‘Pannakasarak ti Inana iti Kararuayo’

“Umaykayo kaniak, dakayo amin nga agrigrigat ken madagdagsenan, . . . ket makasarakkayto iti inana a maipaay kadagiti kararuayo. Ta ti sangolko nalaka ken nalag-an ti awitko.”​—MATEO 11:28-30.

1, 2. Aniat’ situasion ti natauan a pamilia kadagiti napalabas a siglo, ket kasano a naigiddiat daytoy iti orihinal a pinanggep ti Dios?

“TA AMMOTAYO a ti sangkaparsuaan agsasaibbekda ken agrigrigatda ken agrigrigatda a sangsangkamaysa agingga ita.” Daytat’ insurat ti maysa a lalaki kadagiti gagayyemna sadi Roma adu a siglon ti napalabas. (Roma 8:22) Kadagiti tawen nanipud idin, ti panagsasaibbek ken panagrigrigat ti intero a pamilia ti sangatauan ket kimmaron. Ti panagil-ilem, kinapanglaw, krimen, ken panagbisin ti nakaam-amak a nangbiktima kadagiti adu iti uray sadino. Ti naulpit a sistema ti ekonomia pilitenna dagiti minilion a maawanan iti trabaho ken pagtalawenna pay ida kadagiti pagtaenganda, ket dagiti sataniko nga impluensia lapdanda dagiti panagregget a mangpatanor kadagiti annak iti dalan a rumbeng a pagnaanda.

² Ngem nalabit mapasamak ti kadadakkelan a didigra no ti an-anayen, sakit, wenno kinalakay/kinabaket pakapuyenna ti tattao, ket ikkatenna ti dayawda bayat a dumegdeg ti kasasaad ti bagida. Ti nakabutbuteng a saem ken rigat, a masansan agpaut iti adu a lawlawas, bulbulan, ken no maminsan uray pay tawtawen, pagsennaayenna ti puso ken pagarubusenna ti adu a lulua. Anian a nakalkaldaang a kapaliiwan iti biag! No maipapan iti kasasaad ti tao, maysa a masirib nga ari idi ugma kinunana: “Ta amin dagiti al-aldawna isuda dagiti ladladingit ket ti ut-utna isu ti liday.” (Eclesiastes 2:23; 4:1) Sigurado a ti biag itatta ket saan nga isut’ orihinal a pinanggep ti Dios!​—Genesis 2:8, 9.

3. Iti ania a panginanamaan a pinarsua ti Dios ti tao, ket kasano nga agdama a matungtungpal daytoy iti limitado a kasaknap?

³ Ni Jehova a Dios pinarsuana ti tao a perpekto, nga addaan namnama a mangtagiragsak a talaga iti biag. (Deuteronomio 32:4, 5) Panunotenyo laengen ti ragsak ti panangraman iti naimas a taraon, panangsay-op iti makaay-ayo a nadalus nga angin, wenno panangbuya iti nangayed nga ilelennek ti init! “Nakitak ti panagbannog nga inted ti Dios kadagiti annak dagiti tao tapno agwatwatda kenkuana,” napaliiw ti isu met laeng a masirib nga ari idi ugma. “Isu inaramidna ti tunggal banag a naimnas iti panawenna. . . . Ammok nga awan ti aniaman a naim-imbag a maipaay kadakuada ngem ti panagrag-o ken ti panangaramidda ti naimbag iti bayat ti panagbiagda; ket kasta met a tunggal tao mangan koma ken uminum ken agrag-o iti kinaimbag iti amin a pagbannoganna. Isu ti sagut ti Dios.”​—Eclesiastes 3:10-13.

4. (a) Kas naipakita kadagiti kapadasan ni Jesus, aniat’ nakalkaldaang a kasasaad dagiti adu? (b) Ania a makaparagsak-puso nga imbitasion ti impaay ni Jesus, ket ania a salsaludsod ti imbangon daytoy?

