Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w05 8/1 pp. 4-7
  • Matulongannakayo ti Biblia a Maaddaan iti Rag-o

Awan video-na ti napilim.

Pasensiakan, adda problema iti pannakai-load ti video.

  • Matulongannakayo ti Biblia a Maaddaan iti Rag-o
  • Ti Pagwanawanan Mangibumbunannag iti Pagarian ni Jehova—2005
  • Subtitulo
  • Umasping a Material
  • Pudno a Maseknan ti Dios
  • Taginayonenyo ti Natimbeng a Panangmatmat
  • Dagiti Prinsipio ti Biblia a Mangparayray iti Rag-o
  • No Ania ti Maaramidam
  • Kasano a Masarangetmo Dagiti Negatibo a Rikna?
    Ti Pagwanawanan Mangibumbunannag iti Pagarian ni Jehova—2010
  • Makidangdangadangka Kadi iti Riknam?
    Ti Pagwanawanan Mangibumbunannag iti Pagarian ni Jehova—2005
  • Makipagrag-okayo iti Naragsak a Dios
    Ti Pagwanawanan Mangibumbunannag iti Pagarian ni Jehova—2001
  • Napategka iti Imatang ti Dios!
    Agriingkayo!—1999
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—2005
w05 8/1 pp. 4-7

Matulongannakayo ti Biblia a Maaddaan iti Rag-o

NUPAY saan a libro maipapan iti medisina, agkomento ti Biblia maipapan iti mabalin nga epekto ti positibo ken negatibo nga emosion iti mental ken pisikal a salun-at ti maysa a tao. “Ti puso a narag-o nasayaat a pangagas,” kuna ti Biblia, “ngem ti espiritu a nadanar magmaganna dagiti tulang.” Kunana pay: “Impakitam kadi a naupayka iti aldaw ti rigat? Kurangto ti bilegmo.” (Proverbio 17:22; 24:10) Ti pannakaupay mabalin nga ibusenna ti pigsatayo, a pagbalinennatayo a nakapuy ken awanan iti gaway ket ditayon tarigagayan ti agbaliw ken kumiddaw iti tulong.

Ti pannakaupay mabalin nga apektaranna met ti maysa a tao iti naespirituan. Dagiti tattao a mangipagarup nga awan serserbida masansan a mariknada a dida pulos matagiragsak ti nasayaat a relasion iti Dios ken ti pamendisionna. Ni Simone a nadakamat iti immuna nga artikulo, pinagduaduaanna nga “isu ti kita ti tao nga anamongan ti Dios.” Nupay kasta, no kitaentayo ti ibaga ti Sao ti Dios, ti Biblia, maammuantayo a positibo ti panangmatmat ti Dios kadagidiay mangikagumaan a mangay-ayo kenkuana.

Pudno a Maseknan ti Dios

Ibaga kadatayo ti Biblia a “ni Jehova asideg kadagidiay nadunor ti pusoda; ket dagidiay naidagel iti espiritu isalakanna.” Ti Dios saanna nga umsien “ti puso a nadunor ken naidagel,” ngem ikarkarina a ‘paungarenna ti espiritu dagidiay napakumbaba ken paungarenna ti puso dagidiay mailupitlupit.’​—Salmo 34:18; 51:17; Isaias 57:15.

Naminsan, ni Jesus nga Anak ti Dios kasapulan nga ilawlawagna kadagiti adalanna ti kinapudno a ti Dios makitana ti naimbag kadagiti adipenna. Babaen ti maysa nga ilustrasion, insalaysayna nga ammo ti Dios no ti maysa a billit-tuleng matnag iti daga​—maysa a banag a saan a napateg kadagiti tattao. Intampokna pay nga ammo ti Dios ti kabassitan a detalye maipapan kadagiti tattao, uray ti bilang ti buok iti uloda. Ingngudo ni Jesus ti ilustrasionna babaen ti panangikunana: “Gapuna dikay agbuteng; napatpategkayo ngem iti adu a billit-tuleng.” (Mateo 10:29-31)a Impatuldo ni Jesus nga aniaman ti marikna dagiti indibidual maipapan iti bagbagida, dagiti tattao nga addaan pammati adda pategda iti Dios. Kinapudnona, palagipannatayo ni apostol Pedro a “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

Taginayonenyo ti Natimbeng a Panangmatmat

Idagadag ti Sao ti Dios nga agbalintayo a natimbeng no iti panangmatmattay iti bagitayo. Napaltiingan ni apostol Pablo a mangisurat: “Babaen ti di kaikarian a kinamanangngaasi a naited kaniak ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot; no di ket agpanunot tapno maaddaan iti nasimbeng a panagpampanunot, tunggal maysa kas imbunong ti Dios kenkuana a rukod ti pammati.”​—Roma 12:3.

