Aniat’ Mangpawil Kadakayo a Mabautisaran?

“Adtoy! Ti danum; ania ti makapawil kaniak a mabautisaran?”​—ARAMID 8:36.

1. Aniat’ mapaspasamak idiay dalan iti nagbaetan ti Jerusalem ken Gaza?

NAGSAO ti anghel ni Jehova, ket adda banag a napateg unay a mapaspasamak iti dalan idiay let-ang iti nagbaetan ti Jerusalem ken Gaza. Situtugaw iti maysa a karuahe nga agtartaray isut’ maysa nga Etiope nga agbasbasa iti Kasuratan. Di nagbayag adda sabali a lalaki nga agtartaray iti sibay ti sasakayan. “Maawatam aya ti basbasaem?” insaludsodna. “Kasano ti pannakabalinko,” insungbat ti Etiope, “no awan ti mangisuronto kaniak?” Dayta a panangisuro ti impaay ni Felipe a managebanghelio, nga isut’ imbaon ti anghel. Apaman a nakaluganen iti karuahe, nangrugi ni Felipe babaen iti padto nga insurat ni Isaias ket inwaragawagna “ti naimbag a damag maipapan ken ni Jesus.”

2, 3. (a) Kasanot’ panagtignay ti Etiope iti naimbag a damag? (b) Ania a salsaludsod ti pinataud daytoy a pasamak?

² Iti maysa a paset ti dalan, impukkaw ti Etiope: “Adtoy! Ti danum; ania ti makapawil kaniak a mabautisaran?” Iti dayta, imbilinna nga agsardeng ti karuahe. Ket immulogda a dua idi danum ket ni Felipe ti nangbautisar kenkuana. Kalpasanna ti espiritu ni Jehova ti nangiturong iti managebanghelio iti sabali a lugar, ket ti Etiope siraragsak a nagtuloy iti dalanna.​—Aramid 8:26-39.

³ No makitimtimpuyogkayo kadagiti Saksi ni Jehova ngem saankay pay a nabautisaran, dagitoy a pasamak ti mangtignay kadakayo nga agsaludsod: Apay a ti Etiope ket insigida a nabautisaran? Kasanot’ rebbeng a pannakaaramid ti bautismo? Simbolo dayta ti ania? Ken aniat’ makapawil kaniak a mabautisaran?

Di Nasapa Unay a Nabautisaran

4. Asino daytoy nga Etiope?

⁴ Yantangay ti Etiope “napan a nagdayaw idiay Jerusalem,” isu idin ti maysa a nakugiten a proselita a Judio. Isut’ maysa nga “eunuko” ngem saan nga iti nailasagan a kaipapananna, ta dagiti lallaki a nakapon a seksual ket saanda a maawat iti kongregasion ti Israel. (Deuteronomio 23:1) Iti kasona, ti “eunuko” isingasingna nga isut’ maysa nga opisial, ta isu ‘ti mannakabalin babaen ni Reina Candace dagiti Etiope ken isut’ agaywan iti isuamin a gamengna.’​—Aramid 8:27.

5. Apay a ti eunuko nga Etiope ti mabalin a mabautisaran nga insigida?

⁵ Ti Etiope ket maysa a tao ti nasnasion. Yantangay isut’ nakumberte iti relihion a Judio, nupay kasta, isut’ mabalin a mabautisaran kas adalan ni Kristo sakbay a ti mensahe ti Pagarian nagturong kadagiti di nakugit a Gentil kas ken Cornelio idi 36 K.P. Kas Judio a proselita, ammo ti Etiope maipapan iti Dios ken ti Saona, nupay kasapulanna pay ti naespirituan a tulong. Gapuna naiturong ni Felipe a mangasaba iti daytoy a tao ken mabalinna a bautisaran sakbay a napan ti naimbag a damag kadagiti Gentil.

Bautismo kadagiti Immuna a Kristiano

6. Kasano a nabautisaran daydi Etiope, ken apay a kastat’ sungbatyo?

⁶ Kasano a nabautisaran daydi Etiope? Ti sao a “bautisar” ti naggapu iti termino a Griego a ba·ptiʹzo, a kayatna a sawen “mairarem, maibatok.” Maysa a porma iti isu met laeng a sao ti nausar para iti “panangibatok” idiay 2 Ar-ari 5:14 iti Griego a Septuagint. Ket nasken unay a ti Etiope ti nangidawat iti bautismo idi isu ken ni Felipe nakagtengda iti maysa a “bagi ti danum.” Maipaay iti bautismo, “immulogda a dua idi danum,” kalpasanna “simmang-atdan iti danum.” (Aramid 8:36-39) Gapuna, ti eunuko nga Etiope ket nabautisaran babaen ti pannakaitanebna iti danum.

