Dagiti Kontribusion a Mangparagsak ti Puso

ITI kahon nga adda iti baba isuda dagiti dua a gagangay a sursurat a mangpataud kadagiti pundo nga ipatpatulod dagiti relihion ti Kakristianuan. Makitayo aya ida a makaparagsak iti puso? Narigat a kasta! Kaskasdi, kasapulan dagiti pundo iti adu a pamay-an itatta a pangtulong iti panangisaknap ti panagdayaw nga inanamongan ti Dios. Gapuna kasano a paaddaen ti maysa a Nakristianuan nga organisasion dagiti kasapulan a pundo tapno maaramid ti pagayatan ti Dios?

Ti sungbat ket masarakan babaen ti panangsukimat iti ug-ugali ti umuna-siglo a kongregasion Kristiano ken dagiti sasao ti Pundadorna, ni Jesu-Kristo. “Mangtedkayo, ket maikkankayto,” impatigmaan ni Jesus idiay Lucas 6:38. “Sukat a naimbag, napempen, nasedsed, ken agliplipias ti maitedto met iti saklotyo. Ta ti rukod a pangrukodyo isunto met ti pakarukodanyo.” Anian a maiyanatop dayta nga ilustrasion iti panagdengngeg idi dagiti agdengdengngeg ken ni Jesus. Ti kawesda iti Dumaya ti addaan iti naisiguden a bulsa a pagawit wenno pagidulinan kadagiti bambanag. Ti sao a “saklot,” wenno iti literal “barukong” (Griego, kol’pos), tuktukoyenna iti lungog a pinorma babaen ti karenken ti maysa a nakaluklukay a sutana iti ngatuen iti sinturon, ket iti daytoy a bulsa ipakbo dagiti aglaklako dagiti nasukat a nagatangen.

Kasano kaadu dagiti aglaklako ti umuna a mangisedsed ken kalpasanna yugyogen ti nailako tapno ad-adu ti maiserrekda iti lungog ti pagan-anay ti maysa a suki, agingga pay iti punto a dayta ti agliplipiasen? Mammano, no adda pay ketdi! Dagiti Kristiano, nupay kasta, babaen iti siwayawaya a panangted ti tulong ti ayat kadagidiay agkasapulan ti masupapakandanto ti aglaplapusanan met iti asi. Ti rukod ti mismo a panangtratotayo kadagiti dadduma, no daytat’ managparabur wenno naimut, ket mausar a pangrukod iti intayto met apiten a supapakna, saan laeng a manipud kadagiti tattao, no di ket nangnangruna pay manipud ken Jehova a Dios.​—Idiligyo iti 2 Corinto 9:6; Galacia 6:7.

Ni Jesus, babaen iti sibubulos a panangipaayna iti bagina ken iti kuartana, napasaranna ti kaitungpalan daytoy a prinsipio. Isu ti personipikasion ti kinamanagparabur. Sireregta ken awan im-imutna inkaskasabana ti naimbag a damag ti Pagarian ti Dios kadagiti napanglaw. Isut’ pulos di nagsingir a maipaay iti serbisiona wenno nanginanama iti sueldo a maibayad kenkuana. Kaskasdi di pulos nagkurang iti aniaman. Dagiti tattao ti sipaparabur, siboboluntario a nangsuportar kenkuana iti ministeriona.​—Lucas 7:22; 8:1-3.

Ti panangted ni Jesus ti nangparegta kadagiti dadduma​—ni Simon Pedro, Santiago, Juan, ken iti dadduma kadagiti sangapulo ket dua​—a mangipakita met iti kasta a kinamanagparabur iti panangpanawda kadagiti isuamin a bambanag tapno makiraman iti ministerio. (Lucas 5:10, 11; 9:1-6) Dayta a tipo ti panangtulong ti mangted kadagiti isu met laeng a pagbanagan itatta. Dagiti Saksi ni Jehova ti mangipapaay iti tiempoda, pigsada, ken kukuartada tapno mangngeg dagiti dadduma ti naimbag a damag ti Pagarian ti Dios. Kas supapakna, bayat nga iparparangarangda ti kinamanagparaburda babaen ti panangaskasaba, kaskasdi dagiti dadduma maparegtada a mangiyebkas ti kinamanagparaburda babaen iti pannakiramanda kadakuada iti panangisaknap iti naimbag a damag.​—Proverbio 11:25.

Adda, nupay kasta, ti sabali pay a mainayon iti tulongtayo iti panangaskasaba a mangparagsak iti puso. Ti panangitulong kadagiti pundo a buyogen ti umiso a motibo ken agpaay kadagiti umiso a rason ket paset met ti pudno a panagdayaw. (2 Corinto 9:9-14) Kasano ti panangaramid dagiti immuna a Kristiano iti daytoy?

No Kasanot’ Panangaramid dagiti Immuna a Kristiano

Iti umuna nga aldaw ti pannakaipasngay ti kongregasion Kristiano idi tawen 33 K.P., ti “panagkakadua ken panagpipinnisi iti tinapay ken kadagiti kararag” ti inannurot dagiti 3,000 a kababautisar a kumberte. Agpaay iti ania a rason? Tapno mapagbalinda a posible a masuportaran ti kabbaro pay a pammatida babaen ti ‘panagtalinaedda iti sursuro dagiti apostol.’​—Aramid 2:41, 42.

