Kasapulan ti Sangatauan ti Pannakaammo ti Dios

“Maawatamto ti panagbuteng ken ni Jehova, ken masarakamto ti pannakaammo ti Dios.”​—PROVERBIO 2:5.

1. Apay a maikuna nga obra maestra ti inaramid ti Dios a natauan a puso?

ADDA agarup 5,600,000,000 a natauan a puso nga agbitbitik ditoy daga itatta. Kada aldaw, agbitbitik ti pusoyo iti mamin-100,000 a daras ken mangibombomba iti katupag ti 7,600 a litro a dara iti 100,000 kilometro nga ur-urat ti cardiovascular system ti bagiyo. Awanen sabali a piskel a nagaggaget nga agtartrabaho ngem iti daytoy nga obra maestra nga inaramid ti Dios.

2. Kasanoyo nga iladawan ti piguratibo a puso?

² Adda met 5,600,000,000 a piguratibo a puso nga agan-andar ditoy daga. Adda iti piguratibo a puso dagiti rikna, motibo, tarigagaytayo. Isu dayta ti sentro ti panunot, pannakaawat, pagayatantayo. Mabalin a natangsit wenno napakumbaba, naliday wenno naragsak, nakullaapan wenno nalawlawagan ti piguratibo a puso.​—Nehemias 2:2; Proverbio 16:5; Mateo 11:29; Aramid 14:17; 2 Corinto 4:6; Efeso 1:16-18.

3, 4. Kasano a madandanon ti naimbag a damag dagiti puso?

³ Mabasa ni Jehova a Dios ti puso ti tao. Kuna ti Proverbio 17:3: “Ti paggugoran agserbi iti pirak ken ti horno iti balitok, ngem ni Jehova sukimatenna dagiti puso.” Nupay kasta, imbes a basaenna laeng ti tunggal puso ken mangukom, us-usaren ni Jehova dagiti Saksina a mangidanon ti naimbag a damag kadagiti puso ti tattao. Maitunos daytoy iti sasao ni apostol Pablo: “‘Tunggal maysa nga umawag iti nagan ni Jehova maisalakanto.’ Nupay kasta, kasano ti panangawagdanto iti daydiay a kenkuana saanda a naaddaan iti pammati? Kalpasanna, kasano a maaddaandanto iti pammati iti daydiay dida nangngeg? Kalpasanna, kasano a mangngegdanto no awan ti mangasaba? Kalpasanna, kasano ti panangasabadanto malaksid no naibaonda? Kas adda a naisurat: ‘Anian a nagimnas ti saksaka dagidiay mangideklara ti naimbag a damag dagiti naimbag a bambanag!’”​—Roma 10:13-15.

⁴ Pagragsakan ni Jehova nga ibaon dagiti Saksina iti amin a paset ti daga a “mangideklara ti naimbag a damag dagiti naimbag a bambanag” ken mangbirok kadagidiay addaan puso a sidadaan nga umawat. Nasurok a 5,000,000 ti bilangtay itan​—kayatna a sawen, 1 a Saksi iti kada 1,200 a tattao ditoy daga. Saan a nalaka nga idanon ti naimbag a damag kadagiti binilion a tattao ditoy daga. Ngem iturturong ti Dios daytoy a trabaho babaen ken Jesu-Kristo ken iyas-asidegna dagiti nasingpet panagpuspusona a tattao. Gapuna, mapampaneknekan a pudno ti padto a nailanad iti Isaias 60:22: “Ti bassit agbalinto a sangaribu, ket ti kabassitan maysa a napigsa a nasion. Siak, ni Jehova, aramidekto a nadaras iti panawenna.”

