No Kasano a ti Bautismo Makaisalakan Kadatayo
“Ti pannakaitaneb . . . mangisalakan kadatayo.”—1 PEDRO 3:21, The Emphatic Diaglott.
1, 2. Aniat’ kasapulan sakbay a lumasat ti maysa iti bautismo iti danum?
NI Jehova addaan kadagiti espesipiko a pagannurotan kadagidiay agsapsapul ti pannakaisalakan. Masapul a magun-odanda ti umiso a pannakaammo, mangalagad ti pammati, agbabawi kadagiti basbasolda, makumberteda, mangaramidda ti dedikasionda iti Dios, ken agpasakopda iti bautismo kas manamati. (Juan 3:16; 17:3; Aramid 3:19; 18:8) Dagiti kandidato ti bautismo masapul a bigbigenda iti publiko a gaput’ daton ni Jesus nagbabawiandan ti basbasolda ken indedikardan ti bagbagida ken Jehova. Masapul a matarusanda met a ti dedikasion ken bautismo ti mangipabigbig kadakuada kas dagiti Saksi ni Jehova.
2 Ti intero nga urnos ti bautismo, agraman daytoy publiko a panangiyebkas ti pammati, ket nasken iti pannakaisalakan. (Roma 10:10) Pinatalgedan daytoy ni apostol Pedro idi a nagsurat: “Ti pannakaitaneb . . . mangisalakan kadatayo.” (1 Pedro 3:21, ED) Ngem kasanot’ eksakto a pannakaawattayo kadagitoy a sasao? Aniat’ ipakpakita ti konteksto?
No Kasano a Makaisalakan ti Bautismo
3. Iti kabukbukodanyo a sasao, kasanoyo a gupgopen ti 1 Pedro 3:18-21?
3 Impamatmat ni Pedro a kas napagungaren nga espiritu nangikaskasaba ni Jesus ti makailunod a mensahe kadagiti dakes nga espiritu iti pagbaludan, dagiti demonio a naikeddeng a sibabalud iti agnanayon a maipaay iti naindaklan nga aldaw a panangukom ni Jehova. Simmukirda babaen iti panaglasagda ken nakidennada kadagiti babbai “idi agur-uray ti atiddog nga anus ti Dios kadagidi aldaw ni Noe, idi maisagsagana pay di daong, isu a nakaisalakanan dagiti bassit gapu iti danum, kayatna a sawen, walo a kararua [ni Noe, ti asawama, dagiti annakna, ken dagiti assawada].” Innayon ni Pedro: “Isu a napaypayso a kaasping daytoy, ti pammautisar, a mangisalakan ita kadakayo, (a saanna [laeng a kasapulan a basta] ikkaten kadatayo ti rugit ti lasag, no di kas la dawat ti maysa a nasayaat a konsiensia iti Dios,) gapu iti panagungar ni Jesu-Kristo.”—1 Pedro 3:18-21; Genesis 6:1, 2; 2 Pedro 2:4; 2 Corinto 7:1.
4. Aniat’ tuktukoyen ni Pedro idi a kinunana, “Isu a napaypayso a kaasping daytoy”?
4 Aniat’ kayat a sawen ni Pedro idi a kinunana, “Isu a napaypayso a kaasping daytoy”? Kayatna a sawen a ti bautismo a naibangon iti pammati ket kaasping ti pannakaispal ni Noe ken ti pamiliana, a sitatalged a nailasat kadagiti dandanum ti layus a nangdadael kadagidiay adda iti ruar ti daong. No kasanot’ pannakasapul ni Noe ti pammati a mangibangon iti daong, amin dagidiay mabautisaran nga ad-adalan ni Jesu-Kristo ken dagiti saksi ni Jehova ti masapul a maaddaan ti pammati tapno maibturanda dagiti panangparigat a maipapaay kadakuada babaen iti daytoy awanan-pammati a lubong ken iti diosna, a ni Satanas a Diablo.—Hebreo 11:6, 7; 1 Juan 5:19.
