Ti Sao ni Jehova Nabiag
Dagiti Tampok iti Surat Kadagiti Taga-Roma
IDI agarup 56 K.P., bayat ti maikatlo a panagdaliasatna kas misionero, dimteng ni apostol Pablo iti siudad ti Corinto. Naammuanna a nagduma ti panangmatmat dagiti Kristiano a Judio ken Gentil idiay Roma. Kayatna nga agkaykaysada a naan-anay ken Kristo, isu a nagsurat ni Pablo kadakuada.
Inlawlawag ni Pablo iti suratna kadagiti taga-Roma no kasano a dagiti tattao naideklarada a nalinteg ken no kasano ti rumbeng a panagbiagda. Ti surat ipaayannatayo iti pannakaammo maipapan iti Dios ken iti Saona, ipaganetgetna ti di kaikarian a kinamanangngaasi ti Dios, ken itan-okna ti akem ni Kristo iti pannakaisalakantayo.—Heb. 4:12.
NAIDEKLARA A NALINTEG—KASANO?
“Amin nagbasol ken agkurang iti dayag ti Dios,” insurat ni Pablo. “Ket kas awan bayadna a sagut a maidekdeklarada a nalinteg babaen ti di kaikarian a kinamanangngaasi [ti Dios] baeten iti pannakaluk-at babaen ti subbot nga imbayad ni Kristo Jesus.” Kinuna pay ni Pablo: “Ti maysa a tao maideklara a nalinteg babaen ti pammati a naisina iti ar-aramid ti linteg.” (Roma 3:23, 24, 28) Babaen ti pammati iti “maysa nga aramid a panangpalinteg,” agpadpada dagiti napulotan a Kristiano ken dagiti kameng ti “dakkel a bunggoy” dagiti “sabsabali a karnero” mabalin a ‘maideklarada a nalinteg’—dagiti napulotan agpaay iti biag idiay langit kas agtawid a kadua ni Kristo ken ti dakkel a bunggoy kas gagayyem ti Dios, a mangnamnama a makalasat “iti dakkel a rigat.”—Roma 5:18; Apoc. 7:9, 14; Juan 10:16; Sant. 2:21-24; Mat. 25:46.
“Agaramidtayo aya iti basol gapu ta awantayo iti sidong ti linteg no di ket iti sidong ti di kaikarian a kinamanangngaasi?” inimtuod ni Pablo. “Saan koma a pulos mapasamak dayta!” insungbatna. “Ad-adipennakayo . . . , uray iti basol maipaay iti ipapatay wenno iti kinatulnog maipaay iti kinalinteg,” inlawlawag ni Pablo. (Roma 6:15, 16) “No papatayenyo ti ar-aramid ti bagi babaen iti espiritu, agbiagkayto,” kinunana.—Roma 8:13.
Sungbat Kadagiti Nainkasuratan a Saludsod:
1:24-32—Ti kadi nalulok a kababalin a nailadawan ditoy agaplikar kadagiti Judio wenno kadagiti Gentil? Nupay agpada a nalulok ti kababalin daytoy dua a grupo, espesipiko a tuktukoyen ni Pablo dagiti apostata nga Israelita idi unana. Nupay ammoda ti nalinteg a bilin ti Dios, “saanda nga inanamongan ti panangbigbig iti Dios buyogen ti umiso a pannakaammo.” Iti kasta, nakababainda.
3:24, 25—Kasano a ti “subbot nga imbayad ni Kristo Jesus” abbonganna “dagiti basol a naaramid iti napalabas” sakbay pay a naipaay dayta? Natungpal idi 33 K.P. ti umuna a padto maipapan iti Mesias a nailanad iti Genesis 3:15, idi natay ni Jesus iti kayo a pagtutuokan. (Gal. 3:13, 16) Ngem idi inyebkas ni Jehova dayta a padto, iti panangmatmatna, nabayadanen ti gatad ti subbot, ta awan ti makalapped iti Dios a mangtungpal kadagiti panggepna. Gapuna, maibatay iti masanguanan a daton ni Jesu-Kristo, mabalin a pakawanen ni Jehova ti basol dagiti kaputotan ni Adan a mangipakita iti pammati iti dayta a kari. Babaen ti subbot, nagbalin met a posible ti panagungarto dagiti natay sakbay ti panawen Kristiano.—Ara. 24:15.