5. Ania ti pannakaammo, ken aniat’ maikuna iti sirib ti lubong?

⁵ Itan dayta a panawen, ken maysa a banag ti nalawag​—kasapulan dagiti binilion [a tattao] ditoy daga ti pannakaammo. Ti pannakaammo kaipapananna ti panagbalin a pamiliar kadagiti bambanag a magun-od babaen ti kapadasan, kapaliiwan, wenno panagadal. Adun a pannakaammo ti nagun-od ti lubong. Rimmang-ay ti transportasion, panangsaluad iti salun-at, ken komunikasion. Ngem ti kadi nailubongan a pannakaammo ti talaga a kasapulan ti sangatauan? Saan! Agtultuloy a masapsaplit ti sangatauan iti gubat, panangirurumen, sakit, ken ipapatay. Masansan nga agbaliwbaliw ken saan a mapagtalkan ti sirib ti lubong.

6. Maipanggep iti dara, kasano a maidilig ti pannakaammo ti Dios iti sirib ti lubong?

⁶ Kas panangiladawan: Dua a siglon ti napalabas, kadawyan idi ti panangkissay iti dara kas maipagarup a pangagas. Maulit-ulit a kinissayanda idi ti dara ni George Washington, ti immuna a presidente ti Estados Unidos, kadagidi maudi nga oras ti biagna. Naminsan kinunana: “Bay-andak a matay a sitatalna; saanakon nga agpaut.” Husto ti imbagana, ta natay iti dayta met la nga aldaw​—Disiembre 14, 1799. Imbes a panangkissay iti dara, maipagpaganetget ita ti panangyalison ti dara iti bagi ti tao. Agpada a mangpataud dagitoy a pamay-an kadagiti makapapatay a parikut. Nupay kasta, kabayatan amin daytoy a tiempo, kinuna ti Sao ti Dios: “Itultuloyyo ti umadayo . . . iti dara.” (Aramid 15:29) Kanayon nga umiso, mapagtalkan, naintiempuan ti pannakaammo ti Dios.

7. Kasano a maidilig ti umiso a pannakaammo iti Kasuratan iti sirib ti lubong maipanggep iti panangpadakkel iti anak?

⁷ Usigenyo ti maysa pay a pagarigan iti di mapagtalkan a sirib ti lubong. Iti adu a tawen intandudo dagiti sikologo ti napanuynoy a panangpadakkel iti ubing, ngem inamin kamaudiananna ti maysa kadagiti mangitandudo a biddut daytoy. Iti naminsan kinuna ti German Philological Association nga “uray kaskasano maipabasol [iti kinapanuynoy] dagiti parikuttayo ita mainaig kadagiti agtutubo.” Mabalin nga agbaliwbaliw ti sirib ti lubong nga arignat’ ipalpalais ti angin, ngem natibker ti umiso a Nainkasuratan a pannakaammo. Mangipaay ti Biblia iti natimbeng a balakad maipapan iti panangsanay iti anak. “Tubngarem ti anakmo ket itdennanto kenka ti inaná ken itdennanto ti rag-o ita kararuam,” kuna ti Proverbio 29:17. Rumbeng a mapakuyogan iti ayat ti kasta a disiplina, ta insurat ni Pablo: “Amma, dikay rurruroden dagiti annakyo, no di ket itultuloyyo a padakkelen ida iti disiplina ken panangiturong-panunot ni Jehova.”​—Efeso 6:4.

“Ti Pannakaammo ti Dios”

8, 9. Kasanoyo nga ilawlawag ti kuna ti Proverbio 2:1-6 maipapan iti pannakaammo a talaga a kasapulan ti sangatauan?

⁸ Nupay edukado a tao ni Pablo, kinunana: “No ti asinoman kadakayo pagarupenna nga isu masirib iti daytoy a sistema ti bambanag, agbalin koma a maag, tapno agbalin a masirib. Ta ti sirib daytoy a lubong ket kinamaag iti Dios.” (1 Corinto 3:18, 19) Ti laeng Dios ti makaited iti pannakaammo a talaga a kasapulan ti sangatauan. Maipapan iti dayta, kuna ti Proverbio 2:1-6: “Anakko, no awatemto dagiti saok ket ipempenmo kenka dagiti bilinko, iti kasta iyallingagmo ta lapayagmo iti kinasirib, ken ikapetmo ita pusom ti pannakaawat; wen, awagam ti kinasaririt ket idir-im ta timekmo a maipaay iti pannakaawat, no isu birokem a kas pirak, ken tontonem a kas nalmeng a gamgameng, iti kasta maawatamto ti panagbuteng ken ni Jehova, ken masarakamto ti pannakaammo ti Dios. Ta ni Jehova mangted iti sirib; agtaud iti ngiwatna ti pannakaammo ken pannakaawat.”

