Panangtaginayon ti Nakristianuan a Panagkaykaysa iti Relasion ti Negosio

“Kitaenyo! Nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!”​—SALMO 133:1.

1. Apay a makaay-ayo unay ti Nakristianuan a panagkaykaysa?

PUDNO a ‘nagimbagen ken makaay-ayo ti panagtitimpuyog dagiti agkakabsat a Kristiano iti panagkaykaysa,’ nangnangruna itan nga aglaplapusanan unay ti kinaawan panagkaykaysa ti lubong. Idiay ayan ti pudno a panagkaykaysa, daytat’ agbalin a maysa a banag a napintas, a mangibunga iti nasingsinged a singgalut ti nainkabsatan a panagayan-ayat kadagiti tattao, a mamagbalin iti dayta a maysa a ragsak iti pannakikadua kadakuada. Ti kinaawan ti panagkaykaysa, iti kasumbangirna, ti naglaad ken mangibunga iti sakit ti nakem, gura, ken panagsisina kadagiti agkakadua.

2. Kasano a ti sangsangkamaysa a panangmatmattayo kadagiti prinsipio ti Biblia pasayaatenna ti panagkaykaysa dagiti agkakabsat uray iti bambanag maipapan iti negosio?

² No makipagnegosio dagiti Kristiano kadagiti dadduma nga ad-adipen ni Jehova, ti agmaymaysa a panangmatmatda kadagiti prinsipio ti Biblia ti rebbeng a mangpasayaat iti nainkabsatan a panagkaykaysada. Maysa a manangaywan iti kongregasion dagiti Saksi ni Jehova kastoy ti panangibagana: “Bayat a ti lubong agbalbalin a di mapagtalkan, makapabang-ar ti makipagtrabaho kadagiti pada a Kristiano nga addaan prinsipio. Di pay kasapulan ti ‘agbantay’ a kankanayon. Dagiti nadalus, nasingpet a kanegosio ti natakkonen iti daytoy a sistema. Anian a makaay-ayo ti makipagtrabaho a kadua dagiti nasingpet-panagpuspusona a tattao a di agsigsigarilio wenno agus-usar iti narugit a sasao, tattao nga addaan panagteppel, a ti kangrunaan a motiboda ket saan a ti material a kinaagum!”

3. (a) Ania ti sumagmamano kadagiti susio ti negosio a pakairamanantayo kadagiti kapammatian? (b) Ania dagiti prinsipio a rebbeng a mangiwanwan iti pannakilangentayo iti negosio?

³ Ania ti sumagmamano kadagiti relasion ti negosio a pakairamanan dagiti agkakapammatian? Ti maysa ket daydiay dua wenno ad-adu pay a Kristiano nga ikeddengda ti sumrek ti maysa a negosio kas agkakasusio. Ti sabali pay ket daydiay ti maysa isu ti mangiyempleo ket daydiay maysa isu ti empleado. Kaskasdi ti sabali pay a kasasaad a ta idiay ti maysa a Kristiano mangitukon ti maysa a produkto wenno serbisio iti sabali a kapammatian. Kadagiti kakasta a negosio, dagiti prinsipio ti panagbalin a napudno ken ti kinatarnaw a nailanad iti naipaltiing a Sao ni Jehova ti masapul a mangiwanwan kadagiti tigtignayda. Iti daytoy a pamay-an ti nainkabsatan a panagkaykaysa ken ti rag-o iti panagtrabaho a sangsangkamaysa ti mapatibkeran.​—1 Corinto 10:31.