Siempre, saantay a kayat a panunoten a natan-oktayo nga uray la nga agpasindayagtayo; ngem iti sabali a bangir, saantay met kayat a panunoten nga awan serserbitayo. Imbes ketdi, rumbeng a ti panggeptayo ket maaddaan iti rasonable a panangmatmat iti bagitayo, nga usigentayo dagiti paglaingantayo ken kasta met dagiti limitasiontayo. Kastoy ti panangibaga ti maysa a Kristiano a babai: “Saan a siak ti makuna a dakes; ngem saan met a siak ti kasayaatan. Agpadpada nga addaanak kadagiti matarigagayan ken di matarigagayan a saguday, a kas iti asinoman.”

Siempre, saan a nalaka a patanoren ti natimbeng a panangmatmat. Kasapulan ti dakkel a panangikagumaan tapno maiwaksi ti nalabes a negatibo a panangmatmat iti bagitayo a nabayagen a marikriknatayo. Nupay kasta, babaen ti tulong ti Dios mabalbaliwantayo ti personalidadtayo agraman ti panangmatmattayo iti biag. Kinapudnona, isu dayta ti idagdagadag ti Sao ti Dios nga aramidentayo. Mabasatayo: “Ikkatenyo koma ti daan a personalidad a mayannurot iti sigud a dana ti kababalinyo ken agruprupsa maitunos kadagiti makaallilaw a derrepna; no di ket mapabarokayo koma iti puersa a mangtigtignay iti panunotyo, ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.”​—Efeso 4:22-24.

Babaen ti panangikagumaan a mangbalbaliw iti ‘puersa a mangtigtignay iti panunottayo,’ kayatna a sawen, ti nabileg a pagannayasan ti panunottayo, mapagbalintayo a positibo ti negatibo a personalidadtayo. Ni Lena, a nadakamat iti immuna nga artikulo, nabigbigna nga agingga a saanna nga iwaksi ti kapanunotan nga awan ti mabalin a mangayat ken makatulong kenkuana, awan ti makapagbalbaliw iti riknana maipapan iti bagina. Ania a praktikal a balakad a masarakan iti Biblia ti nakatulong kada Lena, Simone, ken dadduma pay tapno maaramidda ti kasta a panagbalbaliw?

Dagiti Prinsipio ti Biblia a Mangparayray iti Rag-o

“Ipalladawmo ti dadagsenmo ken Jehova a mismo, ket isu saranayennakanto.” (Salmo 55:22) Umuna ken kangrunaanna, ti kararag matulongannatayo a maaddaan iti pudno a rag-o. Kuna ni Simone: “No makariknaak iti pannakaupay, umadaniak ken ni Jehova ket kiddawek ti tulongna. Awan pay ti kasasaad a diak narikna ti pigsa ken panangiwanwanna.” Idi idagdagadag ti salmista nga ipalladawtayo ti dadagsentayo ken ni Jehova, arigna nga ipalpalagipna kadatayo a saan laeng a maseknan kadatayo ni Jehova no di ket matmatannatayo kas indibidual a maikari iti tulong ken suportana. Iti rabii ti Paskua idi 33 K.P., malmaldaangan dagiti adalan ni Jesus gapu iti imbaga ni Jesus maipapan iti mabiiten nga ipapanawna. Indagadag ni Jesus kadakuada nga agkararagda ken Amana, sana innayon: “Dumawatkayo ket umawatkayto, tapno maan-anay koma ti rag-oyo.”​—Juan 16:23, 24.