⁹ Dagidiay tigtignayen ti nasayaat a puso ipangagda ti kinasirib babaen ti umiso a panangusar iti inted-Dios a pannakaammo. Ipapusoda ti pannakaawat, a siaannad a tingitingenda dagiti bambanag a maad-adalda. Arigna awaganda ti kinasaririt, wenno ti abilidad a mangilasin no kasano nga agkakanaig ti nadumaduma nga aspeto ti maysa a banag. Agtignay dagiti nalinteg panagpuspusona a tattao a kas man la agkalkalida iti pirak ken agbirbirok iti nalmeng a gameng. Ngem ania a dakkel a gameng ti masarakan dagidiay addaan puso a sidadaan nga umawat? Isu ti “mismo a pannakaammo ti Dios.” Ania kadi dayta? Iti simple a pannao, isu dayta ti pannakaammo a masarakan iti Sao ti Dios, ti Biblia.

10. Aniat’ masapul nga aramidentayo tapno matagiragsak ti nasayaat a salun-at iti naespirituan?

¹⁰ Nasin-aw, di agbaliwbaliw, makaited-biag ti pannakaammo ti Dios. Makapasalun-at dayta iti naespirituan. Indagadag ni Pablo ken ni Timoteo: “Itultuloymo a salimetmetan ti pagtuladan iti makapasalun-at a sasao a nangngegmo kaniak agraman ti pammati ken ayat a mainaig ken Kristo Jesus.” (2 Timoteo 1:13) Addaan ti lengguahe iti padron dagiti sasao. Kasta met, ti “nadalus a pagsasao” ti Nainkasuratan a kinapudno addaan iti “pagtuladan dagiti makapasalun-at a sasao” a naibatay kangrunaanna iti tema ti Biblia, nga isu ti pannakaalangon ti kinasoberano ni Jehova babaen ti Pagarian. (Sofonias 3:9) Masapul a salimetmetantayo iti panunot ken puso daytoy a padron dagiti makapasalun-at a sasao. Tapno saan nga agsakit ti piguratibo a pusotayo ken agtalinaedtay a nasalun-at iti naespirituan, masapul nga iyaplikartay ti Biblia iti biagtayo ken aprobetsaren a naan-anay dagiti naespirituan a probision nga ipapaay ti Dios babaen “ti matalek ken masirib nga adipen.” (Mateo 24:45-47; Tito 2:2) Rumbeng a kanayon a laglagipentayo a tapno nasalun-attayo iti naespirituan, kasapulantay ti pannakaammo ti Dios.

11. Ania dagiti sumagmamano a makagapu no apay a kasapulan ti sangatauan ti pannakaammo ti Dios?

¹¹ Usigenyo ti dadduma pay a makagapu no apay a kasapulan ti binilion a tattao ditoy daga ti pannakaammo ti Dios. Ammoda kadi amin no kasano a napaadda ti daga ken dagiti tattao? Saan, saanda nga ammo. Ammo kadi amin a tattao ti pudno a Dios ken ti Anakna? Ammo kadi ti amin dagiti isyu a pinataud ni Satanas maipanggep iti kinasoberano ti Dios ken kinatarnaw ti tao? Saan manen. Ammo kadi dagiti tattao no apay a lumakay ken mataytayo? Maminsan pay, maikunatayo a saan. Mabigbig kadi dagiti agnanaed ditoy daga nga agturturayen ti Pagarian ti Dios ken agbibiagtayon iti maudi nga al-aldaw? Ammoda kadi dagiti dakes nga espiritu a puersa? Adda kadi mapagtalkan a pannakaammo dagiti tattao no kasanot’ maaddaan iti naragsak a panagbiag ti pamilia? Ken ammo kadi ti kaaduan a ti panggep ti Namarsua kadatayo isu ti naragsak a biag idiay Paraiso para iti natulnog a sangatauan? Ti sungbat met kadagitoy a saludsod ket saan. Ngarud, nalawag a kasapulan ti sangatauan ti pannakaammo ti Dios.