4. Ania dagiti adda a peggad kadagiti Kristiano iti negosio?

⁴ Nupay kasta, adda ti peggad a mabalin a dagiti dadduma mapaayda a mangsalimetmet iti naitan-ok a panangmatmat ti Kristiano. Mabalin a rugianda ti agpanunot unay maipapan kadagiti kabukbukodanda nga interes. (Filipos 2:4) Mabalin a ti kuarta agbalinto a napatpateg kadakuada ngem ti Nakristianuan a panagkaykaysa. Ngem ti kinaagum iti negosio ti mabalin a mangdadael iti relasion ti panagkakabsat ken ti pannakirelasion ti maysa ken Jehova. Nikaanoman ditay kayat a mapasamak dayta!​—Juan 13:34, 35; Hebreo 13:5; 1 Timoteo 3:2, 3; 1 Juan 3:16; 4:20, 21.

Ti Pateg ti Pormal a Tulagan

5. Kasano a ti kapadasan ni Abraham a pananggatang iti daga idemonstrana ti pateg ti pormal a tulagan?

⁵ Tapno makatulong a malapdan ti di pagkikinnaawatan iti negosio, usigenyo ti pananggatang ni Abraham ti maysa a kelleng ti daga. ‘Ket tinimbengna ken Ephron ti pirak nga imbagana iti tallaong dagiti annak ni Heth, uppat a gasut a siklo ti pirak kas apagna kadagiti agtagtagilako. Iti kasta ti talon ti Ephron nga adda idiay Macpela . . . napatalgedanda ken Abraham tapno tagikuaenna iti sango dagiti annak ni Heth iti imatang dagiti amin a simrek iti ruangan ti ilina.’ Daytoy ket saan a pribado a tulagan dagiti natakneng a lallaki. Daytat’ maysa a pormal a tulagan, a napatalgedan iti imatang dagiti saksi. Awan ti di pagkinnaawatan maipapan iti ginatangda ken iti apagpag-isu a gatadna.​—Genesis 23:2-4, 14-18.

6. Kasano a mapagbalin a pormal dagiti Kristiano dagiti importante a transaksion iti negosio?

⁶ Umas-asping met, nainsiriban para kadagiti Kristiano a pagbalinen a pormal dagiti napapateg a transaksion. No ti transaksion ramanenna ti panangilako ti maysa a banag, mabalin nga isurat dagiti partido no ania ti nailako, ti presio, ti metodo ti panagbayad, kaano, ken no kasano ti maaramid a pannakaiyawat, ken dagiti dadduma a kondision a napagnunumuan. No ramanen dayta ti maysa a serbisio a maaramidan, isurat dagiti partido no ania ti trabaho a maaramidan, kaano ti pannakaleppasna, ti bayad, ken dagiti dadduma pay a bambanag. Daytoy a dukomento ti rebbeng a mapetsaan ken mapirmaan, ket maysa a kopia ti idulin ti tunggal partido. Dagiti kakasta a naisurat a tulagan ti nangnangruna a nasken iti panagsusio iti negosio. Daytat’ makatulong iti agsumbangir a maawatan ti relasionda a silalawag ken makatulong kadakuada nga agbiag a maitunos iti balakad ni Jesus: “Ti saoyo a Wen kaipapananna koma ti Wen, ti Saan, Saan.” (Mateo 5:37) Kadagiti ad-adda a komplikado a bambanag, mabalin a maibalakad a sapulen ti propesional a tulong iti panangbukel ti maysa a naisurat a tulagan.

7. (a) Ania pay ti masapul nga usigen maipapan kadagiti naisurat a tulagan? (b) Iti ania nga espiritu ti rebbeng a pagtuloyan dagiti Kristiano kadagiti bambanag iti negosio?

