Makiramankayo Aya ti Impormal a Panangasaba iti Daytoy a Bulan?
1 Ti regular a rikos iti biagtayo ket ramanenna iti masinnunuo a periodo a makisao kadagiti tattao maipapan ken Jehova. Mangitudingtayo iti tiempo a mangasaba a pormal wenno nairanta iti balaybalay, agsarungkar, ken mangidaulo iti panagadal ti Biblia. Adu pay dagiti sabsabali a babassit a pormal nga okasion a makasao dagiti tattao maipapan ti kinapudno. Makuna daytoy a panangasaba a kas impormal a pammaneknek.
2 Masarakan dagiti dadduma nga agibumbunannag ti adu nga oportunidad a makiraman iti daytoy a porma ti ministerio. Maikagumaantayo amin ti agridam kadagitoy nga okasion bayat nga agbiahetayo, mapan iti pagadalan ken trabaho, ken sumarungkar kadagiti kabagian. Gundawayanyo aya dagitoy nga oportunidad iti daytoy a bulan?
3 Agaramidkayo iti Nasakbay a Plano: Ti panagsagana ken nasakbay a panagpanunot isut’ makabael kadatayo a mangsaksi ti impormal iti epektibo a wagas. Siguruenyo ti mangitugot kadagiti publikasion. Mainayon iti Ti Pagwanawanan ken Agriingkayo!, aduantayo ti tract a naglaon iti makatukay ti panunot a titulo a mangpainteres. Adda dagiti broshur a makaallukoy kadagiti tattao iti nagduduma a nalikudan ken relihion. Addaantayo met kadagiti maibulsa a libro a nangkobre kadagiti suheto dagiti agdama a paginteresan. Ania dagiti publikasion a magustuanyo nga itukon? Panunotenyo daytoy a kas pamilia. Kalpasanna sanayenyo no ania iti sawenyo ti kada tumaud a maitutop nga okasion.
4 Bayat ti Panagbiahe: Maysa nga ekselente a tiempo a mangasaba ti impormal isut’ bayat iti panagbiahe a mapan ti trabaho wenno pagadalan. Mangitugotkayo ti Biblia ken iti maysa a publikasion a nadakamat ditoy ngato. Ti panagbasa kadagita a publikasion iti transportasion ti publiko isut’ masansan a mangpasged iti saritaan. Mangitugotkayo iti bassit nga abasto a tract a maited kadagiti interesado a tattao.
5 Idiay Trabaho ken Pagadalan: Masarakantayo met dagiti okasion a mangasaba nga impormal idiay trabaho ken pagadalan bayat iti tiempo a panaginana. Ti basta kaadda ti libro wenno tract idiay rabaw iti lamisaanyo ti masansan a mangpataliaw ken manglukat iti ruangan ti panagsasarita. Nangruna a pudno daytoy iti Creation a libro gapu kadagiti adu nga ilustrasion ken nasayaat a panagrasonna. Sigurado nga adda pagimbaganna no mangawittayo ti maysa iti daytoy a bulan. Mabalin a mangiturong daytoy kadakayo iti pannangted ti naimbag a pammaneknek.
6 Ditay koma palabsen dagiti adu nga oportunidad a masapul koma a mangtedtayo ti impormal a panangsaksi iti kada aldaw. Daytoy a metodo ti panangasaba ket nabunga, ken dagiti adipen ni Jehova ti masapul a makiraman iti daytoy. Kas idi ken Jesus, ti koma ayattayo iti kapada a tao ti mangtignay kadatayo nga agsao iti kada maitutop nga okasion!—Mat. 5:14-16.