12. Kasanotay a makapagdaydayaw iti Dios “a buyogen ti espiritu ken kinapudno”?

¹² Kasapulan met ti sangatauan ti pannakaammo ti Dios gapu iti kinuna ti Jesus iti kararag iti maudi a rabii ti biagna ditoy daga. Awan duadua a natignay unay dagiti apostolna a nakangngeg iti kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Ti panangipakat iti kasta a pannakaammo ti kakaisuna a pamay-an tapno maawat ti panagdayaw iti Dios. “Ti Dios maysa nga Espiritu, ket dagidiay agdaydayaw kenkuana masapul nga agdaydayawda a buyogen ti espiritu ken kinapudno,” kinuna ni Jesus. (Juan 4:24) No napno ti pusotayo iti pammati ken ayat, matignaytayo nga agdayaw iti Dios a “buyogen ti espiritu.” Kasanotay a dayawen a ‘buyogen ti kinapudno’? Babaen ti panagadal iti Saona ken panagdayaw kenkuana maitunos iti impalgakna a kinapudno​—“ti pannakaammo ti Dios.”

13. Ania a pasamak ti nailanad iti Aramid 16:25-34, ket ania ti maadaltayo iti dayta?

¹³ Rinibu ti mangrugi nga agdayaw ken Jehova kada tawen. Nupay kasta, masapul kadi nga iyadalan iti Biblia dagiti interesado a tattao iti napaut, wenno mabalin kadi a tulongan dagiti nasingpet-panagpuspusona a tattao a dumteng iti bautismo a nabibiit? Bueno, usigenyo ti napasamak iti agbambantay ti pagbaludan ken iti sangakabbalayanna kas nadakamat iti Aramid 16:25-34. Naibalud idi da Pablo ken Silas idiay Filipos, ngem idi tumengnga ti rabii, linuktan ti napigsa a ginggined dagiti ridaw ti pagbaludan. Impagarupna a naglibasen dagiti amin a balud ket sigurado a madusa iti nainget, agpakamatay koman ti agbambantay idi imbaga ni Pablo kenkuana nga addada amin sadiay. ‘Sinao [da Pablo ken Silas] ti sao ni Jehova kenkuana agraman amin dagidiay adda iti balayna.’ Gentil nga awanan pannakaammo iti Nasantuan a Kasuratan dayta nga agbambantay ti pagbaludan ken ti pamiliana. Ngem, iti daydi met la a rabii, nagbalinda a manamati. Malaksid iti dayta, “tunggal maysa, isu ken ti sangakabbalayanna nabautisaranda.” Karkarna dagita a pasamak, ngem nasursuruan dagidi a kabbaro kadagiti pagdadamuan a kinapudno ken adu pay ti naammuanda kadagiti gimong ti kongregasion. Mabalin a maaramid met ti kasta itatta.

Adu ti Anien!

14. Apay nga adda pakasapulan a mangikondukta iti ad-adu nga epektibo a panangyadal iti Biblia iti ab-ababa a tiempo?

¹⁴ Nagsayaat ketdin no makaikondukta dagiti Saksi ni Jehova iti ad-adu nga epektibo a panagadal iti Biblia iti ab-ababa a tiempo. Talaga a kasapulan daytoy. Kas pagarigan, kadagiti pagilian ti Akindaya nga Europa, masapul nga aguray dagiti tattao kadagiti mangyadal iti Biblia kadakuada. Kasta met laeng ti kasasaad iti sadinoman. Iti maysa nga ili ti Dominican Republic, nakaad-adu dagiti mayat a payadalan kadagiti lima a Saksi nga uray la saanda a kabaelan nga iyadalan amin ida. Aniat’ inaramidda? Pinaregtada dagiti interesado a tumabuno kadagiti gimong iti Kingdom Hall ken aguray iti mangyadal iti Biblia kadakuada. Kasta met laeng ti kasasaad iti adu a lugar iti aglikmut ti daga.

