Ti Katan-okan a Tao a Nagbiag Pay Laeng
1 Idi naawattayo daytoy a baro a libro, naimayengtayo babaen iti titulona, Ti Katan-okan a Tao a Nagbiag Pay Laeng. Tapno maitudo ti maysa a tao a kas katan-okan kaipapananna a ringbawanna amin dagiti binilion a tattao a nagbiag pay laeng. Ti “natan-ok” isut’ nadepinar a kas “superior iti takder wenno kalidad.”
2 Ni Kristo Jesus, nga Anak ti Dios, isut’ naan-anay a mabigbig a kasta. Ti naaramidanna ditoy rabaw iti daga ket awan ti singgalutna iti kinabaknang, sekular a gapuanan, wenno napolitikaan a panagturay. Nagtaud manipud nanumo a nalikudan ken binusbosna iti gistay kapaut ti biagna iti sidong ti relatibo a kinatalimeng. Idi agedad ti 30, nupay kasta, rinugianna nga imparangarang iti personalidad ken panggep ni Jehova a Dios babaen ti wagas a saan pay a napadasan iti tao. Naibanagna ti kadakkelan a panangasaba a trabaho a naaramid pay laeng iti tao, a nagaramid kadagiti nagpaiduma a milagro, ken impasdekna ti pundasion iti baro a lubong a sosiedad.
3 Apay nga Adalen ti Maipapan ken Jesus? Matulongan dagiti bumalay a mangipateg iti libro babaen ti panagkuna: “Adu dagiti tattao ita ti agkuna a mamatida ken Jesus. Ngem kiddawen ti Biblia kadatayo a masapul iti ‘nainget a panangimutektek’ kenkuana. [Heb. 12:2] Ania ti pagarupyo a mabalin a masursuro manipud iti panangadal ti biag ken ministeriona? [Palubosan nga agkomento.] Wen, isut’ papel a modelo ken ehemplo ket nakiddaw kadatayo a ‘suroten a nainget dagiti addangna.’ [Basaen ti 1 Pedro 2:21.] Mano a tattao ti pagarupenyo a sipupudno a mangar-aramid iti daytoy bayat ti inaldaw a panagbiagda? [Palubosan nga agkomento.] Gapuna a saan nga umdas ti panangammo ken Jesus ngem masapul nga itutop iti panagbiagtayo a tumulad kenkuana, agsipud ta isu laeng ti kakaisuna a dalan ti pannakaisalakan. [Juan 14:6.]” Kalpasanna itukontayo ti libro, a mausar dagiti sumaruno a singasing.
4 Dagiti Nalatak a Benneg: No itukon ti libro, mabalin nga isaludsod: “Ania ti nangaramid ken Jesus a katan-okan a tao?” Mabalinyo a sungbatan dayta babaen ti panangitudo iti sumagmamano kadagiti 133 a kapitulo a nangipamaysa iti biagna, ti personalidadna, iti sursurona, ken dagiti aramidna. Ilawlawag ti Kapitulo 24 iti panggepna nga immayan ditoy daga. Ti Kapitulo 35 irepasona daydiay agdindinamag a Sermonna idiay Bantay. Ibinsabinsa met iti Kapitulo 43 ti nagpaiduma nga abilidadna a mangisuro iti sabsabali babaen ti ilustrasion. Mangted ti Kapitulo 133 iti pangripiripan kadagiti bendision a sagrapen ti sangatauan inton makompletona iti trabahona. Masarakanyo a makatulong dagiti saludsod idiay ngudo ti kada kapitulo a pangparayray iti diskusion. Mabalinyo nga itudo dagiti makapataliaw nga ilustrasion a mangipasimudaag ti puersa iti personalidad ni Jesus, ti napasnekan nga asina iti dadduma, ken ti awan sarday a regtana a mangasaba.—Kitaenyo kadagiti kapitulo 44, 95, 117, ken 123.
5 Itukontayo daytoy a libro bayat iti Hunio. Addaantayo ti rason a mangitukon iti daytoy kadagiti dadduma a buyogen ti kinarayray. Tunggal maysa nga agtarigagay iti biag nga agnanayon ti masapul a mangala iti pannakaammo maipapan ken Kristo Jesus. (Juan 17:3) Ti regtatayo a mangiwaras iti daytoy a libro ti mamagbalin iti biag dagiti adu a sinsero a tattao a masagid babaen ti katan-okan a tao a nagbiag pay laeng.