7. Aniat’ adda a pakpakauna iti bautismo babaen iti pannakaitaneb iti danum?

⁷ Ni Jesus mismo ti nabautisaran babaen ti pannakaitanebna iti danum. Gapuna, kalpasan ti bautismona idiay Karayan Jordan, naikuna nga isu ti “simmang-at nanipud iti danum.” (Mateo 3:13, 16) Kinapudnona, kas nasayaat a lugar a pagaramidan kadagiti bautismo, nangpili ni Juan Bautista ti lugar idiay Ginget ti Jordan a dumna iti Salim. Apay? “Ta adda idiay idi ti adu a danum.” (Juan 3:23) Ngarud dagiti Kasuratan autorisaranda ti bautismo iti maysa a bagi ti danum.

8. Maipapan iti bautismo, aniat’ maipatotayo manipud ar-aramid dagiti Fariseo ken dadduma a Judio?

⁸ Mabalintay ti umadaw ti sumagmamano a nasin-aw a konklusion maipapan iti bautismo no usigentayo ti kustombre dagiti Fariseo ken dagiti dadduma a Judio. Kuna ti mannurat ti ebanghelio a ni Marcos: “No aggapuda idiay tindaan, no saanda a warsian [Griego, ran·tiʹzo] ti bagida saanda a mangan; ken sabsabali pay nga adu a banag ti adda nga inawatda tapno surotenda, dagiti bautismo [ba·pti·smousʹ] kadagiti kopa ken dagiti harra ken baso a kobre.” (Marcos 7:3, 4) Dagitoy a tattao ti nakasansanto a mangwarwarsi ti bagbagida sakbay a manganda no aggapuda idiay tindaan. Ngem bautisaranda, wenno itanebda iti danum, dagiti nadumaduma a bambanag nga ar-aramatenda bayat dagiti pannangan.

9. Aniat’ kinuna ni Tertullian maipapan iti bautismo?

⁹ Uray kalpasan ti pannakastreken ti apostasia, ti “ama ti simbaan” a ni Tertullian (c. 160-230 K. P.) ti nagkuna maipapan iti bautismo: “Awanen ti aniaman nga ad-adda a mamagbalin a natangken iti ulo dagiti tattao ngem ti kinasimple dagiti banag a nasantuan a makitkita iti aramid, no maidilig iti kinaranga a naikari iti dayta iti mapasamak; gapuna manipud laeng iti daytoy a banag, nga uray no nakasimsimple, awan aniaman a kinagarbo, nga awan aniaman a naisangsangayan a panagsagana, a ti kamaudiananna, awan kuarta a ginastosna, ti maysa a tao maitaneb iti danum, ket kagiddan ti panangiyebkas ti sumagmamano a sasao, isut’ mawarwarsian, kalpasanna umaon manen, a di unay (wenno amangan no di pay ketdi) nadaldalus, ti mapasamak a pannakaragpat ti kina-agnanayon [ti biag] ti ad-adda a di nakapapati iti panangmatmatda.” Kitaenyo ta kinuna ni Tertullian, “a ti maysa a tao maitaneb iti danum . . . kalpasanna rumkuas manen.”

10. Aniat’ kuna dagiti eskolar maipapan iti immuna a modo ti Nakristianuan a bautismo?

¹⁰ Ipakpakita met dagiti eskolar a dagiti Kristiano ti dati a mangbabautisar kadagiti tattao babaen iti naan-anay a panangitaneb iti danum. Maysa a nalatak nga enciclopedia a Pranses ti nagkuna: “Dagiti immuna a Kristiano ti nangaw-awat ti bautismo babaen iti panangitaneb uray sadino a pakasarakan ti danum.” Ken kuna ti The Catholic Encyclopedia: “Ti kadadaananen a porma a masansan a maus-usar ket awan duadua isu ti panangitaneb.”​—Tomo II, panid 261 (edision ti 1907).

Mangisuro ken Mangbautisar

11. Ni Jesus ti nangted ti ania a bilin kadagiti adalanna?

¹¹ Sakbay a mabautisaran ti maysa a tao, masapul nga isut’ makagun-od ken agtignay iti umiso a pannakaammo. Nagbalin a nalawag daytoy idi kinuna ni Kristo kadagiti pasurotna: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo. Ket, adtoy! addaak kadakayo nga agnanayon agingga iti panungpalan ti sistema dagiti bambanag.”​—Mateo 28:19, 20.