⁷ Iti panangbukel kadagiti naisurat a tulagan, rebbeng a panunoten dagiti partido saan laeng a dagiti kalat no di ket kasta met dagiti posible a pagtungpalanna, kas daydiay no kasano ti panangiserra iti dayta nga urnos en kaso kasapulan dayta. (Proverbio 21:5) Amin a negosio a serkan ti addaan elemento ti risgo, ket awan dukomento a makairaman iti tunggal kasasaad a mabalin a rumsua. No agbalbaliw dagiti adda a kasasaad, ti tulagan ti masapul a manayonan wenno mabalbaliwan. Inton agangay mabalin nga agbalinto a nalawag a ti maysa a tao nga isut’ simrek iti maysa a negosio a di nainsiriban ket masapul nga iruarna ti bagina iti nadayaw a pamay-an. Nupay kasta, saan koma nga aramiden daytoy kas maysa a pamay-an a paglisian laeng iti responsabilidad kadagiti ut-utang gapu iti personal a kinagastos wenno di umiso a panangipapagna. Dayta a banag ti masapul a mapagsasaritaan tapno makita no ti tulagan ti mabalin a waswasen ken no ania dagiti pinansial a bayadan, no adda man. Siempre, ti napasnek a tao aramidenna ti amin a nainkalintegan a kabaelanna a tungpalen dagiti aniaman nga obligasion iti kontrata, nupay kaipapananna a masapul a balbaliwanna ti estilo ti panagbiagna iti naikeddeng a tiempo. (2 Tesalonica 3:12) No kayat ti maysa a Kristiano ti agbiag nga awan basbasolna ken magna a sililinteg, tungpalenna koma dagiti obligasionna iti maysa a tulagan uray pay no dayta ket saan nga agpaay iti kasayaatan a paginteresanna, ngem tapno masalimetmetanna ti anamong ni Jehova. “Sapataanna ti pannakaranggasna met laeng, ket di agbaliw.” (Salmo 15:1-4) Kadagita amin nga ar-aramid, bay-an dagiti ad-adipen ni Jehova a ‘maaramid koma dagiti isuamin nga aramidda a buyogen ti ayat.’​—1 Corinto 16:14.

8. Apay a naimbag a kuentaen nga umuna ti nginana sakbay a sumrek iti panagsusio iti negosio?

⁸ Gapu iti daytoy, sakbay a sumrek iti relasion ti negosio, nasayaat no kuentaen pay ti nginana. (Lucas 14:28-30) Mabalin a dagiti dadduma aglayagda iti taaw ti komersio a napnuan namnama ngem lumneddanto kadagiti nakalemmeng a batbatona. Kas pangarigan, mabalin a pagarupen dagiti dadduma a ti tubo a naganar ti amoda ti kukuadakan koma no addaanda ti umas-asping met a negosio a kabukbukodanda. Ngem dida naawatan a ti panangipapagna ti negosio ket saan unay a nalaka iti daytoy a lubong nga ayan ti nairut a kompetision. Kada tawen pinulpullo a ribo dagiti negosio a mapapaay iti intero a lubong. Gapuna, kalpasan ti pannakariknada kadagiti napait a pannakapaay iti lubong ti komersio, adu kadagiti Kristiano ti nabang-aran pay a nagbalin manen nga empleado nga addaan ti agtultuloy a sueldo.

Panangdayaw iti Relasion ti Negosio

9. Ania dagiti sumagmamano a pamay-an a pakaipakitaan dagiti Kristiano ti dayaw iti maysa ken maysa iti panggedan?

⁹ “No maipapan iti panagpipinnadayaw dakayo ti mangidaulo,” kuna ti Roma 10:12. Dagiti Kristiano nga empleado a mangar-aramid iti daytoy didanto padpadasen a gundawayan ti amoda agsipud ta isut’ padada a Saksi, a tultuladen ti nailubongan a kababalin a yantangay ti amoda ket kabaelanna dayta, rebbengna a pabus-ayan dagiti pagkurkurangan dagiti empleadona. Imbes ketdi, mangipakitadanto iti dayaw iti amoda babaen iti kababalin ken nagaget a panagtrabahoda. (1 Timoteo 6:2) Kasta met, dagiti Kristiano nga amo ipakitada ti dayaw kadagiti padada a Saksi nga empleado babaen ti pannakisasao ken pannakilanglangenda kadakuada. Ti amo dina koma pagpagarupen nga isu ti nangatngato ngem kadagiti kapammatianna nga agtartrabaho kenkuana no di ket laglagipenna nga isuda amin ket ad-adipen ida ni Jehova, nga agpapadada iti imatangna. (Efeso 6:9) Kasta met, agpadpada dagiti amo ken empleado a silalagipda koma iti daytoy a balakad iti Galacia 6:10: “Aramidentayo ti naimbag kadagiti amin a tattao, ket nangnangruna kadagiti kabbalay iti pammati.”