“Ad-adu ti kinaragsak iti panangted ngem iti panangawat.” (Aramid 20:35) Kas insuro ni Jesus, ti panangted ket makatulong iti pananggun-od iti pudno a rag-o iti biag. Ti panangyaplikar iti daytoy a kinapudno iti Biblia tulongannatayo a mangipamaysa kadagiti kasapulan dagiti sabsabali imbes nga iti bukodtayo a pagnam-ayan. No tulongantayo dagiti tattao ket matignayda nga agyaman kadatayo, makariknatayo iti pannakapnek. Kombinsido ni Lena a ti regular a panangiranud iti naimbag a damag a linaon ti Biblia tumultulong kenkuana iti dua a pamay-an. “Umuna, mariknak ti kinaragsak ken pannakapnek a dinakamat ni Jesus,” kunana. “Maikadua, adu ti mangkomendar kaniak, a tumulong kaniak a maaddaan iti rag-o.” Babaen ti sipaparabur a panangipaay iti bagbagitayo, mapasarantayo ti kinapudno ti Proverbio 11:25: “Daydiay sibubulos a mangsibug iti sabsabali isu sibubulos a masibuganto met.”

“Amin dagiti aldaw daydiay naparigatan dakesda; ngem daydiay maay-ayatan ti pusona addaan padaya a patinayon.” (Proverbio 15:15) Nawayatayo amin a maaddaan iti bukodtayo a panangmatmat iti bagitayo wenno iti kasasaadtayo. Mabalin a kaslatayo daydiay negatibo ti panangmatmatna iti amin a banag ket makarikna iti rigat, wenno mabalintayo ti agpanunot a sipopositibo, nga addaan iti ‘maay-ayatan a puso,’ ken agrag-o a kasla addatayo iti padaya. Kuna ni Simone: “Ikagkagumaak ti agtalinaed a positibo. Kanayonak met nga okupado iti personal a panagadal ken iti ministerio, ken kanayonak nga agkararag. Ikagkagumaak met ti makipulapol kadagiti positibo a tattao ken makipagrikna ken tumulong kadagiti sabsabali.” Ti kasta a kababalin ti puso mangyeg iti pudno a rag-o, kas iti idagdagadag ti Biblia: “Agragsakkayo ken Jehova ken agrag-okayo, dakayo a nalinteg; ket agdir-ikayo a sirarag-o, dakayo amin a napalungdo iti puso.”​—Salmo 32:11.

“Ti pudno a kadua agayat iti isuamin a tiempo, ken ti kabsat a mayanak no adda rigat.” (Proverbio 17:17) Ti panangyebkas iti riknatayo iti maysa nga ing-ingungoten wenno mapagtalkan a mamalbalakad ket makatulong iti panangsaranget ken panangiwaksi kadagiti negatibo a rikna sakbay a lapunosendatayo. Ti pannakisarita kadagiti sabsabali ket makatulong tapno maaddaantayo iti natimbeng, positibo a panangmatmat iti bambanag. “Dakkel ti maitulong ti panangyebkasko iti rikriknak,” kinuna ni Simone. “Kasapulan nga adda pangibagaam iti riknam. Masansan nga umanayen ti basta panangyebkas iti dayta.” Ti panangaramid iti dayta tulongannakayo tapno mapasaranyo ti kinapudno ti proverbio nga agkuna: “Ti panagdanag nga adda iti puso ti maysa a tao isunto ti mamagrukob iti dayta, ngem ti naimbag a sao isu ti mamagrag-o iti dayta.”​—Proverbio 12:25.

No Ania ti Maaramidam

Nausigtayo ti sumagmamano laeng kadagiti adu nga agkakaimbag ken praktikal a prinsipio iti Biblia a makatulong kadatayo a mangparmek kadagiti negatibo a rikna ken maaddaan iti pudno a rag-o. No maysaka kadagidiay makidangdangadang iti rikna ti kinakawaw, paregtaendaka a mangusig a naimbag iti Sao ti Dios, ti Biblia. Sursuruem ti maaddaan iti realistiko ken natimbeng a panangmatmat iti bagim ken iti relasionmo iti Dios. Sipapasnek a namnamaenmi a babaen ti panangiwanwan ti Sao ti Dios, maaddaanka iti pudno a rag-o iti amin nga aramidem.

[Footnote]

a Daytoy a paset ti Kasuratan ket detalyado a nausig iti panid 22 ken 23.

[Ladawan iti panid 7]

Ti panagbiag maitunos kadagiti prinsipio ti Biblia parayrayenna ti rag-om

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share