitoy nga aramid a naangay iti sidong ti Linteg Mosaiko dina kaipapanan a mabalintayo a laksiden dagiti bilin ti Biblia. Kunana: “Anianto ketdin nga ad-adda pay a ti dara ni Kristo . . . dalusanna dagiti konsiensiatayo manipud kadagiti [nadadaan] natay nga ar-aramid tapno mangipaaytayo ti sagrado a panagserbi iti sibibiag a Dios?”​—Hebreo 9:14.

Kasanotay a ‘makaipaay ti sagrado a panagserbi iti sibibiag a Dios’? Karaman kadagiti sabsabali pay a banag, ibagbaga kadatayo ti Biblia a labanantay dagiti aramid ti lasag, sarangtentayo ti imoralidad ti lubong, ken liklikan dagiti silona. Kunana: “Makirupakka iti nasayaat a dangadang iti pammati,” ikkaten ti “basol a silalaka a mangsagud kadatayo,” ken “buyogen ti panagibtur tarayentayo koma ti lumba a naikabil iti sanguanantayo, bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” Ket paregtaennatay ti Biblia a ditay koma ‘mabannog ket agkapuy dagiti kararuatayo.’​—1 Timoteo 6:12; Hebreo 12:1-3; Galacia 5:19-21.

Saantay a mategged ti pannakaisalakan babaen ti panangaramid kadagitoy a banag, ta awan asinoman a tao a makaaramid iti umdas tapno maikari iti kasta a nakaskasdaaw a bendision. Nupay kasta, saantayo a maikari iti daytoy naisangsangayan a sagut no ditay ipakita ti ayat ken panagtulnogtayo babaen ti panangaramid kadagiti banag nga ibagbaga ti Biblia a kayat ti Dios ken ni Kristo nga aramidentayo. No awan dagiti aramid a mangipakita iti pammatitayo, agkurang ti panangikunatayo a sursurotentay ni Jesus, agsipud ta silalawag nga ibagbaga ti Biblia: “Ti pammati, no awan ar-aramidna, ket natay a mismo.”​—Santiago 2:17.

[Ladawan iti panid 7]

Adalenyo ti Biblia, ket bay-anyo a tignayennakay dayta