Agrag-oka iti Namnama
NAKARO ti sakit ni Joe a makapapatay a kanser. Iti sibay ti kamana, makisarsarita ti baketna a ni Kirsten iti sumagmamano a gagayyemda. Minatmatan ni Kirsten ni lakayna ket nadlawna nga agar-arubos dagiti luana. Idi damo, impagarup ni baketna a makarikna ni Joe iti ut-ot. Nalabit kasta, ngem iti daytoy a gundaway, imbagana ken baketna a saan a gapu iti ut-ot ti panagluana.
“Iti daydi nasaem a kanito,” kuna ni Kirsten, “nalikmut ni Joe kadagiti nasinged a gagayyem nga immay mangkadua kenkuana. Addaan met iti nagpateg a namnama ken naamirisna nga ad-addan nga agtalek a magun-odanna dayta ngem iti aniaman a panawen iti panagbiagna, ken ammona nga awan ti siasinoman a makaikkat iti dayta kenkuana. Kinapudnona, impudnona a makalua gapu iti rag-ona. Kamaudiananna, iti daydi a rabii, natay ni Joe.”
Ania ti namnama a nangpabileg ken Joe nga agibtur bayat ti ikakaro ti sakitna? Dayta ti kari ni Jehova a Dios a biag nga agnanayon buyogen ti perpekto a kinasalun-at iti paraiso a daga. (Salmo 37:10, 11, 29) Kastoy ti kuna ti Apocalipsis 21:3, 4: “Ti tolda ti Dios adda iti sangatauan . . . Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag [agraman ti adu a parikut iti kaaldawantayo] naglabasdan.”
Namnama Agpaay Kadagiti Natay
Para ken Joe, ti kaitungpalan daytoy a namnama kaipapananna ti panagungar manipud ken tanem. Kinapudnona, naliwliwa iti inkari ni Jesus nga “amin dagidiay adda kadagiti pakalaglagipan a tanem”—dagiti natay nga adda iti lagip ti Dios— agungardanto manipud iti pannaturogda ken patay. (Juan 5:28, 29) Maladingitanka kadi gapu ta natayanka iti maysa a miembro ti pamilia wenno iti maysa a gayyem? No kasta, ti namnama a panagungar ti mabalin met a mangliwliwa kenka. Mabalin a dayta a namnama dina pukawen ti panagladingittayo gapu iti ipapatay ti maysa nga ay-ayatentayo. Ni Jesus a mismo ‘nagarubos ti luana’ idi pimmusay ti gayyemna a ni Lazaro. Ngem ti namnamatayo talaga a liwliwaennatayo.—Juan 11:14, 34, 35; 1 Tesalonica 4:13.
“Idi pimmusay ni Joe gapu iti kanser,” kinuna ni Kirsten, “mariknak a talaga a saanakto manen a naragsak. Uray ita a naglabasen ti sumagmamano a tawen, mabigbigko a naiduman ti panagbiagko iti daytoy a sistema ti bambanag. Idi awanen ni Joe, kasla addan kurang iti biagko. Nupay kasta, sipupudno a makunak a natalna manen ti panunotko ken kontentoakon.”
Ti imbaga ni Kirsten ti mangipalagip kadatayo nga iti agdama a sistema ti bambanag, ditay namnamaen a kanayon a naragsaktayo iti tunggal kanito ti panagbiagtayo. Iti panagbiag, mapasarantayo dagiti naimbag ken dakes a pasamak. Addada met panawen a rumbeng nga aglidaytayo, no saan a maitutop nga agragsaktayo. (Eclesiastes 3:1, 4; 7:2-4) Kasta met a mabalin a dadduma kadatayo ti agib-ibtur iti depression, a mabalin a nadumaduma ti pakaigapuanna. Nupay kasta, maliwliwatayo unay iti kari ti Biblia. Matulongannatayo met ti di maartapan a kinasirib a masarakan iti Biblia a mangliklik iti adu a palab-og a pakaigapuan ti panagladingittayo. “No maipapan iti daydiay umim-imdeng kaniak,” kuna ti Dios, “agtaengto iti kinatalged ket saanto a masinga manipud alinggaget ti didigra.”—Proverbio 1:33.
Wen, interesado unay ni Jehova iti pagimbagantayo. Kayatna a naragsaktayo—saan laeng nga iti sinsinan a ragsak, no di ket naimpusuan a ragsak ken saan laeng nga iti apagkanito, no di ket iti agnanayon! Gapuna, kastoy dagiti pudno a manayon nga imbaga ti Anakna: “Naragsak dagidiay sipapanunot iti naespirituan a kasapulanda.” (Mateo 5:3) Masiribtayo no iyaplikartayo dagiti imbagana.
[Kahon/Ladawan iti panid 9]
Dagiti Siam a Ramen ti Kinaragsak
1. Panangpatanor iti naespirituan a panangmatmat iti biag.—Mateo 5:3.
2. Panagbalin a kontento, ken saan a ‘panagayat iti kuarta.’—1 Timoteo 6:6-10.
3. Saan a panangipangpangruna iti panaglinglingay.—2 Timoteo 3:1, 4.
4. Panagbalin a naparabur, ken panangikagumaan a mangparagsak iti sabsabali.—Aramid 20:35.
5. Panagbalin a managyaman, ken panangbilang kadagiti bendisionmo.—Colosas 3:15.
6. Sidadaan a panangpakawan.—Mateo 6:14.
7. Panangpili a nainsiriban kadagiti pakitimpuyogam.—Proverbio 13:20.
8. Panangaywan iti bagim, ken panangliklik kadagiti dakes nga aramid.—2 Corinto 7:1.
9. ‘Panagrag-o iti namnama’ a nairanta kenka a nailanad iti Biblia.—Roma 12:12.
[Dagiti Ladawan iti panid 8, 9]
Ti naibasar iti Biblia a namnama a biag iti baro a lubong ket gubuayan ti dakkel a liwliwa