Agtutubo, Pilienyo ti Agserbi ken ni Jehova
“Agpilikayo ita nga aldaw maipaay iti bagbagiyo no siasino ti pagserbianyonto.”—JOSUE 24:15.
1, 2. Ania dagiti di umiso a panangbautisar a maar-aramid iti uneg ti Kakristianuan?
“BAY-ANYO nga agbalin a Kristiano [dagiti ubbing] inton matarusandan ti maipapan ken ni Kristo.” Kasta ti inlanad ti maysa a mannurat nga agnagan iti Tertullian idi arinunos ti maikadua a siglo K.P. Kondenarenna ti panangbautisar kadagiti maladaga, maysa nga aramid a mangrugrugi a maipasdek iti uneg ti apostata a Kristianidad idi kaaldawanna. Maisupadi iti panangmatmat ni Tertullian ken iti Biblia, kinuna ti Ama ti Simbaan a ni Augustine a maugasan ti orihinal a basol babaen ti bautismo, ken mapan iti umap-apuy nga impierno ti asinoman a maladaga a di mabautisaran. Dayta a pammati ti nangitandudo iti kostumbre a panangbautisar kadagiti maladaga.
2 Agingga ita, adu kadagiti kangrunaan a relihion iti Kakristianuan ti mangbabautisar kadagiti kappasngay. Ken iti intero a historia, ti inkapilitan a panangbautisar kadagiti naparmek a “pagano” ket an-annuroten dagiti agtuturay ken narelihiosuan a lider manipud kadagiti maaw-awagan a Kristiano a nasion. Ngem saan a naibatay iti Biblia ti panangbautisar kadagiti maladaga ken ti inkapilitan a panangbautisar kadagiti adulto.
Boluntario ti Panagdedikar Ita
3, 4. Ania ti makatulong kadagiti annak dagiti dedikado a Kristiano tapno boluntarioda nga agdedikar?
3 Ipakita ti Biblia nga ibilang ti Dios a nasantuan dagiti ubbing uray no maysa laeng kadagiti dadakkelda ti matalek a Kristiano. (1 Corinto 7:14) Kayatna kadi a sawen a dedikado nga adipen ni Jehova dagiti kasta nga annak? Saan. Nupay kasta, dagiti ubbing a pinadakkel dagiti nagannak a dedikado ken ni Jehova makaawatda iti pannakasanay a mabalin a mangtignay kadakuada a boluntario a mangidedikar iti bagida. Insurat ni masirib nga Ari Solomon: “Salimetmetam, O anakko, ti bilin ni amam, ket saanmo a baybay-an ti linteg ni inam. . . . No magnaka, idalannakanto; no agiddaka, nakabantayto kenka; ket inton nakariingkan, pakaseknannakanto dayta. Ta ti bilin maysa a pagsilawan, ket ti linteg maysa a silaw, ket dagiti pannubngar ti disiplina isuda ti dalan ti biag.”—Proverbio 6:20-23.
4 Agserbi a salaknib kadagiti ubbing ti panangiwanwan dagiti Kristiano a nagannak no la ket ta situtulok a surotenda dayta. Kinuna pay ni Solomon: “Ti masirib nga anak isu daydiay mamagrag-o iti ama, ket ti maag nga anak isu ti ladingit ni inana.” “Sika, O anakko, dumngegka ket agbalinka a masirib, ket iturongmo ta pusom iti dalan.” (Proverbio 10:1; 23:19) Wen, tapno magunggonaan manipud iti panangsanay dagiti dadakkelyo, dakayo nga agtutubo masapul a situtulok nga awatenyo ti pammagbaga, balakad, ken disiplina. Saankayo a nayanak a masirib, ngem kabaelanyo ti ‘agbalin a masirib’ ken boluntario a surotenyo “ti dana ti biag.”
Ania ti Panangiturong iti Panunot?
5. Ania ti imbalakad ni Pablo agpadpada kadagiti annak ken amma?
5 Insurat ni apostol Pablo: “Annak, agtulnogkayo kadagiti nagannak kadakayo a maikaykaysa iti Apo, ta daytoy nalinteg: ‘Dayawem ni amam ken ni inam’; nga isu ti umuna a bilin nga addaan iti kari: ‘Tapno naimbag ti lak-ammo ken makapagtalinaedka iti daga iti atiddog a tiempo.’ Ket dakayo, nga amma, dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.”—Efeso 6:1-4.