5. Kasano a ti pannakaisalakan ket “gapu iti panagungar ni Jesu-Kristo”?
5 Ti mismo a bautismo ket saan nga isut’ mangisalakan. Ken nupay no masapul nga ‘ikkatentayo dagiti rugit ti lasag,’ no dayta laeng ket saan a makaisalakan kadatayo. Imbes ketdi, ti pannakaisalakan ket “gapu iti panagungar ni Jesu-Kristo.” Dagiti kandidato ti bautismo ti masapul a maaddaandat’ pammati a ti pannakaisalakan ket posible laeng gapu ta natay ti Anak ti Dios iti ipapatay kas daton ken isut’ napagungar. Masapul nga akseptarenda met ni Jesus kas Apoda nga addaan kinaturay a mangukom kadagiti sibibiag ken dagiti natay. “Isu adda iti makanawan ti Dios,” kuna ni Pedro, “nga idinto nga immuli sadi langit; a paiturayanda kenkuana dagiti anghel ken dagiti kinaturay ken dagiti pannakabalin.”—1 Pedro 3:22.
6. Tapno magun-odan ti nasayaat a konsiensia, aniat’ masapul a naaramidanen ti kandidato ti bautismo?
6 Innaig met ni Pedro ti bautismo iti “kasla dawat ti maysa a nasayaat a konsiensia iti Dios.” Tapno maaddaan ti nasayaat a konsiensia, ti kandidato iti pannakaitaneb ti masapul nga agbabawi kadagiti basbasolna, agbalbaliw manipud iti dakes a kurso, ken mangaramid ti awan panangikedkedna a dedikasion ken Jehova a Dios iti panagkararag baeten ken Jesu-Kristo. No ti nabautisaran a tao taginayonenna dayta a nadalus wenno nasayaat a konsiensia babaen ti pannakitunosna kadagiti pagalagadan ti Dios, isut’ agtalinaed iti naisalakan a kasasaad a di mangiyeg iti makailunod a panangukom ni Jehova.
Pannakakualipikar iti Bautismo
7. Maipapan iti bautismo, aniat’ naaramidan dagiti misionero ti Kakristianuan?
7 Idi imbaon ni Jesus dagiti paspasurotna a mangbautisar kadagiti adalan, saanna nga imbaga kadakuada a warwarsian dagiti di manamati a rinibribo. Ngem aniat’ inar-aramid dagiti misionero ti Kakristianuan? Maipapan iti India, insurat ni Jesuita a Francis Xavier idi 1545: “Idiay pagarian ti Travancore . . . iti las-ud laeng ti sumagmamano a bulan nakabautisarak ti nasursurok ngem sangapulo ribo a lallaki, babbai, ken ub-ubbing. . . . Napanak iti pinurunpurok ket pinagbalinko ida a Kristiano.” Saan nga isu daytat’ pamay-an ni Jesus a ‘panagaramid kadagiti Kristiano.’ Masapul a dagiti tattao ti makakualipikar iti bautismo.