⁴ Kaskasdi, anian a nagbassit dagiti makabalin a mangtagiragsak kadagiti naimbag a banag a pinaggep ti Dios maipaay kadatayo! Ni Jesu-Kristo ammona ti nakapimpiman, nakakakaasi a kasasaad ti sangatauan. “Ket dimteng kenkuana ti umariwekwek,” kuna ti Biblia, “a nangikuyogda kadagiti pilay, bulsek, umel, singkol, ken adu pay a sabali a masakit, ket inkabilda ida iti sakaanan ni Jesus.” Anian ti panangngaasi ni Jesus kadagita a nakapimpiman a tatao! (Mateo 9:36; 15:30) Iti maysa nga okasion, impaayna ti maysa a makaparagsak-puso nga imbitasion: “Umaykayo kaniak, dakayo amin nga agrigrigat ken madagdagsenan, ta paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak, ket makasarakkayto ti inana a maipaay kadagiti kararuayo.” (Mateo 11:28, 29) Sigurado, dagitoy ket sasao a makapabileg namnama! Ngem ania nga inana ti tuktukoyen ni Jesus? Ken kasanotay a masarakan dayta?

Ti Kinapudno a Mangted Inana

5. Kasanot’ panangitudo ni Jesus ti dalan iti pudno a wayawaya ken inana maipaay kadagiti kararuatayo?

⁵ Idi timmabuno ni Jesus iti Piesta dagiti Tabernakulo agarup innem a bulan sakbay iti ipapatayna, insurona ti dalan ti pannakawayawaya ket iti kasta makagun-od iti pudno nga inana. Iti pannakisaritana kadagidiay namati kenkuana, kinunana: “No agtalinaedkayo koma iti saok, pudno a dakayo ti adalak, ket maammuanyonto ti pudno, ket ti kinapudno luk-atannakayto.” (Juan 8:31, 32) Ania a kinapudno ti sarsaritaen ni Jesus? Wayawayaannatayo dayta manipud iti ania? Iti ania a pamay-an a dagiti agdengdengngeg kenkuana ket ad-adipenda?

6. (a) Ania a suppiat ti imbangon dagiti relihiuso a bumusbusor, ken apay? (b) Iti ania a pamay-an nga amintayo ket ad-adipen?

⁶ Dagiti relihiuso a bumusbusor pinasardengda ni Jesus, a simmungbatda: “Kaputotannakami ni Abraham ket uray kaano awan ti nakatagabuanmi. Kasano ti panagkunam, ‘Maluk-atankayto’?” Dagidiay a Judio a bumusbusor pagtangsitda ti tawidda. Nupay no ti nasionda ket masansan nga inturayan dagiti ganggannaet, nagkitakit dagiti Judio a maawagan ad-adipen. Ngem impakita ni Jesus no iti ania a pamay-an nga isudat’ ad-adipen, a kunkunana: “Pudno, pudno, kunak kadakayo, Amin nga agaramid iti basol ket tagabu ti basol.” Wen, amin dagiti agdengdengngeg kenkuana ket ‘tagabuda ti basol,’ a kas met amin kadatayo itatta. Daytoy ket gapu ta natawidtayo amin ti basol manipud kadagiti orihinal a nagannak kadatayo. Ngem inkari ni Jesus: “No ngarud ti Anak luk-atannakayo, pudno nga agwayawayakayto.”​—Juan 8:33-36; Roma 5:12.

7. Kasano a magun-odan ti pudno a wayawaya, ket ania ti kinapudno a mangwayawaya kadatayo?

⁷ Ti pudno a wayawaya dumteng laeng ngarud babaen iti Anak ti Dios, ni Jesu-Kristo, a nangipaay iti perpekto a natauan a biagna kas daton a subbot. Daytoy a daton ti mangwayawaya kadatayo manipud iti makapapatay a basol ket pagbalinenna a posible ti panangtagiragsaktayo ti agnanayon a biag iti naan-anay a salun-at ken kinaragsak iti nalinteg a baro a lubong ti Dios. (Juan 3:16; 1 Juan 4:10) Ngarud, ti kinapudno a mangwayawaya kadatayo isut’ kinapudno maipapan ken Jesu-Kristo ken iti akemna iti pannakaitungpal dagiti panggep ti Dios. Ti Pagarian, a ni Kristo ti Ari, isuntot’ mangibanag iti pagayatan ti Dios iti daga, ket ni Jesus awan sarday a sinaksianna daytoy a kinapudno.​—Juan 18:37.