6, 7. Ania ti karaman iti panangpadakkel kadagiti annak babaen ti “panangiturong-panunot ni Jehova”, ken apay a saan a maibilang daytoy kas di umiso a panangimpluensia dagiti nagannak kadagiti annakda?
6 Makuna kadi a saan a nainkalintegan a panangimpluensia ti ar-aramiden dagiti Kristiano a nagannak no padakkelenda dagiti annakda “iti disiplina ken panangiturong-panunot ni Jehova”? Saan. Asino koma ti mabalin a mangbabalaw kadagiti nagannak a mangisursuro kadagiti annakda iti bambanag a matmatanda nga umiso ken makagunggona iti moral? Saan a mababalaw dagiti ateista a mangisursuro kadagiti annakda nga awan ti Dios. Marikna dagiti Katoliko a karbenganda a padakkelen a Katoliko dagiti annakda, ket manmano nga adda mangbabalaw kadakuada iti kasta a panagreggetda. Umasping iti dayta, saan a rumbeng a maakusar dagiti Saksi ni Jehova a konkontrolenda ti isip dagiti annakda no imulada kadakuada dagiti kapanunotan ni Jehova mainaig kadagiti kangrunaan a kinapudno ken moral a prinsipio.
7 Sigun iti Theological Dictionary of the New Testament, ti orihinal a Griego a sao a naipatarus kas “panangiturong-panunot” a masarakan iti Efeso 6:4 tukoyenna ti proseso a “nairanta a mangatur iti isip, mangilinteg iti biddut, mangparang-ay iti pannakilangen iti Dios.” No ngay pagkedkedan ti agtutubo ti panangsanay dagiti dadakkelna gapu ta kayatna a tuladen ti makitkitana nga ar-aramiden dagiti padana nga agtutubo? Siasino ti mangim-impluensia kenkuana—ti nagannak wenno dagiti kapatadana? No ti agtutubo ket impluensiaan dagiti kapatadana nga agdroga, agbartek, wenno makipaset iti imoral nga aramid, mababalawmo kadi dagiti nagannak no ikagumaanda nga aturen ti panagpampanunot ti anakda ken tulonganda dagitoy a mangamiris kadagiti dakes a pagbanagan dagiti kasta nga aramid?
8. Kasano a ‘naguyugoy ni Timoteo a mamati’?
8 Insurat ni apostol Pablo iti agtutubo a ni Timoteo: “Agtultuloyka iti bambanag a nasursurom ken nakaguyugoyam a patien, yantangay ammom no ania a tattao ti nakasursuruam kadagita ket manipud kinamaladaga naammuam ti nasantuan a sursurat, a makabael a mamagsirib kenka maipaay iti pannakaisalakan babaen ti pammati a mainaig ken Kristo Jesus.” (2 Timoteo 3:14, 15) Sipud kinaubing ni Timoteo, ti ina ken lolana pinabilegda ti pammatina iti Dios babaen ti panangparayrayda iti pannakaammona iti Nasantuan a Kasuratan. (Aramid 16:1; 2 Timoteo 1:5) Idi nagbalinda a Kristiano, saanda a pinilit ni Timoteo a mamati no di ket ‘ginuyugoyda’ babaen ti nasimbeng a pannakirinnason a naibatay iti pannakaammo iti Kasuratan.
Awisennaka ni Jehova nga Agpili
9. (a) Kasano nga inikkan ni Jehova iti dignidad dagiti parsuana, ken iti ania a rason? (b) Kasano nga inusar ti bugbugtong nga Anak ti Dios ti wayawayana a mangikeddeng?
9 Mabalin koma nga inaramid ni Jehova a robot dagiti parsuana, a nakaprogramada a mangaramid iti pagayatanna ken dida maaramid ti kayatda. Ngem imbes a kasta, inikkanna ida iti dignidad babaen ti panangipaayna iti wayawayada a mangikeddeng. Kayat ti Dios a situtulok ti panagpasakup kenkuana. Maragsakan no makitana nga agserserbi kenkuana dagiti nataengan ken ubbing a parsuana gapu iti panagayatda kenkuana. Ti kasayaatan a pagarigan ti siaayat a panagpasakup iti pagayatan ti Dios isu ti bugbugtong nga Anakna, ti tinukoy ni Jehova idi kinunana: “Daytoy ti Anakko, ti dungdungnguen, nga inanamongak.” (Mateo 3:17) Kinuna daytoy nga inauna nga Anak iti Amana: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko.”—Salmo 40:8; Hebreo 10:9, 10.