12. Aniat’ kaipapanan ti pannakabautisar “iti nagan ti Ama”?

¹² Ti pannakabautisar iti “nagan ti Ama” kayatna a sawen a ti kandidato ti bautismo bigbigenna ti saad ken autoridad ti Dios. Ni Jehova ti mabigbigbig kas “ti Kangatuan iti amin a daga,” ti Namarsua ken ti Soberano ti Uniberso. (Salmo 36:9; 83:18; 2 Ar-ari 19:15) Ti kasta a tao akseptarenna met ni Jehova kas ti Ukomna, ti Manangted-Lintegna, ken Arina.​—Isaias 33:22; Salmo 119:102; Apocalipsis 15:3, 4.

13. Ti pannakabautisar ‘iti nagan ti Anak’ kaipapananna ti ania?

¹³ Ti pannakabautisar ‘iti nagan ti Anak’ kayatna a sawen ti panangbigbig ti saad ken autoridad ni Kristo ken isut’ bigbigen kas daydiay impaay ti Dios a “katupag a subbot.” (1 Timoteo 2:5, 6) Kalpasan ti ipapatay ni Jesus kas manangsalimetmet ti kinatarnawna, “ti Dios intan-okna iti kangatuan unay,” ket dagidiay agtartarigagay a mabautisaran ti masapul a mangbigbig ken Kristo kas “Apo tapno pakaidayawan ti Dios Ama.” (Filipos 2:9-11) Masapul nga akseptarenda met ni Jesus kas ti “Matalek a Saksi” ni Jehova ken kas “Ari dagiti ar-ari.”​—Apocalipsis 1:5; 19:16.

14. Ti bautismo ‘iti nagan ti nasantuan nga espiritu’ kasapulanna ti ania?

¹⁴ Ti maysa nga indibidual ti masapul met a mabautisaran ‘iti nagan ti nasantuan nga espiritu.’ Masapul a bigbigenna a ti nasantuan nga espiritu ket saan a maysa a persona no di ket isut’ aktibo a puersa ti Dios, a nausar iti panamarsua, a nangpaltiing kadagiti mannurat ti Biblia, ken dadduma pay. (Genesis 1:2; 2 Samuel 23:1, 2; 2 Pedro 1:21) Ti espiritu ni Jehova ti masapul a bigbigen kas nasken no kayattayo a matarusan “dagiti pay nauneg a bambanag ti Dios” ken maipamatmat dagiti nadiosan a bunga ti “ayat, rag-o, talna, mabayag a panagitured, kinaasi, kinaimbag, pammati, kinaanus, panagteppel.” (1 Corinto 2:10; Galacia 5:22, 23) Ken kasta met, Masapul nga annugoten a ti espiritu ti Dios ket kasapulan a mangitultuloy iti trabaho a panangikaskasaba ti Pagarian.​—Joel 2:28, 29.

No Aniat’ Isimsimbolo ti Bautismo

15. Apay a ti Nakristianuan a bautismo saanna nga ugasan ti basbasol?

¹⁵ Babaen iti tulong ti nasantuan nga espiritu a nangbautisar ni Juan a Mammautisar kadagiti tattao. (Aramid 13:24) Binautisaranna ida, saan a tapno ugasan dagiti basbasolda, no di ket kas simbolo ti panagbabawida. (Aramid 19:4) Ni Juan binautisaranna met ni Jesus, a “saan a nagaramid iti basol.” (1 Pedro 2:22) Ket ni Ananias inggunamgunamna ken ni Saulo ti Tarso: “Tumakderka, ket pabautisaranka ket ugasam dagiti basbasolmo nga awagam ti naganna [ni Jesus].” (Aramid 22:12-16) No kasta, ti Nakristianuan a pannakaitaneb iti danum saanna nga ugasan dagiti basbasol. Saan a ti bautismo no di ket ti pannakaiparukpok ti dara ni Jesus ken ti ‘panangawag iti naganna’ ti mamagbalin a posible iti pannakapakawan.​—Hebreo 9:22; 1 Juan 1:7.

16. (a) Yantangay ti bautismo saanna nga ugasan ti basbasol, aniat’ isimsimbolona? (b) Iti panangiladawan, aniat’ mapasamak no ti maysa a tao ket mabautisaran?

