Nasimbeng Koma ti Panagpampanunotyo Bayat nga Umad-adani ti Panungpalan
1 Maulit-ulit a nadakamat iti Sao ti Dios nga umay ti aldaw ni Jehova “a kas iti mannanakaw”—kayatna a sawen, kellaat, giddato, di mapupuotan. (1 Tes. 5:2; Mat. 24:43; 2 Ped. 3:10; Apoc. 3:3; 16:15) “Gapu itoy,” kinuna ni Jesus, “paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.” (Mat. 24:44) Kasano a makapagtalinaedtayo a nasalukag iti naespirituan bayat nga umad-adani ti panungpalan? Masarakan ti sungbat iti daytoy a naipaltiing a pammagbaga: “Nasimbeng koma ti panagpampanunotyo.”—1 Ped. 4:7.
2 Ti kinasimbeng ti panunot ramanenna ti panangmatmat kadagiti bambanag sigun iti panangmatmat ni Jehova. (Efe. 5:17) Tulongannatay dayta a mangibilang iti bagbagitayo kas “ganggannaet ken temporario nga agnanaed” iti tengnga ti agdama a sistema ti bambanag. (1 Ped. 2:11) Tulongannatay dayta a mangilasin no ania ti pudpudno a napateg, mangipangruna kadagiti banag a nasken nga iyun-una, ken mangaramid kadagiti umiso a pangngeddeng.—Fil. 1:10.
3 Mangipasdek Kadagiti Naespirituan a Kalat: Ti panangipasdek ken panangragpat kadagiti naespirituan a kalat tulongannatayo a maaddaan iti nasimbeng a panagpampanunot. Adda kadi dagiti naespirituan a kalatyo a madama a ragragpatenyo? Ikagkagumaanyo kadi a basaen nga inaldaw ti Biblia, tumabuno kadagiti amin a Nakristianuan a gimong, basaen ti tunggal ruar Ti Pagwanawanan ken Agriingkayo!, wenno nalabit parayrayen ti pannakipasetyo iti ministerio? No mangipasdekkayo kadagiti kalat a maitutop kadakayo, iporsegiyo a ragpaten dagita, ken idawatyo ken ni Jehova a bendisionanna ti panagreggetyo, mabalin a masdaawkayto kadagiti resultana.
4 Dinamag ti maysa a panglakayen iti agkabannuag a pagassawaan no ania dagiti naespirituan a kalatda. Ti saludsod ti nangipabigbig kadakuada a kabaelanda ti agpayunir no pagbalinenda a simple ti panagbiagda ken iwakasda ti makapadagsen nga utangda. Inkeddengda nga aramiden a kalat dayta. Inkagumaanda a binayadan ti utangda ken liniklikanda dagiti di nasken nga aktibidad a mangag-agaw iti panawen ken pigsada. Eksakto a makatawen kalpasanna, naragpatda ti kalatda. Ania ti resultana? Kuna ti asawa a lalaki: “Awankami koma iti agdama a kasasaadmi no saankami a nangipasdek kadagiti kalat. Naragragsakkami itan. Nataltalna ken nasaysayaaten ti biagmi. Talaga a makagunggona ken addaan iti napaypayso a panggep.”
5 Bayat nga ur-urayentayo ti aldaw ni Jehova, agtalinaedtayo koma a nasalukag iti naespirituan babaen ti panagbiag a buyogen ti nasimbeng a panagpampanunot, nga ipamaysatayo nga aramiden ti pagayatan ti Dios.—Tito 2:11-13.