10. Maibatay iti ania nga agbalin a makaay-ayo ti panagserbi ken ni Jehova?
10 Kayat ni Jehova a dagidiay agserserbi kenkuana iti sidong ti panangiwanwan ti Anakna ipakitada met ti umasping a situtulok a panagpasakup iti pagayatanna. Iti maysa a padto, inkanta ti salmista: “Dagiti tattaom situtulok nga idatondanto ti bagbagida iti aldaw ti puersa militarmo. Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.” (Salmo 110:3) Ti intero nga organisasion ni Jehova, agpadpada ti nailangitan ken naindagaan a pasetna, siaayat nga agpaspasakupda iti pagayatan ti Dios.
11. Ania a panagpili ti pakaipasanguan dagiti agtutubo a pinadakkel dagiti Kristiano a nagannak?
11 Gapuna, nasken a maawatanyo dakayo nga agtutubo a saandakayo a pilpiliten dagiti dadakkelyo wenno dagiti Kristiano a papanglakayen tapno agpabautisarkayo. Masapul nga aggapu kadakayo ti tarigagay nga agserbi ken ni Jehova. Ni Josue idi umuna a panawen kinunana kadagiti Israelita: “Agserbikayo kenkuana iti kinaawan pagkurangan ken iti kinapudno . . . Agpilikayo ita nga aldaw maipaay iti bagbagiyo no siasino ti pagserbianyonto.” (Josue 24:14-22) Umasping iti dayta, nasken a dakayo a mismo ti mangikeddeng no idedikaryo ti bagiyo ken ni Jehova ken ipamaysayo ti biagyo iti panangaramid iti pagayatanna.
Panangbigbig iti Sungsungbatanyo
12. (a) Nupay kabaelan a sanayen dagiti nagannak ti annakda, ania ti saanda a mabalin nga aramiden para kadakuada? (b) Kaano a ti maysa nga agtutubo adda sungsungbatanna ken ni Jehova mainaig kadagiti aramidenna a desision?
12 Kadakayo nga agtutubo, dumtengto ti panawen a saannakayto a masalakniban ti kinamatalek dagiti dadakkelyo. (1 Corinto 7:14) Insurat ni adalan a Santiago: “No ti maysa ammona ti agaramid iti umiso ket kaskasdi a saanna nga aramiden dayta, basol dayta kenkuana.” (Santiago 4:17) Dagiti nagannak dida mabalin ti agserbi iti Dios para kadagiti annakda, no kasano a dagiti annak saanda met a mabalin ti agserbi iti Dios para kadagiti dadakkelda. (Ezequiel 18:20) Naadalmo kadin ti maipapan ken ni Jehova ken kadagiti pangpanggepna? Addaka kadin iti husto nga edad tapno maawatam ti maad-adalmo ken kabaelamon ti maaddaan iti personal a relasion iti Dios? No kasta, saan kadi a rasonable a panunoten nga iti panangmatmat ti Dios, kabaelamon ti agdesision no kayatmo ti agserbi kenkuana wenno saan?
13. Ania a salsaludsod ti nasken nga imtuoden dagiti di bautisado nga agtutubo kadagiti bagbagida?
13 Maysaka kadi a di bautisado nga agtutubo nga adda iti poder dagiti manamati a nagannak, a tumabtabunokan kadagiti Nakristianuan a gimong ken makipaspasetka pay ketdin iti panangikasaba iti naimbag a damag ti Pagarian? No kasta, sipupudno nga imtuodem iti bagim: ‘Apay nga ar-aramidek dayta? Makigimgimongak kadi ken makipaspasetak iti panangasaba gapu ta dayta ti kayat dagiti dadakkelko, wenno gapu ta kayatko a paragsaken ni Jehova?’ Napaneknekam kadi a mismo iti bagim “ti naimbag ken makaay-ayo ken naan-anay a pagayatan ti Dios”?―Roma 12:2.
Apay Koma nga Itantanmo ti Agpabautisar?