8. Aniat’ kunaen dagiti makunkuna a sursurat ni Pablo maipapan kadagidiay mangiparparang ti bagida iti bautismo?
8 Uray pay dagidiay agkunkuna a Kristianoda kalpasan ti panawen dagiti apostol namatida a dagidiay mangiparparang ti bagida iti bautismo ti masapul a makaragpat kadagiti nainget a pagannurotan. Maipapan kadagita a kandidato ti bautismo, dagiti saan a Biblikal a sursurat a sieerrado a naipabiang ken apostol Pablo, ti agkuna: “Palubosanyo a dagiti ug-ugali ken kabibiagda ti masukimat . . . No awan asawada, bay-anyo a maadalda a di makiab-abig, no di ket sumrekda koma iti panagasawa a maibatay iti linteg. . . . No adda umay a balangkantis, bay-anyo a pagpanawanna ti kinabalangkantisna, wenno saan isut’ laksidenyo. No adda umay a managaramid ti ladladawan, bay-anyo a panawanna ti kasta a panggedanna, wenno saan isut’ laksidenyo. . . . Asinoman a nakaaramid kadagiti basbasol a di mainaganan, . . . ti maysa a managsalamangka, managar-arasaas, astrologo, mammuyon, wenno agus-usar ti salsalamangka a bersikulo wenno managorasion, . . . daydiay agar-aramid kadagiti anting-anting, mananggayuma, mammadles, managbasa ti gasat, mammalad . . . , bay-an a dagitoy ti mapaneknekan ti mabayag bassit . . . ket no panawanda dagita nga ar-aramid, awatenyo ida; ngem no saanda nga umanamong iti dayta, bay-anyo a mailaksidda.”
9. Apay a dagiti panglakayen ti kongregasion makisaritada iti tao nga agngayangay a mabautisaran?
9 Saan a sursuroten dagiti Saksi ni Jehova dagiti di nainkasuratan a sursurat kas ti kaad-adaw, ngem dagiti panglakayen ti mangang-angay ti pannakisarita kadagidiay agngayangay a mabautisaran. Apay? Tapno masigurado a dagitoy a tattao ket manamati a nakaragpat ti nadiosan a pagannurotan ken nakaaramiddan ti dedikasion ken Jehova. (Aramid 4:4; 18:8; 2 Tesalonica 3:2) Ti panangsalaysay ti salsaludsod iti libro nga Organisado a Mangitungpal ti Ministeriotayo ket makatulong a mangdeterminar no ti maysa a tao ket makakualipikaren iti bautismo. No addada punto a di nalawag kenkuana, wenno saanna pay a naitunos ti biagna kadagiti nadiosan a pagalagadan, maragsakan dagiti panglakayen a mangipaay ti naespirituan a tulong.
10. No tarigagayantay ti mabautisaran, ania a kababalin ti rebbeng nga adda kadatayo?
10 No addaantay ti panangipateg iti kinamanangaasi ti Dios a mangtulong kadatayo a makaadal kadagiti pangpanggepna, agbalintayto kas kadagiti tattao a kinaskasabaan ni Pablo idiay Antioquia, Asia Menor. Agpapan pay ibubusor dagiti Judio, “dagidi tattao ti nasnasion [dagiti Gentil] idi nangngegda daytoy [ti gundaway a pannakaawatda iti Dios], nagragsakda ket indaydayawda ti Sao ni Jehova, ket namatida amin dagidi natudingan iti biag nga agnanayon.” (Aramid 13:48) Dagita a namati nabautisaranda.
Bautismo kadagiti Agtutubo
11. Umiso kadi ti panangaramid ti dedikasion iti Dios kas maysa nga agtutubo, ken apay a kastat’ sungbatyo?
11 Dagidiay “natudingan iti biag nga agnanayon” ramanenna ti sumagmamano kadagiti agtutubo. Mabalin a pampanunoten a nupay ni Samuel ken ni Juan a Mammautisar ket naipaayda iti Dios sakbay ti pannakaiyanakda, saan a makapagaramid dagiti nagannak ti dedikasion para kadagiti annakda. (1 Samuel 1:11, 24-28; 2:11, 18, 19; Lucas 1:15, 66) Ngem kas resulta ti nasayaat a panangsanay iti Biblia, adu kadagiti agtutubo ti rumang-ay agingga iti bautismo. Maysa a kabsat a misionera a nabautisaran idi tin-edyer laeng ti nagsurat: “Para kaniak kasla naidedikarakon nga agserbi iti Namarsuak manipud iti mismo nga edad a pannakaammokon nga isut’ sibibiag, ngem gapu iti pananggun-od ti sumagmamano nga umiso a pannakaammo maipapan kenkuana ken iti pangpanggepna, kayatko ti mabautisaran kas makinruar a pammaneknek iti dayta a kinapudno. Nupay kasta, agduadua ni Nanangko no ammok met laeng ti adda nga ar-aramidek, gapuna insingasingna nga agurayak agingga nga adda pay sabali a sisasagana a mabautisaran.” Maysa a babai nga agtartarigagay a mabautisaran ti nakita, ket innayon ti kabsat a babai: “Awan dagiti klase a maipaay ti naisangsangayan a panangisuro para kadagiti kandidato kadagidiay nga al-aldaw, nupay ti dinutokan ti Sosiedad a Service Director . . . ti siaasi a nakitungtong kaniak maipapan ti kinaserioso ti al-alaek nga addang. Sigagagarak nga immanamong kadagiti amin a naiwayat a termino, ket iti maysa a nalawag nga agsapa iti Domingo ti Mayo 1921 siak ken [ti babai] ti nabautisaran.”