¹⁶ Nupay ti Nakristianuan a bautismo ket saanna nga ugasan ti basbasol, daytat’ simbolo a mangipampamatmat a ti indibidual a maitantaneb iti danum ket nakaaramiden ti awan kondisionna a dedikasion ken Jehova a Dios babaen ken Jesu-Kristo. (Idiligyo ti Mateo 16:24.) Ti panangidedikar kayatna a sawen “ti panangiwaragawag, panangpatalged, panangipaay.” Ti dedikasion iti Dios tuktukoyenna ti aramid a sadiay ti maysa a tao ket awan panangikedked a naisina babaen iti maysa a tulag nga agaramiden ti pagayatan ti Dios babaen ken Kristo. Iti makailadawan a pamay-an, no ti kandidato ti bautismo ket apagbiit a “naitanem” iti uneg ti danum ken kalpasanna naaon iti dayta, isut’ natayen iti napalabas a panagbiagna ket napagungar iti baro a wagas ti panagbiag, tapno aramiden ti pagayatan ni Jehova nga awan panangikedkedna.​—Idiligyo ti Roma 6:4-6.

17. Apay a di umiso ti panangbautisar iti maladaga?

¹⁷ Nalawag, ti bautismo ket maysa a serioso nga addang. Ti panangbautisar iti maladaga ket di umiso agsipud ta ti maladaga awan pannakaawatna, di makapagdesision, ken saan nga agbalin nga adalan. (Mateo 28:19, 20) Dagidiay nabautisaran bayat ti panagministerio ni Felipe idiay Samaria ket “lallaki ken babbai,” saan a dagiti maladaga. (Aramid 8:4-8, 12) Ti bautismo ket agpaay kadagidiay nataengan metten a makaadal, mamati, ken mangalagad ti pammati. (Juan 17:3; Aramid 5:14; 18:8; Hebreo 11:6) Gapu itoy, ni Augustus Neander ti nagsurat: “Ti pammati ken bautismo ket kanayon nga agkuykuyog iti maysa ken maysa; ket gapu itoy mapaneknekan un-unay . . . a ti aramid a panangbautisar ti maladaga ket saan a pagaammo [idi umuna a siglo K.P.]. . . . A daytat’ immuna a nailasin kas apostoliko a tradision bayat ti maikatlo a siglo, ket maysa a pammaneknek a kontra imbes nga umayon iti panangbigbig iti apostoliko a namunganayanna.”​—History of the Planting and Training of the Christian Church by the Apostles (New York, 1864), panid 162.

18. (a) Sigun iti Kasuratan, aniat’ kasapulan iti maysa nga agbalin a Saksi ni Jehova? (b) Ania nga ebidensia ti pammati ti mangipamatmat a ti maysa a tao ket mabalin a mabautisaranen? (c) Kasano a maipaganetget ti pammati iti subbot kadagiti kandidato ti bautismo?

¹⁸ Maulit-ulit a dakdakamaten ti Kasuratan ti pannakabautisar dagiti mammati. (Aramid 4:4; 5:14; 8:13; 16:27-34; 18:8; 19:1-7) Ngarud, iti panagbalin kas maysa kadagiti Saksi ni Jehova, masapul a ti maysa a tao agbalin a manamati​—daydiay mangalagad ti pammati ken mabautisaran. Uray pay sakbay ti bautismo, ti kasta a pammati ipamatmatna ti bagina iti nadiosan a kababalin, agtalek ken ni Jehova, makiraman iti trabaho a panangikaskasaba ti Pagarian, ken akseptarenna ti daton a subbot ni Jesus. Ti pammati iti subbot ti maipagpaganetget kadagiti kandidato iti bautismo, ta ti umuna kadagiti dua a saludsod nga isaludsod ti managpalawag kadakuada ket: “Gapu iti daton ni Jesu-Kristo, nagbabawiamon aya dagiti basbasolmo ken indedikarmon ti bagim ken Jehova a mangaramid iti pagayatanna?” Inton sungbatan ti indibidual dagiti saludsod iti wen ken natarusanna metten a ti dedikasion ken bautismona ti mangipabigbig kenkuana kas maysa kadagiti Saksi ni Jehova a naitimpuyog iti iturturong ti espiritu ti Dios nga organisasion santo laeng mapalubosan a mabautisaran iti danum.