14. Ania dagiti pagarigan iti Biblia a mangipakita a rumbeng a liklikan ti di nainrasonan a panangitantan iti panagpabautisar?
14 “Ania ti makalapped kaniak a mabautisaran?” Ti Etiope a nangisaludsod iti dayta iti ebanghelisador a ni Felipe kaam-ammona a ni Jesus ti Mesias. Ngem umdasen ti pannakaammo ti Etiope maipapan iti Kasuratan tapno mabigbigna a di rumbeng nga agtaktak a mangipakita a kayatnan ti agserbi ken ni Jehova kas paset ti kongregasion Kristiano, ket dayta ti nangyeg kenkuana iti dakkel a rag-o. (Aramid 8:26-39) Umasping iti dayta, maysa a babai nga agnagan iti Lidia, a ‘silalawa a naluktan ti pusona tapno imdenganna ti bambanag a sasawen ni Pablo,’ ti dagus a ‘nabautisaran,’ isu ken ti sangakabbalayanna. (Aramid 16:14, 15) Uray ti maysa a guardia iti pagbaludan idiay Filipos nga immimdeng kada Pablo ken Silas bayat a “ti sao ni Jehova sinaoda kenkuana” “isu ken ti sangakabbalayanna nabautisaranda nga awanan panagtaktak.” (Aramid 16:25-34) Gapuna, no addaanka iti pagdamdamuan a pannakaammo maipapan ken ni Jehova ken kadagiti pangpanggepna, napasnek ti tarigagaymo a mangaramid iti pagayatanna, nasayaat ti reputasionmo iti kongregasion, ken regular a makigimgimong ken makipaspasetka iti panangikasaba iti naimbag a damag ti Pagarian, apay koma nga itantanmo pay ti agpabautisar?―Mateo 28:19, 20.
15, 16. (a) Ania a di umiso a panagrasrason ti mabalin a manglaplapped kadagiti agtutubo nga agpabautisar? (b) Kasano a salaknib kadagiti agtutubo ti panagdedikar ken panagpabautisar?
15 Agkitakitka kadi a mangaramid iti daytoy a napateg nga addang gapu iti panagamakmo nga adda sungsungbatam no makaaramidka iti di umiso? No kasta, panunotem daytoy: Saanka kadi nga ageskuela gapu laeng ta maamakka amangan no saankanto a makapasa? Siempre saan! Umasping iti dayta, dika agkitakit nga agpabautisar no kualipikadoka. Kinapudnona, ad-adda a matignayka a mangaramid iti amin a kabaelam a mangliklik iti basol no indedikarmo ti biagmo ken ni Jehova ken siaannugotka a mangaramid iti pagayatanna. (Filipos 4:13) Dakayo nga agtutubo, diyo koma pampanunoten nga awan ti sungsungbatanyo no itantanyo ti panagpabautisaryo. Apaman a makagtengkayo iti edad a kabaelanyon ti agdesision iti bukodyo, sungsungbatanyo ken ni Jehova ti aniaman a tignayyo, bautisadokayo man wenno saan.―Roma 14:11, 12.
16 Marikna ti adu a Saksi iti intero a lubong a dakkel ti naitulong ti desisionda nga agpabautisar idi agtutuboda pay. Usigentayo ti pagarigan ti maysa a Saksi nga agtawen iti 23 manipud iti Lumaud a Europa. Kinunana a ti panagpabautisarna idi isu ket agtawen iti 13 ti nangtignay kenkuana a di agpaibuyog “kadagiti tarigagay a naikasigudan iti kinaagtutubo.” (2 Timoteo 2:22) Sipud kinaubingna, kalatnan ti agserbi kas amin-tiempo a ministro. Ita, isu ket siraragsak nga agserserbi iti maysa a sanga nga opisina dagiti Saksi ni Jehova. Nabaknang a bendision ti agur-uray kadagiti amin nga agtutubo, a pakaibilangam, no ikeddengyo ti agserbi ken ni Jehova.
