Mapagwadanka Kadi iti Panangipakita iti Pammadayaw?

“Iti panangipakita ti pammadayaw iti maysa ken maysa mangidaulokayo.”​—ROMA 12:10.

1. Ania ti saanen a gagangay iti adu a paset ti lubong?

ITI dadduma a paset ti lubong, kadawyan kadagiti ubbing a padayawanda dagiti nakatugaw a natataengan babaen ti siraraem a panagparintumengda. Iti kasta, dida agparang a nataytayag ngem kadagiti in-inauna kadakuada. Kadagita a komunidad, maibilang met nga awan daydayaw ti maysa nga ubing no tallikudanna ti maysa a nataengan. Nupay agduduma ti pamay-an ti panangipakita iti panagraem iti nadumaduma a kultura, dagiti kasta a panangipakita iti panagraem ti mangipalagip kadatayo iti Mosaiko a Linteg. Karaman iti dayta daytoy a bilin: “Iti sanguanan ti ubanan rebbeng a tumakderka [kas panagraem], ket masapul nga ipakitaam ti konsiderasion ti kinatao ti maysa a lakay.” (Lev. 19:32) Ngem nakalkaldaang ta iti adu a lugar, saanen a gagangay ti panangipakita iti panangpadayaw iti sabsabali. Kinapudnona, nasaknap itan ti kinaawan panagraem.

2. Siasino dagiti ibagbaga ti Sao ti Dios a padayawantayo?

² Iyunay-unay ti Sao ti Dios ti kinapateg ti panangipakita iti pammadayaw. Ibagbagana kadatayo a padayawantayo ni Jehova agraman ni Jesus. (Juan 5:23) Naibilin met kadatayo a padayawantayo dagiti kapamilia ken kapammatiantayo agraman dagiti ditay kapammatian. (Roma 12:10; Efe. 6:1, 2; 1 Ped. 2:17) Ania ti dadduma a pamay-an a maipakitatayo a padpadayawantay ni Jehova? Kasanotay a maipakita ti pammadayaw, wenno ti nauneg a panagraem, kadagiti kapammatiantayo? Usigentayo dagitoy ken ti dadduma pay a mainaig a saludsod.

Padayawantayo ni Jehova ken ti Naganna

3. Ania ti maysa a napateg a pamay-an ti panangpadayawtayo ken Jehova?

³ Ti maysa a napateg a pamay-an tapno mapadayawantayo ni Jehova ket babaen ti panangipakitatayo iti umiso a panagraem iti naganna. Ngamin, datayo ti “ili a maipaay iti naganna.” (Ara. 15:14) Talaga a pakaidayawantayo ti agbalin a Saksi ti mannakabalin-amin a Dios a ni Jehova. Kinuna ni propeta Mikias: “Amin dagiti ili, iti biangda, magnadanto tunggal maysa iti nagan ti diosna; ngem datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.” (Mik. 4:5) ‘Magnatayo iti nagan ni Jehova’ babaen ti panagreggettayo nga agbiag iti tunggal aldaw iti wagas a pakaidayawan ni Jehova ken ti naganna. Kas iti impalagip ni Pablo kadagiti Kristiano idiay Roma, no saantayo nga agbiag a maitunos iti naimbag a damag nga ikaskasabatayo, ‘matabbaawan’ wenno maibabain ti nagan ti Diostayo.​—Roma 2:21-24.

4. Ania ti panangmatmatmo iti pribilehiotayo a mangsaksi ken Jehova?

⁴ Padpadayawantayo met ni Jehova babaen ti trabahotayo a panangsaksi. Idi un-unana, inawis ni Jehova ti nasion ti Israel nga agbalin a saksina, ngem dida natungpal dayta nga akemda. (Isa. 43:1-12) Masansan a simmukirda kenni Jehova ken “pinasakitanda uray Daydiay Santo ti Israel.” (Sal. 78:40, 41) Idi agangay, naan-anay a napukaw dayta a nasion ti anamong ni Jehova. Ngem no para kadatayo ita, anian a yamantayo iti pribilehiotayo a mangsaksi kenni Jehova ken mangipakaammo iti naganna. Ar-aramidentayo dayta gapu ta ay-ayatentayo ni Jehova ken il-iliwentayo a masantipikar ti naganna. Kasano koma nga isardengtayo ti mangasaba idinto ta ammotayo ti kinapudno maipapan iti nailangitan nga Amatayo ken kadagiti panggepna? Mariknatayo ti kas iti narikna ni apostol Pablo idi a kinunana: “Ti panagkasapulan naipabaklay kaniak. Pudno unay, asiak pay no diak indeklara ti naimbag a damag!”​—1 Cor. 9:16.

