PANANGIPAPILIT

Ti Griego a termino a naipatarus kas “manangipapilit” (Tit 1:7; 2Pe 2:10, AS, KJ, NW) ket literal a kaipapananna ti “panangay-ayo iti bagi” ken “mangipasimudaag iti maysa a dinominaran ti kinamanagimbubukodan, ken awanan konsiderasion iti sabsabali, sipapangas a mangipapilit iti kayatna.” (Vine’s Expository Dictionary of Old and New Testament Words, 1981, Tomo 3, p. 342) Gapuna, ti panangipapilit ket kababalin a saan a maitunos iti espiritu ti Kinakristiano. Saan koma a makita daytoy a kababalin nangnangruna kadagiti Kristiano a manangaywan. (Tit 1:5, 7) Dagiti indibidual a simmina manipud umiso a Nakristianuan a kababalin ket tinukoy ni apostol Pedro kas “nakarit” ken “manangipapilit.”​—2Pe 2:10.