Agaramidkayo iti Epektibo a Panagsarungkar
1 Ti panagsarungkar isut’ maysa a nasken a paset iti serbisiotayo kas “katrabahador ti Dios.” (1 Cor. 3:6-9) Ti naimbag a panagsagana iti biangtayo isut’ mangisarming ti personal nga interes iti daydiay maysa a sarungkaran bayat a pagsaritaan ti maysa a makaay-ayo a suheto iti Biblia.
2 Masapul a nabatadkayo; nainsiriban dagiti saludsodyo.
Manipud iti notayo idi damo a sarungkaryo, mabalinyo nga isaludsod:
◼ “Mariknayo kadi a ti kararagyo nga umay iti Pagarian ti Dios ket mas adda kaipapananna manipud iti daydi diskusiontayo ti Biblia idi napan a lawas?”
Ti naingayyeman nga ebkas iti langa ken tonada ti timek ket agdadanggayda a mangidemostra iti napudno nga interestayo no maiyimtuod dagiti kakasta a saludsod.
3 Dikay Agdardaras; Timudenyo no Ania ti Kunaen iti Bumalay. No dumngegtayo iti sawen ti bumalay ken seriosotayo nga agpanunot sakbay a sumungbattayo, ti napudno nga interes kenkuana isut’ agminar. Maibatay iti daydiay sawenna, maitukon ti Nainkasuratan a kapanunotan a maisinggalut iti daydi damo a bisita. Nakasaganakayo koma a mangisuro iti bumalay ti maysa a banag iti kada sarungkar. No tumanor iti di mapakadaan a suheto, usaren ti gundaway a mangiruar iti libroyo a Panakirinnason tapno saraken sadiay ti kasapulan nga impormasion.
4 No ipaimayo iti Mayo 1, 1992, a “Pagwanawanan,” mabalinyo a kunaen:
◼ “Idi napalabas, napagsaritaantayo maipapan iti tawen 1914. Manipud idi adu a panagbalbaliw ti naaramid kadagiti gobierno. Ngem dagitoy kadi a panagbalbaliw ket pinennekna iti kasapulan dagiti tattao, ken naigaranteyada aya iti talna? [Palubosan nga agkomento.] Timudenyo no kasano nga insuro ni Jesus kadagiti pasurotna nga ikararagda iti maysa a gobierno a makasolbar kadagiti dadakkel a problema a sangsanguentayo ita. [Basaen ti Mateo 6:9, 10.] Ania ti pagarupyo a maitungpal iti Pagarian ti Dios? [Palubosan nga agkomento.] Ti salaysay iti Biblia ket makapainteres unay.” Kalpasanna basaen iti Daniel 2:44. Mabalin a kayatyo nga usaren daydiay ilustrasion iti pinanid 12 ken 13 ti Agbiag nga Agnanayon a libro a mangipakita iti kita ti kasasaad a manamnama idiay sidong iti Pagarian ti Dios.
5 No ipaimayo iti Mayo 8, 1992, nga “Agriingkayo!,” mabalinyo met a kunaen:
◼ “Idi simmarungkarak iti napalabas a tiempo, napagsaritaantayo maipapan kadagiti tattao a nagtalaw manipud pagilianda tapno maliklikanda ti panagsagaba ken pannakairurumenda. Pagarupenyo aya a ti Dios ket maseknan iti sagsagabaen ti tao manipud iti padada a tao?” Agpannuray iti sungbat, mabalin a mairanud iti daydiay tao ti Eclesiastes 4:1 wenno Salmo 72:12-14. Kalpasanna maiturong idiay panid 15 ti “Adtoy!” a broshur ken basaen wenno sumariaen dagiti tallo a parapo iti dayta a panid, a maiyimtuod dagiti saludsod ti kada parapo.
6 Agtultuloytayo koma a mangidemostra ti personal nga interes ken adda iti panunot dagiti makaallukoy a suheto ti Biblia a mapagsaritaan tapno naballigi iti panagsarungkartayo.