No Kasano a ti Kinapudno Makaited Inana

8. Kasano a mabalin a maiyilustrar ti pamay-an a panangipaay ti kinapudno iti inana?

⁸ Ti pamay-an a ti kinapudno mangted iti inana ket mabalin a maiyilustrar babaen iti maysa a babai a napakaammuan nga addaan kanser a napartak ti panagramaramna. Ti dagsen dayta a pannakaammo isut’ mangimameg kenkuana bayat a panunotenna dagiti nasaem, mabalin a makadidigra a resultana. Kabayatanna, nupay kasta, kinunsultana ti sabali a doktor ket naaddaan iti kanayonan a pannakasukimat. No ti resulta ti panangsukimat ipakitana a biddut ti immuna a pannakaresitana wenno nakaskasdaaw nga immimbagen ti kasasaadna, mailadawanyo ti nagsayaat a rikna ti pannakabang-ar a mapasaranna. Anian nga inana dayta iti kararuana!

9. Kasanot’ panangipaay ni Jesus iti bang-ar babaen iti panangisurona kadagiti tattao iti kinapudno?

⁹ Maiyasping iti dayta, idi immay ni Jesus ditoy daga, nadagsenan dagiti tattao kadagiti awan mamaayna a sistema ti tradision ti aldaw. Kadagiti eskribas ken Fariseo a responsable, kinuna ni Jesus: “Ta mangreppetda kadagiti awit a nadagsen ken narigat nga awiten, ngem isuda dida kayat a garawen dagiti ramayda.” (Mateo 23:4; Marcos 7:2-5) Anian a pannakabang-ar dayta idi impaayan ni Jesus dagiti tattao iti kinapudno a nangwayawaya kadakuada kadagiti makaadipen a tradision! (Mateo 15:1-9) Kasta met laeng itatta.

10. Ania a mangikkat iti rag-o a dadagsen ti imbaklay dagiti adu, ket kasanot’ panagrikna ti maysa a tao no maikkat dagitoy kas resulta ti pannakaadalna iti kinapudno?

¹⁰ Nalabit maysakayo a, gapu iti nadagsen a babantot dagiti ulbod a narelihiusuan a sursuro, nagbibiagkayo a mabutbuteng iti panagsagaba iti pannakatutuok iti apuy ti impierno wenno purgatorio kalpasan ti ipapatay. Wenno no natay ti maysa nga ing-ingungoten, mabalin a naimamegkayo idi imbaga ti klero nga innala ti Dios ti ay-ayatenyo nga anak agsipud ta kasapulanna ti maysa pay nga anghel​—a kasla kettay ad-adda a kasapulan ti Dios ti anakyo ngem iti pannaksapulyo. No dadduma kunaen met dagiti klero kadagiti tattao nga agsagsagaba iti an-anayen a daytoy ket lunod manipud iti Dios. Saan kadi a pudno a makaited iti inana a maammuan ti kinapudno a mangpabang-ar iti maysa a tao manipud kadagita a makapadagsen a narelihiusuan a kinaulbod? Anian a rikna ti pannakabang-ar ti iyeg daytoy!​—Eclesiastes 9:5, 10; Ezequiel 18:4; Juan 9:2, 3.

11. (a) Aniat’ maysa kadagiti kadadakkelan a dadagsen, ket kasano a maikkat daytoy? (b) Ania nga inana ti inyeg ni Jesus kadagiti managbasol idi adda ditoy daga?

¹¹ Maysa kadagiti kadakkelan a dadagsen nga awiten isut’ rikna ti pannakabasol gapu iti biddut a naaramidtayo. Makapabang-ar a maammuan a gaput’ pateg ti subbot ti daton ni Jesus, mabalin a maikkat dagitoy a basol. ‘Ti dara ni Jesus ugasannatayo manipud iti amin a basol,’ ipasigurado ti Biblia kadatayo. (1 Juan 1:7) Agpapanpay kadagiti nakabutbuteng a bambanag a naaramidantayo, no talaga a pinagbabawiantayo ken pinalintegtayon ti daldalantayo, tagiragsakentayo ti makaited inana a pannakabang-ar gapu iti nadalus a konsiensia ken ti pannakasiguro a saanen a malagip ti Dios ti basbasoltayo. (Salmo 103:8-14; 1 Corinto 6:9-11; Hebreo 10:21, 22) Anian nga inana ti inted ni Jesus kadagidiay madagdagsenan gaput’ basol, kas kadagiti balangkantis ken managsingir iti buis a kas ken Zaqueo! Liniwliwa ida ni Jesus kadagiti kinapudno iti Biblia bayat a nakipangan kadakuada.​—Lucas 5:27-32; 7:36-50; 19:1-10.

