Iwaragawag iti Pudno a Talna ken Talged
1 Ti talna ken talged isudat’ agtaud iti maymaysa laeng a gubuayan, ni Jehova a Dios. Impakaammo kadatayo ni Mikias a ni Jehova ket “masinnunuo nga iyegna ti panangukom kadagiti adu a tattao, ken palintegenna dagiti bambanag kadagiti mannakabalin a nasnasion.” Ti resultana? “Saandanton nga itag-ay ti kampilanda, ti nasion a maibusor iti sabali a nasion, ni saanda metten nga adalen ti pannakigubat iti uray kaano.”—Mik. 4:3.
2 Idinto ta ni Jehova laeng ti gubuayan iti pudno a talna, masapul a dagiti tattao ket “sumang-atda idiay bantay ni Jehova” tapno maisuroda maipapan iti daldalanna ken tapno magnada kadagiti danana. (Mik. 4:2) Maadalda a ni Jehova ket iyegna iti pudno a talna iti daytoy a daga babaen iti Pagarianna. Ngem kasano a matulongantayo pay dagiti ad-adu a tattao a mangadal maipapan iti Gubuayan ti pudno a talna ken talged?
IWARAS DAGITI DAAN A LIBRO
3 Kabayatan ti Enero ken Pebrero masapul nga iwarastayo dagiti daan a publikasion. Amin dagitoy ti naglaon iti naintiempuan nga impormasion kadagidiay agtarigagay a “sumang-at iti bantay ni Jehova.” Maysa a doktor ti nakaawat iti kopia ti Pudno a Talna ken Talged a libro ket inkabilna idiay paglugaran dagiti libro a saanna a binasa a pulos. Saan a nabayag nalagip ti asawana daytoy a libro ket binasana. Nakombinse nga isu daytoy ti kinapudno ket nangrugin a nagadal. Itan isu ken ti asawana ket bautisadodan, ken mangaskasaban dagiti annakda. Ipakita daytoy ti pateg dagiti publikasiontayo a maiyeg kadagiti adu a pagtaengan dagiti tattao agingga iti mabalin.
4 Ti panagsaganatayo a maipaay iti tay-ak ti serbisio ket ramanenna iti panangrepaso kadagiti listaan dagiti linaonna ken dagiti kapitulo ti libro a makaallukoy kadagiti tattao. Mabalintayo a pilien dagiti masinnunuo a puntos manipud iti libro a mabalin a mausar no makisaotayo kadagiti bumalay.
5 Kas ehemplo, ti baro a Topiko a Pagsasaritaan isut’ “Iyegton ti Dios iti Talna.” Amin dagiti publikasion nga itukontayo ti naglaon iti mapagsasaritaan a puntos wenno ilustrasion a mabalin a mausar iti daytoy a suheto. Iti libro a Worldwide Security mabalinyo nga usaren ti ilustrasion idiay pinanid 172 ken 173. Idiay Pudno a Talna a libro mabalinyo nga aramaten iti ilustrasion idiay panid 98. Iti libro a Good News to Make You Happy mabalinyo a dakamaten ti ilustrasion iti panid 157. Ti Kapitulo 12 iti Kinapudno a libro ken Kapitulo 16 iti Happiness a libro naglaonda kadagiti nasayaat a puntos maipapan iti pamay-an ti Dios a mangyeg ti talna. Usarenyo dagitoy iti naimbag a bentahe ken agpositibokayo a mangiparang iti agdama a tukon bayat ti Enero ken Pebrero.
6 Kalpasan a maipakita iti bumalay ti maysa wenno dua a puntos iti libro, mabalinyo a saludsoden kenkuana no kayatna a mausig pay dagiti dadduma a puntos kadagiti sumaganad a parapo. Iti kastoy a wagas, madagdagus a maipasdek ti panagadal iti Biblia kenkuana. Dikay koma agbayag iti daytoy nga okasion, ngem iyurnosyo ti panagsubli iti sabali a tiempo tapno maitultuloy ti diskusion.
7 Aggibusen ti tiempo kadagiti tattao a maipaay iti oportunidad a bumaw-ing iti daydiay pudno a Gubuayan ti talna ken talged. Aramidentayo koma iti kabaelantayo bayat ti Enero ken Pebrero a mangiwaragawag iti mensahe ti talna kadagiti adu a nasingpet ti panagpuspusoda a tattao iti teritoria ti kongregasiontayo.