Ti Panangmatmat ti Biblia

Napategka iti Imatang ti Dios!

“MASANSAN A MARIKNAK NGA AWAN SERSERBI TI BIAGKO,” INSURAT TI MAYSA A KRISTIANO A BABAI. “URAY KASTA UNAY TI PANAGAYATKO KEN JEHOVA WENNO PANAGREGGETKO NGA AGSERBI KENKUANA, KANAYON A MARIKNAK A KURANG DAYTA.”

ADDA kadi am-ammom a makidangdangadang iti nakaro a pannakariknana nga awan serserbina? Wenno pasaray mariknam kadi a mismo dayta? Saan a karkarna dagita a rikna, uray kadagiti matalek nga agdaydayaw iti Dios. Awan ti maipuera kadagiti epekto ti panagbiag iti “napeggad a tiempo a narigat a pakilangenan.” Adu ti binaybay-an ken inabuso dagiti tattao nga “awanan panagteppel, narungsot, awanan panagayat iti kinaimbag”​—dagiti kababalin nga agraraira “kadagiti maudi nga al-aldaw.” (2 Timoteo 3:1-5) Mabalin a mangibunga dagita a nasaem a kapadasan iti nakaro a pannakasair, a mangiparikna iti naan-anay a kinaawan serserbi.

Iti dadduma a kasasaad, dagiti negatibo a rikna isut’ mabalin a resulta ti panangipasdek iti nangato unay a pagalagadan para iti bagida. Kumaro ti pannakariknada a talaga a kurang ti maar-aramidanda gapu ta dida maragpat dagitoy a pagalagadan. Aniaman ti makagapu, dagidiay makarikna nga awan serserbida mabalin a marigatanda a mangtarus no apay nga ay-ayaten ida ti Dios​—wenno ti siasinoman, gapu iti dayta a banag. Kinapudnona, mabalin a patienda pay ketdi a saanda a maipatpateg.

Ngem saan a kasta ti panagrikna ni Jehova a Dios! Iti Saona, pakdaarannatayo ni Jehova nga agannadtayo “kadagiti makaallilaw a taktika” ti Kabusorna a ni Satanas a Diablo. (Efeso 6:11, Jewish New Testament) Us-usaren ni Satanas dagiti makaallilaw a taktikana tapno mapasardengnatayo nga agserbi iti Diostayo. Gapu iti dayta a kalat, iparparikna ni Satanas nga awan serserbitayo, nga awan a pulos ti pamkuatan ni Jehova tapno ipategnatayo. Ngem “managulbod” ni Satanas​—kinapudnona, isu “ti ama ti kinaulbod.” (Juan 8:44) Masapul ngarud a ditay pailaw-an kadagiti makaallilaw a taktikana! Iti Biblia, ibagbaga a mismo ni Jehova ken ipanamnamana a napategtayo iti imatangna.

Natimbeng a Panangmatmat iti Pategtayo

Mamakdaar ti Biblia maipapan iti negatibo nga epekto kadatayo ti pannakaupay. Kuna ti Proverbio 24:10: “No kumapsutka iti aldaw ti pagpaglan, ti pigsam bassit.” Pakapuyennatayo ti napaut a negatibo a rikriknatayo, isu a nakapsut ken nalakatayton a mabiktima. Sigurado a pagaammo ni Satanas daytoy. Narigat no mariknatayo nga awan serserbitayo. Ngem narigrigat ti kasta a kasasaad no padasen ni Satanas a gundawayan ti kakasta a rikna.

Napateg ngarud a maaddaantayo iti umiso, natimbeng a panangmatmat iti pategtayo. “Ibagak iti tunggal maysa kadakayo,” indagadag ni apostol Pablo, “a dina panunoten nga ad-adda ti bagina ngem iti rebbengna a panangpanunot; no di ket agpanunot a kas addaan iti nasimbeng a panagpampanunot.” (Roma 12:3) Kastoy ti sabali pay a pannakaipatarusna: “Kunak iti tunggal maysa kadakayo a dina koma ipappapan ti bagina a nangatngato ngem iti pudno a pategna, no di ket mangaramid iti kalalainganna a panangtingiting iti bagina.” (Charles B. Williams) Isu nga iparparegta ti kasuratan a maaddaantayo iti natimbeng a panangmatmat iti bagitayo. Iti kasumbangirna, masapul a liklikantayo ti kinaarogante; iti sabali a bangir, ditay padasen a lablabsen nga aramiden ti kasunganina, ta ipatpatuldo ni Pablo a tapno maaddaantayo iti nasimbeng a panagpampanunot, masapul a panunotentayo nga adda met pategtayo. Wen, babaen ti nadiosan a paltiing, impatuldo ni Pablo a napateg ti tunggal maysa kadatayo iti imatang ni Jehova.

