ANTIKRISTO

Daytoy a sao kaipapananna ti “maibusor ken (wenno imbes a ni) Kristo.” Agparang dayta iti dagup a lima a daras, pangmaymaysa ken pangadu, nga addada amin iti dua kadagiti surat ni Juan.

Ti suheto saan a kabbaro kadagiti Kristiano idi insurat ni Juan dagiti suratna (a. 98 K.P.). Kuna ti 1 Juan 2:18: “Ubbing, daytoy ti kamaudianan nga oras, ket, kas iti nangngegyo nga umay ti antikristo [Gr., an·tiʹkhri·stos], uray pay ita timpuaren ti adu nga antikristo; manipud itoy a kinapudno magun-odantayo ti pannakaammo a daytoy ti kamaudianan nga oras.” Ipakita ti sasao ni Juan nga adu dagiti indibidual nga antikristo, nupay mabalin a buklenda amin a sangsangkamaysa ti maysa a ragup a persona a naawagan “ti antikristo.” (2Jn 7) Ti pannakaaramat ti sao nga “oras” kas tumukoy iti maysa a periodo ti tiempo, uray no pangababaen wenno di masinunuo ti kaatiddogna, ket naiparangarang iti dadduma pay a surat ni Juan. (Kitaenyo ti Jn 2:4; 4:21-23; 5:25, 28; 7:30; 8:20; 12:23, 27.) Ngarud saanna a kinedngan nga iti masanguanan a tiempo laeng ti panagparang, kaadda, ken ar-aramid ti kasta nga antikristo no di ket impakitana a ti antikristo adda idin ken agtultuloy nga adda.​—1Jn 4:3.

Pakabigbigan. Nupay napalalo ti panagregget kadagidi naglabas tapno inaig “ti antikristo” iti maysa a tao, kas kada Pompey, Nero, wenno Muhammad (a daytoy naud-udi a tao insingasing ni Papa Inocente III idi 1213 K.P.), wenno iti espesipiko nga organisasion, kas iti panangmatmat dagiti Protestante maipapan iti “antikristo” nga agaplikar dayta kadagiti papa, ipakita ti naipaltiing a sasao ni Juan a nalawa ti pagaplikaran ti termino, a saklawenna amin dagidiay mangilibak a “ni Jesus isu ti Kristo,” ken mangilibak a ni Jesus isu ti Anak ti Dios nga immay “a naglasag.”​—1Jn 2:22; 4:2, 3; 2Jn 7, NE, NIV; idiligyo ti Jn 8:42, 48, 49; 9:22.

Ti panangilibak ken Jesus kas Kristo ken kas Anak ti Dios agkasapulan a saklawenna ti panangilibak iti aniaman wenno kadagiti amin a sursuro ti Kasuratan maipapan kenkuana: ti nagtaudanna, ti saadna iti urnos ti Dios, ti panangtungpalna iti padpadto iti Hebreo a Kasuratan kas naikari a Mesias, ti ministerio ken sursuro ken padpadtona, kasta met ti aniaman a panangbusor wenno panagregget a mangsandi kenkuana iti saadna kas nangato a Padi ken Ari a dinutokan ti Dios. Nabatad daytoy iti dadduma pay a teksto, a, nupay saanda nga inaramat ti termino nga “antikristo,” nangnangruna a mangyebkas iti isu met laeng kapanunotan. Gapuna, kinuna ni Jesus: “Daydiay awan iti dasigko bumusor kaniak, ket daydiay saan a makipagurnong kaniak agiwara.” (Lu 11:23) Ipakita ti 2 Juan 7 a ti kakasta mabalin nga agtignayda kas manangallilaw, ket ngarud ti “antikristo” ramanenna dagidiay “ulbod a Kristo” ken “ulbod a mammadto,” kasta met dagidiay agaramid iti mannakabalin nga ar-aramid iti nagan ni Jesus ket kaskasdi nga imbilangna ida kas “agar-aramid ti kinakillo.”​—Mt 24:24; 7:15, 22, 23.

Maigapu iti pagannurotan ni Jesus a ti naaramidan kadagiti pudno a pasurotna ket naaramidan kenkuana (Mt 25:40, 45; Ara 9:5), ti termino ramanenna la ketdi dagidiay mangidadanes kadagita, a kaipapananna a ramanenna ti simboliko a “Babilonia a Dakkel.”​—Lu 21:12; Apo 17:5, 6.

Espesipiko a dakamaten ni Juan dagiti apostata kas karaman kadagidiay kameng ti antikristo babaen ti panangtukoyna kadagidiay ‘rimmuar manipud kadatayo,’ a pinanawanda ti kongregasion Kristiano. (1Jn 2:18, 19) Ramanenna ngarud “ti tao ti kinakillo” wenno “anak ti pannakadadael” a dineskribir ni Pablo, kasta met dagiti “ulbod a mannursuro” a kondenaren ni Pedro gapu iti panangbuangayda kadagiti makadadael a sekta ken isuda a ‘naglikud uray pay iti makinkukua a nanggatang kadakuada.’​—2Te 2:3-5; 2Pe 2:1; kitaenyo ti TAO TI KINAKILLO.

Umasping met a naipakita dagiti pagarian, nasion, ken organisasion kas paset ti antikristo iti simboliko a pannakadeskribir iti Apocalipsis 17:8-15; 19:19-21.​—Idiligyo ti Sal 2:1, 2.

Kadagiti amin a kasasaad a nadakamat, dagidiay mangbukel iti antikristo naipakita nga agturongda iti pannakadadael inton agangay kas supapak iti panangbusorda.