5. Kasano a ti kaadda ti pammatitayo ken Jehova ket mainaig iti panagraemtayo kenkuana?

⁵ Kinuna ni salmista David: “Agtalekto kenka dagidiay makaam-ammo iti naganmo, ta pudno unay a saanmonto a baybay-an dagidiay mangbirbirok kenka, O Jehova.” (Sal. 9:10) No talaga nga am-ammotayo ni Jehova ken raraementayo ti naganna, agtalektayo kenkuana kas iti inaramid dagiti nagkauna a matalek nga adipenna. Ti kaadda ti kasta a panagtalek ken pammati kenni Jehova ket maysa pay a pamay-an a maipakitatayo ti panangpadayawtayo kenkuana. Idi a saan a nagtalek ti nasion ti Israel Kenkuana, kastoy ti inyimtuod ni Jehova ken Moises: “Kasanonto kabayag a saannak a raemen daytoy nga ili, ket kasanonto kabayag nga awananda iti pammati kaniak kadagiti amin a pagilasinan nga inaramidko iti tengngada?” (Num. 14:11) Imutektekam no kasano ti pananginaig dayta a teksto iti panagtalek kenni Jehova ken iti panagraem kenkuana. Pudno met ti kasungani dayta. No agtalektayo a salakniban ken tulongannatayo ni Jehova a mangibtur kadagiti pakasuotantayo, ipakpakitatayo nga isu ket raraementayo.

6. Ania ti mangtignay kadatayo a mangipakita iti nauneg a panagraem ken Jehova?

⁶ Impasimudaag ni Jesus a masapul a naimpusuan ti panagraemtayo ken Jehova. Iti pannakisaritana kadagidiay parparawpaw ti panagdayawda, inadaw ni Jesus daytoy a kinuna ni Jehova: “Daytoy nga ili dayawennak babaen kadagiti bibigda, ngem ti pusoda adayo kaniak.” (Mat. 15:8) Ti napudno a panagraem ken Jehova ket aggubuay iti naimpusuan a panagayattayo kenkuana. (1 Juan 5:3) Kasta met a sipapanunottayo iti daytoy a kari ni Jehova: “Dagidiay mangpadayaw kaniak padayawakto.”​—1 Sam. 2:30.

Ipakpakita Dagiti Manangaywan ti Panagraemda iti Sabsabali

7. (a) Apay a dagiti addaan iti akem iti kongregasion ket rumbeng nga ipakitada ti panangpadayaw kadagiti adda iti aywanda? (b) Kasano nga impakita ni Pablo ti panagraemna kadagiti kapammatianna?

⁷ Imbalakad ni apostol Pablo kadagiti kapammatianna: “Iti panangipakita ti pammadayaw iti maysa ken maysa mangidaulokayo.” (Roma 12:10) Dagiti addaan iti akem iti kongregasion ket rumbeng nga ‘idaulo’ wenno iyulidanda ti panangpadayaw kadagidiay adda iti aywanda. Maipapan iti dayta, rumbeng a tuladenda ti inyulidan ni Pablo. (Basaen ti 1 Tesalonica 2:7, 8.) Ammo dagiti kakabsat kadagiti kongregasion a sinarungkaran ni Pablo a dina pulos kiniddaw kadakuada nga aramidenda dagiti banag a dina kayat a mismo nga aramiden. Impakita ni Pablo ti panagraemna kadagiti kapammatianna isu a nagun-odanna ti panagraemda. Gapu iti nagsayaat nga ulidanna, masiguradotayo nga adu ti nangipangag ken Pablo idi kinunana kadakuada, “dawatek kadakayo, ngarud, agbalinkayo a tumutulad kaniak.”​—1 Cor. 4:16.