Naiparipirip met ti natimbeng a panangipateg iti bagi iti sasao ni Jesus idi kinunana: “Masapul nga ayatem ti kaarrubam a kas iti bagim.” (Mateo 22:39) Ti sasao a “kas iti bagim” ipatuldona a masapul nga adda met panangipategtayo iti bagitayo, wenno panagraemtayo iti bagitayo. Pudno nga agbasol ken agkamalitayo. Ngem no ikagumaantayo nga ay-aywen ti Dios, pagbabawyantayo dagiti pagkurkurangantayo, ket kiddawentayo ti pammakawanna, kaskasdi nga adda pay laeng panangipategtayo iti bagitayo. Nalabit sabali ti idarirag ti manangbabalaw a pusotayo, ngem laglagipentayo a “ti Dios dakdakkel ngem kadagiti pusotayo.” (1 Juan 3:20) Iti sabali a pannao, talaga a naiduma ti panangmatmat ni Jehova kadatayo ngem iti panangmatmattayo iti bagitayo.

Sitatarumpingay a Puspuso, Sibababawi nga Espiritu

Kastoy ti insurat ni salmista David: ‘Ni Jehova adda iti asideg dagiti sitatarumpingay ti pusoda, ket isalakanna dagiti sibababawi ti espirituda.’ (Salmo 34:18) Kastoy ti komento ti Matthew Henry’s Commentary on the Whole Bible maipapan iti daytoy a bersikulo: “Daytat’ galad dagiti nalinteg . . . a sitatarumpingay ti puso ken sibababawi ti espirituda, kayatna a sawen, nagpakumbabada gapu iti basol, ken awan panangipategdan iti bagida; nanumo ti panangmatmatda iti bagida, ken awan panagtalekda iti nasayaat a magapuananda a mismo.”

Mabalin a marikna dagidiay “sitatarumpingay ti pusoda” wenno ‘sibababawi ti espirituda,’ nga adayo ni Jehova ken awan unay serserbida tapno maseknan pay ni Jehova kadakuada. Ngem saan a husto dayta. Ipanamnama kadatayo dagiti sasao ni David a saan a baybay-an ni Jehova dagidiay “nanumo ti panangmatmatda iti bagida.” Ammo ti naayat a Diostayo nga isut’ lalo a kasapulantayo kadagita a tiempo, ken isut’ asideg.

Imutektekam ti maysa a pagarigan. Sumagmamano a tawenen ti napalabas, intaray ti maysa nga ina ti dua ti tawenna nga anakna a lalaki idiay ospital agsipud ta kelkelen. Kalpasan nga ineksamen ti dodoktor ti anakna, imbagada iti ina a pagtalinaedenda ti ubing iti ospital iti agpatnag. Nagturogan ngay ti ina iti daydi a rabii? Iti maysa a tugaw ti ospital, a kadenna ti kama ti anakna. Masakit ti anakna, ket masapul a dina pampanawan. Ad-adu pay ti manamnamatayo iti naayat a nailangitan nga Amatayo, ta naparsuatayo a kaladladawanna! (Genesis 1:26; Isaias 49:15) Ipanamnama kadatayo dagiti makapikapik a sasao ti Salmo 34:18 a no “sitatarumpingay ti puso[tayo],” ni Jehova ket “asideg”​—kanayon a sisisiput, mangipangag, ken sidadaan a tumulong, kas iti maysa a naayat nga ama.​—Salmo 147:1, 3.

“Napatpategkayo Ngem Kadagiti Adu a Billit-tuleng”

Iti unos ti naindagaan a ministerio ni Jesus, nagadu ti impalgakna maipapan iti kapanunotan ken rikrikna ni Jehova, agraman ti panagrikna ni Jehova kadagiti naindagaan nga adipenna. Saan la a namnaminsan nga impanamnama ni Jesus kadagiti adalanna a napategda iti imatang ni Jehova.​—Mateo 6:26; 12:12.

Kas pagarigan, kinuna ni Jesus idi inyilustrarna ti kinapateg ti tunggal maysa kadagiti adalanna: “Saan aya a ti dua a billit-tuleng mailako iti maysa a sinsilio a bassit ti pategna? Kaskasdi awan maysa kadakuada ti matnag iti daga nga awan pannakaammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem kadagiti adu a billit-tuleng.” (Mateo 10:29-31) Panunotenyo ti epekto dagidiay a sasao kadagiti dumdumngeg ken Jesus idi umuna a siglo.

