AZARIAS
[Timmulong ni Jehova].
1. Kaputotan ni Juda babaen ken Tamar; kameng iti balay ni Etan.—1Cr 2:4, 6, 8.
2. Maysa a Levita babaen iti linia ni Cohat; anak ni Sofonias ken inapo ni mammadto Samuel.—1Cr 6:33, 36.
3. Kaputotan ni Aaron babaen iti linia ni Eleazar; anak ni Ahimaaz.—1Cr 6:9.
4. Maysa kadagiti prinsipe ni Solomon. (1Ar 4:2) Natukoy kas anak ni Padi Sadok; mabalin nga isu ti kabsat ni Ahimaaz.—1Cr 6:8.
5. Anak ni Natan; ti prinsipe a dinutokan ni Solomon kas pannakaulo dagiti 12 a diputado a mangipapaay iti taraon iti sangakabbalayan ti ari.—1Ar 4:5, 7, 19.
6. Maysa a mammadto nga anak ni Oded. Timmulong a nanggutugot ken Asa idi 963 K.K.P. tapno ‘birokenna ni Jehova.’ Kas nagbanaganna, ti ari inikkatna ti “makarimon a bambanag” manipud intero a daga ket inyegna dagiti tattao iti maysa a sinapataan a tulag, iti kasta “rebbeng a mapapatay ti asinoman a saan a mangbirok ken Jehova a Dios ti Israel.”—2Cr 15:1-15.
7, 8. Dua kadagiti pito nga annak ni Jehosafat, nailistada a maikadua ken maikalima. Inikkan ida ni amada iti adu a sagut kasta met iti nasarikedkedan a siudsiudad, ngem idi nagbalin nga ari ti inauna a kabsatda a ni Jehoram, napapatay dagitoy nga annak. (2Cr 21:1-4) “Agparang nga awan pakaibasaran ti panangipapan [kas kunaen ti dadduma] a namindua a nausar daytoy a nagan agsipud ta saan a puro nga agkabsat dagiti ubbing wenno agsipud ta natayen ti maysa idi maladaga pay laeng.” (The Interpreter’s Dictionary of the Bible, inurnos ni G. A. Buttrick, 1962, Tomo 1, p. 325) Karkarna nga agkanagnagan ti dua nga agkabsat, ngem iti Hebreo adda sangkabassit a nagdumaan ti naganda no iti ispeling ken pannakaibalikas, ʽAzar·yahʹ (“Timmulong ni Jah”) ken ʽAzar·yaʹhu (“Timmulong ni Jehova”).
9. Anak ti maysa a Jehu ken ama ni Helez; manipud iti tribu ni Juda, pito a kaputotan ti kaadayona manipud iti Egipcio nga inapona a ni Jarha.—1Cr 2:3, 34-39.
10. Ari ti Juda, ti inaudian nga anak da Jehoram ken Athalia; naawagan met iti Jehoacaz ken Ocozias.—2Ar 8:25-29; 2Cr 21:17; 22:1, 6; kitaenyo ti OCOZIAS Num. 2.
11. Anak ni Jehoram. Maysa kadagiti lima a panguluen ti ginasut. Timmulong iti pannakapadisi ni Athalia a nangagaw iti turay ken iti pannakaisaad ni Jehoas iti trono ti Juda idi 898 K.K.P.—2Cr 23:1-15.
12. Anak ni Obed. Maysa kadagiti lima a panguluen ti ginasut. Timmulong iti pannakaitrono ni Jehoas kas sukat ni Athalia a nangagaw iti trono idi 898 K.K.P.—2Cr 23:1-15.
13. Ari ti Juda iti 52 a tawen (829-778 K.K.P.). Anak da Amazias ken Jecolia. (2Ar 14:21; 15:1, 2) Naawagan Ozias iti 2 Ar-ari 15:13.—Kitaenyo ti OZIAS Num. 2.
14. Maysa a nangato a padi, anak ni Johanan, kaputotan ni Aaron. (1Cr 6:1-10) Idi a sidudursok a ginandat ni Ari Ozias ti mangidaton iti insienso idiay templo, nalabit daytoy nga Azarias ti nangibilin kenkuana a rummuar, ket idi nagkedked, ni Jehova pinagkukutelna ti ari. (2Cr 26:16-21) Agarup tallo a dekada kalpasan ti ipapatay ni Ozias, bayat ti umuna a tawen ti panagturay ni Ezekias (745 K.K.P.), ni Azarias nga agserserbi pay laeng idi kas nangato a padi (wenno sabali pay nga indibidual a kasta met laeng ti naganna) binigbigna ti pamendision ni Jehova kadagiti reporma nga inaramid ti ari.—2Cr 31:9, 10, 13.