8. (a) Ania ti maysa a napateg a pamay-an nga impakita ni Jesus ti panagraemna kadagiti adalanna? (b) Kasano a matulad dagiti manangaywan ita ti ulidan ni Jesus?

⁸ Ti maysa pay a pamay-an a maipakita ti maysa a manangaywan ti panagraemna kadagiti adda iti aywanna ket babaen ti panangibagana kadakuada no apay nga adda dagiti espesipiko a kidkiddawen wenno ipapaaramidna kadakuada. No kasta ti aramidenna, tultuladenna ni Jesus. Kas pagarigan, idi ibagbaga ni Jesus kadagiti adalanna nga ikararagda nga ad-adu koma a trabahador ti maibaon iti panagani, imbagana kadakuada ti makagapu. Kinunana: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Umasping iti dayta, idi imbagana kadagiti adalanna nga ‘agtultuloyda nga agbantay,’ imbagana ti makagapu. Kinunana: “Agsipud ta saanyo nga ammo no ania nga aldaw nga umay ti Apoyo.” (Mat. 24:42) Masansan nga agpadpada nga ibaga ni Jesus kadagiti adalan no ania ti rumbeng nga aramidenda ken no apay a rumbeng nga aramidenda dayta. Iti kasta, impakitana ti panagraemna kadakuada ken pinadayawanna ida. Anian a nagsayaat nga ulidan a nasken a suroten dagiti Kristiano a manangaywan!

Raementayo ti Kongregasion ni Jehova ken ti Panangiwanwan Dayta

9. Siasino pay ti padpadayawantayo no ipakpakitatayo ti panagraemtayo iti sangalubongan a kongregasion Kristiano ken dagiti pannakabagi dayta? Ilawlawagmo.

⁹ Tapno mapadayawantayo ni Jehova, nasken met a padayawantayo ti sangalubongan a kongregasion Kristiano agraman dagiti pannakabagi dayta. No ipangpangagtayo ti Nainkasuratan a balakad ti klase matalek ken masirib nga adipen, ipakpakitatayo a raraementayo ti urnos ni Jehova. Iti kongregasion Kristiano idi umuna a siglo, nakita ni Juan a nasken a babalawenna dagidiay di mangraraem kadagiti nadutokan a manangaywan. (Basaen ti 3 Juan 9-11.) Ipakita ti imbaga ni Juan nga adda dagidiay saan a mangraraem kadagiti indibidual a manangaywan ken uray kadagiti pannursuro ken panangiwanwanda. Makaparagsak ta saan a kasta ti kaaduan a Kristiano. Bayat a sibibiag idi dagiti apostol, ti kaaduan a kakabsat ket nabatad a mangipakpakita iti nauneg a panagraem kadagiti mangidadaulo kadakuada.​—Fil. 2:12.

10, 11. Ilawlawagmo manipud kadagiti Kasuratan no apay a maiparbeng a ti dadduma ket maipaayan iti autoridad iti kongregasion Kristiano.

¹⁰ Irasrason ti dadduma a yantangay imbaga ni Jesus kadagiti adalanna nga “agkakabsatkayo amin,” rumbeng nga awan dagiti maipaayan iti autoridad iti kongregasion Kristiano. (Mat. 23:8) Ngem ti Hebreo ken Griego a Kasuratan ket agpadpada a nangilanad iti nagadu a pagarigan maipapan kadagiti lallaki nga impaayan ti Dios iti autoridad. Ti pakasaritaan dagiti patriarka, uk-ukom, ken ar-ari kadagiti nagkauna a Hebreo ket mangipaay iti adu a pammaneknek a mangmangted ni Jehova kadagiti pammilin babaen kadagiti tattao a pannakabagina. Idi a dagiti tattao ket saanda a nangipakita iti maiparbeng a panangpadayaw kadagiti nadutokan nga indibidual, dinusa ida ni Jehova.​—2 Ar. 1:2-17; 2:19, 23, 24.

