LEKSION 02

Mangted ti Biblia iti Namnama

Nayimprenta nga Edision

Adu a tattao iti intero a lubong ti saan a naragsak, madandanagan, ken agrigrigat gapu kadagiti problema. Napadasam kadin dayta? Baka marigrigatanka gapu iti sakit wenno gapu ta natay ti maysa nga ay-ayatem iti biag. Mabalin a maisaludsodmo, ‘Sumayaatto pay kadi ti biagko?’ Adda makapagin-awa a sungbat ti Biblia iti dayta a saludsod.

1. Kasano a mangted ti Biblia iti namnama?

Saan la nga ilawlawag ti Biblia no apay a nakaad-adu ti problematayo. Ibagana pay a temporario laeng dagitoy a problema ken dandanin mapukaw. Dagiti kari ti Biblia maikkannaka iti “nasayaat a masakbayan ken namnama.” (Basaen ti Jeremias 29:11, 12.) Makatulong dagita a kari tapno kayatayo a sanguen dagiti problematayo ita, agbalintayo a positibo, ken agbalintayo a naragsak iti agnanayon.

2. Ania ti ikarkari ti Biblia a mapasamak iti masanguanan?

Ibagbaga ti Biblia nga iti masanguanan, “awanton ni patay. Awanto metten ti panagladingit wenno panagsangit wenno ut-ot.” (Basaen ti Apocalipsis 21:4.) Awanton dagiti problema a mangpadpadagsen iti biag ita—kas iti kinarigat ti biag, kinaawan hustisia, sakit, ken ipapatay. Ikarkari ti Biblia nga agbiagto a naragsak dagiti tattao iti Paraiso a daga iti agnanayon.

3. Kasanom a masigurado a matungpalto dagiti kari ti Biblia?

Adu a tattao ti mangnamnama iti nasayaat a bambanag, ngem saanda a sigurado no mapasamak dagita. Ngem naiduma dagiti kari ti Biblia. No ‘sukimatentayo a naimbag ti Kasuratan,’ ad-adda a mamatitayo iti ibagbagana. (Aramid 17:11) No adalem ti Biblia, sikanto a mismo ti makaibaga no agpayso ti ibagbagana maipapan iti masanguanan.

AMMUEM TI AD-ADU PAY

Ammuem ti dadduma a kari ti Biblia a mapasamak iti masanguanan. Kitaem no kasano a makatultulong kadagiti tattao ita ti namnama nga ibagbaga ti Biblia.

Collage: Dagiti ladawan a mangipakita iti kasasaad ita ken dagiti kasasaad nga ikarkari ti Biblia para iti masanguanan. Naulit dagiti eksena iti baba.

4. Ikarkari ti Biblia a mabalintayo ti agbiag nga agnanayon nga awan ti rigat

Kitaem ti dadduma a kari ti Biblia nga adda iti baba. Ania kadagita ti magustuam unay? Apay?

Basaen dagiti teksto kalpasan dagiti kari, sa pagsaritaan dagitoy a saludsod:

Para kenka, maikkannaka kadi iti namnama dagitoy a teksto? Maikkanna met kadi dagiti kapamiliam ken gagayyemmo iti namnama?

Imadyinem ti biagmo inton

AWANEN TI . . .	AMIN KET . . .
agsangit gapu iti pakarigatan, bumaket wenno lumakay, wenno matay.—Isaias 25:8.	makitada nga agbiagto manen ditoy daga dagiti natayen nga ay-ayatenda.—Juan 5:28, 29.
agsakit wenno adda depektona.—Isaias 33:24; 35:5, 6.	nasalun-at ken napigsa a kas idi agtutuboda.—Job 33:25.
makapadas iti kinaawan hustisia.—Isaias 32:16, 17.	addaan iti adu a makan, komportable a balay, ken makaparagsak a trabaho.—Salmo 72:16; Isaias 65:21, 22.
agrigat gapu iti gubat.—Salmo 46:9.	agbiag iti nakataltalna nga aglawlaw.—Salmo 37:11.
malagip a nasaem wenno nasakit a kapadasan, wenno negatibo a kapanunotan.—Isaias 65:17.	agbiag nga agnanayon iti nakasaysayaat a kasasaad.—Salmo 37:29.