10. Kasano a ti kinapakumbaba makatulong iti pammadayaw iti maysa ken maysa?

¹⁰ Ti dayaw ket saan a narigat nga ipakita no ti kinapakumbaba ket aglaplapusanan. Kas maysa a pangarigan, ti napakumbaba a panglakayen iti maysa a kongregasion Kristiano dinanto makita a narigat nga ipasakop ti bagina iti negosio iti panangiturong ti padana a Kristiano nga awanan kadagiti isu met laeng a pribilehio iti kongregasion. Kasta met, ti napakumbaba nga amo dinanto makita a narigat nga ipakumbaba ti bagina iti empleadona, a maysa a panglakayen, kadagiti ar-aramid ti kongregasion. Ti kinapakumbaba ti mangsalimetmet met kadakuada a dua iti panagbalinda nga aglablabes a manangbabalaw wenno manginanama iti kinaperpekto ti sabali, yantangay “isuda amin nagbasolda ket agkurangda iti dayag ti Dios.”​—Roma 3:23; 12:3.

11. Kasano a maipakita dagiti Kristiano ti kinanainkalintegan iti negosio?

¹¹ Ti Biblia ibilinna pay met: “Maammuan koma dagiti isuamin a tattao ti kinanainkalinteganyo.” (Filipos 4:5) Saan a nainkalintegan para iti maysa a Kristiano a mangnamnama kadagiti naisangsangayan a pabor wenno kasasayaatan a trabaho wenno kanayon ti kababaan a presio agsipud ta isu ti makilanglangen iti kapammatianna. Wenno saan met koma a namnamaen ti maysa a Kristiano, kas maysa a kalintegan, ti saanna a panagtrabaho wenno kadagiti dadduma a pribilehio, kas ti panagusar kadagiti makina wenno luglugan, gapu ta ti amona ket kapammatianna. Dagiti pabor, dagiti nasasayaat a trabaho, nababa a presio, wenno ti bakasion mabalin nga umayda ngem saan koma a rebbeng a maipapilit. Dagiti di nainkalintegan a pananginanama ti mabalin a mangpataud kadagiti sakit ti nakem iti nagbabaetan dagiti Kristiano, isu a mangdadael ti relasionda.​—Proverbio 18:19.

12. No maipapan iti panangikasaba iti Pagarian ania a panagannad ti masapul a watwaten idiay pagtrabahuan?

¹² Numan pay kayat dagiti Kristiano nga ipakaammo ti naimbag a damag ti Pagarian ti Dios kadagiti di mamati, idiay pagtrabahuanda rebbeng nga agannadda koma a ti kasta a panangikaskasaba iti Pagarian ket maaramid kadagiti maiyanatop a tiempo. (Eclesiastes 3:1, 7) No daytat’ maaramidan bayat iti oras ti panagtrabaho, rebbeng a daytat’ addaan anamong ti amo. Ta no saan mabalin a dayta ti sakiten ti nakem ti amo, ket daytoy mangiyeg iti pakababalawan ni Jehova ken ti ilina. (1 Timoteo 6:1) Addada pay dadduma a tiempo, kas kabayatan ti oras ti pangngaldaw wenno kadagiti break iti aldaw ti panagtrabaho, a maaramidan ti kasta a panangaskasaba. Kasta met, idiay addada dagiti sumagmamano a Saksi nga agtartrabaho, saanda koma a tarigagayan ti mangbusbos ti oras nga agsasaoda iti maysa ken maysa maipapan kadagiti nateokratikuan a bambanag idinto a rebbeng nga agtartrabahoda koma.