12. Kasanot’ panangmatmat ni Kabsat Russell iti dedikasion ti maysa a menor de edad?
12 Idi 1914, immawat ni C. T. Russell (a presidente idi ti Watch Tower Society) ti maysa a surat a sadiay insaludsod ti maysa a pada a Kristiano no ti 12-años nga anakna a lalaki ti rebbeng a madagdag a mangaramid ti dedikasion iti Dios. “No siak ti sika,” insungbat ni Russell, “diak nga ipapilit ti konsagrasion [dedikasion] kenkuana, ngem daytat’ ipasagepsepko iti panunotna kas ti kakaisuna nga umiso a kurso kadagiti isuamin a nasaririt a tattao a nakagteng iti pannakaammo iti Dios ken kadagiti naparabur a pangpanggepna . . . No awan ti konsagrasion awan pulos ti makagun-od ti biag nga agnanayon . . . Ti anakmo ket saan a masaktan iti konsagrasion, no di ket matulongan iti dakkel unay. . . . Asino ti makapagkuna a ti ubing nga agtawen sangapulo ket saan pay a naan-anay a makagteng iti panangipateg iti naan-anay a konsagrasion iti panunot ken sao ken aramid? No kumitaak iti nalikudan makitak a ti naan-anay a konsagrasionko ket immuna a naaramid a natataengan bassit—iti labes ti maikasangapulo ket dua a tawen.”
13. Aniat’ kinuna daytoy a pagbasaan kadagiti agtutubo agarup 94 a tawen ti napalabasen?
13 Kuna ti Zion’s Watch Tower iti Hulio 1, 1894: “Kadagiti amin nga ingungoten nga annak ken agtutubo a nangipaayen ti puspusoda iti Dios, ken inaldaw-aldaw a padpadasenda a sursuroten ni Jesus, ti WATCH TOWER ti mangkablaaw. Am-ammomi ti sumagmamano kadagiti ub-ubbing nga agayat ken Jesus, a di mababain nga agtakder a maipaay ken Jesus iti tengnga dagiti dadduma nga ub-ubbing a di agayat kenkuana wenno mangpadpadas a mangparagsak kenkuana; ken maingelda ken napudnoda iti Dios, uray isudat’ katkatawaanda ken kasla mulmulluongda iti imatang dagiti kaeskuelada a pangibagbagaanda ti naimbag a damag ti pagarian. Ket maragsakankamin a makakita ti sumagmamano kadagiti agtutubo, a situtureden a nangtallikud iti lubong ken kadagiti ambision ken ragragsakna, a nairaman kadagidiay matalek unay a [nangidedikaren] ti biagda iti Apo. Dadduma kadagiti katulonganmi iti opisina, agraman adu kadagiti naballigi a colporteurs, ket nakaub-ubing pay iti tawenda.” Uray no nakaub-ubingkayo pay, apay a dikay makisarita kadagiti dadakkelyo maipapan iti dedikasion ken Jehova a Dios?
