Malagipyo Kadi?
Nagustuanyo kadi a binasa dagiti kallabes a ruar ti Pagwanawanan? Bueno, padasenyo a sungbatan dagiti sumaganad a saludsod:
• Ania ti makatulong tapno masolbar ti di pagkinnaawatan?
Umuna, masapul a bigbigentayo nga umapay kadatayo amin ti di umiso a pampanunot ken kababalin. Kalpasanna, nasken nga usigentay a naimbag di la ket ta datayo ti yan ti problema imbes a ti sabali a tao.—8/15, panid 23.
• Kaanonto ‘dagiti tiempo ti pannakaisubli dagiti amin a bambanag’ a nadakamat iti Aramid 3:21?
Mapasamak ti pannakaisubli iti dua a wagas. Umuna, adda ti pannakaisubli iti naespirituan a paraiso a nangrugi idi 1919 agingga iti agdama. Addanto pay ti pannakaisubli inton agbalin manen ti daga a maysa a literal a paraiso.—9/1, panid 17, 18.
• Kasano nga awanan iti pangulo dagiti kuton, kas nadakamat iti Proverbio 6:6-8, ken kaskasdi a makasursurotay kadakuada iti ania?
Adda reyna dagiti kuton, ngem reyna laeng iti anag nga isu ti para itlog ken pannakaina dagiti kuton. Nagagetda, ket kastatayo met koma, nga ikagumaantay a pasayaaten ti trabahotayo uray awan ti agbambantay.—9/15, panid 26.
• Umiso kadi ti impadto ni Hulda, kas nairekord iti 2 Ar-ari 22:20, a matay ni Josias ‘a sitatalna,’ idinto ta napasag iti paggugubatan?
Wen, natay a sitatalna iti anag nga isut’ natay sakbay a simmangbay ti didigra idi 609-607 K.K.P, idi inalikubkob ken dinadael dagiti taga Babilonia ti Jerusalem.—9/15, panid 30.
• Apay a makuna a maysa a pammadayaw ti panangdeskribir ni Solomon iti asawa a babai kas “maay-ayat a kabaian nga ugsa ken maysa a makakayaw a kalding iti bantay”? (Proverbio 5:18, 19, NW)
Natalna ti kabaian a kalding ti bantay ken nangayed ti langana. Kaskasdi, maanduranna ken kabaelanna ti aganak iti nabato ken narigat a madanon a lugar a nakirang ti taraon.—10/1, panid 30, 31.
• Asino da Henry Grew ken ni George Storrs?
Nagbiag dagitoy dua a lallaki iti tawtawen ti 1800 ken napasnekda nga agadal iti Biblia. Naammuan ni Grew a saan a nainkasuratan ti Trinidad, a kas met kadagiti doktrina nga imortal a kararua ken umap-apuy nga impierno. Natarusan ni Storrs nga addanto dagiti agbiag nga agnanayon ditoy daga. Immun-unada a dua sakbay ni Charles Taze Russell, ti nangirugi a nangipablaak iti daytoy a magasin idi 1879.—10/15, panid 26-30.
• Kasano ti panangmatmat dagiti Saksi ni Jehova kadagiti medikal nga operasion a mausar iti pasiente ti mismo a darana?
Gapu iti pammatida a naibatay iti Biblia, saanda nga ipalubos a maidulin ti darada ket kalpasanna mayalison kadakuada. Makaammo ti tunggal Kristiano nga agdesision no kasano a mausar ti darana kabayatan ti operasion, medikal a panangeksamen, wenno agdama a pannakaagas. Nasken nga ikabilanganna ti kuna ti Biblia maipapan iti dara ken laglagipenna nga isut’ naan-anay a nagdedikar iti Dios.—10/15, panid 30, 31.
• Sigun iti maysa a surbey iti rugrugi daytoy a tawen, ania ti naganat a kasapulan dagiti Saksi ni Jehova iti intero a lubong?
Nasurok a 11,000 a Kingdom Hall ti masapul kadagiti napanglaw a pagilian a limitado iti pinansial. Maus-usar ti kontribusion dagiti Kristiano manipud iti adu a pagilian para iti pannakabangon dagiti umdas a paggigimongan.—11/1, panid 30.
• Ania ti sumagmamano nga orihinal a sasao a naaramat iti Biblia nga adda pakainaiganna iti panagdayaw?
Ti maysa isu ti lei·tour·giʹa, a naipatarus a “publiko a panagserbi.” Naaramat met ti la·treiʹa, a naipatarus a “sagrado a panagserbi.” (Hebreo 10:11; Lucas 2:36, 37)—11/15, panid 11, 12.
• Ania ti napateg a leksion a maadaltayo iti salaysay ti Biblia maipapan kada Adan ken Eva?
Agdadata a kinamaag ti sikukuspag nga isisina ken Jehova a Dios.—11/15, panid 24-7.
• Ania ti Nainkasuratan a pammaneknek a papigsaen ti Dios dagiti adipenna?
Pinaneknekan a mismo da David, Habacuc, ken apostol Pablo a pinabileg, wenno pinapigsa ida ni Jehova a Dios. (Salmo 60:12; Habacuc 3:19; Filipos 4:13) Makapagtalektayo ngarud a madadaan ken kabaelan ti Dios a pabilgen ti tunggal maysa kadatayo.—12/1, panid 10, 11.