6:3-5—Ania ti kaipapanan ti pannakabautisar ken Kristo Jesus ken ti pannakabautisar iti ipapatayna? Idi pinulotan ni Jehova iti nasantuan nga espiritu dagiti pasurot ni Kristo, naikaykaysada ken Jesus ken nagbalinda a kameng ti kongregasion nga isu ti bagi ni Kristo, ket isu ti Ulo. (1 Cor. 12:12, 13, 27; Col. 1:18) Daytoy ti pannakabautisarda ken Kristo Jesus. Dagiti napulotan a Kristiano ‘nabautisaranda met iti ipapatay ni Kristo’ gapu ta agsakripisioda ken pagtallikudanda ti aniaman a namnama nga agbiag nga agnanayon ditoy daga. No kasta, kas ken Jesus, maysa a sakripisio ti ipapatayda nupay saan a makasubbot dayta. Daytoy a pannakabautisar iti ipapatay ni Kristo ket agturpos inton matayda ken mapagungarda iti nailangitan a biag.
7:8-11—Kasano a ‘ti basol immawat iti pannakagutugot babaen iti bilin’? Nakatulong ti Linteg kadagiti tattao tapno mabigbigda ti naan-anay a saklawen ti basol, ken ad-adda a sipapanunotda a managbasolda. Iti kasta, nalaklakada a mailasin ti naaramidanda a basol ken ad-adu a tattao ti makabigbig a managbasolda gayam. Makuna ngarud a ti basol immawat iti pannakagutugot babaen ti Linteg.
Dagiti Masursurotayo:
1:14, 15. Adu ti rason no apay a sigaganetget nga iwaragawagtayo ti naimbag a damag. Ti maysa ket adda utangtayo kadagiti tattao a nagatang babaen ti dara ni Jesus ken adda obligasiontayo a tumulong kadakuada iti naespirituan.
1:18-20. Dagiti di nadiosan ken nakillo “awan ti pagpambarda,” agsipud ta dagiti di makita a kualidad ti Dios ket silalawag a makita kadagiti pinarsuana.
2:28; 3:1, 2; 7:6, 7. Kalpasan nga inyebkas ni Pablo dagiti sasao a kasla makapabain kadagiti Judio, pinasarunuanna dayta kadagiti mangep-ep a sasao. Nasayaat a tuladen daytoy no tamingentayo dagiti serioso a banag buyogen ti kinaannad ken kinasigo.
3:4. No maikontra ti sao ti tao iti ibagbaga ti Sao ti Dios, ‘masarakan koma a napudno ti Dios’ babaen ti panagtalektayo iti mensahe ti Biblia ken panagtignaytayo a maitunos iti pagayatan ti Dios. Babaen ti naregta a pannakiraman iti panangasaba ken panagaramid iti adalan, matulongantayo ti dadduma tapno ad-adda nga agtalekda iti Dios.
4:9-12. Nabayagen nga imbilang ti Dios a nalinteg ti pammati ni Abraham sakbay pay a nakugit daytoy idi agtawen iti 99. (Gen. 12:4; 15:6; 16:3; 17:1, 9, 10) Iti kasta a nabileg a pamay-an, impakita ti Dios no ania ti ibilangna a nalinteg iti imatangna.
4:18. Ti namnama ket napateg a paset ti pammati. Ti pammatitayo ket naibatay iti namnama.—Heb. 11:1.
5:18, 19. Babaen iti umiso a panangipakitana no kasano a ni Jesus ket kaasping ni Adan, inlawlawag ni Pablo iti simple ken ababa a pamay-an no kasano a ti maysa a tao “itedna ti kararuana kas subbot a kasukat dagiti adu.” (Mat. 20:28) Ti umiso ken ababa a pannakirinnason ket nagsayaat a tuladen no mangisurotayo.—1 Cor. 4:17.
7:23. Dagiti paset ti bagi a kas iti ima, saka, ken dila ti mabalin a ‘mangiturong kadatayo a kautibo iti linteg ti basol,’ isu nga annadantayo ti di umiso a panangusar kadagitoy.
8:26, 27. No maipasangotayo kadagiti narikut a kasasaad ket ditay ammo ti ikararagtayo, “ti espiritu a mismo agdawat a maipaay kadatayo.” Kalpasanna, ni Jehova, a “Managdengngeg iti kararag,” awatenna dagiti maitutop a kararag a nailanad iti Saona kas naggapu kadatayo.—Sal. 65:2.
8:38, 39. Dagiti kalamidad, dakes nga espiritu a parsua, ken gobierno ti tao saanda a mapasardeng ni Jehova a mangayat kadatayo; ket saandatay met a mapasardeng a mangayat kenkuana.