Ti Akem dagiti Nagannak
14. Ania dagiti gunggona a tagiragsaken dagiti agtutubo a mangaramid ti dedikasion ken Jehova?
14 Usigenyo dagiti gunggona a tagiragsaken dagiti ub-ubbing nga umawat ti panangiwanwan dagiti nagannak nga agturong iti bautismo. (Efeso 6:4) Ti panagpampanunot kadagiti naespirituan a bambanag makatulong kadakuada a makalisi kadagiti silo ken pakaibalbaludan iti lubong. (1 Juan 2:15-17) Saandanto nga apiten ti napait nga ani a resulta ti ‘panagmula gapu iti lasag.’ (Galacia 6:7, 8) Gapu ta nasursuruanda nga agbiag ti nadiosan a panagbiag, ipakpakitada dagiti bunga ti espiritu ti Dios. (Galacia 5:22, 23) Gapu ta naidedikarda iti Dios, tagtagiragsakenda ti nasinged a pannakirelasion kenkuana. Ken agsipud ta naadalda ti “agtalek ken Jehova,” isudat’ iwanwanwan ti nailangitan a kinasirib ken magmagnada kadagiti dalan a makaay-ayo ken iti kinatalna.—Proverbio 3:5, 6, 13, 17.
15. Aniat’ maaramidan dagiti Kristiano a nagannak tapno mamolde ti biag dagiti annakda?
15 Yantangay ti dedikasion ken Jehova ket makagunggona kadagiti agtutubo, rebbeng nga aramiden dagiti Kristiano a nagannak ti amin a kabaelanda a mangmolde ti biag dagiti annakda. Kas ken Timoteo, masansan a mabalin a sursuruan dagiti agtutubo ti Kasuratan manipud kinamaladaga tapno ‘agtalinaedda kadagiti bambanag a nasursuroda ken pinatalgedanda.’ (2 Timoteo 3:14, 15) Dagiti nadiosan a nagannak ti mabalin a malawlawda dagiti annakda iti impluensia ti kabukbukodanda a mapagulidanan a panagbiag, nga itden kadagiti annakda nga agtutubo ti pannakaammo ti bukodda a pannakirelasion iti Dios, ti kapkapadasanda, ken ti nataengan a pangngeddengda. No umisot’ pannakaiturongna, dagitoy a panagregget ket saan a masayang kadagiti agtutubo.—Proverbio 22:6.
16. Aniat’ rebbeng a makita dagiti annakyo iti ulidan ken pannursuroyo?
16 Babaen iti ulidan ken panangisuro, tulonganyo dagiti annakyo a makakita no kasano kalawag ti panagiddiat ti organisasion ni Jehova ken ni Satanas. Ipakitayo kadakuada a saan a mabalin ti pannakikompromiso iti daytoy a lubong, a masapul a tallikudan dagiti Kristiano dagiti makaallilaw a bambanagna, dagiti dakes a ragragsak, ambision, ken pannakikuykuyog. (1 Corinto 15:33; 2 Corinto 4:2) Babaen iti kababalinyo, agraman ti panangisuroyo, ken ulidanyo, ipakitayo kadagiti agtutuboyo nga anian ti kinakawaw dagiti nailubongan a ragragsak, no kasanot’ pannakaiyaw-awan dagiti tattao iti lubong no iyar-arig kadagiti Saksi ni Jehova. Ilawlawagyo no kasanot’ panangiturong ti Dios kadakayo babaen iti nasantuan nga espirituna, a sinalimetmetannakayo tapno saankay a maiyaw-awan iti dana a mabalin a mangiturong iti pakariribukan, a sinustenernakayo kadagiti tiempo ti panagdukot ken panagladingit. Dikay koma agkamkamali iti panunot a no dagiti agtutubo nga annakyo ket mapalubosanda nga agtaray kadagiti nailubongan a dana ti kinatangsit, ambision, kinaloko, ken kinamaag, agbalindanto a manamati. Sakbay a masiluan daytoy a lubong dagiti annakyo, salaknibanyo ida manipud kadagiti dakes nga impluensiana ken tulonganyo ida a mangisentro kadagiti panagayatda ken namnamada ken Jehova.
