LEKSION 26
Apay nga Adda Kinadakes ken Panagrigrigat?
No adda dakes a mapasamak, normal laeng a maisaludsod ti maysa, “Apay?” Makaparagsak ta ibagbaga ti Biblia ti sungbat dayta a saludsod!
1. Kasano nga inrugi ni Satanas ti kinadakes ditoy lubong?
Nagrebelde ni Satanas a Diablo iti Dios. Kayat ni Satanas a kontrolen ti dadduma isu nga inimpluensiaanna ti immuna a tattao, da Adan ken Eva, a makikadua kenkuana nga agrebelde iti Dios. Tapno maaramidna dayta, adda imbagana a kinaulbod ken Eva. (Genesis 3:1-5) Pinagparangna nga adda kano nasayaat a banag nga iyim-imut ni Jehova kenkuana. Kayat ni Satanas a panunoten dagiti tattao a naragragsakda no saanda nga agtulnog iti Dios. Imbagana ti umuna a kinaulbod ken Eva idi imbagana a saan a matay. Gapuna, inawagan ti Biblia ni Satanas kas “ulbod ken . . . ama ti kinaulbod.”—Juan 8:44.
2. Ania ti pinili da Adan ken Eva nga aramiden?
Nakaim-imbag ni Jehova kada Adan ken Eva. Imbagana a mabalinda a kanen ti bunga ti amin a kayo iti hardin ti Eden malaksid iti maysa. (Genesis 2:15-17) Ngem kinnanda latta ti bunga dayta a kayo. “Nangpuros [ni Eva] iti bunga ket kinnanna.” Idi kuan,“nangan met” ni Adan. (Genesis 3:6) Agpadada a nagsukir iti Dios. Gapu ta perpekto da Adan ken Eva, gagangay kadakuada nga aramiden ti husto. Ngem inggagarada a sukiren ti Dios, isu a nagbasolda ken tinallikudanda ti panangiturayna. Nagresulta dayta a desisionda iti nakaro a rigat.—Genesis 3:16-19.
3. Ania ti epektona kadatayo ti desision da Adan ken Eva?
Idi nagbasol da Adan ken Eva, nagbalindan nga imperpekto, ket naipatawidda dayta a kinaimperpekto iti amin nga annakda. Maipapan ken Adan, kuna ti Biblia: “Babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao.”—Roma 5:12.
Agduduma ti rason nga agrigrigattayo. No dadduma, agrigattayo gapu ta saan a husto ti desisiontayo. No dadduma met, gapu iti saan a husto a desision ti sabsabali. Ken no dadduma, agrigattayo gapu ta nairana nga addatayo iti kamali a lugar ken oras.—Basaen ti Eclesiastes 9:11.
AMMUEM TI AD-ADU PAY
Kitaem no apay a saan a ti Dios ti makimbasol iti kinadakes ken panagrigrigat iti lubong ita. Ammuem met no ania ti marikriknana iti panagrigrigattayo.
4. Ti makimbasol iti panagrigrigattayo
Adu ti mamati a konkontrolen ti Dios ti intero a lubong. Agpayso kadi dayta? I-play ti VIDEO.
Basaen ti Santiago 1:13 ken 1 Juan 5:19, sa pagsaritaan daytoy a saludsod:
Basol kadi ti Dios ti panagrigrigat ken kinadakes?
5. Ti resulta ti panangituray ni Satanas
Basaen ti Genesis 3:1-6, sa pagsaritaan dagitoy a saludsod:
Ania a kinaulbod ti imbaga ni Satanas?—Kitaen ti bersikulo 4 ken 5.
Ania ti imbaga ni Satanas tapno mapagparangna nga adda naimbag nga iyim-imut ni Jehova kadagiti tattao?
Sigun ken Satanas, kasapulan kadi dagiti tattao ni Jehova kas Agturay tapno agbalinda a naragsak?
Basaen ti Eclesiastes 8:9, sa pagsaritaan daytoy a saludsod:
Ania ti napasamak idi saanen a ni Jehova ti Agturay iti lubong?
Perpekto idi da Adan ken Eva ken nagyanda iti Paraiso. Ngem dimngegda ken Satanas ket nagrebeldeda ken Jehova
Ti panagrebelde da Adan ken Eva ket nagresulta iti basol, panagrigrigat, ken ipapatay
Pagpatinggaento ni Jehova ti basol, panagrigrigat, ken ipapatay. Perpektonto manen dagiti tattao ken agbiagda iti Paraiso
6. Masaksaktan ni Jehova iti panagrigrigattayo
Awan kadi ti bibiang ti Dios iti panagrigrigattayo? Kitaem ti insurat da Ari David ken apostol Pedro. Basaen ti Salmo 31:7 ken 1 Pedro 5:7, sa pagsaritaan daytoy a saludsod:
Ania ti mariknam a nakaammo a makitkita ken masaksaktan ni Jehova iti panagrigrigattayo?
7. Pagpatinggaento ti Dios ti amin a panagrigrigat dagiti tattao
Basaen ti Isaias 65:17 ken Apocalipsis 21:3, 4, sa pagsaritaan daytoy a saludsod:
Apay a makaparagsak a maammuan nga ikkatento ni Jehova ti epekto ti amin a kinadakes a napadasan dagiti tattao?
Ammom kadi?
Idi imbaga ni Satanas ti umuna a kinaulbod, pinadakesna ni Jehova. Pinerdina ti reputasion ni Jehova kas patas ken naayat nga Agturay. Inton pagpatinggaen ni Jehova ti amin a panagrigrigat iti asidegen a masanguanan, alangonennanto ti bagina, wenno isublinanto ti nasayaat a reputasionna. Kayatna a sawen, paneknekannanto a ti panangiturayna ti talaga a kasayaatan. Ti pannakaalangon ti nagan ni Jehova ti maysa kadagiti kapatgan a banag iti uniberso.—Mateo 6:9, 10.
KUNA TI DADDUMA: “Pannubok ti Dios dagiti dakes a mapaspasarantayo.”
Ania ti makunam?
SUMARIO
Ni Satanas a Diablo ken da Adan ken Eva ti kangrunaan a makimbasol iti kinadakes iti lubong. Masaksaktan unay ni Jehova iti panagrigrigattayo, ket asidegen a pagpatinggaenna dayta.
Rebiu
Ania a kinaulbod ti imbaga ni Satanas a Diablo ken Eva?
Ania ti epektona kadatayo ti panagrebelde da Adan ken Eva?
Kasanotayo nga ammo a masaksaktan ni Jehova iti panagrigrigattayo?
AGDISKOBREKA PAY
Ammuem no ania ti ibagbaga ti Biblia a kaipapanan ti basol.
Agbasaka iti ad-adu pay maipapan iti isyu nga inrugi ni Satanas a Diablo iti hardin ti Eden.
“Apay nga Ipalpalubos ti Dios ti Panagsagaba?” (Ti Pagwanawanan, Enero 1, 2014)
Kitaem ti makaliwliwa a sungbat iti maysa a narigat a saludsod.
“Apay a Napasamak ti Holocaust? Apay a Saan nga Inatipa Dayta ti Dios?” (Artikulo iti website)
Kitaem no ania ti nasursuro ti maysa a lalaki iti panagrigrigat a nakitana iti aglawlawna.