Tulongan Dagiti Sabsabali a Mangadal Maipapan iti Anak ti Dios, ni Kristo Jesus
1 Bayat daytoy a tiempo ti tawen adu dagiti makuna a Kristiano iti mangted ti ad-adu a panunot ken Jesus ngem iti dadduma a panawen. Ngarud, nasayaat a tiempo a dakamaten ti libro a Ti Katan-okan a Tao a Nagbiag Pay Laeng. Kasanotayo a maiyammo daytoy a libro iti agkurri a wagas bayat ti Enero?
2 Padasenyo nga iturong iti naibatay ti Biblia a saritaan a maipamaysa ken Jesus.
Kalpasan a makablaawan ti bumalay, mabalinyo a kunaen iti kaasping daytoy:
◼ “Salsaludsodenmi ita kadagiti kaarubatayo no ania ti makunada no mabasada iti Biblia maipapan ti biag nga agnanayon. [Palubosan a sumungbat.] Makapainteres unay agsipud ta nadakamat dayta ti Biblia iti 40 a daras. Ania ti kaipapanan dayta a biag kadatayo? Siputanyo ti makuna iti Apocalipsis 21:4. [Mabasa.] Nadlawyo kadi no ania ti naikari? [Palubosan a sumungbat.] Kasanotayo a magun-od iti agnanayon a biag?” Basaen ti Juan 17:3, ket mailawlawag iti kasapulan a panangammo iti Dios ken ti Anakna, ni Kristo Jesus. Maitukon ti Katan-okan a Tao a libro, a mausar dagiti subtema idiay introduksion tapno maallukoy pay ti interesna.
3 No pagkedkedan ti bumalay iti libro, maitukon dagiti agdinama a Ti Pagwanawanan ken Agriingkayo! wenno ti tract a Daytoy Kadi a Lubong Makalasatto? Iyawis ti asikasona iti maysa wenno dua a puntos iti publikasion a naiparang. Itukon ti panagsubli iti nawaya a tiempo tapno maitultuloy ti diskusion.
4 No agparang a kupado ti bumalay, nainsiriban no mapaababa iti panangiparang a nasao ditoy ngato. Dagiti agdadamo nga agibumbunannag ti nalabit a makasarak a nalakada nga usaren daytoy sumaruno a panangiparang.
Kalpasan a maiyammo ti bagitayo, mabalintayo a kunaen:
◼ “Salsaludsodenmi ita kadagiti kaarubatayo no ania ti makunada no mabasada iti Biblia maipapan ti pananggun-od iti agnanayon a biag. Kas pangarigan, iti Juan 17:3 nakuna ni Jesus: [Mabasa.] Tapno matulongan dagiti tattao a mangadal ti ad-adu maipapan ken Kristo Jesus ken no ania iti insurona, daytoy a libro ti nairanta a naipablaak.” Ukagen ti libro kadagiti dadduma a napipintas nga ilustrasion. Iturong idiay introduksion, ket basaen ti maikadua a parapo iti baba ti subtema a “Magunggonaan Babaen ti Panangammo Kenkuana.” No interesado ti bumalay, maitukon iti publikasion.
5 No itukonyo dagiti daan a publikasion kas naiwardas idiay Dagiti Pakaammo iti dadduma a pagsasao, maisingasing nga usarenyo dagiti panangiparang ken kasuratan ditoy ngato, a madakamat dagiti tumutop a kapitulo ti libro nga itukonyo iti pagsasaoyo. Aniaman a publikasion ti itukonyo, kanayon a naalibtakkayo a mangirubbuat iti panagadal ti Biblia iti umuna a dupag wenno inton agsarungkarkayo.
6 Iti Enero, ipamaysa ti asikasotayo iti Anak ti Dios, ni Kristo Jesus, tapno matulongan dagiti dadduma nga agturong iti dalan ti biag.—Mat. 7:14.