Dedikasion iti Kararag

19. Apay nga aramiden ti dedikasion ken Jehova iti panagkararag?

¹⁹ Dagidiay agngayngayangay iti bautismo ti masapul a maaddaan pammati iti Dios ken ni Kristo. Ngem apay a kunaen dagiti Saksi ni Jehova a ti dedikasion iti Dios ti masapul a maaramid iti panagkararag? Agsipud ta maiyanatup ti panangiyebkas ken Jehova iti kararag ti desisiontayo a mangipaay kenkuana ti naipamaysa a debosion a maiparbeng kenkuana. (Deuteronomio 5:8, 9; 1 Cronicas 29:10-13) Kaawatan a babaen ti kararag nga impakaammo ni Jesus ti tarigagayna a mangipaay ti sagrado a serbisio a maipampamaysa iti nailangitan nga Amana. (Hebreo 10:7-9) Kinapudnona, ni Jesus “agkarkararag” uray pay kabayatan nga isut’ mababautisaran! (Lucas 3:21, 22) Gapuna nalawag a ti dedikasion iti Dios ti rebbeng nga aramiden babaen iti kararag.

20. Apay a mabalbalin a maikuna a dagiti immuna a Kristiano inggunamgunamda kadagiti baro nga adalan nga aramiden ti dedikasionda iti Dios iti panagkararag?

²⁰ Dagiti immuna a Kristiano kaawatan nga inggunamgunamda kadagiti baro nga adalan nga aramidenda ti dedikasion babaen iti panagkararag, ta iti kamaudianan uray pay ni Tertullian ti nagkuna: “Dagidiay ngangnganin sumrek iti bautismo ti rebbeng nga agkararag iti maulit-ulit a panagkararag, buyogen ti panagayunar, ken panagparparintumeng.” Iti nasapsapa pay, ni Justin Martyr (c. 100-165 K.P.) ti nagsurat: “Isalaysayko met ti wagas a panangideddedikarmi ti bagbagimi iti Dios inton napabarokamin babaen ken Kristo . . . Kas ti pannakaallukoy ken panamati dagiti adu a ti isursuro ken ibagbagami isut’ kinapudno, ken an-annuroten tapno makapagbiag a maitunos iti dayta, nasursuruanda nga agkararag ken idawat iti Dios a buyogen ti panagay-ayunar, a maipaay iti pannakapakawan ti basbasolda a napalabas, a dakami makipagkarkararag ken makipagay-ayunarkami a kaduada.”

21. Aniat’ mabalbalin, uray no ti panagaramid ti dedikasion iti panagkararag ket saan a naipagpaganetget idi nabautisarankayo adu a tawen ti napalabasen?

²¹ No ti panagaramid ti dedikasion iti panagkararag ti saan a naipaganetget idi nabautisarankayo adu a tawen ti napalabasen, di kayat a sawen dayta a di maawat ti bautismoyo. Uray kadagidiay nga al-aldaw, awan duadua adu ti kas iti daydiay maysa a tao a nakalawlawag a malaglagipna pay ti panagparintumengna ken panangaramidna ti dedikasion ken Jehova iti napasnek a panagkararag bayat nga isut’ ubing pay nasurok a 40 a tawen ti napalabasen. Ket kadagidiay a tiempo, uray no ti maysa a tao saan a nakaaramid nga immun-una ti dedikasion iti pormal a panagkararag, daytat’ inaramidna a banag a binuyogan ti kararag bayat a dagiti kandidato ti bautismo ken dagiti dadduma nagkararagda a sangsangkamaysa idi naited ti palawag maipapan iti bautismo iti aldaw a pannakaitanebna.

Apay a Dadduma Agkedkedda

22. Apay a dadduma agkedkedda a mabautisaran?

²² Gapu ta ti panagbalin a dedikado a saksi ni Jehova ket maysa a naragsak a pribilehio, apay a dadduma agkedkedda a mabautisaran? Ti kinakurang ti pudno nga ayat ket maysa a rason no apay a dadduma saanda nga agtulnog iti Sao ti Dios, suroten ti panangiturturong ni Jesus, ken mabautisaran. (1 Juan 5:3) Siempre, dagiti di bautisado a tattao masansan saanda nga ibagbaga a didanto suroten ti ulidan ni Jesus wenno agtulnog iti Dios. Imbes ketdi, maigamerda la unay kadagiti nailubongan nga ar-aramid a bassit tiempoda a maipaay kadagiti naespirituan nga ar-aramid. No daytoy met ti parikutyo, saan aya a nainsiriban no baliwanyo met dagiti ay-ayatenyo, dagiti interesesyo, ken raragpatenyo? Dagidiay pudno nga agayat iti Dios saanda a mabalin nga ayaten met ti lubong. (1 Juan 2:15-17) Ken dikay palubosan ti bagiyo a mailibay iti palso a rikna ti kinatalged babaen “iti panangallilaw dagiti kinabaknang.” (Mateo 13:22) Ti pudno a kinatalged ket masarakan laeng iti dedikado a pannakirelasion ken Jehova a Dios.​—Salmo 4:8.