Panagannad kadagiti Motibo iti Negosio

13. Kasano ti panangmatmat ni Pablo ken dagiti manangsangailina idiay Corinto ti sekular a panggedanda?

¹³ Idi adda idiay Corinto, simrek ni apostol Pablo iti pannakisusio iti negosio kadagiti manangsangailina a Kristiano, da Aquila ken Priscilla. (Aramid 18:1-3) Nanggedda tapno maipaayanda dagiti kasapulanda iti panagbiag, ngem dayta ti segundario iti kangrunaan a panggepda​—ti panangisaknap ti panagdayaw ken ni Jehova. Pudno a saanda a maakusar a “pagarupenda a ti nadiosan a debosion maysa a [material] a pagsapulan.” (1 Timoteo 6:5) Amin dagitoy a tallo ti sibabaknang a binendisionan ni Jehova ken sidadayaw a nadakamatda iti Biblia.​—Roma 16:3-5.

14. (a) Apay naimbag a sukimaten dagiti motibo sakbay a sumrek iti negosio? (b) Kasano a sinolbar dagiti tallo a Saksi ti parikutda?

¹⁴ Babaen ti naannad a panangsukimat kadagiti motibo sakbay iti iseserrek iti negossio, mabalin a maliklikan ti Kristiano dagiti adu a pakarigatan. Kas pangarigan, mabalin a tarigagayan ti Kristiano ti ad-adu a tiempo a panangisaknap kadagiti intereses ti Pagarian, bayat a ti kasusiona ti mabalin a kayatna a parang-ayen ti estilo ti panagbiagna. Mabalin a ti maysa tarigagayanna a pagpuonan manen dagiti ganansiana tapno maparang-ay ti negosio, ngem daydiay maysa ti sisasagana nga agbayad kadagiti nangatngato a buis ket saanen a pagpuonan dagiti ganansiana tapno maliklikan ti ad-adu a pannakairaman. Iti maysa a pagilian tallo kadagiti Saksi ni Jehova nga agkakabagian met iti lasag ti nagsususio iti maysa a negosio. Ngem idi agangay nagduduman ti panangmatmatda no kasano kawadwad ti pannakairaman ti tunggal maysa kadakuada iti negosio. Ti solusionda ket isu ti sangsangkamaysa a pangngeddeng nga agsisinadan iti interes ti negosio ket pagbibingayanda dagiti klienteda. Iti daytoy a pamay-an naispalda agpadpada dagiti relasionda a naespirituan ken ti pamiliada. Impangagda ti balakad ti Biblia a “surotentayo dagiti bambanag nga agpataud ti talna ken dagiti bambanag a makapalaing iti maysa ken maysa.”​—Roma 14:19.

15. Apay a masapul a nangnangruna nga annadantay dagiti motibotayo maipapan iti kuarta?

¹⁵ Kasapulan met ti naisangsangayan a panagannad iti panangwatwat ti panagsalukag kadagiti motibo ti maysa maipapan iti kuarta. “Ti matalek a tao,” impasiguro ti Biblia kadatayo, “aglaplapusananto kadagiti bendision, ngem ti sigaganat a bumaknang saanto a di madusa.” (Proverbio 28:20) No “sigaganat a bumaknang,” ti maysa a Kristiano agbalin a bulsek iti banag nga ad-adda pay a nasudsudi​—ti Nakristianuan a pannakikabsatna. Mabalin a makapataud daytoy ti gulo iti kongregasion, ta mabalin a dagiti dadduma sakiten ti nakemda ti panangipangpangruna ti kuarta ngem kadagiti intereses ti Pagarian. Gapuna mamakdaar ti Biblia: “Ngem dagiti agpanggep a bumaknang matnagda iti maysa a pannakasulisog ken ti maysa a silo ken kadagiti adu nga agum a minamaag ken makaranggas, a mangipalned kadagiti tao iti pannakarba ken pannakapukaw. Ta ti ayat ti kuarta isu ti maysa a ramut ti isuamin a kita ti dakes, isu nga idi inaguman dagiti dadduma naiyaw-awanda iti pammati ket nasalputda kadagiti adu a ladladingit.”​—1 Timoteo 6:9, 10.

