Iparegta ti Panangragpat Kadagiti Espiritual a Kalat
1 Awan pay idi iti kastoy ti kaaduna nga agtutubo a tattao a makipaspaset iti panangikasaba ti naimbag a damag iti Pagarian! Pinullo a ribo ti nangabrasa iti balakad ti Eclesiastes 12:1: “Laglagipem, itan, ti Naindaklan a Namarsuam iti al-aldaw ti kinaagtutubom.” Ania ti nangtignay kadagitoy nga agtutubo a makiraman iti ministerio, ken apay a nagadu kadakuada ti makiraman iti payunir a serbisio?
2 Awan duadua nga adu dagiti tumulad iti kondukta ni nagpaiduma nga agtutubo a Timoteo. Ti nanang ken apongna a baket iti nangted kenkuana ti espiritual nga edukasion manipud kinamaladagana ken pinaregtada a mangragpat kadagiti espiritual a kalat. (2 Tim. 3:14, 15) Iti kasta, idi a limtuad ti oportunidad a mangparang-ay iti pribilehio ti serbisio, isut’ nakasagana ken kualipikado.—Ara. 16:1-3.
3 Kasano nga ad-adu pay nga agtutubo ti maparegta a mangragpat kadagiti espiritual a kalat? Kasano a mapabileg dagiti nagannak iti annakda a mangipateg ti kinapudno ken matulonganda ida a mangitaning iti kalatda?
4 Iwayatyo iti Nainkasuratan a Pundasion: Masapul a tinungen dagiti nagannak a ti isuroda kadagiti annakda ket nagtaud ken Jehova tapno daytoy iti mangaramid kadagiti annakda a “masirib a maipaay ti pannakaisalakan.” (2 Tim. 3:15) Ikagumaan a sireregta a kultibaren ti napasnek nga ayatda iti Sao ti Dios. Kasapulanna daytoy iti regular, nabagas a panagadal ti Biblia, agraman iti kanayon nga itatabuno ti gimong. Masapul met dagiti agtutubo ti bukodda a programa iti panagadal ken sukogenda ti bukodda a relasion ken Jehova.—1 Tes. 5:21; Heb. 11:1.
5 Lalo pay a sidadaan dagiti Kristiano nga agtutubo a mangragpat iti espiritual nga interes no dagiti nagannakda ken sabsabali a nataengan iti kongregasion ket mangituyangda ti naimbag nga ehemplo ken iraniagda “iti rag-o ni Jehova.” (Neh. 8:10) Iti kastoy a wagas, amintayo ti makaidemostra iti agtutubo a dagiti kasapulan ti pudno a Kinakristiano ket saanda a makapadagsen.—1 Juan 5:3.
6 Adu dagiti agtutubo ti naimpluensiaan unay dagiti payunir, misionero, ken managdaliasat a manangaywan a nakikuyog kadakuada iti tay-ak ti serbisio wenno naparegta babaen kadakuada. Makatulong dagiti nagannak babaen ti panangawisda kadagiti mapagulidanan nga amin a tiempo a trabahador idiay pagtaenganda a mangaldaw wenno maipaay iti Kristiano a panagkakadua. Impaay ni Kristo Jesus ti kasayaatan nga ehemplo iti natimbang a pannangted ti asikaso kadagiti agtutubo.—Mar. 10:13-16.
7 Panangiwayat Kadagiti Kalat: Babaen ti umiso a naamaan ken nainaan a panangidalan, makaituyang dagiti annak iti nasapa a bukodda a kalat ti biag. Apaman a dagiti agtutubo ket naikeddengda iti espiritual a kalat a kayatda a ragpaten, mabalin a payunir a serbisio, Bethel wenno misionero a serbisio, dagiti nagannak ken dadduma a nataengan ti makaparegta kadakuada a mangragpat iti kalatda, a mangtedda ti praktikal a singasing a mangpagagar kadakuada kadagita.
8 Ti kada kongregasion ket umasping iti maysa a pamilia. Gapuna a tunggal maysa kadatayo ti masapul nga interesado a tumulong kadagiti agtutubo nga agtultuloy a magna iti kinapudno ken umabante ti espiritual.