12. (a) Nangipaay ni Jesus ti inana kadagidiay tattao nga adda iti ania a narigat a kasasaad? (b) Idi umuna a siglo, kadagiti siasino nga indemonstra ni Jesus iti naisangsangayan a pamay-an nga isu “ti dalan ken ti kinapudno ken ti biag”?

¹² Adu pay a tattao ti addaan nadagsen a babantot iti sakit ken an-anayen, nakaro a panagliday, ken ti napalalo a panagleddaang a dumteng iti ipapatay ti maysa nga ay-ayaten. Nupay kasta, ni Jesus nangiyeg iti inana kadagidiay amin nga “agrigrigat ken madagdagsenan.” (Mateo 4:24; 11:28, 29) Inagasanna ti maysa a babai a di natulongan dagiti mangngagas iti uneg ti 18 a tawen. Pinaimbag pay ni Jesus ti maysa a lalaki a 38 a tawenen a masaksakit, ken ti sabali pay a naiyanak a bulsek. Maripiripyo aya ti pannakabang-arda idi inagasan ida ni Jesus? (Lucas 13:10-17; Juan 5:5-9; 9:1-7) Ti kinapudnona ket amin dagidiay immay ken Jesus iti pammati immayda iti gubuayan ti kinapudno, pudno nga inana, ken biag. Iti daydiay balo a nangabrasa iti kakaisuna nga anakna a lalaki manipud ken patay ken dagiti nagannak a ti 12-años nga anakda ket naisubli kadakuada a sibibiag, pudno a pinaneknekan ni Jesus nga isu “ti dalan ken ti kinapudno ken ti biag.”​—Juan 14:6; 17:3; Lucas 7:11-17; 8:49-56.

13. Iti siasino ti insuro ni Jesus a pagturongantayo a maipaay iti tulong, ket aniat’ mapasamak no ipakattayo daytoy a balakad?

¹³ Di pagduaduaan adda tiempo a mapasanguankayo kadagiti problema a diyo kabaelan a tamingen a personal. Ni Jesus insuronatayo a bumaw-ing ken Jehova a maipaay iti tulong, a kas met ti inaramidna a mismo. (Lucas 22:41-44; Hebreo 5:7) No regular nga agturongtayo iti Dios babaen iti kararag, makiramantayo iti rikrikna ti salmista nga insuratna: “Bendito ni Jehova nga inaldaw-aldaw a mangawit iti awittayo, ti pudno a Dios iti pannakaisalakantayo.” (Salmo 55:22; 68:19) Wen, ti pannakaammo iti kinapudno talaga a makaited iti inana. Pasingedennatayo ken Jehova ken tulongannatayo a mangapresiar a babaen iti tulongna mabalin a mataming a sibaballigi uray dagiti karirigatan a kasasaad iti biag.

Maaddaan Inana babaen iti Namnama ti Pagarian

14. Aniat’ nangsustener ken Jesus kadagiti pannakasusuotna, ket aniat’ nasken tapno makasaraktayo iti inana a maipaay kadagiti kararuatayo?

¹⁴ Tapno masarakan ti pudpudno nga inana iti kararuatayo, masapul a maaddantayo iti natibker a namnama. Namnama ti nangsustener ken Jesus. Ti Biblia kunana: “Ta gapu iti rag-o a naikabil iti sanguananna inibturanna ti kayo a pagtutuokan, nga inwaksina ti bain, ket nagtugaw iti makanawan iti trono ti Dios.” (Hebreo 12:2) Ti naragsak a namnama a nangsustener ken Jesus ket isut’ panangiyegna iti pannakasantifikar ti nagan ni Amana babaen iti panangsalimetmet iti kinatarnawna, agraman iti panangpaneknekna nga isut’ maikari nga Ari iti Pagarian ti Dios. Ti panangtaginayon iti nalawag a panangmatmat iti namnamatayo, kas makipagturay ken Kristo idiay langit wenno kas maysa kadagiti sakopna nga agtaeng iti Paraiso a daga, sustenerennatayto met iti panagserbi iti Dios. Wen, nasken ti namnama iti panangsarak iti inana a maipaay iti kararuatayo.​—Roma 12:12.

15. Aniat’ mainanama ti biagtayo no awan ti namnama ti Pagarian?

¹⁵ Imutektekanyo ti mainanama iti biagtayo no awan ti namnama ti Pagarian. Ti kadawyan a kaatiddog ti biag ket 70 laeng wenno mabalin a 80. Ket napartak ti panaglabas dagita nga aldaw, kas maikuna ti siasinoman a lumaklakay wenno bumakbaket kadakayo! Wen, ti Biblia sipupudno a kunaenna maipapan iti biag: “Ta lumabas nga apagbiit, ket tumayabkamin.” (Salmo 90:10) Kaskasdi, kayattay nga agtultuloy ti panagbiagtayo. Kayattayo ti agbiag. Nakaad-adu ti aramiden ken tagiragsaken.

