Agbibiagka Kadi nga Agpaay Laeng iti Agdama?
“DIAK pulos pampanunoten ti masanguanan. Dumtengto latta dayta.” Dagita ti imbaga ti nalatak a sientista a ni Albert Einstein. Kasta met ti kapanunotan ti adu a tattao. “Apay koma a pakadanagam ti masanguanan?” mabalin a kunaenda. Wenno nalabit adda nangnangngegmon a nagkuna iti: “Basta ituloymo no ania ti ar-aramidem.” “Agpennekka ketdi nga agbiag ita.” “Makaammonto ditan no ania ti mapasamak inton bigat.”
Siempre, nairuamtayon iti kasta a kapanunotan ti kaaduan a tattao. “Manganka, uminumka, agragsakka. Awanen ti napatpateg pay ngem kadagita.” Dayta ti prinsipio dagiti nagkauna nga Epicureo. Kasta met laeng ti kapanunotan ti dadduma a kasadaran ni apostol Pablo. Ti prinsipioda ket, “Mangan ken uminumtayo, ta inton bigat mataytayo.” (1 Corinto 15:32) Patienda a ti agdama nga ababa a biagtayo ti kakaisuna a gundawaytayo nga agbiag isu nga itantandudoda ti kapanunotan a gun-odentayo ketdi ti kasayaatan iti biag.
Para iti minilion a tattao, ti pananggun-od iti kasayaatan manipud iti biag ket sigurado a dina kaipapanan ti panangipangpangruna iti ragragsak. Gapu kadagiti narigat a kasasaad, adu ti makarikna a tapno agbiagda, nasken nga awan sarday a sarangtenda dagiti nasaem a karit iti biag. Isu nga apay koma a panunotenda ti masanguanan, idinto ta kasla nakabutbuteng ken awanto met la ti iyegna a pangnamnamaan?
Rumbeng Kadi nga Agplanotayo Para iti Masanguanan?
Uray dagidiay nanam-ay ti biagda masansan nga ibilangda nga awan serbina ti panangiplano iti masanguananda. “Apay koma a problemaek dayta?” nalabit isaludsodda. Mabalin nga irason ti dadduma a maupay ken mapaayka laeng no agplanoka agpaay iti masanguanan. Uray ni patriarka a Job idi un-unana a panawen napasaranna ti nakaro a ladingit idi kellaat a “napagsisina” wenno natungday dagiti planona a mangyeg koma iti naragsak a masakbayan para kenkuana ken iti pamiliana.—Job 17:11; Eclesiastes 9:11.
Sigun kenni Robert Burns, maysa a dumadaniw a taga-Scotland, ti narigat a kasasaadtayo ket umasping iti maysa nga utot ti taltalon a ti balayna ket di ingagara a naarado ni Burns. Inkarkarigatan ti utot ti agbiag kalpasan a naan-anay a nadadael ti balayna. ‘Wen,’ kinuna ni Burns, ‘masansan unay nga awan gawaytayo no maipasangotayo kadagiti kasasaad a ditay pulos makontrol, isu a masansan a matungday uray dagiti kasayaatan a planotayo.’
No kasta, minamaag kadi ti agplano para iti masanguanan? Kinapudnona, no awan ti naan-anay a panagplano, mabalin a makadidigra dagiti resultana no dumteng dagiti bagyo wenno dadduma pay a natural a didigra. Siempre, awan ti makapasardeng kadagiti bagyo a kas idi iti Bagyo a Katrina. Ngem saan ngata a dakkel ti magapuanan ti nasaysayaat a panagsakbay ken panagplano tapno maliklikan dagiti nakaro nga epekto dayta a bagyo iti siudad ken kadagiti umilina?
Ania ti makunam? Talaga kadi a nainsiriban ti agbiag para laeng iti agdama, nga uray ditay panunotenen ti masanguanan? Usigem ti makuna ti sumaganad nga artikulo maipapan iti dayta a banag.
[Dagiti Ladawan iti panid 3]
“Manganka, uminumka, agragsakka. Awanen ti napatpateg pay ngem kadagita”
[Ladawan iti panid 4]
Naliklikan ngata dagiti nakaro nga epekto ti Bagyo a Katrina no adda panagsakbay ken panagplano?
[Credit Line]
U.S. Coast Guard Digital