¹¹ Iti umasping a wagas, binigbig dagiti Kristiano idi umuna a siglo ti autoridad dagiti apostol. (Ara. 2:42) Kas pagarigan, nangted ni Pablo iti pammilin kadagiti kapammatianna. (1 Cor. 16:1; 1 Tes. 4:2) Nupay kasta, situtulok met a nagpasakup kadagidiay addaan iti autoridad kenkuana. (Ara. 15:22; Gal. 2:9, 10) Talaga nga addaan ni Pablo iti umiso a panangmatmat iti autoridad iti kongregasion Kristiano.

12. Kadagiti pagarigan a nadakamat iti Biblia, ania ti masursurotayo a nagkadua a leksion maipapan iti autoridad?

¹² Adda masursurotayo a nagkadua a leksion. Umuna, Nainkasuratan para iti “matalek ken masirib nga adipen” babaen iti Bagi a Manarawidwid ti panangdutokna kadagiti lallaki a maaddaan iti akem, ken adda dadduma a lallaki a nadutokan a maaddaan iti autoridad iti dadduma pay a nadutokan a lallaki. (Mat. 24:45-47; 1 Ped. 5:1-3) Maikadua, amintayo, agraman dagiti nadutokan a kakabsat a lallaki, ket rumbeng a padayawantayo dagidiay addaan iti autoridad kadatayo. Ania ngay ti dadduma a praktikal a pamay-an a maipakitatayo ti panangpadayaw kadagidiay nadutokan a mangaywan iti sangalubongan a kongregasion Kristiano?

Panagraem Kadagiti Agdaldaliasat a Manangaywan

13. Kasano a maipakitatayo ti panagraem kadagiti pannakabagi ti kongregasion Kristiano iti kaaldawantayo?

¹³ Kinuna ni Pablo: “Kiddawenmi kadakayo, kakabsat, a maaddaankayo iti panagraem kadagidiay agtartrabaho a sipipinget iti tengngayo ken mangidadaulo kadakayo iti Apo ken mangbagbaga kadakayo; ket ipaayanyo ida iti ad-adda pay a nalablabes a konsiderasion iti ayat gapu iti aramidda. Makikappiakayo iti maysa ken maysa.” (1 Tes. 5:12, 13) Dagiti agdaldaliasat a manangaywan ket sigurado a karaman “kadagidiay agtartrabaho a sipipinget.” No kasta, ipaayantayo koma ida iti “ad-adda pay a nalablabes a konsiderasion.” Ti maysa a pamay-an tapno maaramidtayo dayta ket babaen ti naimpusuan a panangipangag iti ibalbalakad ken iparparegtada. No adda pammilin ti klase matalek ken masirib nga adipen nga ipakaammo kadatayo ti kasta nga agdaldaliasat a manangaywan, ti “sirib manipud ngato” ti mangtignay kadatayo a “sisasagana nga agtulnog.”​—Sant. 3:17.

14. Kasano a maipakita ti kongregasion ti naimpusuan a panagraemda kadagiti agdaldaliasat a manangaywan, ket ania ti ibunga dayta?

¹⁴ Ngem kasano ngay no adda dagiti maipaaramid kadatayo a naiduma iti nakairuamantayo? No dadduma, ti panangipakita iti panagraem ket mabalin a kalikagumanna a sumurottayo iti panangiwanwanda imbes nga ibagatayo, “Saan a kasta ti panangaramidmi kadagiti bambanag ditoy” wenno, “Mabalin nga agkurri dayta iti dadduma a lugar ngem saan nga agkurri dayta iti kongregasionmi.” Imbes ketdi, ikagumaantayo ti agtulnog. Matulongantayo a mangaramid iti dayta no sipapanunottayo a ni Jehova ti makinkukua iti kongregasion ken ni Jesus ti Ulo dayta. No siraragsak nga awaten ken suroten ti kongregasion ti panangiwanwan ti agdaldaliasat a manangaywan, ipakpakitada ti naimpusuan a panagraemda. Kinomendaran ni apostol Pablo dagiti kakabsat idiay Corinto gapu iti siraraem a panagtulnogda iti panangiwanwan ti panglakayen a ni Tito a bimmisita kadakuada. (2 Cor. 7:13-16) Ita, masiertotayo met a no situtulok nga iyaplikartayo ti panangiwanwan dagiti agdaldaliasat a manangaywan, ad-adda a masagraptayo ti rag-o iti trabahotayo a panangasaba.​—Basaen ti 2 Corinto 13:11.