9:22-28; 11:1, 5, 17-26. Adu a padto maipapan iti pannakaisubli ti Israel ti natungpal iti kongregasion dagiti napulotan a Kristiano, a dagiti kamengna ket ‘naayaban saan laeng a manipud kadagiti Judio no di ket manipud met kadagiti nasion.’
10:10, 13, 14. Babaen ti nabileg a pammati kenni Jehova ken kadagiti karina, agraman ti ayattayo iti Dios ken iti padatayo a tao, matignaytayo a makiraman a sireregta iti Nakristianuan a ministerio.
11:16-24, 33. Nagsayaat ti panagtimbeng ti ‘kinamanangngaasi ti Dios ken ti kinaingetna’! Wen, “ti Bato, naan-anay ti aramidna, ta amin a daldalanna kinahustisia.”—Deut. 32:4.
PANAGBIAG KAS MAYSA A NAIDEKLARA A NALINTEG
Kinuna ni Pablo: “Iti kasta dawatek kadakayo babaen kadagiti asi ti Dios, kakabsat, nga iparangyo ti bagbagiyo a maysa a sakripisio a sibibiag, nasantuan, makaay-ayo iti Dios.” (Roma 12:1) “Iti kasta,” wenno agsipud ta naideklara a nalinteg dagiti Kristiano gapu iti pammatida, dagiti sumaganad nga ibagana apektaranna koma ti kababalinda iti sabsabali, kadagiti agtuturay, ken iti bagida.
“Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot,” insurat ni Pablo. “Ti ayatyo awan koma ti panaginsisingpetna,” imbalakadna. (Roma 12:3, 9) “Tunggal kararua paiturayan koma kadagiti nangatngato nga autoridad.” (Roma 13:1) Kadagiti bambanag a mainaig iti konsiensia, imparegtana kadagiti Kristiano a ‘saanda koma nga agiinnukom.’—Roma 14:13.
Sungbat Kadagiti Nainkasuratan a Saludsod:
12:20—Kasano a ‘mangibuntontayo kadagiti umap-apuy a beggang’ iti ulo ti kabusor? Idi panawen ti Biblia, maikabil ti metal iti maysa nga urno, sa makargaan iti adu a beggang ti sirok ken rabawna. Ad-adda a mangpabara dagiti beggang nga adda iti rabawna tapno malunag ti natangken a metal ken maisina kadagiti rugit. Umasping iti dayta, no pakitaantayo iti kinaimbag ti maysa a bumusbusor, mabalin a mapaluknengtayo ti pimmamulinawen a pusona ket agminar dagiti agkakaimbag a galadna.
12:21—Kasano nga “agtultuloy a parmekentayo ti dakes babaen ti naimbag”? Ti maysa a pamay-an ket babaen ti agtultuloy ken situtured a panangikasabatayo iti naimbag a damag ti Pagarian agingga a mairingpas dayta iti kapkapnekan ni Jehova.—Mar. 13:10.
13:1—Iti ania a pamay-an a dagiti nangatngato nga autoridad “impasdek ti Dios kadagiti relatibo a saadda”? Dagiti autoridad ti gobierno ket “impasdek ti Dios kadagiti relatibo a saadda” gapu ta impalubos ti Dios ti panagturayda, ken iti dadduma a kaso, impakpakaunana dayta. Nalawag daytoy iti padto ti Biblia maipapan iti adu nga agtuturay.
Dagiti Masursurotayo:
12:17, 19. No agibalestayo, ar-aramidentayo ti maysa a banag a ni laeng Jehova ti makinrebbeng. Kinadursok ngarud ti ‘panangsubad ti dakes iti dakes’!
14:14, 15. Saan koma a makaitibkol ti taraon wenno inumen nga idasartayo kadagiti kakabsat.
14:17. Ti naanamongan a takder iti imatang ti Dios ket saan nga agpannuray a nangnangruna iti kanen wenno inumen ti maysa wenno iti saanna a kanen wenno inumen. Imbes ketdi, mainaig dayta iti kinalinteg, talna, ken rag-o.
15:7. Awan panangidumduma nga awatentayo iti kongregasion ti amin a napasnek nga agsapsapul iti kinapudno ken iwaragawagtayo ti mensahe ti Pagarian kadagiti amin a makasaritatayo.
[Dagiti Ladawan iti panid 31]
Agaplikar kadi ti subbot kadagiti basol a naaramid sakbay a naibayad dayta?