23. Apay a dadduma agtukiadda a mangaramid ti dedikasion ken Jehova ken isimbolo dayta iti pannakaitaneb iti danum?

²³ Dadduma kunada nga ayatenda ti Dios ngem agkedkedda a mangaramid ti dedikasion agsipud ta pagarupda malisianda ti responsabilidad ket awanto ti sungsungbatanda. Kayatda ti agbiagto idiay Paraiso, ngem agingga ita bassit wenno awan pay ketdi ti ar-aramidenda maipapan iti dayta. (Proverbio 13:4) Dagita a tattao saanda a malisian nga adda sungsungbatanda agsipud ta ti responsabilidad ti immayen kadakuada idi nangngeganda ti sao ni Jehova. (Ezequiel 33:7-9) No mangaramidda koma ti dedikasion, maidemostrada koma a natarusanda ti pagayatan ti Dios ken sigagagarda a mangaramid iti dayta. Imbes a mangikabkabil ti nadagdagsen nga awiten kadakuada, ti kasta a kinatulnog awaganna ti bendision ni Jehova ket mangibunganto ti rag-o agsipud ta agbibiagda maitunos iti panagkunada nga isut’ ay-ayatenda.

24. Agpaay iti ania a rason a kaskasdi dadduma agkedkedda a mabautisaran?

²⁴ Ti panagrikna a kurang pay ti ammoda a mangilawlawag ti Kasuratan ti makagapu no apay a dadduma lislisianda ti bautismo. Ngem ti Etiope nga eunuko ti sisasagana a mangisimbolo ti dedikasionna iti Dios kalpasan ti pannakisarsaritana ken ni Felipe iti panagsakayda ti karuahe. Pudno unay, saan a masungbatan idi damo daydi Etiope amin a salsaludsod dagidiay nangisarsaritaanna ti kinapudno. Ngem ti pusona ti agliplipias iti panagyaman iti inna nangngeganen, ket isut’ di nagkedked gaput’ buteng: “Awan buteng ken ayat, no di ket ti ayat a nagdanunan paksiatenna ti buteng.” (1 Juan 4:18) Saan a ti ulo a napunno ti sungsungbat no di ket ti puso a napunno ti ayat ti mangtignay iti maysa a tao a mangaramid ti dedikasion iti Dios ken mabautisaran.​—Lucas 10:25-28.

25. Aniat’ namnamaen ni Jehova kadagidiay agkunkuna nga agayat kenkuana?

²⁵ No saankay pay a nabautisaran, saludsodanyo ti bagiyo: Aniat’ namnamaen ti Dios kadagidiay agkuna nga agayat kenkuana? Tarigagayanna ti naipamaysa a debosion ken sapsapulenna dagidiay agdayaw kenkuana “iti espiritu ken kinapudno.” (Juan 4:23, 24; Exodo 20:4, 5; Lucas 4:8) Ti eunuko nga Etiope ti nangipaay iti dayta a kita ti panagdayaw, ket saan a nagtaktak idi naaddaanen ti gundaway nga agpabautisar. Saan aya a rebbeng a pagbalinenyo ti dedikasion ken Jehova a maysa a banag a buyogen ti napasnek a panagkararag itattan ken saludsodan ti bagiyo: “Ania ti makapawil kaniak a mabautisaran?”

Salsaludsod a Pangrepaso

◻ Apay a ti eunuko nga Etiope ket mabalin a mabautisaran nga insigida?

◻ Aniat’ modo ti bautismo kadagiti immuna a Kristiano?

◻ Ti pannakabautisar ‘iti nagan ti Ama, ti Anak, ken ti nasantuan nga espiritu’ kayatna a sawen ti ania?

◻ Aniat’ isimsimbolo ti Nakristianuan a bautismo?

◻ Apay nga aramiden ti dedikasion ken Jehova iti panagkararag?

◻ Agpaay kadagiti ania a rason a dadduma agkedkedda iti dedikasion ken bautismo?