15, 16. Ania ti naipaay tapno naparpartak ti pannakaisaknap ti pannakaammo ti Dios, ket ania dagiti sumagmamano a banag maipapan iti dayta?

¹⁵ Nalalawa a teritoria​—dadakkel a talon a nakasagana nga anien​—ti malukluktan iti ili ti Dios. Nupay mangibabaon ti “Apo ti Panagani,” ni Jehova, iti ad-adu pay a trabahador, adu pay latta ti aramiden. (Mateo 9:37, 38) Ngarud, tapno nabibiit a maisaknap ti pannakaammo ti Dios, nangipaay ti ‘matalek nga adipen’ iti maysa a banag a silalawag a mangipaay iti espesipiko nga impormasion tapno rumang-ay iti naespirituan dagiti agad-adal iti Biblia kada panagadal. Maysa dayta a baro a publikasion a maaramat kadagiti panangyadal iti Biblia iti pagtaengan a nabibiit​—nalabit iti sumagmamano a bulan. Ken nalaka laeng nga ikabil dayta kadagiti portpolio, bag, wenno uray kadagiti bolsatayo! Naragsakan nga immawat ti ginasgasut a ribu a nagtataripnong iti “Nararagsak a Managdaydayaw” a Kombension Distrito dagiti Saksi ni Jehova itoy baro a 192-panid a libro a napauluan Pannakaammo a Mangiturong iti Biag nga Agnanayon.

¹⁶ Nangisagana dagiti mannurat iti nadumaduma a daga iti material a siaannad a nabukel para iti libro a Pannakaammo. No kasta, makaallukoy dayta kadagiti tattao iti nadumaduma a pagilian. Ngem mabayag pay kadi a mairuar daytoy baro a publikasion iti pagsasao dagiti tattao iti aglikmut ti lubong? Saan, agsipud ta nabibiit nga ipatarus ti 192-panidna a libro ngem dagiti daddadakkel a libro. Idi Oktubre 1995, inanamongan ti Writting Committee ti Bagi a Manarawidwid ti pannakaipatarus daytoy a libro manipud Ingles iti nasurok a 130 a pagsasao.

17. Kadagiti ania a pamay-an a nalaklaka nga usaren ti libro a Pannakaammo?

¹⁷ Tangay espesipiko ti linaon ti tunggal kapitulo ti libro a Pannakaammo, makatulong daytoy kadagiti estudiante a rumang-ay a nadaras iti naespirituan. Makapabileg ti panangidatag ti libro kadagiti Nainkasuratan a kinapudno. Saan a naipamaysa kadagiti ulbod a doktrina. Gapu ta nalawag dagiti sao a naaramat ken lohikal ti pannakabukelna, nalaka nga usaren ti libro a mangikondukta kadagiti panagadal iti Biblia ken iti panangtulong kadagiti tattao a mangtarus iti pannakaammo ti Dios. Malaksid kadagiti naadaw a kasuratan, adda dagiti nadakamat a teksto ti Biblia a basaen ti estudiante kas panagsagana iti diskusion. Mabalin a basaen dagitoy bayat ti panagadal no ipalubos ti panawen, nupay saan a nainsiriban ti mangnayon iti material a manglibeg kadagiti kangrunaan a punto. Imbes ketdi, dagidiay mangikonkondukta iti panagadal iti Biblia rebbeng a pagreggetanda a tarusan ken ipaawat iti estudiante no aniat’ pampaneknekan ti libro iti tunggal kapitulo. Kayat a sawen daytoy a masapul nga agadal a naimbag ti mannursuro, tapno nalawag unay iti panunotna dagiti kangrunaan a punto.