Immay dagiti Judio ken proselita idiay Jerusalem a planoda laeng ti agtalinaed iti sumagmamano a panawen ti Piesta ti Pentecostes. Ngem dagidiay nagbalin a Kristiano tinarigagayanda ti agtalinaed iti mabaybayag pay tapno ad-adu ti maadalda a mangpabileg iti baro a pammatida. Daytoy ti namataud ti parikut iti taraon ken pagtaengan. Dadduma kadagiti sangaili ti awanan umdas a kuarta a naitugotda, bayat a dagiti dadduma addaan met ti agsobsobra. Gapuna adda ti temporario a panangurnong ken panangiwaras kadagiti material a bambanag kadagidiay agkasapulan.​—Aramid 2:43-47.

Kasano ti pannakaiwanwan ti panangtaraon ken panangpadagos kadakuada? Dagiti apostol a nagtignay kas bagi a manarawidwid, inyurnosda ti panangkolekta ken panagiwaras kadagiti naitulong a bambanag. Gapuna, dagiti umuna a ladawan ti kongregasion Kristiano ipakitana dagiti kamkameng a saanda nga ibilbilang dagiti material a bambanagda a kas kabukbukodanda no di ket kas banag a mausar nga agpaay a pakagunggonaan ti intero a kongregasion. (Aramid 2:44; 4:32) Mainayon pay, “ta amin dagidi agikut iti taltalon wenno balbalay inlakoda ida ket inyegda ti naglakuanda ket inkabilda ida kadagiti sakaanan dagiti apostol ket naiwaras a kas ti pakasapulan ti tunggal maysa.”​—Aramid 4:34, 35.

Ti panaglako ti balbalay ken taltalon ken ti panagririnnanud kadagiti isuamin a bambanag ti istrikto a boluntario. Awan asinoman a napilit a mangilako wenno agidonar. Ket daytoy saan met a panangitandudo ti kinapanglaw. Ti kapanunotan a naiyebkas a ta saan nga inlako dagiti babaknang a kamkameng amin a sanikuada ket kalpasanna pimmanglawda. Imbes ketdi, gaput’ asi kadagiti kapammatianda nga adda iti dayta a kasasaad idi, inlakoda ti sanikuada ket intulongda amin a naglakuanda tapno maipaay ti kasapulan a panangparang-ay kadagiti intereses ti Pagarian.​—Idiligyo iti 2 Corinto 8:12-15.

Kasta met itatta, addada dagiti indibidual nga impatawidda ti sanikuada iti Watch Tower Society wenno innaganda daytoy nga organisasion kadagiti testamentoda, a gapu itoy impaimada iti Bagi a Manarawidwid dagiti Saksi ni Jehova ti pannakausar dagiti pundo sadinoman a ti Pagarian dakdakkel ti pakasapulanna. Amin dagiti kasta a panangted ti makatulong iti panangisaknap iti naespirituan a pakalawlawagan kas idi Pentecostes. Awan ti naaramid nga inkapilitan.

Ti Kinaregular Isu ti Palimedna

Agarup 20 a tawen kalpasan ti Pentecostes 33 K.P., pinalagipan ni apostol Pablo ti kongregasion idiay Corinto ti maipapan iti pannakasapul ti maysa a kontribusion. “No maipapan iti maurnong a maipaay kadagiti sasanto, kas imbilinko kadagiti kongregasion idiay Galacia, aramidenyo met ti kasta,” insuratna ket sana innayon daytoy a bassit a pammagbaga. “Tunggal umuna nga aldaw ti lawas tunggal maysa kadakayo iti mismo a balayna mangilasin ti idulinna kas iti irarang-aynanto, tapno inton umayak saanto a masapul ti agurnong. Ket inton dumtengak, ibaonkonto dagidiay anamonganyonto babaen kadagiti surat, tapno ipanda ti paraburyo idiay Jerusalem.” Ti panangikeddeng no kasano kadakkel ti maited agparang a ramanenna ti intero a sangakabbalayan, nabaknang man wenno napanglaw, agsipud ta daytat’ maaramid iti “mismo a balayda met laeng.”​—1 Corinto 16:1-3.

Ti suhestion ni Pablo iti wagas ti panangited ti kontribusion ti maiyaplikar met dagiti kamkameng ti kongregasion itatta. Kasano? Ti kinaregular isu dayta ti tulbek wenno palimed. No ti kongregasionyo agbayad iti binulan nga abang ken dagiti kasapulan a panangtaginayon ti paggigimonganyo wenno Kingdom Hall, kasapulanna ti “panagtitinnulong, saan unay a ti kantidad, no di ket ti kinaregular iti panangilasin iti bassit kada lawas wenno bulan a maipaay kadagiti intereses ti Pagarian,” insurat ti sanga nga opisina idiay Peru. Makaallukoy aya daytoy a kapanunotan kadakayo? Uray dagiti ub-ubbing mabalinda a masursuruan a mangapresiar no kasano a ti kinaregular ti panangted kontribusion ket paset ti panagdayawda.