16. Tapno makasarak iti inana a maipaay iti kararuatayo, aniat’ kasapulan nga aramidentayo?

¹⁶ Anian a nagpateg, ngarud, a maaddaantayo iti pammati ken ni “Kristo-Jesus nga inanamatayo”! (1 Timoteo 1:1) Kas iti kinunana: “Ta daytoy ti pagayatan ni Amak, a tunggal maysa a makakita iti Anak ket mangalagad pammati kenkuana adda koma biagna nga agnanayon.” (Juan 6:40, 51) Mamatitayo kadi iti dayta? Tapno makasarak iti inana ti kararuatayo, masapul a naan-anay a patientayo dayta. Nasken kadatayo dayta. Pudno, masapul nga ikapettayo ti “kabal ti barukong ti pammati.” (1 Tesalonica 5:8; idiligyo ti Hebreo 6:19.) Dayta a namnama ti masapul a mangsaluad iti isip, ken panagpampanunottayo. Ta no saan madagsenantayto unay kadagiti babantot ken problema ta sumukotayon ket mapukawtayo ti biag nga agnanayon. Ngarud, tapno matagiragsaktayo ti inana a maipaay iti kararuayo, siguraduen a taginayonen a natibker ti namnamayo iti Pagarian.

Inana Manipud Panangaramid iti Trabaho ti Dios

17. (a) Tapno maaddaan iti inana, aniat’ kasapulan, ken apay a saan a nalabes unay daytoy para kadatayo? (b) Aniat’ iraman ti panangakseptar iti sangol ni Kristo?

¹⁷ Ngem, tapno maddaaan iti inana, ad-adda pay ti kasapulan ngem iti iyaadani ken Jesus. Innayonna: “Alaenyo ti sangolko kadakayo [wenno, “Umaykayo iti sidong ti sangolko”] ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto iti inana a maipaay kadagiti kararuayo. Ta ti sangolko nalaka ken nalag-an ti awitko.” (Mateo 11:29, 30, New World Translation Reference Bible, footnote) Ti panangala iti sangol ipakitana ti panagtrabaho. Ngem paliiwenyo a saan a kiniddaw ni Jesus kadatayo nga awiten ti sangol iti mismo a bagbagitayo ket agmaymaysa nga aramiden amin a trabaho. Kasapulan a makipagawittayo iti sangol kenkuana. Iti daytoy a kaso, ti panangakseptar iti sangol nga ipaay ni Kristo iramanna ti panangaramid iti dedikasion iti Dios, nga isimbolo daytoy babaen iti bautismo iti danum, ken kalpasanna alaen ti responsabilidad kas maysa nga adalan ni Kristo. Ngem kasano a ti kasta a sangol ti panagbalin nga adalan ket makaiyeg iti inana?

18. (a) Apay a ti panangakseptar iti sangol ni Kristo makaited iti inana? (b) Kasano a ti panangaskasaba a trabaho makaiyeg kadatayo iti rag-o ken inana?

¹⁸ Ti panangakseptar iti sangol ni Kristo makaiyeg iti inana agsipud ta ni Jesus ket naemma ken napakumbaba. Agsipud ta nainkalintegan, makaited inana ti makipagtrabaho kenkuana iti sidong ti pareho a sangol. Isu ket mannakaawat kadagiti limitasion ken pagkapuyantayo. Kas iti kinunana, “Ti sangolko nalaka.” Pudno, ti sangol ti panagbalin a disipulo iramanna ti trabaho, ti isu met laeng a panangaskasaba ken panangisuro a trabaho nga inaramid ni Jesus ken isu daytat’ nangsanayanna kadagiti immuna a pasurotna. (Mateo 28:19, 20; Aramid 1:8) Kaskasdi, anian a makaited iti inana ti panangibaga iti sabsabali maipapan iti naayat a Diostayo, ti Anakna, ken ti Pagarian! Anian a makaited inana ti panangibaga kadagiti tattao no kasanoda nga agbiag nga agnanayon iti Paraiso! Ket no agtignayda iti makaited-biag a mensahe ket makidanggayda kadatayo iti panagserbi ken Jehova a Dios, anian a napalaus a rag-otayo!​—1 Timoteo 4:16.