16. Kasano ti rebbeng a pannakaipapagna amin dagiti bambanag iti negosio?

¹⁶ Maysa a pamay-an a mabalin a “ti ayat ti kuarta” iyaw-awanna ti maysa a Kristiano ket babaen ti panangsulisogna kenkuana nga agusar kadagiti ar-aramid ti negosio a di maikanatad iti naimbag a kababalin wenno nalawag a panagsuitik. No dagiti pada a Kristiano nairamanda iti kasta a tao, mabalin a mangibunga iti gulo. Ket dagita nga ar-aramid ti mamagpeggad iti pannakirelasion ti maysa ken ni Jehova. Tapno nalamuyot ti panagandar ti relasion iti negosio, nasken a laglagipen a ti panagkusit iti negosio “ket makarimonda ken ni Jehova.” (Proverbio 11:1; 20:23) Imbes ketdi, tarigagayan dagiti Kristiano a maikunada koma, kas panagkuna ni apostol Pablo: “Ta mapnekkami unay nga adda nasayaat a konsiensiami, a tarigagayanmi ti agbiag a sitatakneng kadagiti isuamin a bambanag.”​—Hebreo 13:18.

Ti Panangsolbar kadagiti Parparikut iti Negosio

17. Kasano a masolbar dagiti dadduma a minor a parikut iti negosio?

¹⁷ Iti aniaman a susio ti negosio iti nagbabaetan dagiti kakabsat, mabalin a rumsua dagiti parikut. Dadduma kadagiti babassit a parikut ti mabalin a masolbar babaen ti panangiyaplikar ti prinsipio idiay 1 Pedro 4:8 a kunana: “Ket nangnangruna ngem amin adda koma kadakayo met laeng ti nasged nga ayat, ta ti ayat abbonganna dagiti adu unay a basbasol.” No dagiti parikut saanda a masolbar iti dayta a pamay-an, saanda koma a mapalubosan a dumakkel ken kumaro. Mabalin a daytoy ti mangibunga iti pannakapukaw iti panagraem ti maysa ken maysa ken panagsisinasina. Masansan a ti solusion ket adda iti naasi, prangka a komunikasion sakbay a dumakes dagiti adda a kasasaad. Ibalakad kadatayo ti Sao ti Dios nga ibanag dagiti di pagkikinnaawatan a sidadaras.​—Mateo 5:23-25; Efeso 4:26, 27.

18. Aniat’ maaramidan ti maysa a Kristiano no patienna nga isu ti kuskusiten ti padana a Kristiano iti negosio?

¹⁸ Nupay kasta, no patien ti maysa a Kristiano nga isu ti sisiserioso a nagbiddutan ti kapammatianna iti negosio, dagiti addang a naibalabala idiay Mateo 18:15-17 ti rebbeng a masurot a siaannad. Ti umuna wenno maikadua nga addang ti rebbeng a mangsolbaren koma kadagiti bambanag. No saan a masolbar, ti maikatlo nga addang isut’ banag a tamingen dagiti nadutokan a panglakayen. No mapasamak daytoy, sibibileg koma a paayen dagiti panglakayen dagiti kakabsat a nairaman iti panagdidinnarumda iti pangukoman ti tao. Ti panangidemanda iti kapammatian kaipapananna, kas kuna ni Pablo, “maysa a basol kadakayo.” Innayonna pay: “Apay pay dikay koma itured ti pannakaranggas? Apay dikay koma anusan ti mapukawan ti kalintegan?” (1 Corinto 6:1-8) Nasaysayaat laengen ti agsagaba ti pannakalugi ngem ti panangiyeg ti pakababalawan ti nagan ni Jehova agraman ti kongregasion ken dadaelen ti panagkaykaysa babaen ti panangidarum ti kapammatian iti maysa a pangukoman. Siempre, uray no saan a maaramid ti aniaman a panagidarum iti korte, ti maysa a langa ti panagtignay ti kongregasion ti kasapulan no adda nairaman a panagsuitik.