Gapuna, no dagiti kontribusion ti maaramid nga addaan iti umiso a motibo ken agpaay iti umiso a rason, paragsakenda ti puso agpadpada ti Dios ken iti tao. Kuna ti 2 Corinto 9:7: “Tunggal maysa itedna koma ti pinanggepna iti pusona, saan nga iti dakes a nakem wenno mapilpilit, ta ti Dios ayatenna ti mangted a siayat.”

[Kahon iti panid 28]

Dagiti Metodo nga Us-usaren ti Kakristianuan

“Nagsao kaniak ti Apo nga ipatulod daytoy a surat kadakayo . . . Saanak a makapagsurat iti kastoy a surat kadakayo a maipaay iti aniaman ditoy lubong no saan koma a nagsao ti Dios kaniak nga agsurat kadakayo ket ibaga kadakayo a no mangipatulodkayo a sigaganat iti $20.00 a tumulong kaniak itan bendisionannakayto kas ti saanna pay a panangbendision kadakayo sakbay daytoy.”​—Porma a surat manipud mayaa a klero a taga Canada a napirmaan, “Ti ministroyo ken Kaduayo.”

“Lukatanyo daytoy Nasantuan a Pangpulot a Lana, (dikay saysayangen ti uray sangatedted.) Ni Jesus ti adda iti daytoy a lana ti pammati. Agkuroskayo iti mugingyo iti dayta, kalpasanna babaen iti pammati mapankayo iti maysa a siled nga agmaymaysakayo ket iruaryo ti aniaman a kuarta nga adda kadakayo ket mangaramid ti krus iti tunggal kuarta para iti Dios tapno agasanna dagiti parikutyo iti kuarta, ken tapno paaduenna ti kuartayo kas idiay Lucas 6:38 . . . No pulotanyo ti kuarta nga adda kadakayo iti daytoy nasantuan a pangpulot a lana, pulotanyo ti tunggal kuarta nga adda kadakayo. Mangaramidkayo iti krus iti tunggal kuarta, kalpasanna, ti kadadakkelan a kuarta nga adda kadakayo, no daytat’ $20.00, $10.00 wenno $5.00, mangaramidkayo ti krus iti pangpulot a lana iti dayta ket ipatulodyo dayta iti trabaho ti Dios.​—Porma a surat manipud maysa a “reverendo” idiay Estados Unidos a napirmaan, “Maysa a Mammadto ti Dios iti 30 años.”

[Kahon iti panid 30]

No Kasano ti Itutulong dagiti Dadduma iti Trabaho ti Pagarian

◆ SAGSAGUT: Dagiti donasion ti kuarta ti mabalin a maipatulod a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Mabalin met a maidonar dagiti sanikua. Ti ababa a surat a mangibagbaga a ti kasta a boluntario a donasion ti maipakuyog kadagitoy a kontribusion.

◆ URNOS TI KONDISIONAL A DONASION: Dagiti kuarta, stocks, bonds, ken sanikua ti mabalin a maited iti Watch Tower Society nga addaan kondision nga en kaso iti personal a pannakasapul, mabalin ti pannakaisubli dayta iti nagidonar. Daytoy a pamay-an liklikanna ti gastos ken kinaagpangpangadua iti panangikeddeng iti maysa a testamento, bayat nga ipasigurona ti panangawat ti Sosiedad iti sanikua en kaso ti ipapatay.

◆ INSURANCE: Ti Watch Tower Society mabalin a mainagan kas ti beneficiary iti polisa ti seguro iti biag. Dagiti kuenta ti banko ti mabalin met a maitalek iti Sosiedad. Iti aniaman a kaso, mabalin a mapakaammuan ti Sosiedad.

◆ DAGITI TESTAMENTO: Ti sanikua wenno kuarta ti mabalin a maipatawid iti Watch Tower Society babaen iti legal pannakaaramidna a testamento. Maysa a kopia ti rebbeng a maipatulod iti Sosiedad.

Ti ad-adu pay nga impormasion wenno pakaammo maipapan kadagita a bambanag ti mabalm a magun-odan no agsuratkayo iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad.

[Dagiti ladawan iti panid 31]

Dagiti pamay-an ti panangiwaras ti Bagi a Manarawidwid dagiti Saksi ni Jehova kadagiti kontribusionyo tapno maparang-ay dagiti intereses ti Pagarian iti naglabas a dua a tawen:

Pananggastos iti nasurok a 12,700 a misionero ken espesial payunirs

Panagibangon wenno panangpalawa kadagiti 40 a pasilidades ti sanga

Panangsuportar ti nasurok a 5,000 nga agdaldaliasat a manangaywan ken dagiti assawada

Pananggatang ti walo a baro a napepegges a rotary presses

Panangipaay kadagiti kasapulan ti nasurok nga 8,400 a Bethelites

Panangbadang kadagiti biktima dagiti didigra