Ag-Auxiliary Payunirkayo Kadi iti Nobiembre ken Disiembre?
1 Inrugi ni Jesus iti kasta ti kapategna a trabaho nga iti masanguanan ti amin a sangatauan ket agpannuray iti dayta. (Mat. 4:17) Daytoy a trabaho ti agngudo sakbay unay “iti panungpalan,” inton ti damag iti Pagarian ket “maikaskasaba iti amin a mapagnaedan a daga a kas pammaneknek iti amin a nasion.”—Mat. 24:14.
2 Idinto ta asidegtayon iti panungpalan, daytoy a trabaho ti naganat unay ngem iti napalabas. Agsipud ta agngangabit iti biag, ti panagtaktak ket serioso iti pagbanaganna. Ti auxiliary payunir nga urnos isut’ namaregta iti adu a mas aktibo a nangaramid iti naganat a trabaho. Maka-auxiliary payunirkayo kadi iti Nobiembre ken Disiembre?
3 Nasayaat a Bulbulan iti Panagpayunir: Idinto ta ti Nobiembre ket masansan a nasayaat iti panniempona kalpasan ti matutudo, naimbag a tiempo a panunoten iti panagpayunir. Iti daytoy met a tawen, ti Nobiembre ket addaan iti lima a Domingo, a tumulong kadagidiay agtartrabaho iti ngalay ti lawas. Adu ti makapaneknek a maka-auxiliary payunirda met iti Disiembre, idinto ta iti daytoy a tawen ket saan a mangrugi dagiti kombension agingga ti maikapat a lawas iti bulan. Kasta met nga adu dagiti agtutubo ti agbakasion manipud iti pagadalan bayat ti Disiembre.
4 Kadagiti napalabas a dua a tawen nakapromediotayo ti 5,000 nga auxiliary payunir iti kada bulan ditoy Pilipinas, a daytoy ket nagsayaat unay. Nupay kasta, idi napan a Nobiembre adda laeng 2,658 nga auxiliary payunir, ket idi Disiembre adda met laeng 2,068. Gapuna a kayatmi a paregtaen dagiti amin a mangusig iti kasasaadda tapno makapagpayunirda. Apay a dikay makisao kadagidiay a nadutokanen tapno mangalakayo iti singasing kadakuada?
5 Apay a Palawaen iti Ministeriotayo? Wen, apay a dagiti Saksi ni Jehova ket palawaenda ti ministerioda imbes a sapulenda iti material a bentaha? Agsipud ta kayatda nga idayaw ni Jehova ken ibaga kadagiti dadduma maipapan ti panggepna. Ammoda a “ti lubong ket aglabas, . . . ngem daydiay agaramid iti pagayatan ti Dios ket agtalinaed iti agnanayon.” (1 Juan 2:17) Kasta met nga agtigtignayda a maitunos iti kararagda a ti Apo iti anien ket “ibaonna dagiti trabahador iti paganianna.” (Mat. 9:37, 38) Sapay koma ta bendisionan ni Jehova dagiti planoyo a mangpalawa iti bukodyo a paset ti ministerio bayat iti Nobiembre ken Disiembre.