Ti ubing a lalaki nga agsaksakit idi ket nasalun-aten ken ar-arakupen ni nanangna.

Immubingen ti maysa a lakay ken idurduronna ti karatilia a napno iti natnateng.

5. Mapasayaat dagiti kari ti Biblia ti biagmo

Adu ti dismayado wenno makapungtot gapu kadagiti problema iti aglawlawda. Padpadasen ti dadduma nga aramiden ti amin tapno mabalbaliwanda ti situasion. Kitaem no kasano a makatultulong kadagiti tattao ita ti kari ti Biblia a sumayaatto ti bambanag. I-play ti VIDEO, sa pagsaritaan dagiti sumaruno a saludsod.

VIDEO: Kayatko Idi a Labanan ti Kinaawan Hustisia (4:07)

Collage: Dagiti eksena iti video a ‘Kayatko Idi a Labanan ti Kinaawan Hustisia.’ 1. Ni Rafika nga agburburas iti kapas a kadua dagiti kapadana iti puli idi ubing pay. 2. Naragragsakan ni Rafika a makakita iti agduduma a puli a naragsak nga aglalangen idi immatender iti kombension dagiti Saksi ni Jehova iti umuna a gundaway.

Iti video, ania a kinaawan hustisia ti saan a maikkat iti panunot ni Rafika?
Uray no saan a napukaw dayta a kinaawan hustisia a nakitana, kasano a nakatulong kenkuana ti Biblia?

Dagiti kari ti Biblia para iti masanguanan matulongannatayo tapno malabanantayo ti pannakadismaya ken agbalintayo a naragsak uray adda problematayo. Basaen ti Proverbio 17:22 ken Roma 12:12, sa pagsaritaan dagitoy a saludsod:

Panagkunam, mapasayaat ngata dagiti kari ti Biblia ti biagmo ita? Apay?

KUNA TI DADDUMA: “Kasla imposible a pumayso dagiti kari ti Biblia.”

Apay nga importante a sika a mismo ti mangkita kadagiti ebidensia a talaga a matungpal dagiti kari ti Biblia?

SUMARIO

Ikarkari ti Biblia a maaddaantayto iti nakaragragsak a masakbayan. Dayta ti mangted kadatayo iti namnama ken mangtulong kadatayo a mangsango kadagiti pakarigatan.

Rebiu

Apay a kasapulan dagiti tattao ti namnama?
Ania ti ibagbaga ti Biblia a mapasamak iti masanguanan?
Kasano a matulongannaka ita ti namnama iti masanguanan?

Nalpas daytoy a leksion idi:

Padasem Daytoy

Basaem manen dagiti teksto nga adda iti daytoy a leksion tapno agbalinka a pamiliar kadagiti kari ti Biblia.

Dadduma pay:

Your other goal

AGDISKOBREKA PAY

Ammuem ti maaramidan kenka ti namnama.

“Namnama—Pakasarakam iti Dayta?” (Agriingkayo!, Abril 22, 2004)

Ammuem no kasano a makatulong ti namnama iti masanguanan kadagiti nakaro ti sakitna.

“Adda Nakaro a Sakitko—Matulongannak Kadi ti Biblia?” (Artikulo iti website)

No buyaem daytoy a music video, imadyinem ti bagim ken ti pamiliam a naragsak nga agbibiag iti Paraiso a kari ti Biblia.

Iladawam (3:37)

Basaem no kasano a nagbalbaliw ti biag ti maysa nga aktibista idi naammuanna ti kari ti Biblia para iti masanguanan.

“Saankon a Marikna a Masapul a Balbaliwak ti Lubong” (Ti Pagwanawanan, Hulio 1, 2013)