“Padayawanyo Dagiti Amin a Kita ti Tattao”

15. Ania ti dadduma a pamay-an a maipakitatayo ti panagraem kadagiti kapammatiantayo?

¹⁵ Insurat ni Pablo: “Dika palaluan a dillawen ti maysa a lakay. Iti kasupadina, makipakaasika kenkuana a kas ama, kadagiti ub-ubing a lallaki a kas kakabsat a lallaki, kadagiti babbaket a kas inna, kadagiti ub-ubing a babbai a kas kakabsat a babbai buyogen ti isuamin a kinadalus. Padayawam dagiti balo a babbai a pudpudno a balo.” (1 Tim. 5:1-3) Wen, idagdagadag kadatayo ti Sao ti Dios a padayawantayo ti amin iti kongregasion Kristiano. Ngem kasano ngay no adda personal a diyo nagkinnaawatan iti maysa a kakongregasionmo? Dayta kadin ti panggapuam a mangisardeng iti obligasionmo a mangraem iti dayta a kapammatiam? Wenno mabalinmo kadi a baliwan ti panangmatmatmo babaen ti panangikabilangam kadagiti Nakristianuan a galad dayta a padam nga adipen ti Dios? Rumbeng a dagidiay naipaayan iti autoridad ti nangnangruna a mangtaginayon iti panagraemda kadagiti kapammatianda​—a dida koma pulos ‘iturayan ti arban.’ (1 Ped. 5:3) Kinapudnona, nagadu ti gundawaytayo nga agpipinnadayaw iti kongregasion Kristiano, a ti pakabigbiganna ket ti naimpusuan a panagiinnayat dagiti kamengna.​—Basaen ti Juan 13:34, 35.

16, 17. (a) Apay a napateg nga agpadpada a raementayo dagidiay kaskasabaantayo ken dagiti bumusbusor? (b) Kasanotay a ‘padayawan dagiti amin a kita ti tattao’?

¹⁶ Siempre, saan laeng a dagidiay kapammatiantayo ti masapul a raementayo. Insurat ni Pablo kadagiti Kristiano idi kaaldawanna: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin.” (Gal. 6:10) Siempre, narigat nga iyaplikar dayta a prinsipio no saan a nasayaat ti panangtrato kadatayo ti maysa a katrabahuan wenno kaeskuelaantayo. Kadagita a kanito, nasken a laglagipentayo dagitoy a sasao: “Dika agpudpudot gapu kadagiti managaramid iti dakes.” (Sal. 37:1) Ti panangyaplikartayo iti dayta a balakad ti tumulong kadatayo nga agtignay a siraraem uray kadagiti bumusbusor. Umasping iti dayta, bayat a mangaskasabatayo, ti napakumbaba a panangmatmattayo iti bagitayo ti makatulong kadatayo a sumungbat kadagiti amin buyogen ti “naalumamay a kababalin ken nauneg a panagraem.” (1 Ped. 3:15) Uray ti panaglanglanga ken panagkawkawestayo ket mabalin a mangipasimudaag a raraementayo dagiti kaskasabaantayo.

¹⁷ Gapuna, dagiti man kapammatiantayo wenno dagiti ditay kapammatian ti kalanglangentayo, situtulok nga ikagumaantayo nga iyaplikar daytoy a balakad: “Padayawanyo dagiti amin a kita ti tattao, maaddaankayo iti ayat iti intero a timpuyog dagiti kakabsat, agbutengkayo iti Dios, padayawanyo ti ari.”​—1 Ped. 2:17.

Ania ti Sungbatmo?

Kasano a maipakitam ti umiso a panagraem:

• Ken Jehova?

• Kadagiti panglakayen iti kongregasion ken kadagiti agdaldaliasat a manangaywan?

• Iti tunggal kameng ti kongregasion?

• Kadagiti kaskasabaam?

[Ladawan iti panid 23]

Raraemen dagiti Kristiano idi umuna a siglo ti panangiwanwan ti bagi a manarawidwid

[Ladawan iti panid 24]

Dagiti panglakayen iti amin a pagilian padpadayawanda dagiti agdaldaliasat a manangaywan a dinutokan ti Bagi a Manarawidwid