Kumita iti Labes ti Bautismo
17. (a) Apay a dadduma kadagiti nabautisaranen a Kristiano ket matnagda iti naespirituan? (b) Kasanot’ rebbeng a panangmatmattayo iti dedikasiontayo?
17 Ubing man wenno lakayen, awan duadua ti kandidato iti bautismo kayatna ti agtalinaed a matalek ken Jehova. Gapuna apay a dadduma kadagiti nabautisaranen a Kristiano ti matnag manen iti naespirituan? Nupay nagduduma a makagapu ti nairaman, kasla adda maysa a kangrunaan a makagapu—ti saanda a pannakaawat iti amin a kaipapanan ti dedikasion. Daytat’ saan a maysa a panangidedikar iti bagitayo iti maysa a trabaho. Daytat’ mamagbalin kadatayo nga okupado ngem dinatay pagbalinen a naespirituan a tattao. Kasapulan a laglagipentayo a dedikadotayo saan nga iti maysa a trabaho no di ket iti maysa a Persona—ni Jehova a Dios. Daytoy ti makatulong kadatayo a mangliklik iti biddut a panangmatmat iti dedikasiontayo kas nakaiyugalian laeng nga addang a masapul nga alaentayo sakbay nga agtuloy iti trabaho. Ti panagdedikar ti rebbeng a matmatan kas iseserrek iti maysa a nasken a pannakirelasion a masapul kanayon a saluadan ken taginayonen. Iti daytoy a banag, addaantay ti ulidan ni Jesu-Kristo. Iti inna panangiyebkas ti naimpusuan a kababalinna idi imparangna ti bagina ken Jehova ket isuda dagitoy a propetiko a sasao: “Umayak . . . Pagragsakak nga aramiden ti pagayatam, O Diosko, wen, ti lintegmo adda iti uneg ti pusok.”—Salmo 40:6-8; Hebreo 10:5-10.
18. Kasano a ti linteg ti Dios adda iti “uneg ti puso” ni Jesus?
18 Kasano a ti linteg ni Jehova adda iti “uneg ti puso” ni Jesus? Imbagana iti maysa nga eskriba a Judio a ni Jehova a Diostayo ket maymaysa ken awan sabalin, gapuna ipagpaganetgetna ti kinatan-ok ni Jehova. Kalpasanna impakita ni Jesus a ti kababagas ti linteg ti Dios ket buklen ti panangayat ken Jehova iti amin a pusotayo, pannakaawattayo, ken pigsatayo, bayat nga ay-ayatentay met ti padatayo a tattao kas ti bagitayo. (Marcos 12:28-34) Daytat’ kangrunaan a rason no apay a maikuna ni Jesus, ‘Pagragsakak nga aramiden ti pagayatan ti Dios.’ Nabalinanna ti nagtalinaed iti kurso ti kinamatalek agpapan pay kadagiti kadadakkelan a suot ken panagsagaba, saan laeng a gapu ta nakitana daytoy kas nasayaat a trabaho no di ket gapu ta isut’ addaan ti nasinged a relasionna ken Jehova a Dios. No umas-aspingtay met a bigbigen ti kinatan-ok ni Jehova ken isut’ ayatentayo iti di magessat a kinasinged, agbiagtayto a maitunos iti dedikasion ken bautismotayo.