18. Ania dagiti singasing a naipaay maipanggep iti panangusar iti libro a Pannakaammo?

¹⁸ Kasano a mapapartak ti libro a Pannakaammo a Mangiturong iti Biag nga Agnanayon ti trabaho a panagaramid adalan? Mapagadalan daytoy 192-panid a libro iti ababa a panawen, ket dagidiay “siuumiso a maikari iti agnanayon a biag” rumbeng a masursuruanda a naimbag babaen ti panangadal iti dayta tapno makapagdedikarda ken Jehova ken mabautisaran. (Aramid 13:48) Isu nga aramatentay a naimbag iti ministerio ti libro a Pannakaammo. No nakaadayon ti estudiante ti Biblia iti sabali a libro a mayad-adal kenkuana, mabalin a praktikal a leppasenna dayta. No saan, maisingasing nga iyakar ti panagadal iti Biblia iti libro a Pannakaammo. Kalpasan a mapagadalan daytoy baro a publikasion, saanen a kasapulan nga iyadalan ti isu met laeng nga estudiante iti maikadua a libro. Mabalin nga an-anayén dagidiay mangabrasa iti kinapudno ti pannakaammoda babaen ti itatabuno kadagiti gimong dagiti Saksi ni Jehova ken kasta met babaen ti bukodda a panagbasa iti Biblia ken iti nadumaduma a Nakristianuan a publikasion.​—2 Juan 1.

19. Sakbay a mangikondukta kadagiti panagadal iti Biblia iti libro a Pannakaammo, apay a makatulong a repasuen ti pinanid 175 aginggat’ 218 iti Organisado a Mangitungpal ti Ministeriotayo?

¹⁹ Nairanta a naisurat ti libro a Pannakaammo tapno matulongan ti maysa a tao a mangsungbat kadagiti amin a saludsod nga irepaso dagiti panglakayen kadagiti di bautisado nga agibumbunannag nga agngayangay nga agpabautisar kas Saksi ni Jehova. Ngarud, sakbay nga iyakaryo iti daytoy baro a publikasion dagiti agdama nga iyad-adalanyo iti Biblia, maisingasing a mangbusboskay iti sumagmamano nga oras a mangrepaso kadagiti saludsod iti pinanid 175 aginggat’ 218 ti libro nga Organisado a Mangitungpal ti Ministeriotayo.a Matulongannakay daytoy a mangipaganetget iti sungbat kadagita a saludsod bayat ti panagadal iti Biblia babaen ti libro a Pannakaammo.

20. Aniat’ planoyo nga aramiden iti libro a Pannakaammo a Mangiturong iti Biag nga Agnanayon?

²⁰ Rumbeng a mangngegan dagiti tao iti amin a disso ti naimbag a damag. Wen, kasapulan ti sangatauan ti pannakaammo ti Dios, ket addada Saksi ni Jehova a mangipakaammo iti dayta. Ita addaantayon iti baro a libro nga impaay ti naayat a nailangitan nga Amatayo babaen ti matalek ken masirib nga adipen. Usarenyo kadi dayta a mangisuro iti kinapudno ken mangidayaw iti nasantuan a nagan ni Jehova? Sigurado a bendisionannakay ni Jehova bayat nga ikagumaanyo nga idanon kadagiti adu ti pannakaammo a mangiturong iti biag nga agnanayon.

[Footnote]

Kasanoyo a Sungbatan?

◻ Kasanoyo nga iladawan ti piguratibo a puso?

◻ Ania ti pannakaammo ti Dios?

◻ Apay a kasapulan ti sangatauan ti pannakaammo ti Dios?

◻ Ania a baro a libro ti magun-odanen, ket kasanoyo nga usaren dayta?

[Ladawan iti panid 10]

Adu ti makagapu no apay a kasapulan dagiti binilion a tattao ditoy daga ti pannakaammo ti Dios