Apocalipsis 21:4—“Punasennanto ti Amin a Lulua Cadagiti Matada”

“Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.”—Apocalipsis 21:4, Baro a Lubong a Patarus.

“Punasennanto ti amin a lulua cadagiti matada; ket awanton ni patay; ket awanto metten ti sasaibbec, wenno sangsangit, wenno rigrigat; ta dagidi immuna a banbanag napalabasdan.”—Apocalipsis 21:4, Ti Biblia.

Kaipapanan ti Apocalipsis 21:4

Ikarkari ti Dios a saanna la nga ikkaten ti ut-ot ken panagrigrigat dagiti tattao ita no di ket uray dagiti pakaigapuan dagita a problema.

“Punasennanto ti amin a lua kadagiti matada.” Ipaganetget dagitoy a sasao ti insurat ni propeta Isaias a kari ni Jehovaa a ‘punasennanto dagiti lua iti amin a rupa.’ (Isaias 25:8; Apocalipsis 7:17) Ipakita daytoy nga ebkas ti nadungngo a pannakaseknan ti Dios kadagiti amin nga agsangsangit gapu ta natayanda iti ipatpateg wenno gapu iti dadduma pay a rason.

“Awanton ni patay.” Daytoy a sasao ket mabalin met a maipatarus kas “mapukawton ni patay” wenno “awanton ti matay.” Ikarkari ti Dios nga ikkatenna ti ipapatay ken ti resultana a panagsagaba. Malaksid iti dayta, agungarto dagiti natay. (1 Corinto 15:21, 22) Isu a “mapukawto” ni patay.—1 Corinto 15:26.

“Awanto metten ti panagladingit wenno panagsangit wenno ut-ot.” Daytoy a kari ti Dios dina kayat a sawen a saanton a pulos makarikna dagiti tattao iti ut-ot wenno sakit, agraman ti pisikal a sakit a mangpakdaar kadatayo no adda peggad wenno potensial a pakadangranan. Imbes ketdi, ipakita dayta a kari nga awanton ti amin a mental, emosional, ken pisikal a sakit wenno ut-ot a resulta ti basolb ken kinaimperpekto.—Roma 8:21, 22.

“Dagiti dati a bambanag ket limmabasen.” Dagitoy a maudi a sasao ipakitana ti nakaskasdaaw a panagbalbaliw a matagiragsakto dagiti tattao. Kuna ti maysa a reperensia: “Ti daan a kasasaad ti panagbiag a pakairamanan ti ipapatay, panagladingit, panagsangit, ken ut-ot a di maliklikan dagiti tattao ket masuktanto iti baro a kasasaad ti biag.” Matagiragsakto dagiti tattao ti biag nga agnanayon ditoy daga iti perpekto a kasasaad kas iti orihinal a panggep ti Dios.—Genesis 1:27, 28.

Konteksto ti Apocalipsis 21:4

Iti rugi ti kapitulo 21, inladawan ni apostol Juan ti nasirmatana: “Nakakitaak iti baro a langit ken baro a daga.” (Apocalipsis 21:1) Nagusar kadagiti piguratibo a sasao a mangiladawan iti naan-anay a panagbalbaliw a naipadto met iti dadduma a teksto ti Biblia. (Isaias 65:17; 66:22; 2 Pedro 3:13) Ti nailangitan a gobierno ti Dios, wenno ti “baro a langit,” suktanna ti amin a gobierno ti tao ken iturayanna ti “baro a daga,” wenno ti baro a kagimongan dagiti tattao nga agbiag ditoy daga.—Isaias 65:21-23.

Ania ti mangipakita a ti tuktukoyen ti sirmata ket biag ditoy daga? Umuna, kastoy ti inkari ti Dios: “Adda iti sangatauan ti tolda ti Dios.” (Apocalipsis 21:3) Isu a naikari daytoy saan a kadagiti anghel idiay langit, no di ket iti sangatauan wenno tattao ditoy daga. Maikadua, desdeskribiren ti sirmata ti maysa a lubong nga “awanton ni patay.” (Apocalipsis 21:4) Awan a pulos ti ipapatay idiay langit, no di ket ditoy laeng daga. (Roma 5:14) Lohikal ngarud a panunoten a ti tuktukoyen daytoy a bersikulo ket ti kasasaadto iti daga iti masanguanan.

Buyaem daytoy ababa a video tapno makitam ti pakabuklan ti libro nga Apocalipsis.