19. Aniat’ koneksion ti pannakirelasiontayo ken Jehova ken iti ar-aramidentayo a trabaho?
19 Siempre, adda koneksion ti relasiontayo iti Dios ken iti trabahotayo. Iparparangarangtay ti ayattayo ken Jehova babaen ti trabahotayo a panangikaskasaba ti Pagarian. Gapu itoy, daydi pimmusayen a Grant Suiter, a dati a kameng ti Manarawidwid a Bagi dagiti Saksi ni Jehova, ti nagsurat a naminsan: “Bayat a dengdenggek [ti maysa nga agdaldaliasat a manangaywan] nga agsasao maipapan kadagiti pribilehio ti panagserbi ken Jehova ken ti responsabilidad a mangaramid iti dayta, nabigbigko no aniat’ rebbeng nga aramidek ken no ania ti kayatko nga aramiden. Gapuna nangaramidak ti personal a dedikasion ken Jehova, ken maigiddato iti dayta dagiti dadduma a miembro ti pamiliami ti nangaramid met ti kasta. Idi Oktubre 10, 1926, idiay San Jose, California, sangsangkamaysami a nangisimbolo ti dedikasionmi ken Jehova a Dios babaen ti pannakaitaneb iti danum. . . . Kalpasan ti bautismo . . . kuna ni tatangko iti panglakayen a mangay-aywan iti bautismo: ‘Dakayo a gagayyem ti rumrummuar nga addaan kadagiti literatura, saan kadi? Kayatmi met nga aramiden dayta a trabaho, itan.’ Gapuna ti pamiliami ket nangrugi iti tay-ak ti ministerio.” Itatta, dagiti kualipikado a tattao mangrugida a maaddaan ti nabagas a pannakiraman iti tay-ak ti serbisio uray pay sakbay ti pannakabautisarda.
Ti Bautismo Makaisalakan Kadatayo
20, 21. (a) Iti ania a pamay-an a ‘matantandaan’ dagiti ad-adipen ni Jehova? (b) Ania daytoy a “tanda,” ket ti panangikut iti dayta kaipapananna ti ania?
20 Babaen kadagiti ar-aramidtayo, maipakitatayo a “kukuanatay ni Jehova.” Wen, ti pannakaisalakan ket agpannuray iti panagtrabaho a simamatalek kas dagiti dedikado nga ad-adipenna! (Roma 6:20-23; 14:7, 8) Idi unana, masansan a dagiti ad-adipen ti mamarmarkaan iti muging. Babaen iti trabaho a panangaskasaba itatta, ti antitipiko a ‘lalaki a nakalienso’—ti natda kadagiti napulotan a pasurot ni Jesus—ti ‘mangtantanda’ kadagidiay makalasat iti panungpalan daytoy a sistema. Iti daytoy a trabaho dagiti napulotan ket tultulongan dagiti kakaduada, a “sabsabali a karnero.” (Ezequiel 9:1-7; Juan 10:16) Ket ania ti “tanda”? Isu dayta ti ebidensia a datayo ket dedikado ken Jehova ken nabautisaranen nga ad-adalan ni Jesus nga addaan ti kas ken Kristo a personalidad.
21 Nangnangruna itatta a nasken a maaddaantayo ti “tanda” ken taginayonen dayta, ta nakaun-unegtay unayen iti “panawen ti panungpalan.” (Daniel 12:4) Tapno maisalakan masapul nga ‘agibturtayo agingga iti panungpalan’ ti agdama a biagtayo wenno daytoy a sistema. (Mateo 24:13) Babaen laeng iti panagtalinaedtayo kas dagiti matalek a saksi ni Jehova a ti bautismo makaisalakan kadatayo.
Dagiti Saludsod a Pangrepaso
◻ Tapno maisalakan, aniat’ kasapulan kadatayo?
◻ Apay a dagiti panglakayen makisaritada kadagidiay agngayangay a mabautisaran?
◻ Aniat’ mabalin nga aramiden dagiti nagannak tapno maikkan dagiti annakda ti naespirituan a pannakaiwanwan a mangiturong iti bautismo?
◻ Mangar-aramidtay aya ti dedikasion iti maysa a trabaho?
◻ Kasano a ti bautismo makaisalakan kadatayo?
[Ladawan iti panid 16]
Ammoyo kadi no kasano a ti bautismo umasping iti pannakaitalimeng ni Noe ken ti pamiliana iti daong?
[Ladawan iti panid 18]
Ti dedikasion ken bautismo gunggonaanna dagiti agtutubo. Ammoyo kadi no kasano?