19. Apay a ti balakad ti katugangan a lalaki ni Moises ket napateg kadagiti panglakayen ti kongregasion itatta?

¹⁹ Iti nabiit pay a tawtawen, minilmilion dagiti immay iti organisasion ni Jehova a makasapul iti tulong iti panangakseptar iti sangol ni Kristo, ket daytoy ti nangpadakkel iti awit a trabaho dagiti manangiwaragawag iti Pagarian ken dagidiay mangipastor kadakuada. Kadagita a naespirituan a pastor, ti balakad nga inawat ni Moises iti katuganganna a lalaki ket napateg. Intedna ken Moises daytoy a balakad: “Ti ar-ramidem saan a naimbag. Di bumurong a mapaksuyankanto, sika ken dagiti tattao a kaduam, ta daytoy nga annongen napalalo ti dagsenna kenka. Dika mabalin nga aramiden a siksika laeng.” Gapuna binalakadanna a mangpili kadagiti makabalin a lallaki a makiraman iti trabaho a panagpastor kadagiti tattao. Ti panangsurot iti daytoy a balakad ket napaneknekan a naballigi. (Exodo 18:17-27) Itatta, ti di agsarday a panagsanay pataudenna dagiti makabael a lallaki, dagiti “sagut iti lallaki,” a makatulong iti panangipastor iti arban tapno dagiti panglakayen iti kongregasion saanda a mapaksuyan.​—Efeso 4:8, 16.

20. Aniat’ kalikaguman ni Jesu-Kristo ken ni Amana para kadatayo?

²⁰ Nupay no binalakadan ni Kristo dagiti pasurotna a gagetanda a nalaing ti bagbagida, isu wenno ni Amana saanda a kalikaguman ti asinoman kadatayo nga aramiden ti ad-adda ngem iti nainkalintegan. Naminsan, idi ni Maria a kabsat a babai ni Lazaro ket dinillaw ti dadduma gapu iti tigtignayna a maipaay iti pagimbagan ni Jesus, tinubngarna ida, a kunkunana: “Bay-anyo. . . . Inaramidna ti nabalinanna.” (Marcos 14:6-8; Lucas 13:24) Ket dayta laeng ti manamnama kadatayo​—ti panangaramid iti kabalinantayo. Ti kasta a Nakristianuan a trabaho saan a dadagsen no di ket makaited iti inana. Apay? Gapu ta mangiyeg iti pudpudno a pannakapnek ken ti sigurado a namnama iti agnanayon a pakagunggonaan iti masanguanan.

21. (a) Aniat’ nalag-an nga awit ni Kristo, ket aniat’ masansan a mangparigat iti panangaskasaba a trabaho? (b) Ania komat’ natibker a pangngeddengtayo, ket iti ania a sigurado a panginanamaan?

²¹ Pudno, ikagumaan ni Satanas a maidadanestayo, a kas met idi iti kasangolantayo, ni Jesu-Kristo. (Juan 15:20; 2 Timoteo 3:12) Ngem laglagipenyo a saan a ti nalag-an nga awit ni Kristo ti dadagsen. Imbes ketdi, ti ibubusor ni Satanas ken dagiti ahentena ti masansan a mangparigat iti trabahotayo. Ti awit ni Kristo buklenna ti basta panangalagad kadagiti pagannurotan ti Dios, ket dagitoy saanda a nadagsen. (1 Juan 5:3) Ngarud, sapay koma, ta itultuloytayo ti agtalinaed a makikadua iti sidong ti sangol ni Kristo, a gagetantantayo ti panangaskasaba ken panangisuro a trabaho, a kas met ti inaramidna. Babaen iti panangaramid iti dayta, kas iti naikari, ‘makasaraktayto iti inana maipaay kadagiti kararuatayo.’

Kasanot’ Isusungbatyo?

◻ Sigun iti Roma 8:22, aniat’ nabayagen a kasasaad ti sangatauan?

◻ Kadagiti ania a pamay-an a ti pannakaammo iti kinapudno mangted iti inana?

◻ Apay a ti namnama ti Pagarian ket makaited unay iti inana?

◻ Ania ti sangol ni Kristo, ken apay a daytoy ket nalaka?

◻ Ti panangawit iti ania ti makaited ti inana kadatayo?