Ti Kadi Kuarta ti Ramut ti Amin a Kinadakes?

Sungbat ti Biblia

Saan. Saan nga ibaga ti Biblia a dakes ti kuarta, wenno saanna nga ibilang dayta kas kangrunaan a makagapu iti amin a kinadakes. Ti popular a sasao a ti “kuarta isu ti pagtaudan ti amin a kita ti kinadakes” ket saan a kompleto ken mangtikaw a panangkutar iti maysa a bersikulo ti Biblia. Ti talaga nga ibagbaga ti Biblia ket “ti panagayat iti kuarta isu ti pagtaudan ti amin a kita ti kinadakes.”a—1 Timoteo 6:10, Ti Baro a Naimbag a Damag Biblia, dakami ti nangpapuskol iti sao a “panagayat” kas panangipaganetget.

Ania ti ibaga ti Biblia maipapan iti kuarta?

Ibaga ti Biblia a no mausar ti kuarta iti nasayaat a pamay-an, makatulong dayta ken “proteksion” pay ketdi. (Eclesiastes 7:12) Kanayonanna, apresiaren ti Biblia dagidiay naparabur iti sabsabali, a pakairamanan ti panangregalo iti kuarta.—Proverbio 11:25.

Ngem mangpakdaar met ti Biblia maibusor iti panagpokus nga agbirok iti kuarta. Kunana: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag.” (Hebreo 13:5) Umiso koma ngarud ti pangilugarantayo ti kuarta iti biagtayo ken ditay agtarigagay iti adu a kinabaknang. Ikagumaantayo ketdi ti agbalin a kontento kadagiti banag a talaga a kasapulantayo kas iti taraon, bado, ken pagyanan.—1 Timoteo 6:8.

**Apay a nangpakdaar ti Biblia maipapan iti panagayat iti kuarta?**

Saan a tawiden dagiti naagum a tattao ti biag nga agnanayon. (Efeso 5:5) Ngamin, ti kinaagum ket maysa a kita ti idolatria wenno ulbod a panagdaydayaw. (Colosas 3:5) Ti maysa pay a rason ket, gapu ta kayat a maala dagiti naagum ti tartarigagayanda, masansan a saanda a suroten dagiti nasayaat a prinsipio. ‘Agbasolto dagidiay agganat a bumaknang,’ kuna ti Proverbio 28:20. Baka masulisogda pay ketdi nga agaramid kadagiti krimen kas iti panangbutbuteng, panangkikil, panangallilaw, panangkidnap, wenno panangpapatay.

Uray no ti panagayat iti kuarta ket saan nga agresulta kadagiti dakes nga aramid, mabalin nga adda dadduma a di nasayaat nga ibunga dayta. Kuna ti Biblia a “dagidiay determinado a bumaknang matnagda iti sulisog, silo, ken adu a minamaag ken makadangran a tartarigagay.”—1 Timoteo 6:9.

Kasanotayo a magunggonaan iti balakad ti Biblia maipapan iti kuarta?

No saantay nga isukat ti panagaramid iti nasayaat ken dagiti banag a mangparagsak iti Dios para laeng iti kuarta, maaddaantayo iti respeto iti bagitayo ken magun-odtayo ti anamong ken tulong ti Dios. Inkari ti Dios kadagidiay sidadaan a mangparagsak kenkuana: “Saankanto a pulos panawan ken saankanto a pulos baybay-an.” (Hebreo 13:5, 6) Impasiguradona met nga “adunto ti bendision ti matalek a tao.”—Proverbio 28:20.

Dagiti Teksto iti Biblia Maipapan iti Kuarta

Eclesiastes 7:12: “Ti kuarta ket proteksion.”

Kaipapananna: No mausar a nasayaat ti kuarta, makatulong dayta ta mangnayon iti kinatalged.

Lucas 12:15: “Uray no kasano kabaknang ti maysa a tao, ti biagna ket saan nga agdepende kadagiti adda kenkuana.”

Kaipapananna: Saan a kuarta ti kapatgan iti biag ken saan a dayta ti pakaisalakanan.

1 Timoteo 6:10: “Ti ayat iti kuarta ti ramut ti amin a kita ti makadangran a banag, ket gapu iti panangpennek ti dadduma iti daytoy nga ayat, tinallikudanda ti pammati ket nagsagabada iti adu nga ut-ot.”

Kaipapananna: Saan a dakes ti maaddaan iti kuarta. Ngem dagiti tattao a mangay-ayat iti kuarta—a nakapokusda iti panagbirok iti dayta—ket adu ti problemada, kas iti pannakadadael ti pamilia ken nakapuy a salun-at gapu iti sobra a panagtrabahoda.

Hebreo 13:5: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag.”

Kaipapananna: Imbes nga aramidentayo ti amin tapno laeng bumaknang, masiribtayo no kontentotayon kadagiti talaga a kasapulantayo.

Mateo 19:24: “Nalaklaka pay a lumsot ti kamelio iti abut ti dagum ngem ti baknang a sumrek iti Pagarian ti Dios.”

Kaipapananna: Inawis idi ni Jesus ti maysa a baknang nga agtutubo a lalaki nga agbalin a pasurotna. Nagkedked ta saanna a mapanawan dagiti kinabaknangna isu a nangpakdaar ni Jesus. Ti tao a mangyun-una iti kinabaknang ngem iti Dios mapukawna ti tsansana nga agbiag nga agnanayon.

a Dayta a bersikulo ket naipatarus met kas: “Ti ayat iti kuarta ti ramut ti amin a kita ti makadangran a banag.”