19. Ania dagiti nagsayaatan pangarigan ti Biblia a maitudo dagiti panglakayen no mangbalbalakadda maipapan kadagiti parikut ti negosio?

¹⁹ No mangbalbalakad kadagidiay addaan pakarigatan iti negosio, mabalin nga itudo dagiti panglakayen ti awan-agumna a pangarigan nga impakita ni Abraham idi a ti pannakirelasionna ken ni Lot ket agpegpeggad. Ni Abraham, uray pay isu ti laklakay, ti siaasi a nangited ken ni Lot ti kasasayaatan iti daga imbes nga irisgo ti pannakadadael ti relasionda. (Genesis 13:5-11) Mabalin met nga itudo dagiti panglakayen ti nasayaat a pangarigan ni Zaqueo. Isut’ situtulok a mangited iti kagudua kadagiti sanikuana kadagiti napanglaw ken ti sabali pay a kagudua tapno isubli iti mamimpat a daras dagiti kinusitna kadagiti tattao gapu iti ulbod a pammabasolna.​—Lucas 19:1-10; kitaenyo met ti 1 Corinto 10:24.

20, 21. Aniat’ masapul a salimetmetan iti isiptayo maipapan kadagiti sekular nga ar-aramid?

²⁰ Anian a nagsayaat no dagiti Kristiano ket siepektibo a tamingenda dagiti parparikutda iti negosio babaen ti siaannad a panangsurot ti balakad ti Biblia! Iti daytoy a pamay-an agtalinaed ti panagkaykaysada uray pay no di nagballigi ti negosioda. Daytanto ti naragsak nga ibungana no salsalimetmetantayo a kangrunaan iti isiptayo a, para kadagiti Kristiano, ti sekular a trabaho ket maikadua laeng kadagiti intereses ti Pagarian ken iti panagkaykaysa dagiti agkakabsat. Nagsayaat pay met no dagiti intereses ti negosio ket maiyurnosda tapno maipalubos ti ad-adu a tiempo nga agpaay kadagiti napatpateg a bambanag a mainaig kadagiti ar-aramid ti Pagarian.​—Mateo 6:33; idiligyo iti Filipos 1:9, 10.

²¹ Gapuna, ti talaga a napatpateg iti biagtayo ket isu ti pannakirelasiontayo ken ni Jehova ken kadagiti Nakristianuan a panagkakabsattayo. (Mateo 22:36-39) Ditay koma pulos tarigagayan a daytoy ti madadael babaen kadagiti nailubongan nga impluensia wenno bambanag iti negosio, ta awan aniaman a naan-anay a pakaidiligan ti pannakirelasiontayo ken ni Jehova wenno makaartap iti kinapintas ti sangsangkamaysa a panagkakabsattayo!

Dagiti Saludsod a Pagrepaso

◻ Kasano a ti panagtulnog iti Sao ti Dios pasayaatenna ti relasion iti negosio?

◻ Apay a nainsiriban a pagbalinen a pormal dagiti importante a transaksion?

◻ Kasano a makaipakita dagiti Kristiano ti dayaw iti maysa ken maysa idiay pagtrabahuan?

◻ Apay rebbeng a sukimatentay dagiti motibotayo iti negosio?

◻ Ania a kababalin ti rebbeng a maipakita iti panangsolbar kadagiti parikut iti negosio?

[Ladawan iti panid 16]

Pinatalgedan ni Abraham ti pananggatang ti daga babaen ti pormal a tulagan ken Ephron

[Ladawan iti panid 18]

Ti panagtrabaho tapno maipaay dagiti kasapulan ti panagbiag ti segundario ti pategna kada Pablo, Aquila, ken Priscilla