Ania ti Epekto Kenka ti Pannakaammom iti Kinapudno Maipapan iti Impierno?
DAGIDIAY mangisursuro a ti impierno ket maysa a lugar a pagtutuokan balballikugenda ti kinapudno maipapan ken Jehova a Dios ken kadagiti galadna. Agpayso nga ibagbaga ti Biblia a ti Dios dadaelennanto dagiti nadangkes. (2 Tesalonica 1:6-9) Ngem ti nalinteg a panagpungtot ket saan nga isu ti kangrunaan a galad ti Dios.
Ti Dios ket saan a naulpit wenno managibales. Inyimtuodna pay ketdi: “Maragsakanak aya iti ipapatay ti managdakdakes?” (Ezekiel 18:23, Ti Baro a Naimbag a Damag Biblia) No saan a maragsakan ti Dios iti ipapatay dagiti managdakdakes, kasano koma nga agnanayon a kaay-ayona a buyaen ti pannakatutuokda?
Ti kangrunaan a galad ti Dios ket ayat. (1 Juan 4:8) Kinapudnona, “naimbag ti APO iti tunggal maysa, ket nadungngo kadagiti amin a pinarsuana.” (Salmo 145:9, Ti Baro a Naimbag a Damag Biblia) Kayat met ti Dios a patanorentayo ti naimpusuan a panagayat kenkuana.—Mateo 22:35-38.
Ania ti Pakatignayam—Panagbuteng iti Impierno Wenno Panagayat iti Dios?
Ti pannursuro a dagiti kararua ket matutuok idiay impierno pataudenna ti di umno a panagbuteng iti Dios. Iti sabali a bangir, no masursuro ti maysa a tao nga ayaten ti Dios gapu ta naammuanna ti kinapudno maipapan kenkuana, mapatanorna ti umno a panagbuteng kenkuana. “Ti panagbuteng ken Jehova isu ti punganay ti sirib. Amin dagidiay mangar-aramid kadakuada addaanda iti naimbag a pannakatarus,” inlawlawag ti Salmo 111:10. Dayta a panagbuteng iti Dios ket saan a panagsidduker, no di ket panagamanga ken nauneg a panagraem iti Namarsua. Mangpataud dayta iti umno a panagbuteng a mangpagura kenkuana.
Usigem no kasano a ti pannakaammo iti kinapudno maipapan iti impierno ket nakatulong ken Kathleen, maysa a 32 anyos a dati nga agus-usar iti droga. Masansan idi a makidaya ken mairaman iti kinaranggas, kagurgurana ti bagina, ken imoral ti panagbiagna. Inaminna: “Adda idi dagiti gundaway a no makitak ti maysa pay laeng ti tawenna nga anakko, sumken iti panunotko, ‘Kitaem ti ar-aramidem iti anakmo. Mapuorankanto la ketdi idiay impierno.’” Inkagumaan ni Kathleen nga isardeng ti panagdrogana, ngem saan latta a nagballigi. Kinunana: “Kayatko nga aturen ti biagko ngem nakapimpiman ti biag ken ti lubongko. Kasla awan ti pamkuatak nga agbalbaliw.”
Idi agangay, naam-ammo ni Kathleen dagiti Saksi ni Jehova. Kinunana: “Naammuak nga awan ti umap-apuy nga impierno. Talaga a nainkalintegan dagiti ebidensia a nabasak iti Biblia. Nabang-aranak unay idi naammuak a saanak a mapuoran idiay impierno.” Malaksid iti dayta, naammuanna ti kari ti Dios a dagiti tattao ket mabalinto nga agbiag nga agnanayon ditoy daga nga awananen iti kinadakes. (Salmo 37:10, 11, 29; Lucas 23:43) Siraragsak a kinunana: “Addaanakon iti napaypayso a namnama nga agbiagto nga agnanayon iti Paraiso!”
Maisardeng ngata ni Kathleen ti panagdrogana ita ta naammuannan nga awan gayam ti pagam-amkanna nga umap-apuy nga impierno? Kinunana: “No kasta a sapulen unay idi ti bagik ti droga, agkararagak, nga ipakpakaasik ken Jehova a Dios a tulongannak. Lagipek no ania ti panangmatmatna kadagita a narugit a bisio, ket diak kayat a mapagura. Sinungbatanna dagiti kararagko.” (2 Corinto 7:1) Dayta a panagbuteng ni Kathleen a mangpagura iti Dios ti nakatulong kenkuana a mangisardeng kadagiti bisiona.
Wen, ti panangpatanor iti panagayattayo iti Dios ken ti umno a panagbuteng kenkuana—saan a ti panagbuteng iti pannakatutuok iti impierno—ti mangtignay kadatayo a mangaramid iti pagayatan ti Dios tapno masagraptayo dagiti manayon a bendision. Insurat ti salmista: “Bendito ti tunggal maysa nga agbuteng ken Jehova, a magna cadagiti daldalanna.”—Salmo 128:1, Ti Biblia.
[Kahon/Dagiti Ladawan iti panid 9]
SIASINO DAGITI MAWAYAWAYAAN MANIPUD IMPIERNO?
Makatikaw ti dadduma a patarus ti Biblia gapu ta impatarusda ti dua a nagduma a Griego a sasao a Geʹen·na ken Haiʹdes kas maymaysa a sao nga isu ti “impierno.” Iti Biblia, ti termino a Geʹen·na tukoyenna ti naan-anay a pannakadadael, nga awanen ti namnama a pannakapagungar. Iti sabali a bangir, adda namnama a panagungar para kadagidiay adda iti Haiʹdes wenno Hades.
Gapuna, kalpasan a natay ken napagungar ni Jesus, impasigurado ni apostol Pedro kadagiti dumdumngeg kenkuana a ni Jesus “ket saan a nabaybay-an idiay impierno.” (Aramid 2:27, 31, 32; Salmo 16:10, King James Version) Ti Griego a Haiʹdes ti sao a naipatarus nga “impierno” iti dayta a bersikulo. Saan a napan ni Jesus iti umap-apuy a lugar. Ti Hades, wenno “impierno” ket isu ti tanem. Ngem malaksid ken Jesus, addanto pay ti wayawayaan ti Dios manipud iti Hades.
Maipapan iti panagungar, kuna ti Biblia: “Ni patay ken ti impierno inyawatda dagiti natay nga adda kadakuada.” (Apocalipsis 20:13, 14, KJ) Gapuna, inton awanen ti linaon ti “impierno,” kayatna a sawen a napagbiagton amin nga inukom ti Dios a maikari iti panagungar. (Juan 5:28, 29; Aramid 24:15) Anian a nagsayaat a namnama agpaay iti masanguanan—ti pannakakitatayo kadagiti natay nga ay-ayatentayo a mapagungar manipud iti tanem! Dayta ti aramidento ni Jehova, ti Dios ti awan inggana nga ayat.