Nabatad a karaman dagiti billit-tuleng kadagiti kalalakaan kadagiti amin a tumatayab a mabalin idi a sidaen. Dagitoy a billit ket gagangay a madutdotan, matudok, ken maituno a kas karne. Sigurado a nakakita idin ni Jesus kadagiti nakurapay a babbai iti plasa a mangbilbilang kadagiti sinsilioda tapno maammuanda no mano a billit-tuleng ti magatangda. Naibilang a nakalaklaka dagiti billit ta makagatang ti maysa a tao iti dua a billit-tuleng babaen ti maysa a sinsilio a bassit ti pategna (kayatna a sawen, literal a maysa nga asarion, awan pay lima a sentimo).

Idi agangay, nadakamat manen ni Jesus daytoy nga ilustrasion​—ngem iti naiduma la bassit a pamay-an. Sigun iti Lucas 12:6, kinuna ni Jesus: “Saan kadi a ti lima a billit-tuleng mailako iti dua a sinsilio a bassit ti pategna?” Panunotem dayta. Makagatang ti maysa a tao iti dua a billit-tuleng babaen ti maysa a sinsilio a bassit ti pategna. Ngem no kayatna nga igatangna ti dua a sinsiliona, saan nga uppat a billit-tuleng ti magatangna no di ket lima. Ti buntok a billit ket nayon iti panaglako a kas man la awan a pulos ti pategna. “Kaskasdi,” kinuna ni Jesus, “awan uray maysa kadakuada [uray daydiay naibuntok] ti malipatan iti sanguanan ti Dios.” Kastoy ti inngudo ni Jesus iti panangyaplikarna iti daytoy nga ilustrasion: “Napatpategkayo ngem kadagiti adu a billit-tuleng.” (Lucas 12:7) Naparegta la ketdi dagidiay a sasao dagiti dumdumngeg idi kenkuana!

Naawatam kadi ti punto ti makaparagsak nga ilustrasion ni Jesus? No napateg ken Jehova uray dagiti billit, napatpateg la ketdi nga amang kenkuana dagiti naindagaan nga adipenna! Para ken Jehova, awan uray maysa kadatayo ti mabaybay-an. Napateg ti tunggal maysa kadatayo ken Jehova ta uray la a makitana ti kabassitan a detalye maipapan kadatayo​—nabilang a saggaysa dagiti buok ti ulotayo.

Siempre, itultuloy ni Satanas nga usaren “dagiti makaallilaw a taktikana”​—a kas iti pananggundawayna iti pannakariknatayo iti kinaawan serserbi​—tapno mapasardengnatayo nga agserbi ken Jehova. Ngem dika ipalubos a mangabak ni Satanas! Lagipem ti Kristiano a babai a nadakamat itay. Isut’ natulongan ti maysa nga artikulo iti magasin a Pagwanawanan a namakdaar kadagiti panagregget ni Satanas a manggundaway iti rikriknatayo.a Kunana: “Diak idi naamiris a padpadasen gayam ni Satanas nga usaren ti rikriknak tapno upayennak. Ita ta ammokon, ikagumaak a parmeken dagitoy a rikrikna. Madaerakon dagitoy a sataniko a panangraut nga addaan kompiansa.”

Ni Jehova “ammona ti isuamin a bambanag.” (1 Juan 3:20) Wen, ammona ti agdama nga ib-ibturantayo. Ammona met ti napasarantayo idi napalabas a mabalin a nakadadaelan ti panagraemtayo iti bagitayo. Laglagipem, ti panangmatmat ni Jehova kadatayo isut’ kapatgan! Ipagaruptay man a saantayo a maipatpateg wenno awan serserbitayo, ipasigurado ni Jehova kadatayo a napateg kenkuana ti tunggal maysa kadagiti adipenna. Makapagtalektayo iti sao ni Jehova, ta saan a kas iti Kabusorna, ti Dios “dina mabalin ti agulbod.”​—Tito 1:2.

[Footnote]

[Blurb iti panid 12]

Kas iti naayat nga ama, asideg ni Jehova kadagidiay maladladingitan

[Dagiti ladawan iti panid 13]

No saan a malipatan ni Jehova ti billit-tuleng, sikanto la ketdin?

[Dagiti Credit Line]

Lydekker

Illustrated Natural History