15. Maysa a prinsipe ti Efraim, anak ni Jehohanan. Idi ngalay ti maikawalo a siglo K.K.P., kalpasan a ti Israel naparmekna ti Juda ken idi iyaw-awidnan ti 200,000 a kautibo, ni Azarias ken ti dadduma pay a prinsipe ti Efraim winayawayaanda dagiti kautibo ken impaayanda ida iti namaterialan a tulong iti panagsublida.—2Cr 28:5-15.
16. Kaputotan ni Levi babaen iti linia ni Cohat. Ti anakna a ni Joel timmulong iti pannakadalus ti templo sigun iti bilin ni Ezekias idi 745 K.K.P.—2Cr 29:1-12, 15.
17. Kaputotan ni Levi babaen iti linia ni Merari; anak ni Jehalelel; maysa kadagidiay nakipaset iti pannakadalus ti templo kas imbilin ni Ezekias.—2Cr 29:1-12, 15.
18. Anak ni Meraiot; maysa nga inapo ni Esdras.—Esd 7:3.
19. Anak ni Hilkias a nangato a padi idi tiempo ti panagturay ni Josias; ama ni Seraias (2Ar 22:3, 4; 1Cr 6:13, 14); inapo ni Esdras a managkopia.—Esd 7:1.
20. Anak ni Osaias. (Jer 43:2) Naawagan met Jezanias (Jer 40:8; 42:1) ken Jaazanias (2Ar 25:23). Maysa ni Azarias kadagiti panguluen dagiti puersa militar a nangsuportar ken Gedalias (Jer 40:7-10); maysa kadagidiay nagkiddaw nga agkararag ni Jeremias maipaay iti pannakaiwanwanda (Jer 42:1-3); ket idi agangay, maysa kadagiti “nadursok a lallaki” a nangiwaksi iti sungbat ni Jehova babaen iti ngiwat ni Jeremias.—Jer 43:1-3.
21. Maysa kadagiti agtutubo a Hebreo a nakautibo idiay Babilonia idi 617 K.K.P. Ti naganna nasuktan iti Abednego, nalabit kaipapananna ti “Adipen ni Nebo [maysa a dios ti Babilonia].” (Da 1:3-7) Kalpasan ti tallo a tawen nga espesial a kurso ti panagsanay, ni Azarias ken ti kakaduana (da Daniel, Hananias, Misael) ket nasarakan a “maminsangapulo a nalalaing ngem iti amin a managsalamangka a papadi ken kadagiti aran” ti Babilonia. (Da 1:5, 14-20) Idi damo, napangtaan a mapapatay (Da 2:13-18), ngem idi agangay naital-o iti saad nga administrador (Da 2:49), ket dimteng ti kakaruan a pannakasubok ti kinasungdo ni Azarias ken Jehova idi isu naitapuak iti kasta unay ti pudotna nga urno gapu iti panagkitakitna nga agdaydayaw iti ladawan nga impasdek ni Nabucodonosor. (Da 3:12-30) Awan duadua nga isu addaan iti nabileg a pammati, ket dinakamat ni apostol Pablo kas maysa a ‘nangdepdep iti puersa ti apuy.’—Heb 11:34.
22. Maysa kadagiti kadua ni Zorobabel a nagsubli idiay Jerusalem idi 537 K.K.P. kalpasan ti pannakaidestiero idiay Babilonia. (Ne 7:6, 7) Naawagan Seraias iti Esdras 2:2.
23. Maysa kadagiti papadi a nagnaed idiay Jerusalem kalpasan ti pannakaidestiero. (1Cr 9:11) Seraias ti agparang iti maysa a pumadpada a listaan. (Ne 11:11) Mabalin nga isu met laeng ti Num. 22 iti ngato.
24. Anak ni Maasias nga anak ni Anania. Iti sidong ti panangaywan ni Nehemias, tinarimaan ni Azarias ti benneg ti pader ti Jerusalem nga adda iti asideg ti pagtaenganna, idi 455 K.K.P.—Ne 3:23, 24.
25. Maysa a dinutokan ni Nehemias a makipagna ken Esdras ken iti sabsabali pay bayat ti panagmartsa iti rabaw ti nabangon manen a pader ti Jerusalem idi inagurasion dayta; nalabit isu met laeng ti Num. 27.—Ne 12:31-36.
26. Maysa kadagiti 13 a Levita a timmulong ken Esdras a mangilawlawag iti Linteg bayat ti pannakaibasa dayta kadagiti umili.—Ne 8:7, 8.
27. Maysa a padi, wenno inapo ti maysa a padi. Babaen iti selio pinatalgedanna ti “mapagpiaran nga urnos” idi kaaldawan ni Gobernador Nehemias.—Ne 9:38; 10:1, 2, 8.