17. Kadagiti ania a benneg a masapul nga itultuloyyo a lasinen no ania ‘ti pagayatan ni Jehova’?
17 Ti panagdedikar ken panagpabautisar ket pangrugian ti maysa a panagbiag a maikabilangan ti pagayatan ni Jehova kadagiti amin nga aramidentayo. Karaman iti dedikasiontayo ti ‘pananggatang iti tiempo.’ Kasanotayo a maaramid dayta? Imbes a busbosentayo ti tiempotayo kadagiti awan serserbina a panggep, usarentayo ketdi dayta iti naanep a panagadal iti Biblia, regular a pannakigimong, ken naan-anay a pannakipaset iti panangikasaba iti “naimbag a damag ti pagarian.” (Efeso 5:15, 16; Mateo 24:14) Ti dedikasiontayo ken ni Jehova ken ti tarigagaytayo a mangaramid iti pagayatanna ket pagimbagan ti amin nga aspeto ti panagbiagtayo, agraman ti wagas ti panagaliwaksay, pampannangan, panaginum, ken kita ti musika a dengdenggentayo. Apay a diyo pilien ti kita ti panagaliwaksay nga agnanayon a matagiragsakyo? Rinibu a naragsak nga agtutubo a Saksi ti mangibaga kadakayo nga adu ti makagunggona a pamay-an tapno makapaglinglingay a di maikaniwas ‘iti pagayatan ni Jehova.’―Efeso 5:17-19.
“Kumuyogkaminto Kadakayo”
18. Ania a saludsod ti nasken nga imtuoden dagiti agtutubo kadagiti bagida?
18 Sipud idi 1513 K.K.P. agingga idi Pentecostes 33 K.P., adda organisado nga ili ni Jehova ditoy daga a pinilina nga agdayaw kenkuana ken agbalin a saksina. (Isaias 43:12) Nayanak iti dayta a nasion dagiti agtutubo nga Israelita. Ngem sipud idi Pentecostes, adda baro a “nasion” ni Jehova ditoy daga, ti naespirituan nga Israel, maysa nga “ili a maipaay iti naganna.” (1 Pedro 2:9, 10; Aramid 15:14; Galacia 6:16) Kinuna ni apostol Pablo a nanggugor ni Kristo maipaay iti bagina “ti maysa nga ili a naisangsangayan a kukuana, naregta iti nasayaat nga ar-aramid.” (Tito 2:14) Adda kadakayo nga agtutubo a mangilasin no pakasarakanyo iti dayta nga ili. Siasino ita ti mangbukel iti “nalinteg a nasion a mangsalsalimetmet iti matalek a kababalin,” nga agbibiag maitunos kadagiti prinsipio ti Biblia, nga agserserbi kas matalek a Saksi agpaay ken ni Jehova, ken mangiwarwaragawag iti Pagarianna kas ti kakaisuna a namnama ti sangatauan? (Isaias 26:2-4) Kitaenyo dagiti iglesia ti Kakristianuan ken dadduma pay a relihion, ket idiligyo dagiti konduktada kadagiti kalkalikaguman ti Biblia kadagiti pudno nga adipen ti Dios.
19. Iti ania a kombinsido ti minilion a tattao iti intero a lubong?
19 Minilion a tattao iti intero a lubong, agraman dagiti agtutubo, ti kombinsido a dagiti napulotan a natda dagiti Saksi ni Jehova ti mangbukel iti dayta a “nalinteg a nasion.” Ibagada kadagitoy a naespirituan nga Israelita: “Kumuyogkaminto kadakayo, ta nangngegmi a ti Dios adda kadakayo.” (Zacarias 8:23) Sipapasnek nga inanamaen ken ikarkararagmi nga ikeddengyo dakayo nga agtutubo ti makitimpuyog iti ili ti Dios ket iti kasta, ‘mapiliyo ti biag’―biag nga agnanayon iti baro a lubong ni Jehova.―Deuteronomio 30:15-20; 2 Pedro 3:11-13.
Pangrepaso
• Ania ti karaman iti panangiturong iti panunot?
• Ania a kita ti panagserbi ti makaay-ayo ken ni Jehova?
• Ania a panagpili ti nakaipasanguan ti amin nga agtutubo a pinadakkel dagiti Kristiano a nagannak?
• Apay a di nainrasonan nga itantan ti panagpabautisar?
[Dagiti Ladawan iti panid 26]
Siasino ti imdengam?
[Ladawan iti panid 28]
Kasano nga agserbi a salaknib kenka ti panagdedikar ken panagpabautisar?
[Ladawan iti panid 29]
Ania ti manglaplapped kenka nga agpabautisar?